١ مِينْزِي ثُوغَا شَّارِيعَا ذ ثِيڒِي ن ڒْْخَارْ إِ د غَا يَاسنْ وَاهَا، وَارْ غَارسْ طّْبِيعثْ ن ثْمسْڒَايِينْ سِيمَانْثْ نْسنْثْ. س ؤُينِّي وَارْ زمَّارنْثْ ثْغَارْصَا نِّي، وَاخَّا إِوْينْ ثنْثْ-إِ-د كُوڒْ أَسڭّْوَاسْ، أَذْ أَوْينْثْ ڒكْمَارثْ خْ يِينِّي ثنْثْ د-إِتّْقَارَّابنْ. ◘10:‏1 كُول. 2‏:‏17؛ عبر. 8‏:‏5. ٢ مِينْزِي مَاڒَا إِبَانْ-د أَقَا ثتَّاوْينْثْ غَارْ ڒكْمَارثْ، أَذْ ثِيڒِي تّْوَاسّْبدّنْ نِيثْنِي زڭْ ؤُوهّبْ ن ثْغَارْصَا نْسنْ أَطَّاسْ زڭْ وَامِي، مِينْزِي وَارْ ثتّْوَاكّْوُورْ عَاذْ ثْنفْسشْثْ نْسنْ س دّنْبْ أَوَارْنِي ڒَْامِي تّْوَاسِّيزذْڭنْ إِشْثْ ن ثْوَاڒَا. ٣ مَاشَا س مَانْ أَيَا تّْوَاسّْفكَّارنْ أَسنْ-د دّْنُوبْ نْسنْ كُوڒْ أَسڭّْوَاسْ، ٤ مِينْزِي إِذَامّنْ ن إِفُونَاسنْ إِمژْيَاننْ ذ إِغَايْضنْ وَارْ زمَّارنْ أَذْ سِّيزْذڭنْ زِي دّْنُوبْ. ◘10:‏4 لَاوِي 16‏:‏14؛ ڒخْڒ. 19‏:‏4؛ عبر. 9‏:‏13. ٥ س ؤُينِّي ڒَْامِي د-يُوذفْ غَارْ دُّونشْثْ، إِنَّا:

”ثِيغَارْصَا نِيغْ ثِيوْهِيبِينْ وَارْ ثنْثْ ثخْسذْ،

مَاشَا أَقَا ثسّْيَارْضذْ أَيِي إِشْثْ ن أَرِّيمثْ. ◘10:‏5 إِزهد. 40‏:‏7؛ إِشا. 1‏:‏11؛ إِرْم. 6‏:‏20؛ عَام. 5‏:‏21.

٦ ثِيغَارْصِينْ ن وشْمَاضْ

أَكْ-ذ ثِيغَارْصَا ن ڒهْنَا إِ دّْنُوبْ

وَارْ ثنْثْ ثتَّارذْ.“

٧ ڒخْذنِّي نِّيغْ:

”خْزَارْ، أَذْ د-أَسغْ!

- مِينْزِي يُورَا خَافِي ذڭْ وذْلِيسْ إِتّْوَانْضنْ -

حِيمَا أَذْ ڭّغْ مِينْ ثخْسذْ شكْ، أَ أَربِّي!“ ◘10:‏7 إِزهد. 40‏:‏8، 9

٨ ثُوغَا إِنَّا قْبڒْ: ”ثِيغَارْصِينْ ذ ثوْهِيبِينْ ذ ثْغَارْصِينْ س ثْمسِّي ذ ثْغَارْصِينْ إِ دّْنُوبْ وَارْ ثنْثْ ثخْسذْ!“، وَاخَّا أَقَا أَثنْثْ تّْوَاقدّْمنْثْ عْلَاحْسَابْ شَّارِيعَا. ٩ أَوَارْنِي مَانْ أَيَا إِنَّا: ”خْزَارْ، ؤُسِيغْ-د حِيمَا أَذْ ڭّغْ مِينْ ثخْسذْ شكْ، أَ أَربِّي.“ س ؤُيَا إِكّسْ أَمزْوَارْ، حِيمَا أَذْ إِسّْڭعّذْ وِيسّْ ثْنَاينْ. ١٠ مَاغَارْ س مَانْ أَيَا، س ڒْْخَاضَارْ نّسْ، أَقَا نتّْوَاقدّسْ ذڭْ إِشْثْ ن ثْوَاڒَا س ثْغَارْصْثْ ن أَرِّيمثْ ن يَاسُوع لْمَاسِيحْ. ◘10:‏10 عبر. 9‏:‏12.

