أَذْلِيسْ إِقدّْسنْ أَمزْوَارُو ١١

١١

صُّومْعثْ ن بَابِيلْ

١ ثُوغَا مَارَّا ثَامُّورْثْ س يِيڒسْ ذ إِجّنْ ؤُ س ڒْْهَارْذْ ذ إِجّنْ. ٢ إِمْسَارْ ڒَْامِي فسْينْ إِقِيضَانْ نْسنْ ؤُشَا فّْغنْ-د زِي شَّارْقْ، ؤُفِينْ إِجّْ ن ڒوْضَا ذِي ثمُّورْثْ ن شِينْعَارْ، ؤُشَا قِّيمنْ زدّْغنْ ذِينِّي. ◘ ٣ نِيثْنِي نَّانْ، كُوڒْ إِجّْ إِ ونّغْنِي: ”أَرَاحمْ-د، أَذْ نڭّْ إِژْرَا زِي ثْڒَاخْثْ، أَذْ ثنْ نسّحْمَا!“ أَمُّو إِ ذ أَسنْ ثذْوڒْ ثْڒَاخْثْ ذ أَژْرُو ؤُ أَشَارْمُوضْ إِذْوڒْ غَارْسنْ ذ ثَارِّيسْثْ. ٤ خَاسْ ؤُشَا نَّانْ: ”زِيذْ، أَذْ نبْنَا إِشْثْ ن ثنْذِينْثْ ذ إِشْثْ ن صُّومْعثْ، ثَاقِيشَّاثْ نّسْ أَذْ د-ثَاوضْ غَارْ ؤُجنَّا، ؤُ جّمْ أَنغْ أَذْ نڭّْ إِجّْ ن يِيسمْ إِ نشِّينْ، حِيمَا وَارْ نتّمْسبْضِي شَا خْ وُوذمْ ن مَارَّا ثَامُّورْثْ.“ ◘

٥ خنِّي إِهْوَا-د سِيذِي، حِيمَا أَذْ إِژَارْ ثَانْذِينْثْ ذ صُّومْعثْ نِّي بْنَانْ ثَارْوَا ن بْنَاذمْ. ٦ إِنَّا سِيذِي: ”خْزَارْ، أَقَا أَثنْ ذ ڒْْڭنْسْ ذ إِجّنْ ؤُ مَارَّا إِنَا غَارْسنْ إِجّْ ن يِيڒسْ. وَا ذ بدُّو ن مِينْ غَا ڭّنْ. ڒخُّو وَارْ ذِينْ مِينْ ثنْ إِ غَا إِسّْبدّنْ خْ وبْرِيذْ نْسنْ نِّي نْوَانْ أَذْ ڭّنْ. ٧ أَرَاحمْ-د، أَذْ نهْوَا ؤُشَا أَذْ نسّْخَارْوضْ إِڒسْ نْسنْ، حِيمَا كُوڒْ إِجّنْ وَارْ إِفهّمْ عَاذْ إِڒسْ ن ونِّي ث يُوذْسنْ.“ ٨ أَمُّو إِ ثنْ إِزُّوزَارْ سِيذِي سّنِّي خْ وُوذمْ ن مَارَّا ثَامُّورْثْ ؤُشَا سّْبدّنْ ڒبْنِي ن ثنْذِينْثْ. ◘ ٩ خْ ؤُيَا إِ ذ أَسْ ڒَْاغَانْ إِ ثنْذِينْثْ نِّي س يِيسمْ ن ’بَابِيلْ‘، مِينْزِي ذِينْ إِسّْخَارْوضْ سِيذِي إِڒسْ ن مَارَّا ثَامُّورْثْ ؤُ سّنِّي إِ ثنْ إِزُّوزَارْ سِيذِي خْ وُوذمْ ن مَارَّا ثَامُّورْثْ.

