١ مَاشَا غَارْ ؤُمزْوَارْ ثُوغَا ذِينْ ڒفْرُوضْ إِ ثْسخَّارْثْ ؤُ ثُوغَا ذِينْ إِشْثْ ن زَّاوشْثْ إِقدّْسنْ ذِي دُّونشْثْ-أَ. ٢ مِينْزِي ثَازذِّيغْثْ ثَامزْوَارُوثْ إِ ثتّْوَاڭّْ، ثُوغَا ذَايسْ ڒْْقنْذِيڒْ ذ ثْزوْضَا ذ وغْرُومْ ن وسْشَانْ ؤُشَا قَّارنْ أَسْ: ’أَقدَّاسْ‘. ◘9:‏2 ؤُف. 26‏:‏1؛ 36‏:‏1؛ لَاوِي 24‏:‏5. ٣ مَاشَا ثَازذِّيغْثْ ن ذَاخڒْ، أَوَارْنِي إِ ؤُڒحَّافْ وِيسّْ ثْنَاينْ، قَّارنْ أَسْ ’أَقْذَاسْ خْ ؤُقدَّاسْ‘. ◼9:‏3 ’أَڒحَّافْ‘ - نِيغْ: ’أَرْوَاقْ‘. ٤ أَقَا ذَايسْ ڒْْقشْعثْ ن وُورغْ إِ ڒبْخُورْ ؤُڒَا ذ تَّابُوثْ ن ڒْْعَاهْذْ إِغدْجْفنْ س وُورغْ غَارْ مَارَّا إِغزْذِيسنْ. ثُوغَا ذَايسْ إِجّْ ن ؤُزنْبِيڒْ ن وُورغْ ذَايسْ ’مَانَّا‘، ؤُ ذَايسْ ؤُڒَا ذ ثَاغَّارْشْثْ ن هَارُونْ ثنِّي إِتّْوَانُووّْشنْ ذ ثڒْوِيحِينْ ن وژْرُو ن ڒْْعَاهْذْ. ◘9:‏4 ؤُف. 25‏:‏10؛ 34‏:‏29؛ ڒخْڒ. 17‏:‏25؛ 1 إِج. 8‏:‏9؛ 2 إِم. 5‏:‏10. ٥ سنّجْ إِ مَانْ أَيَا أَقَا ذِينْ ’إِخِيرُوبنْ‘ ن ڒْْعزّْ، إِنِّي إِدّْڒِينْ ثَاقبَّارْثْ ن وصْڒَاحْ إِ إِدْجَانْ خْ تَّابُوثْ س ثِيڒِي ن وَافْرِيونْ نْسنْ. مَاشَا وَارْ غَارْنغْ بُو ڒْْوقْثْ ڒخُّو حِيمَا أَذْ نسِّيوڒْ خْ كُوڒْ إِشْثنْ زِي ثْمسْڒَايِينْ-أَ إِ إِتّْوَاسّْوجْذنْ أَمُّو. ◘9:‏5 ؤُف. 25‏:‏22. ٦ مَاشَا إِكهَّاننْ ثُوغَا تَّاذْفنْ ڒبْذَا غَارْ ثْزذِّيغْثْ نِّي غَارْ بَارَّا، ثنِّي ذ ثَامزْوَارُوثْ، حِيمَا أَذْ ذَايسْ كمّْڒنْ ثَاسخَّارْثْ نْسنْ. ◘9:‏6 ڒخْڒ. 28‏:‏3. ٧ مَاشَا أَرَّايْسْ ن إِكهَّاننْ ثُوغَا إِتَّاذفْ إِشْثْ ن ثْوَاڒَا ذڭْ ؤُسڭّْوَاسْ غَارْ ثْزذِّيغْثْ ن ذَاخڒْ أَكْ-ذ إِذَامّنْ إِ إِقدّمْ خْ يِيخفْ نّسْ ؤُڒَا خْ ؤُودَّارْ ن ڒْْڭنْسْ. ◘9:‏7 ؤُف. 30‏:‏10؛ لَاوِي 16‏:‏2، 34؛ عبر. 9‏:‏25. ٨ س ثبْرِيذْثْ-أَ إِسّْشنْ أَرُّوحْ إِقدّْسنْ مْلِيحْ بلِّي أَبْرِيذْ إِقدّْسنْ عَاذْ وَارْ د-إِتّْوَامّضْهَارْ، ؤُمِي عَاذْ ثَازذِّيغْثْ ثَامزْوَارُوثْ ثْبدّْ. ◘9:‏8 يُوح. 14‏:‏6. ٩ ثَانِيثَا ثُوغَا ذ أَمذْيَا إِ ڒْْوقْثْ نِّي ذِي ثُوغَا تّْقدَّامنْ صّْذَاقِي ذ ثْغَارْصِينْ نِّي وَارْ زمَّارنْثْ أَذْ أَوْينْثْ ڒكْمَارثْ غَارْ ثْنفْسشْثْ ن ونِّي إِ-ثنْثْ إِقدّْمنْ. ١٠ أَقَا أَثنْثْ ثُوغَا تّْهِيمَّانْثْ مْغِيرْ مَاشَّا ذ ثْسسِّي ذ إِبْرِيذنْ إِفَارْزنْ ن ؤُسغْضَاسْ ذڭْ وَامَانْ، أَقَا أَثنْثْ ذ ڒفْرُوضْ إِ إِتّْهِيمَّانْ دَّاثْ وَاهَا، تّْوَامُورنْثْ أَڒْ ڒْْوقْثْ ن وعْذَاڒْ ن ثْسڭْذَا. ◘9:‏10 لَاوِي 11‏:‏2؛ ڒخْڒ. 19‏:‏7‏-‏22.

