أَذْلِيسْ إِقدّْسنْ أَمزْوَارُو ١٥

١٥

ڒْعَاهْذْ ن أَربِّي أَكْ-ذ أَبْرَامْ

١ أَوَارْنِي مَانْ أَيَا يُوسَا-د وَاوَاڒْ ن سِيذِي غَارْ أَبْرَامْ ذڭْ إِجّْ ن ڒوْحِييْ. إِنَّا أَسْ ”وَارْ تّڭّْوذْ شَا، أَبْرَامْ، نشّْ ذ أَسڒْقِي إِ شكْ، ڒْْمُونثْ نّشْ ثمْغَارْ أَطَّاسْ ذ نشّْ.“ ◘ ٢ ؤُشَا إِنَّا أَبْرَامْ: ”سِيذِي إِنُو، سِيذِي، مِينْ ذ أَيِي غَا ثوْشذْ، مَاغَارْ نشّْ أَذْ رَاحغْ أَمُّو بْڒَا مِّي ؤُ أَلِيعَازِيرْ زِي ذِيمَاشْقْ أَذْ يِيڒِي أَمشْنَاوْ مِّي خْ وَاڭْڒَا ن ثَادَّارْثْ إِنُو؟“ ◼ ٣ إِنَّا أَبْرَامْ عَاوذْ: ”خْزَارْ، وَارْ ذ أَيِي ثوْشِيذْ زَّارِيعثْ، س ؤُينِّي، ونِّي إِدْجَانْ أَمْ مِّي ن ثَادَّارْثْ إِنُو، أَذْ يِيڒِي ذ أَوْرِيثْ إِنُو!“ ◼ ٤ ؤُشَا خْزَارْ، أَوَاڒْ ن سِيذِي يُوسَا-د غَارسْ، إِنَّا: ”وَارْ شكْ إِوَارّثْ شَا وَا، مَاشَا ونِّي إِ غَا إِفّْغنْ زَّايكْ أَذْ يِيڒِي ذ أَوْرِيثْ نّشْ.“ ٥ إِسُّوفّغْ إِ-ث غَارْ بَارَّا، إِنَّا: ”خْزَارْ غَارْ ؤُجنَّا، ثْحسْبذْ إِثْرَانْ، مَاڒَا ثْزمَّارذْ أَذْ ثنْ ثْحسْبذْ!“ ؤُشَا إِنَّا أَسْ: ”أَمُّو إِ غَا ثِيڒِي زَّارِيعثْ نّشْ!“ ◘ ٦ ؤُشَا نتَّا يُومنْ ذِي سِيذِي ؤُشَا إِحْسبْ أَسْ ث-إِ-د ذ ثَاسڭْذَا. ◼ ◘