١١ مَاغَارْ كُوڒْ أَكهَّانْ إِ ثُوغَا إِتّْسخَّارْ كُوڒْ أَسّْ، أَقَا إِوهّبْ أَطَّاسْ ن ثْوَاڒَاوِينْ سِيمَانْثْ ن ثْغَارْصَا، ثِينِّي وَارْ إِزمَّارنْ أَذْ سِّيزذْڭنْثْ زِي دّْنُوبْ. ١٢ مَاشَا وَانِيثَا إِقدّمْ إِشْثْ ن ثْغَارْصْثْ خْ دّْنُوبْ، ؤُشَا خنِّي إِقِّيمْ خْ يفُوسْ ن أَربِّي إِ ڒبْذَا. ◘10:‏12 إِزهد. 110‏:‏1؛ ڒخ. 2‏:‏34؛ 1 كُور. 15‏:‏25؛ أَفا. 1‏:‏20؛ كُول. 3‏:‏1؛ عبر. 1‏:‏13. ١٣ زِي ڒخْذنِّي إِتّْرَاجَا أَڒْ ذ أَسْ تّْوَاڭّنْ ڒْْعذْيَانْ نّسْ ذ ثَانبْذَاثْ سَاذُو إِضَارنْ نّسْ. ١٤ مِينْزِي س إِشْثْ ن ثْغَارْصْثْ أَقَا يِيوِي إِنِّي زَّايسْ إِتّْوَاقدّْسنْ غَارْ ڒكْمَارثْ إِ ڒبْذَا.

١٥ مَاشَا أَرُّوحْ إِقدّْسنْ عَاوذْ إِشْهذْ إِ نشِّينْ، إِقَّارْ:

١٦ ”ذ وَا ذ ڒْْعَاهْذْ إِ ذ أَسنْ غَا وْشغْ

أَوَارْنِي إِ وُوسَّانْ نِّي، إِقَّارْ سِيذِي:

’أَذْ ڭّغْ شَّارِيعَا إِنُو ذِي ڒعْقڒْ نْسنْ،

أَذْ ت أَرِيغْ عَاوذْ ذڭْ وُوڒَاونْ نْسنْ، ◘10:‏16 إِرْم. 31‏:‏31‏-‏34؛ رُوم. 11‏:‏27؛ عبر. 8‏:‏8.

١٧ ؤُشَا دّْنُوبْ نْسنْ ذ إِخطَّانْ نْسنْ،

عمَّارْصْ أَذْ ذَايْسنْ فكَّارغْ عَاذْ.‘ “ ◘10:‏17 إِرْم. 31‏:‏33، 34.