١١ مَاشَا لْمَاسِيحْ إِ د-يُوسِينْ، أَقَا إِذْوڒْ ذ أَرَّايْسْ ن إِكهَّاننْ خْ ڒْْخَارْ إِ إِڭَّا. نتَّا يُوذفْ غَارْ ثْزذِّيغْثْ ثَامقّْرَانْثْ إِكمّْڒنْ، ثنِّي وَارْ إِتّْوَاڭّنْ شَا س إِفَاسّنْ، وَارْ ثدْجِي زِي مِينْ د-إِتّْوَاخڒْقنْ. ◘9:‏11 عبر. 3‏:‏1؛ 4‏:‏14؛ 6‏:‏20؛ 8‏:‏1. ١٢ وَارْ يُوذِيفْ شَا أَكْ-ذ إِذَامّنْ ن إِغَايْضنْ ذ إِعجْمِييّنْ ن إِجّْ ن ؤُسڭّْوَاسْ، مَاشَا أَقَا يُوذفْ إِشْثْ ن ثْوَاڒَا أَكْ-ذ إِذَامّنْ ن يِيخفْ نّسْ غَارْ زَّاوشْثْ إِقدّْسنْ ؤُ أَمُّو إِ د-يِيوِي أَسنْجمْ إِتّْذُومَانْ. ◘9:‏12 ڒخ. 20‏:‏28؛ أَفا. 1‏:‏7؛ كُول. 1‏:‏14؛ عبر. 10‏:‏10؛ 1 بُط. 1‏:‏19؛ أَسَا. 1‏:‏5؛ 5‏:‏9

