1 ذڭْ وُوسَّانْ ن أَمْرَافِيلْ، أَجدْجِيذْ ن شِينْعَارْ، ذ أَرِييُوشْ، أَجدْجِيذْ ن إِلَّاسَارْ، ذ كِيذُورْلَاعُومرْ، أَجدْجِيذْ ن عِيلَامْ، ذ ثِيذَالْ، أَجدْجِيذْ ن ڒڭْنُوسْ، إِمْسَارْ بلِّي 2 إِنَا ڭِّينْ ڒْبَارُوضْ أَكْ-ذ بِيرَا، أَجدْجِيذْ ن سَاذُومْ ؤُ أَكْ-ذ بِيرْشَاعْ، أَجدْجِيذْ ن عَامُورَّا، ؤُ أَكْ-ذ شِينَابْ، أَجدْجِيذْ ن أَذْمَا، ؤُ أَكْ-ذ شِيمْ‘إِبَارْ، أَجدْجِيذْ ن صابُويِيمْ، ؤُ أَكْ-ذ ؤُجدْجِيذْ ن بِيلَاعْ، ونِّي إِدْجَانْ ذ صُوغَارْ. 3 مَارَّا إِنَا مُوننْ ذِي ڒوْضَا ن ثغْزُورْثْ ن سِيذِّيمْ، أَقَا ذ ڒبْحَارْ أَمدْجَاحْ. ◼14:‏3 ’ڒبْحَارْ أَمدْجَاحْ‘ - نِيغْ ’إِلّْ أَمدْجَاحْ‘. 4 ثُوغَا خدّْمنْ ثنْعَاشْ ن إِسڭّْوُوسَا إِ كِيذُورْلَاعُومِيرْ، مَاشَا غَارْ ؤُسڭّْوَاسْ وِيسّْ ثْڒطَّاشْغوّْغنْ. 5 ؤُشَا ذڭْ ؤُسڭّْوَاسْ وِيسّْ أَرْبعْطَاشْ يُوسَا-د كِيذُورْلَاعُومِيرْ ذ إِجدْجِيذنْ إِ يدْجَانْ أَكِيذسْ ؤُشَاغڒْبنْ خْ إِرَافَاوِييّنْ ذِي أَشْثِيرُوثْ-قَارْنَايْمْ، خْ إِزُوزِييّنْ ذِي هَامْ، خْ إِمِيثِييّنْ ذِي شَاوَا-قَارْيَاثَايِيمْ ◼14:‏5 ’إِرَافَاوِييّنْ‘ - إِجّْ ن ڒْڭنْسْ ن جّْوَاهڒْ أَمشْنَاوْ إِعَانَاقِييّنْ ذ إِزُوزِييّنْ ذ إِمِييّنْ. إِسمْ وَانِيثَا ؤُڒَا ذ إِسمْ ن مَارَّا ڒڭْنُوسْ-أَ إِنِّي جَارْ أَسنْ جّْوَاهڒْ.  ◘14:‏5 أَمز. 15‏:‏20؛ أَعَوذ. 2‏:‏10، 11. 6 ؤُ خْ إِخُورِييّنْ ذڭْ إِذُورَارْ نْسنْ ن سَاعِيرْ أَڒْ فَارَانْ، ونِّي إِدْجَانْ زَّاثْ إِ ڒخْڒَا. 7 أَوَارْنِي أَيَا ذوْڒنْ-د، ؤُسِينْ-د غَارْ عَايْنْ-مِيشْفَاثْ، ونِّي ذ قَاذَاشْ، ؤُشَاغڒْبنْ خْ يوْذَانْ نِّي إِزدّْغنْ ذِي مَارَّا ثَامُّورْثْ ن أَيْثْ ن عَامَالِيقْ ؤُ عَاوذْ خْ إِمُورِييّنْ إِنِّي إِزدّْغنْ ذِي هَاصُّونْ-ثَامَارْ. ◼14:‏7 ’عَايْنْ-مِيشْفَاثْ‘ - إِسمْ وَانِيثَا إِخْسْ أَذْ يِينِي ’أَنُو ن ڒْحُوكْمْ‘. ’كَاذسْ‘ - إِسمْ وَانِيثَا إِخْسْ أَذْ يِينِي ’أَمْقدَّاسْ‘. ’هَاصُّونْ-ثَامَارْ‘ - إِسمْ وَانِيثَا إِخْسْ أَذْ يِينِي ’أَزْبَارْ ن ثِينِي‘.

