أَذْلِيسْ إِقدّْسنْ إِعِيبْرَانِييّنْ ٨

أَرَّايْسْ ن إِكهَّاننْ ن إِجّْ ن ڒْْعَاهْذْ يُوعْڒَانْ

١ لْمُوفِيذْ زِي مَارَّا مَانْ أَيَا، أَقَا غَارْنغْ أَرَّايْسْ ن إِكهَّاننْ، ونِّي إِقِّيمنْ غَارْ يفُوسْ ن ڒْْعَارْشْ ن لْعَاضِيمْ ذڭْ إِجنْوَانْ. ◘ ٢ نتَّا ذ أَمْسيَّارْ ن زَّاوشْثْ إِقدّْسنْ ؤُ ن ثْزذِّيغْثْ إِقدّْسنْ ذ ثِيذتّْ نِّي إِبْنَا أَربِّي، وَارْ إِدْجِي ذ بْنَاذمْ.

٣ مِينْزِي كُوڒْ أَرَّايْسْ ن إِكهَّاننْ إِتّْوَاسّْڭعّذْ حِيمَا أَذْ إِوْشْ ثِيوْهِيبِينْ ذ ثْغَارْصِينْ. س ؤُينِّي ثُوغَا إِتّْخصَّا أَسْ إِ وَانِيثَا عَاوذْ أَذْ غَارسْ يِيڒِي شَا حِيمَا أَذْ ث إِوْشْ. ◘ ٤ معْلِيكْ إِدْجَا ذِي ثمُّورْثْ، نتَّا وَارْ إِتِّيڒِي ذ أَكهَّانْ، مِينْزِي أَقَا ذِينْ إِكهَّاننْ عَاذْ إِنِّي إِتّْقدَّامنْ ثِيوْهِيبِينْ عْلَاحْسَابْ شَّارِيعَا. ٥ نِيثْنِي سخَّارنْ إِ ؤُمذْيَا ذ ثِيڒِي ن مِينْ إِدْجَانْ ذڭْ ؤُجنَّا، أَمْ مَامّشْ إِتّْوَانَّا إِ مُوسَا ؤُمِي ثُوغَا إِڒْهَا أَكْ-ذ ؤُقِيضُونْ إِقدّْسنْ: ”حْضَاثْ، أَذْ ثڭّذْ مَارَّا أَمْ لْمِيثَالْ ونِّي ذ أَشْ سّشْنغْ خْ وذْرَارْ.“ ◘

٦ مَاشَا ڒخُّو يَاسُوع لْمَاسِيحْ إِكْسِي ثَاسخَّارْثْ ثشْنَا خَاسْ، مِينْزِي ڒْْعَاهْذْ إِ زِي إِذْوڒْ نتَّا ذ لْوَاسِيثْ، أَقَا حْسنْ قَاعْ، ؤُشَا إِمّوْشْ س لْوُوعُوذْ إِشْنَانْ خْ يِينِّي إِ د-إِتَّاسنْ أَكْ-ذ ڒْْعَاهْذْ أَقْذِيمْ. ◘ ٧ مِينْزِي مَاڒَا ثُوغَا ڒْْعَاهْذْ أَمزْوَارُو بْڒَا ڒْْعِيبْ، وَارْ إِتِّيڒِي عَاذْ ومْشَانْ إِ ونِّي ذ وِيسّْ ثْنَاينْ. ٨ مَاغَارْ نتَّا يُوفَا ذَايْسنْ ڒْْعِيبْ، إِنَّا:

”خْزَارْ، أَذْ د-أَسنْ وُوسَّانْ، إِنَّا سِيذِي،

خْمِي غَا ڭّغْ إِجّْ ن ڒْْعَاهْذْ ن جْذِيذْ

ذِي ڒكْمَارثْ،

إِ ڒَْادْجْ ن ثَادَّارْثْ ن إِسْرَائِيل

ؤُ إِ ڒَْادْجْ ن ثَادَّارْثْ ن يَاهُوذَا، ◘

٩ وَارْ إِدْجِي أَمْ ڒْْعَاهْذْ نِّي وْشِيغْ إِ ڒجْذُوذْ نْسنْ،

ذڭْ وَاسّْ مِينْ ذِي ثنْ طّْفغْ زڭْ ؤُفُوسْ،

ڭوّْذغْ ثنْ زِي ثمُّورْثْ ن مِيصْرَا.