١٣ مِينْزِي مَاڒَا إِذَامّنْ ن إِغَايْضنْ ذ إِفُونَاسنْ إِمژْيَاننْ ذ إِغّضْ ن ؤُعجْمِي أَزڭّْوَاغْ إِ إِتّْوَارُوشّنْ خْ يِينِّي إِتّْوَاخمْجنْ، أَقَا قدّْسنْ ؤُ سِّيزْذِيڭنْ ثنْ زِي جِّيهثْ ن ويْسُومْ نْسنْ ن أَرِّيمثْ، ◘9:‏13 لَاوِي 16‏:‏14‏-‏16؛ ڒخْڒ. 19‏:‏4؛ عبر. 10‏:‏4. ١٤ مشْحَاڒْ عَاذْ أَذْ سِّيزذْڭنْ إِذَامّنْ ن لْمَاسِيحْ ثَانفْسشْثْ نّغْ زِي ڒخْذَايمْ إِمُّوثنْ، حِيمَا أَذْ نخْذمْ أَربِّي إِدَّارنْ، أَقَا لْمَاسِيحْ ونِّي إِوْشِينْ إِخفْ نّسْ إِ أَربِّي س أَرُّوحْ ن ڒبْذَا ذ ثَاغَارْصْثْ وَارْ ذَايسْ بُو ڒْْعِيبْ! ◘9:‏14 لك. 1‏:‏74؛ رُوم. 6‏:‏13؛ ڭال. 1‏:‏4؛ 2‏:‏20؛ أَفا. 5‏:‏2؛ ثِيث. 2‏:‏14؛ 1 بُط. 4‏:‏2؛ 1 يُوح. 1‏:‏7؛ أَسَا. 1‏:‏5. ١٥ س ؤُينِّي أَقَا نتَّا ذ لْوَاسِيثْ ن ڒْْعَاهْذْ ن جْذِيذْ، مَاغَارْ س ڒْْموْثْ نّسْ إِذْوڒْ نتَّا ذ أَسنْجمْ إِ يِينِّي إِخطَّانْ ضِيدّْ ڒْْعَاهْذْ أَمزْوَارْ، حِيمَا نِيثْنِي إِنِّي إِتّْوَاڒَاغَانْ إِ ڒْْوَارْثْ ن ڒبْذَا، أَذْ طّْفنْ لْوَاعْذْ. ◘9:‏15 إِرْم. 31‏:‏31؛ مت. 26‏:‏28، مك. 14‏:‏24، لك. 22‏:‏20، 1 كُور. 11‏:‏25، 2 كُور. 3‏:‏6، عبر. 8‏:‏6، 8، 13؛ 9‏:‏15؛ 12‏:‏24؛ رُوم. 5‏:‏6؛ 1 بُط. 3‏:‏18.

١٦ مِينْزِي مَانِي إِدْجَا ڒْْعَاهْذْ، إِتّْخصَّا أَذْ ثتّْوَاسَّارْڭبْ ڒْْموْثْ ن ونِّي إِڭِّينْ ڒْْعَاهْذْ. ١٧ مِينْزِي ڒْْعَاهْذْ أَذْ إِذْوڒْ إِصْڒحْ وَاهَا خْمِي غَا إِمّثْ حذْ، وَارْ إِتِّيڒِي شَا نِيشَانْ مِينْ غَا يكّْ إِدَّارْ ونِّي إِڭِّينْ ڒْْعَاهْذْ. ◘9:‏17 ڭال. 3‏:‏15. ١٨ س ؤُيَا ؤُڒَا ذ ڒْْعَاهْذْ أَمزْوَارْ وَارْ إِتّْوَاضْمنْ شَا بْڒَا إِذَامّنْ. ١٩ مِينْزِي أَوَارْنِي ڒَْامِي كُوڒْ ثَاوْصِييّثْ نِّي إِدْجَانْ ذِي شَّارِيعَا أَقَا إِوصَّا إِ ڒْْڭنْسْ س ؤُفُوسْ ن مُوسَا، إِكْسِي نتَّا إِذَامّنْ ن ؤُفُونَاسْ أَمژْيَانْ أَكْ-ذ وَامَانْ ؤُڒَا ذ ثَاضُوفْثْ ثَازڭّْوَاغْثْ ذ ثْعلْدْجثْ، ؤُشَا إِرُوشّْ إِ-ثنْ خْ إِذْلِيسنْ إِتّْوَانّْضنْ ؤُ خْ مَارَّا ڒْْڭنْسْ، ◘9:‏19 ؤُف. 24‏:‏6‏-‏8 ٢٠ إِنَّا أَسنْ:

”إِنَا ذ إِذَامّنْ ن ڒْْعَاهْذْ،

إِ ذ أَومْ يُومُورْ أَربِّي.“ ◘9:‏20 ؤُف. 24‏:‏8؛ مت. 26‏:‏28.