٧ إِنَّا أَسْ عَاوذْ: ”نشّْ ذ سِيذِي، ونِّي شكْ د-يِيوْينْ زِي ؤُرْ ن إِكَالْذَانِييّنْ، حِيمَا أَذْ أَشْ وْشغْ ثَامُّورْثْ-أَ ذ ڒْْوَارْثْ.“ ◘ ٨ خنِّي نتَّا إِنَّا: ”أَ سِيذِي إِنُو، سِيذِي، س مِينْزِي إِ غَا سّْنغْ، بلِّي أَذْ ت وَارْثغْ؟“ ٩ إِنَّا أَسْ نتَّا: ”أَوِي أَيِي-د إِشْثْ ن ثْعجْمِيثْ ن ثْڒَاثَا ن إِسڭّْوُوسَا ذ إِجّْ ن إِغَايْضْ ن ثْڒَاثَا إِسڭّْوُوسَا ذ إِجّْ ن إِشَارِّي ن ثْڒَاثَا إِسڭّْوُوسَا ذ إِشْثْ ن ثجْلِيلّحْثْ ذ إِجّْ ن وذْبِيرْ ذ أَمژْيَانْ.“ ١٠ نتَّا يِيوِي-د غَارسْ مَارَّا مَانْ أَيَا، إِبْضَا ثنْ خْ وزْينْ ؤُ إِڭَّا كُوڒْ أَزْينْ قِيبَاتْشْ إِ ونّغْنِي، مَاشَا وَارْ إِبْضِي شَا إِجْضَاضْ. ◘ ١١ هْوَانْ-د إِجْضَاضْ إِتّْكشَّاضنْ خْ إِمُورْضَاسْ، مَاشَا أَبْرَامْ يُوژّڒْ خَاسنْ. ١٢ غَارْ ؤُغدْجَايْ ن ثْفُوشْثْ، إِمْسَارْ أَقَا يُوسَا أَسْ-د إِ أَبْرَامْ إِجّْ ن يِيضصْ يُودْجغْ، ؤُشَا خْزَارْ، ثِيڭّْوُوذِي ذ ثَادْجسْثْ إِحذْقنْ وْضَانْ-د خَاسْ. ١٣ خنِّي إِنَّا إِ أَبْرَامْ: ”سّنْ س ثِيذتّْ أَقَا زَّارِيعثْ نّشْ أَذْ ثِيڒِي ذ ثَابَارَّانشْثْ ذڭْ إِشْثْ ن ثمُّورْثْ إِ وَارْ إِدْجِينْ نّسْ ؤُشَا أَذْ أَسنْ خذْمنْ أَمْ إِسمْغَانْ ؤُ نِيثْنِي أَذْ خَاسنْ ڭّنْ أَغِيڒْ أَربْعَا-مْيَا ن إِسڭّْوُوسَا. ◘ ١٤ مَاشَا ڒْْڭنْسْ ؤُمِي غَا خذْمنْ أَمْ إِسمْغَانْ، أَذْ خَاسنْ حكْمغْ عَاوذْ، ؤُشَا أَوَارْنِي مَانْ أَيَا أَذْ فّْغنْ س وَاڭْڒَا إِمْغَارْ. ◘ ١٥ أَذْ ثتّْوَاسّْمُونذْ غَارْ ڒجْذُوذْ نّشْ س ڒهْنَا ؤُشَا أَذْ شكْ نضْڒنْ أَمْ ؤُمشَّايْبُو إِوقَّارْ. ◘ ١٦ جِّيڒْ وِيسّْ أَربْعَا أَذْ د-إِعْقبْ ذَانِيثَا، مِينْزِي ڒْْقدّْ ن ڒْْمُوعْصِييّثْ ن إِمُورِييّنْ عَاذْ وَارْ إِكمّڒْ.“ ◘ ١٧ ڒَْامِي ثغْڒِي ثْفُوشْثْ ؤُشَا ثذْوڒْ ذ ثَادْجسْثْ، ثُوغَا ذِينْ أَفَارَّانْ إِدّخّْننْ ؤُ إِعْذُو إِجّْ ن وصْفضْ ن ثْمسِّي جَارْ إِزيْنَانْ نِّي. ◼ ١٨ ذڭْ وَاسّْ نِّي نِّيثْ إِڭَّا سِيذِي إِجّْ ن ڒْْعَاهْذْ أَكْ-ذ أَبْرَامْ، إِنَّا: ”إِ زَّارِيعثْ نّشْ ؤُمِي وْشِيغْ ثَامُّورْثْ-أَ زڭْ إِغْزَارْ ن مِيصْرَا أَڒْ إِغْزَارْ أَمقّْرَانْ، إِغْزَارْ ن لْفُورَاطْ: ◘ ١٩ ثَامُّورْثْ ن إِقِينِييْينْ، إِقنِيزِييْينْ، إِقَاذْمِييْينْ، ٢٠ إِحِيتِّييْينْ، إِفِيرْزِييْينْ، إِرَافَاوِييّنْ، ٢١ إِمُورِييْينْ، أَيْثْ ن كنْعَانْ، إِڭِيرْڭَاشِييْينْ ذ إِيِيبُوسِييْينْ.“

◘١٥:١ 15:‏1 إِزهد. 16‏:‏6؛ 18‏:‏3؛ 19‏:‏12.

◼١٥:٢ 15:‏2 ’أَلِيعَازِيرْ‘ - إِسمْ-أَ وَانِيثَا إِخْسْ أَذْ يِينِي ’ونِّي غَارْ إِدْجْ أَربِّي ذ أَمْعَاونْ نّسْ‘ نِيغْ ’ونِّي ؤُمِي إِوْشَا أَربِّي أَفُوسْ‘.

◼١٥:٣ 15:‏3 ’زَّارِيعثْ‘ - إِخْسْ أَذْ يِينِي ’ثَارَّاوْثْ‘.

◘١٥:٥ 15:‏5 ؤُف. 32‏:‏13؛ أَعَوذ. 10‏:‏22؛ رُوم. 4‏:‏18؛ عبر. 11‏:‏12.

◼١٥:٦ 15:‏6 ’إِحسْبْ أَسْ ث-إِ-د ذ ثَاسڭْذَا‘ - نِيغْ ’إِڭَّا أَسْ ث إِ نتَّا ذ ثَاسڭْذَا‘.