مِينْزِي نِيثْنِي وَارْ قِّيمنْ شَا ذِي ڒْْعَاهْذْ إِنُو،

نْضَارغْ ثنْ، إِقَّارْ سِيذِي.

١٠ مَاشَا ذ وَا ذ ڒْْعَاهْذْ إِ غَا وْشغْ

إِ ڒَْادْجْ ن ثَادَّارْثْ ن إِسْرَائِيل:

’أَوَارْنِي وُوسَّانْ نِّي، إِنَّا سِيذِي،

أَذْ ڭّغْ إِزرْفَانْ إِنُو ذِي ڒعْقڒْ نْسنْ،

ؤُشَا أَذْ ثنْ أَرِيغْ ذڭْ وُوڒَاونْ نْسنْ،

ؤُشَا نشّْ أَذْ أَسنْ إِڒِيغْ ذ أَربِّي،

نِيثْنِي أَذْ أَيِي إِڒِينْ ذ ڒْْڭنْسْ.

١١ ؤُڒَا ذ إِجّنْ أَذْ إِسّڒْمذْ

مِّيسْ ن ثمُّورْثْ نِيغْ ؤُمَاسْ،

أَذْ يِينِي: سّنْ سِيذِي!،

مِينْزِي مَارَّا أَذْ أَيِي سّْننْ،

أَمْ ؤُمژْيَانْ نْسنْ أَمْ ؤُمقّْرَانْ نْسنْ. ◘

١٢ مِينْزِي نشّْ أَذْ ثنْ سّصْفِيغْ

زِي ڒْْمُوعْصِييّثْ نْسنْ،

ؤُشَا دّْنُوبْ نْسنْ وَارْ ذَايْسنْ تّْفكَّارغْ عَاذْ.‘ “ ◘

١٣ ڒَْامِي إِنَّا: ’جْذِيذْ!‘، أَقَا إِڭَّا ڒْْعَاهْذْ أَمزْوَارُو ذ أَقْذِيمْ، ؤُشَا مِينْ يَارْشَانْ ؤُ إِدُّويْسَارْ، أَقَا أَذْ إِفْنَا. ◘

◘٨:١ 8:‏1 أَفا. 1‏:‏20؛ كُول. 3‏:‏1؛ عبر. 3‏:‏1؛ 4‏:‏14؛ 6‏:‏20؛ 9‏:‏11؛ 12‏:‏2.

◘٨:٣ 8:‏3 أَفا. 5‏:‏2.

◘٨:٥ 8:‏5 ؤُف. 25‏:‏40؛ ڒخ. 7‏:‏44؛ كُول. 2‏:‏17؛ عبر. 10‏:‏1.

◘٨:٦ 8:‏6 2 كُور. 3‏:‏6.

◘٨:٨ 8:‏8 إِرْم. 31‏:‏31‏-‏34؛ مت. 26‏:‏28، مك. 14‏:‏24، لك. 22‏:‏20، 1 كُور. 11‏:‏25، 2 كُور. 3‏:‏6، عبر. 8‏:‏6، 8، 13؛ 9‏:‏15؛ 12‏:‏24

◘٨:١١ 8:‏11 يُوح. 6‏:‏45، 65؛ 1 يُوح. 2‏:‏27.

◘٨:١٢ 8:‏12 إِرْم. 31‏:‏31‏-‏34.

◘٨:١٣ 8:‏13 إِرْم. 31‏:‏31؛ مت. 26‏:‏28، مك. 14‏:‏24، لك. 22‏:‏20، 1 كُور. 11‏:‏25، 2 كُور. 3‏:‏6، عبر. 8‏:‏6، 8، 13؛ 9‏:‏15؛ 12‏:‏24