إِنَا ذ إِمزْرُوينْ ن يِينِّي د-إِتّْوَاخڒْقنْ زِي شَامْ. ◼

ثَارْوَا ن شَامْ

١٠ ؤُمِي ثُوغَا غَارْ شَامْ مْيَا ن إِسڭّْوُوسَا، إِجَّا-د أَرْفَاكْشَاذْ، ثْنَاينْ ن إِسڭّْوُوسَا أَوَارْنِي إِ سّحْڒثْ. ◼ ◘ ١١ أَوَارْنِي ڒَْامِي د-إِجَّا أَرْفَاكْشَاذْ، إِدَّارْ شَامْ عَاذْ خمْسَا-مْيَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ. ◼

١٢ إِدَّارْ أَرْفَاكْشَاذْ خمْسَا ؤُ-ثْڒَاثِينْ ن إِسڭّْوُوسَا، خنِّي إِجَّا-د شَالَاحْ. ◼ ١٣ أَوَارْنِي ڒَْامِي د-إِجَّا أَرْفَاكْشَاذْ شَالَاحْ، إِدَّارْ عَاذْ أَربْعَا-مْيَا ؤُ-ثْڒَاثَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

١٤ إِدَّارْ شَالَاحْ ثْڒَاثِينْ ن إِسڭّْوُوسَا، خنِّي إِجَّا-د عَابِيرْ. ◼ ١٥ أَوَارْنِي ڒَْامِي د-إِجَّا شَالَاحْ عَابِيرْ، إِدَّارْ عَاذْ أَربْعَا-مْيَا ؤُ-ثْڒَاثَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

١٦ إِدَّارْ عَابِيرْ أَربْعَا ؤُ-ثْڒَاثِينْ ن إِسڭّْوُوسَا، خنِّي إِجَّا-د فَالَاجْ. ◼ ١٧ أَوَارْنِي ڒَْامِي د-إِجَّا فَالَاجْ، إِدَّارْ عَابِيرْ عَاذْ أَربْعَا-مْيَا ؤُ-ثْڒَاثِينْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

١٨ إِدَّارْ فَالَاجْ ثْڒَاثِينْ ن إِسڭّْوُوسَا، خنِّي إِجَّا-د رَاعُووْ. ◼ ◘ ١٩ أَوَارْنِي ڒَْامِي د-إِجَّا رَاعُووْ، إِدَّارْ فَالَاجْ عَاذْ مِيثَاينْ ؤُ-ثسْعَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

٢٠ إِدَّارْ رَاعُووْ ثْنَاينْ ؤُ-ثْڒَاثِينْ ن إِسڭّْوُوسَا، خنِّي إِجَّا-د سَارُوجْ.◼ ٢١ أَوَارْنِي ڒَْامِي د-إِجَّا سَارُوجْ، إِدَّارْ رَاعُووْ عَاذْ مِيثَاينْ ؤُ-سبْعَا ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

٢٢ إِدَّارْ سَارُوجْ ثْڒَاثِينْ ن إِسڭّْوُوسَا، خنِّي إِجَّا-د نَاحُورْ.◼ ٢٣ أَوَارْنِي ڒَْامِي د-إِجَّا نَاحُورْ، إِدَّارْ سَارُوجْ عَاذْ مِيثَاينْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

٢٤ إِدَّارْ نَاحُورْ ثسْعَا ؤُ-عِيشْرِينْ ن إِسڭّْوُوسَا، خنِّي إِجَّا-د ثَارَاحْ.◼ ٢٥ أَوَارْنِي ڒَْامِي د-إِجَّا نَاحُورْ ثَارَاحْ، إِدَّارْ عَاذْ مْيَا ؤُ-ثسْعَاطَاشْ ن إِسڭّْوُوسَا، ؤُشَا إِجَّا-د إِحنْجِيرنْ ذ ثْحنْجِيرِينْ.

٢٦ إِدَّارْ ثَارَاحْ سبْعِينْ ن إِسڭّْوُوسَا، خنِّي إِجَّا-د أَبْرَامْ، نَاحُورْ ذ هَارَانْ.