8 خنِّي إِفّغْ ؤُجدْجِيذْ ن سَاذُومْ ذ ؤُجدْجِيذْ ن عَامُورَّا ذ ؤُجدْجِيذْ ن أَذْمَا ذ ؤُجدْجِيذْ ن صابُويِيمْ ذ ؤُجدْجِيذْ ن بِيلَاعْ، أَقَا-ت ذ صُوغَارْ. رُوحنْ نِيثْنِي غَارْ ڒوْضَا ن ثغْزُورْثْ ن سِيذِّيمْ، مَاحنْذْ أَذْ مّنْغنْ 9 أَكْ-ذ كِيذُورْلَاعُومِيرْ، أَجدْجِيذْ ن عِيلَامْ ذ ثِيذْعَالْ، أَجدْجِيذْ ن ڒڭْنُوسْ، ذ أَمْرَافِيلْ، أَجدْجِيذْ ن شِينْعَارْ، ذ أَرْيُوكْ، أَجدْجِيذْ ن إِلَّاسَارْ: أَربْعَا ن إِجدْجِيذنْ ڭِّينْ ڒْبَارُوضْ أَكْ-ذ خمْسَا. ◼14:‏9 ’أَجدْجِيذْ ن جُويِيمْ‘ - إِخْسْ أَذْ يِينِي ’أَجدْجِيذْ ن ڒڭْنُوسْ‘. 10 ثُوغَا ڒوْضَا ن ثغْزُورْثْ ن سِيذِّيمْ ثشُّورْ س وَانُوثنْ ن ثِيزفْثْ. ؤُشَا أَروْڒنْ إِجدْجِيذنْ ن سَاذُومْ ذ عَامُورَّا ؤُشَا وْضَانْ ذَايْسنْ، ؤُ إِنِّي إِقِّيمنْ أَروْڒنْ غَارْ إِذُورَارْ. 11 كْسِينْ مَارَّا أَڭْڒَا ن سَاذُومْ ذ عَامُورَّا ذ مَارَّا مَاشَّا إِ خزْننْ ؤُشَا ؤُيُورنْ. 12 كْسِينْ عَاوذْ لُوطْ، مِّيسْ ن ؤُمَاسْ ن أَبْرَامْ، ذ وَاڭْڒَا نّسْ ؤُشَا رُوحنْ. نتَّا ثُوغَا إِزدّغْ ذِي سَاذُومْ.

13 خنِّي يُوسَا-د إِجّنْ زڭْ إِنِّي يَاروْڒنْ، إِنَّا مَانْ أَيَا إِ أَبْرَامْ، أَعِيبْرَانِي، ونِّي ثُوغَا إِزدّْغنْ غَارْ ثْشجُّورَا ن يِيڭّْ ن مَامْرِي، أَرْيَازْ ذ أَمُورِييْ، ؤُمَاسْ ن أَشْكُولْ ذ عَانِيرْ. نِيثْنِي ذ أَرْفِيقنْ ذِي ڒْعَاهْذْ ن أَبْرَامْ. ◼14:‏13 ’أَعِيبْرَانِي‘ - ثَانِيثَا ذ ثْوَاڒَا ثَامزْوَارُوثْ إِ نتَّافْ إِسمْ-أَ ذڭْ وذْلِيسْ إِقدّْسنْ. ذڭْ وذْلِيسْ ’أَمزْوَارُو‘، ؤُذمْ 39، أَيَاثْ 4 ذ 17 ؤُڒَا ذڭْ وُوذمْ 41، أَيثْ 21 نتَّافْ إِسمْ-أَ أَمْ ؤُشيَّارْ غَارْ يُوسُوفْ ؤُ ذڭْ وذْلِيسْ أَمزْوَارُو (أَمز. 43:32) أَمْ إِجّْ ن ؤُشيَّارْ غَارْ مَارَّا إِهنْجِيرنْ ن يَاعْقُوبْ (خْزَارْ عَاوذْ أَمز. 40:15).  ◘14:‏13 أَمز. 13‏:‏18. 14 ڒَْامِي إِسْڒَا أَبْرَامْ بلِّي ؤُمَاسْ طّْفنْ ث ذ أَمحْبُوسْ، يِيوِي إِرْيَازنْ إِنِّي إِذَارّْبنْ إِ ؤُمنْغِي، إِنِّي د-إِتّْوَاخڒْقنْ ذِي ثَادَّارْثْ نّسْ، ذِي ثڒْثْ-مْيَا ؤُ-ثْمنْطَاشْ، ؤُشَا إِضْفَارْ إِ-ثنْ أَڒْ دَان. 15 س دْجِيرثْ بْضَانْ خَاسنْ نِيثْنِي، ڭِّينْ ثرْفِيقِينْ، نتَّا ذ إِمْسخَّارنْ نّسْ، ؤُشَا إِغْڒبْ خَاسنْ ؤُشَا إِضْفَارْ إِ-ثنْ غَارْ ثنْذِينْثْ ن حُوبَا، ثنِّي إِدْجَانْ خْ ؤُزڒْمَاضْ ن ذِيمَاشْقْ. 16 يَارَّا-د مَارَّا أَڭْڒَا ؤُڒَا ذ ؤُمَاسْ لُوطْ ذ وَاڭْڒَا نّسْ ؤُڒَا ذ ثِيمْغَارِينْ ذ ڒْڭنْسْ.