◘١٥:٦ 15:‏6 رُوم. 4‏:‏3، 9 ،18، 22؛ ڭال. 3‏:‏6؛ يَاع. 2‏:‏23.

◘١٥:٧ 15:‏7 إِزهد. 105‏:‏11.

◘١٥:١٠ 15:‏10 إِرْم. 34‏:‏18، 19

◘١٥:١٣ 15:‏13 ؤُف. 12‏:‏40؛ ڒخ. 7‏:‏6؛ ڭال. 3‏:‏17.

◘١٥:١٤ 15:‏14 ؤُف. 3‏:‏22؛ 11‏:‏2؛ 12‏:‏35،36.

◘١٥:١٥ 15:‏15 أَمز. 25‏:‏7، 8.

◘١٥:١٦ 15:‏16 ؤُف. 12‏:‏40.

◼١٥:١٧ 15:‏17 أَفسَّارْ - ڒَْامِي ڭِّينْ ثْنَاينْ ن إِجدْجِيذنْ زِيشْ إِجّْ ن ڒْْعَاهْذْ ذِي شَّارْقْ-أَمڒْوَاسُو كْسِينْ نِيثْنِي إِجّْ ن ؤُمدَّارْ إِ ثْغَارْصْثْ، بْضَانْ ث ذ إِزيْنَانْ ؤُشَا سَّارْسنْ أَزْينْ غَارْ إِجّْ ن ؤُغزْذِيسْ ؤُ أَزْينْ غَارْ إِجّْ ن ؤُغزْذِيسْ نّغْنِي. خنِّي ثُوغَا خْ ؤُجدْجِيذْ نِّي ثُوغَا ذ أَمُوقْڒِيڒْ زَّايْسنْ أَذْ يُويُورْ ذِي ڒْْوسْثْ ن ثْنَاينْ ن إِزِييْنَانْ أَمْ إِقَّارْ أَقَا أَجدْجِيذْ ونِّي ذ أَمقّْرَانْ زَّايْسنْ غَارسْ ڒْْحقّْ حِيمَا أَذْ كِيذسْ إِڭّْ أَمشْنَاوْ مِينْ إِڭَّا أَكْ-ذ ؤُمُودَّارْ إِ ؤُمِي غَارْصنْ، مَاڒَا نتَّا وَارْ إِكمّڒْ ڒْْعَاهْذْ إِ إِڭَّا أَكِيذسْ (خْزَارْ إِرْم. 34:18-20). ذڭْ وَاوَاڒنْ-أَ نتّْوَاڒَا أَقَا أَربِّي ونِّي ذ أَمقّْرَانْ خْ إِبْرَاهِيمْ، ثُوغَا إِڭُّورْ ذِي ڒْْوسْثْ ن إِزيْنَانْ ن ؤُمدَّارْ ذِي صِّيفثْ ن وسْفضْ أَمْ ثُوغَا إِبْرَاهِيمْ إِتّْبدَّا غَارْ ؤُغزْذِيسْ. مَانْ أَيَا إِخْسْ أَذْ يِينِي أَقَا أَربِّي س يِيخفْ نّسْ ذ نتَّا إِ إِقضْعنْ ڒْْعَاهْذْ أَكْ-ذ إِبْرَاهِيمْ مِينْزِي أَربِّي إِتّْحِينَّا خْ بْنَاذمْ، إِسّنْ بْنَاذمْ وَارْ إِزمَّارْ أَذْ إِكمّڒْ ؤُڒَا ذ إِجّْ ن ڒْْعَاهْذْ أَكِيذسْ. بْنَاذمْ إِزمَّارْ مْغِيرْ أَذْ إِتّْوَاسّنْجمْ خْمِي إِ غَا يَامنْ ذِي ڒْْعَاهْذْ إِ إِڭَّا أَربِّي ذِي مِّيسْ، إِخْسْ أَذْ يِينِي ذِي لْمَاسِيحْ ونِّي إِوْشِينْ إِخفْ نّسْ ذ ثْغَارْصْثْ إِ دّْنُوبْ ن إِوْذَانْ.

◘١٥:١٨ 15:‏18 أَمز. 12‏:‏7؛ 13‏:‏15؛ 24‏:‏7؛ 26‏:‏4؛ ؤُف. 32‏:‏13؛ أَعَوذ. 1‏:‏8؛ 34‏:‏4.