إِنَا ذ إِمزْرُوينْ ن يِينِّي د-إِتّْوَاخڒْقنْ زِي ثَارَاحْ. ◼

٢٧ ثَارَاحْ إِجَّا-د أَبْرَامْ، نَاحُورْ ذ هَارَانْ، ؤُ هَارَانْ إِجَّا-د لُوطْ. ◘ ٢٨ إِمُّوثْ هَارَانْ زَّاثْ إِ بَابَاسْ ثَارَاحْ ذِي ثمُّورْثْ مَانِي د-إِخْڒقْ نتَّا، ذِي ؤُرْ ن إِكَالْذَانِييّنْ. ٢٩ ؤُشَا كْسِينْ أَبْرَامْ ذ نَاحُورْ إِ يِيخفْ نْسنْ ثِيمْغَارِينْ. إِسمْ ن ثمْغَارْثْ ن أَبْرَامْ ثُوغَا-ث ذ سَارَايْ ؤُ إِسمْ ن ثمْغَارْثْ ن نَاحُورْ ذ مِيلْكَا، يدْجِيسْ ن هَارَانْ، بَابَاسْ ن مِيلْكَا ذ يِيسْكَا. ◘ ٣٠ سَارَايْ ثُوغَا-ت وَارْ د-ثتِّيرُووْ، ثُوغَا وَارْ غَارسْ بُو ؤُحنْجِيرْ. ◘ ٣١ ؤُشَا إِكْسِي ثَارَاحْ أَبْرَامْ، مِّيسْ، ذ لُوطْ مِّيسْ ن هَارَانْ، مِّيسْ ن مِّيسْ، ذ سَارَايْ، ثَاسْڒِيثْ نّسْ، ثَامْغَارْثْ ن مِّيسْ أَبْرَامْ، ؤُشَا نِيثْنِي فّْغنْ جْمِيعْ زِي ؤُرْ ن إِكَالْذَانِييّنْ، حِيمَا أَذْ رَاحنْ غَارْ ثمُّورْثْ ن كنْعَانْ. إِوْضنْ غَارْ حَارَانْ ؤُشَا زدّْغنْ ذِينِّي. ◼ ◘ ٣٢ ؤُمِي ثڭَّا ثَارَاحْ مِيثَاينْ ؤُ-خمْسَا ن إِسڭّْوُوسَا، إِمُّوثْ ثَارَاحْ ذِي حَارَانْ.

◘١١:٢ 11:‏2 أَمز. 10‏:‏10.

◘١١:٤ 11:‏4 أَعَوذ. 1‏:‏28

◘١١:٨ 11:‏8 أَعَوذ. 32‏:‏8؛ ڒخ. 17‏:‏26.

◼١١:٩ 11:‏9 ’بَابِيلْ‘ - إِسمْ-أَ وَانِيثَا إِخْسْ أَذْ يِينِي ’أَخَارْوضْ‘ نِيغْ ’أَربِّي إِسّْخَارْوَاضْ‘.

◼١١:١٠ 11:‏10 أَفسَّارْ - ذڭْ وذْلِيسْ أَمزْوَارُو 5:32 نقَّارْ أَقَا شَامْ إِتّْوَاخڒْقذْ-د أَوَارْنِي ڒَْامِي ثُوغَا نُوحْ غَارسْ 500 ن إِسڭّْوُوسَا. ذڭْ ؤُسڭّْوَاسْ وِيسّْ ستَّا مْيَا ن ثُوذَارْثْ ن نُوحْ ثبْذَا سّحْرثْ (أَمز. 7:11). ثُوغَا ثُوسَا-د سّحْڒثْ إِجّْ ن ؤُسڭّْوَاسْ خْ ثمُّورْثْ. أَكْ-ذ إِنغْمِيسنْ إِ نُوفَا ذڭْ وَاوَاڒنْ ن أَيَا-يَا نسّنْ أَقَا نُوحْ ثُوغَا غَارسْ 502 ن إِسڭّْوُوسَا ڒَْامِي د-إِتّْوَاخڒْقْ شَامْ. ’شَامْ‘ - إِسمْ-أَ وَانِيثَا إِخْسْ أَذْ يِينِي ’إِسمْ‘.