٢١ ثُوغَا إِرُوشّْ عَاوذْ ثَازذِّيغْثْ إِقدّْسنْ ذ مَارَّا ڒقْشُوعْ ن ثْسخَّارْثْ س إِذَامّنْ. ٢٢ مَاغَارْ مَارَّا ثِيمسْڒَايِينْ نِّي إِدْجَانْ ذِي شَّارِيعَا تّْوَاسِّيزذْڭنْثْ س إِذَامّنْ ؤُشَا بْڒَا أَسِيزّڒْ ن إِذَامّنْ وَارْ ذِينْ إِدْجِي شَا وغْفَارْ.

٢٣ ثُوغَا قَاعْ إِتّْخصَّا أَذْ تّْوَاسِّيزْذڭنْثْ ثْمسْڒَايِينْ-أَ س ثْغَارْصَا إِ إِدْجَانْ ذ ڒمْثُوڒْ ن ثِيمسْڒَايِينْ إِ إِدْجَانْ ذڭْ إِجنْوَانْ، مَاشَا ثِيمسْڒَايِينْ نِّي إِدْجَانْ ن ؤُجنَّا سِيمَانْثْ نْسنْ س ثْغَارْصِينْ إِشْنَانْ زِي ثِينَا. ◼9:‏23 ’ثِيغَارْصِينْ‘ - نِيغْ ’دّْبَايحْ‘. ٢٤ مِينْزِي لْمَاسِيحْ وَارْ يُوذِيفْ شَا غَارْ زَّاوشْثْ إِقدّْسنْ إِ إِتّْوَاڭّنْ س إِفَاسّنْ، ذ ونِّي نتَّا ذ لْمِيثَالْ ن مِينْ إِدْجَانْ ذ ثِيذتّْ، مَاشَا غَارْ ؤُجنَّا سِيمَانْثْ نّسْ، حِيمَا أَذْ د-إِضْهَارْ ذِي طّْوعْ نّغْ قِيبَاتْشْ إِ أَربِّي. ٢٥ وَارْ إِدْجِي حِيمَا أَذْ إِقدّمْ إِخفْ نّسْ أَطَّاسْ ن ثْوَاڒَاوِينْ أَمْ مَامّشْ ثُوغَا إِتَّاذفْ أَرَّايْسْ ن إِكهَّاننْ كُوڒْ أَسڭّْوَاسْ غَارْ زَّاوشْثْ إِقدّْسنْ س إِذَامّنْ وَارْ إِدْجِينْ نّسْ ◘9:‏25 ؤُف. 30‏:‏10؛ لَاوِي 16‏:‏2، 34؛ عبر. 9‏:‏7. ٢٦ - مِينْزِي مَاڒَا أَمُّو إِ إِدْجَا، إِڒِي إِتّْخصَّا أَذْ إِودّبْ يشُّو أَطَّاسْ ن ثْوَاڒَاوِينْ زِي بدُّو ن دُّونشْثْ - مَاشَا ڒخُّو، غَارْ قطُّو ن دُّونشْثْ، إِوْشَا نتَّا إِخفْ نّسْ إِشْثْ ن ثْوَاڒَا حِيمَا أَذْ إِبطّڒْ دّْنُوبْ س ثْغَارْصْثْ نّسْ.

٢٧ أَمْ مَامّشْ ذ إِتّْوَاسَّارْسْ إِ إِوْذَانْ أَذْ مّْثنْ إِشْثْ ن ثْوَاڒَا، ؤُشَا خنِّي أَوَارْنِي إِ ڒْْموْثْ نْسنْ أَذْ د-يَاسْ ڒْْحُوكْمْ، ٢٨ أَمُّو عَاوذْ إِمّوْشْ لْمَاسِيحْ إِشْثْ ن ثْوَاڒَا ذ ثَاغَارْصْثْ، إِوْشَا ذڭْ يِيخفْ نّسْ ثَاغَارْصْثْ ن دّنْبْ إِ وَاطَّاسْ، مَاشَا غَارْ ثْوَاسِيثْ نّسْ إِ ثْوَاڒَا وِيسّْ ثْنَاينْ أَذْ إِتّْوَاژَارْ بْڒَا دّنْبْ إِ ثُوذَارْثْ ن يِينِّي ث إِتّْرَاجَانْ. ◘9:‏28 رُوم. 5‏:‏6، 8؛ 1 بُط. 3‏:‏18.