17 ؤُمِي د-إِعْقبْ، أَوَارْنِي ڒَامِي إِغْڒبْ نتَّا خْ كِيذُورْلَاعُومِيرْ ؤُ خْ إِجدْجِيذنْ نِّي ثُوغَا أَكِيذسْ، إِفّغْ ؤُجدْجِيذْ ن سَاذُومْ حِيمَا أَذْ ث إِڒْقَا ذِي ڒوْضَا ن ثغْزُورْثْ ن شَاوَا، ثنِّي إِدْجَانْ ذ ثَاغْزُورْثْ ن ؤُجدْجِيذْ. 18 ؤُ مَالْكِيصَاذِيقْ، أَجدْجِيذْ ن شَالِيمْ، يِيوِي-د أَغْرُومْ ذ بِينُو. نتَّا ثُوغَا ذ أَكهَّانْ ن أَربِّي، أَمْعُودْجِي خْ كُوڒْشِي. ◼14:‏18 ’مَالْكِيصَاذِيقْ‘ - إِسمْ وَانِيثَا إِخْسْ أَذْ يِينِي ’أَجدْجِيذْ أَمْسڭّذْ‘ نِيغْ ’أَجدْجِيذْ ذ أَمْثِيقِّي‘.  ◘14:‏18 عبر. 7‏:‏1، 2، 3. 19 إِبَارْكْ إِ-ث، إِنَّا أَسْ: ”أَذْ إِتّْوَابَاركْ أَبْرَامْ زِي أَربِّي، أَمْعُودْجِي خْ كُوڒْشِي، ونِّي إِڭِّينْ إِجنْوَانْ ذ ثمُّورْثْ. 20 أَذْ إِتّْوَابَاركْ أَربِّي، أَمْعُودْجِي خْ كُوڒْشِي، ونِّي إِسلّْمنْ إِغْرِيمنْ نّشْ ذڭْ إِفَاسّنْ نّشْ!“ ؤُشَا أَبْرَامْ إِوْشَا أَسْ ڒعْشُورْ ن مَارَّا.

21 ؤُشَا إِنَّا ؤُجدْجِيذْ ن سَاذُومْ إِ أَبْرَامْ: ”أوْشْ أَيِي مَارَّا مِينْ إِدَّارنْ، مَاشَا كْسِي أَڭْڒَا إِ يِيخفْ نّشْ.“ 22 مَاشَا أَبْرَامْ يَارَّا-د خْ ؤُجدْجِيذْ ن سَاذُومْ: ”أَقَا سّْڭعّْذغْ أَفُوسْ إِنُو غَارْ سِيذِي أَربِّي، أَمْعُودْجِي خْ كُوڒْشِي، ونِّي إِڭِّينْ أَجنَّا ذ ثمُّورْثْ، جُّودْجغْ 23 مَاحنْذْ وَارْ كسِّيغْ أَفِيڒُو نِيغْ ثَاحزّمْثْ ن سَانْذَالِييَاثْ ؤُڒَا شَا ن ڒْحَاجّثْ زِي مَارَّا مِينْ إِدْجَانْ نّشْ، حِيمَا وَارْ ثقَّارذْ: ’نشّْ سّْثجَّارغْ أَبْرَامْ!‘ 24 وَارْ غَارِي ذَايسْ بُو ثَاسْغَارْثْ! مْغِيرْ مِينْ شِّينْ إِمْسخَّارنْ ذ ثسْغَارْثْ ن إِرْيَازنْ نِّي كِيذِي إِرُوحنْ، أَنِيرْ ذ إِشْكُولْ ذ مَامْرِي، أجّْ إِ-ثنْ أَذْ كْسِينْ ثَاسْغَارْثْ نْسنْ!“