◘١١:١٠ 11:‏10 [1 إِم. 1‏:‏1‏-‏27] — أَمز. 10‏:‏22‏-‏31؛ 1 إِم. 1‏:‏17.

◼١١:١١ 11:‏11 أَفسَّارْ - أَقَا شَامْ إِذْوڒْ غَارسْ 600 ن إِسڭّْوُوسَا. س ؤُينِّي ثُوغَا عَاذْ إِدَّارْ ڒَْامِي ثُوغَا إِبْرَاهِيمْ غَارسْ 50 ن إِسڭّْوُوسَا.

◼١١:١٢ 11:‏12 ’شَالَاحْ‘ - إِسمْ وَانِيثَا إِخْسْ أَذْ يِينِي ’ڒسْنَاحْ‘ نِيغْ ’أَرَّاوْ‘.

◼١١:١٤ 11:‏14 ’عَابِيرْ‘ - إِسمْ وَانِيثَا إِخْسْ أَذْ يِينِي ’ثَامُّورْثْ ن ؤُجمَّاضْ‘.

◼١١:١٦ 11:‏16 ’فَالَاجْ‘ - إِسمْ وَانِيثَا إِخْسْ أَذْ يِينِي ’أَبطُّو‘ نِيغْ ’أَفدْجقْ‘.

◼١١:١٨ 11:‏18 ’رَاعُووْ‘ - إِسمْ وَانِيثَا إِخْسْ أَذْ يِينِي ’أَمدُّوكّڒْ‘.

◘١١:١٨ 11:‏18 1 إِم. 1‏:‏25

◼١١:٢٠ 11:‏20 ’سَارُوجْ‘ - إِسمْ وَانِيثَا إِخْسْ أَذْ يِينِي ’ثَاسطَّا‘ نِيغْ ’ڒْْفَارْعْ‘.

◼١١:٢٢ 11:‏22 ’نَاحُورْ‘ - إِسمْ وَانِيثَا إِخْسْ أَذْ يِينِي ’أَنفّحْ يُودْجْغنْ‘.

◼١١:٢٤ 11:‏24 ’ثَارَاحْ‘ - إِسمْ وَانِيثَا إِخْسْ أَذْ يِينِي ’أَمْشَانْ ن وَاريّحْ‘.

◼١١:٢٦ 11:‏26 ’أَبْرَامْ‘ - إِسمْ-أَ وَانِيثَا إِخْسْ أَذْ يِينِي ’ثَابَابَاثْ إِعُودْجنْ‘ نِيغْ ’بَابَاسْ ن أَرَامْ‘.

◘١١:٢٧ 11:‏27 ياش. 24‏:‏2؛ 1 إِم. 1‏:‏26.

◘١١:٢٩ 11:‏29 أَمز. 22‏:‏12؛ 22‏:‏20.

◘١١:٣٠ 11:‏30 أَمز. 16‏:‏1، 2؛ 18‏:‏11، 12.

◼١١:٣١ 11:‏31 ’إِكَالْذَانِييّنْ‘ - إِكَالْذَانِييّنْ ثُوغَا زدّْغنْ ذِي جّْوَايهْ ن ؤُرْ، إِشْثْ ن ثنْذِينْثْ ذِي ثْڭلْذِيثْ ن مِيسُوپُوثَامِييَا. ذڭْ وُوسَّانْ-أَ نسّنْ بلِّي جّْوَايهْ ن مِيسُوپُوثَامِييَا أَقَا-ثنْثْ ذ شَّامَالْ ن لْعِيرَاقْ. أَڒْ إِ ڒخُّو أَطَّاسْ ن إِوْذَانْ ذِي شَّامَالْ ن لْعِيرَاقْ سَّاوَاڒنْ س ثُوثْلَايْثْ ن ثْكَالْذَانِيثْ.

◘١١:٣١ 11:‏31 ياش. 24‏:‏2؛ نَاح. 9‏:‏7؛ ڒخ. 7‏:‏4.