١٨ مَانِي إِتِّيڒِي خنِّي وغْفَارْ إِ دّْنُوبْ، وَارْ ذِينْ إِقِّيمْ عَاذْ ثْغَارْصْثْ خْ دّْنُوبْ. ١٩ س ؤُينِّي، أَ أَيْثْمَا، أَقَا غَارْنغْ تِّيقّثْ مَاحنْذْ أَذْ نَاذفْ غَارْ زَّاوشْثْ إِقدّْسنْ س إِذَامّنْ ن يَاسُوع، ◘10:‏19 يُوح. 10‏:‏9؛ 14‏:‏6؛ رُوم. 5‏:‏2؛ أَفا. 2‏:‏13؛ 3‏:‏12. ٢٠ خْ وبْرِيذْ ن جْذِيذْ إِدَّارنْ إِ ذ أَنغْ إِسّوْجذْ أَمْ وبْرِيذْ ن جْذِيذْ إِ د-إِتَّاذْفنْ غَارْ ذَاخڒْ ن ؤُڒحَّافْ ن ثوَّارْثْ، ونِّي ذ ويْسُومْ نّسْ، ٢١ ؤُشَا أَقَا غَارْنغْ عَاوذْ أَرَّايْسْ ن إِكهَّاننْ خْ ثَادَّارْثْ ن أَربِّي. ◘10:‏21 أَفا. 2‏:‏19؛ 1 تِيم. 3‏:‏1؛ 1 بُط. 4‏:‏17 ٢٢ أجّْ أَنغْ خنِّي أَذْ د-نْقَارّبْ س وُوڒْ ن ثِيذتّْ، ذِي تِّيقّثْ ن لْ-إِيمَانْ، أَمْ تّْوَارُوشّنْ وُوڒَاونْ نّغْ ؤُ تّْوَاسِّيزْذڭنْ عَاوذْ زِي ثْنفْسشْثْ ثَاعفَّانْثْ، ؤُ أَمْ ثتّْوَاسِّيرْذْ عَاوذْ أَرِّيمثْ نّغْ س وَامَانْ إِصْفَانْ. ◘10:‏22 حِز. 36‏:‏25. ٢٣ أجّْ أَنغْ أَذْ نْشبَّارْ ذِي شّْهَاذثْ ن ؤُسِيثمْ نّغْ بْڒَا مَا أَذْ نَارْجِيجْ، مِينْزِي ذ ونِّي ذ أَنغْ إِوْشِينْ لْوَاعْذْ، ذَايسْ ڒَْامَانْ. ٢٤ أجّْ أَنغْ أَذْ نحْضَا إِجّْ إِ ونّغْنِي حِيمَا أَذْ نڭّْ ؤُڒْ ذڭْ وَايَاوْيَا غَارْ ثَايْرِي ؤُ غَارْ ڒخْذَايمْ ثِيصبْحَانِينْ. ٢٥ وَارْ نتّجِّي شَا ثَامسْمُونْثْ نّغْ أَمْ مَامّشْ نُّومنْ شَا، مَاشَا أَذْ نسّمْحضْ إِجّنْ ونّغْنِي، مَاهُو عَاذْ خْمِي غَا ثْژَارمْ أَقَا أَسّْ نِّي يِيوضْ-د.

٢٦ مِينْزِي مَاڒَا إِخْضَا شَا ن إِجّْ نعْمَاذَا أَوَارْنِي مَا إِطّفْ ثُوسّْنَا ن ثِيذتّْ، خنِّي وَارْ ثقِّيمْ عَاذْ ثْغَارْصْثْ خْ دّْنُوبْ، ◘10:‏26 ڒخْڒ. 15‏:‏30؛ مت. 12‏:‏31؛ عبر. 6‏:‏4؛ 2 بُط. 2‏:‏20؛ 1 يُوح. 5‏:‏16. ٢٧ مَاشَا مْغِيرْ أَرَاجِي ن لْحِيسَابْ إِسّْنخْڒْعنْ ذ ڒْْعابُوقْ ن ثْمسِّي نِّي إِ غَا إِشّنْ ڒْْعذْيَانْ. ٢٨ مَاڒَا إِخْضَا حذْ أَكْ-ذ شَّارِيعَا ن مُوسَا، إِتّْخصَّا أَذْ إِمُّوثْ بْڒَا أَرّحْمثْ خْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ. ◘10:‏28 ڒخْڒ. 35‏:‏30؛ أَعَوذ. 17‏:‏6؛ 19‏:‏15؛ مت. 18‏:‏16؛ 2 كُور. 13‏:‏1. ٢٩ مشْحَاڒْ كْثَارْ إِتّْخصَّا أَذْ إِهْوَا لْعِيقَابْ خْ ؤُزدْجِيفْ ن ونِّي إِعفّْسنْ خْ مِّيسْ ن أَربِّي، ذ ونِّي إِحسّْبنْ إِذَامّنْ ن ڒْْعَاهْذْ نّسْ إِ زِي ثُوغَا إِتّْوَاقدّسْ أَمشْنَاوْ إِذَامّنْ ن مَارَّا إِوْذَانْ، ذ ونِّي إِسّحْقَارنْ عَاوذْ أَرُّوحْ ن أَرْضَا؟ ٣٠ مِينْزِي نسّنْ ذ ونِّي إِنَّانْ:

”أَنْثَاقمْ إِ نشّْ ؤُمِي إِدْجَا،

نشّْ أَذْ ث خدْجْصغْ!“

ؤُشَا عَاوذْ:

”سِيذِي أَذْ إِحْكمْ ڒْْڭنْسْ نّسْ.“ ◘10:‏30 أَعَوذ. 32‏:‏35، 36؛ رُوم. 12‏:‏19.

٣١ سّعْذْ ذ أَبَارْشَانْ إِ ونِّي إِ غَا إِوْضَانْ ذڭْ إِفَاسّنْ ن أَربِّي إِدَّارنْ. ٣٢ س ؤُيَا فكَّارمْ ذڭْ وُوسَّانْ إِمزْوُورَا ڒَْامِي ثتّْوَاسّْغضْصمْ ؤُ ثُوغَا ثَاربُّومْ أَمنْغِي أَمقّْرَانْ أَمْ مَامّشْ خَاومْ ثكَّا ڒفْضِيحثْ ذ ڒْْمحْنثْ. ٣٣ ثْذوْڒمْ ذ إِجّْ ن أَفُورّجْ ؤُ ثْشَارْشمْ أَكْ-ذ إِنّغْنِي ؤُمِي ذَايْسنْ إِتّْوَاڭّْ أَمُّو كِيفْكِيفْ. ٣٤ مِينْزِي ثكْسِيمْ أَمْنُوسْ خْ يِينِّي إِتّْوَاحبّْسنْ، ؤُشَا ثْقبْڒمْ أَكشّضْ ن وَاڭْڒَا نْومْ س ڒفْرَاحثْ، ثسّْنمْ بلِّي غَارْومْ أَڭْڒَا إِمْغَارْ إِ وَارْ إِفنِّينْ ذڭْ إِجنْوَانْ. ◘10:‏34 مت. 5‏:‏12؛ ڒخ. 21‏:‏33. ٣٥ وَارْ نطَّارمْ شَا ثَارْيَاسْثْ نْومْ نِّي غَارْ ثدْجَا إِشْثْ ن ڒْْمُونثْ ثمْغَارْ. ٣٦ مِينْزِي إِتّْخصَّا كنِّيوْ صّْبَارْ حِيمَا أَذْ ثڭّمْ مِينْ إِخْسْ أَربِّي ؤُ مَاحنْذْ أَذْ ثطّْفمْ لْوَاعْذْ. ◘10:‏36 لك. 21‏:‏19.

٣٧ ”مِينْزِي ذْرُوسْ ن ڒْْوقْثْ إِ ذِينِّي، وَاهْ ذْرُوسْ،

أَڒْ ونِّي د غَا يَاسنْ أَذْ إِخشّْ،

وَارْ إِتّْعطَّاڒْ شَا. ◘10:‏37 حَاب. 2‏:‏2‏-‏3؛ Ḥag. 2‏:‏7؛ 1 بُط. 1‏:‏6؛ 5‏:‏10.

٣٨ مَاشَا أَمْسڭَّاذْ س لْ-إِيمَانْ إِنُو أَذْ إِدَّارْ،

مَاشَا مَاڒَا إِسْمحْ،

وَارْ ذَايسْ يَارطِّي ڒعْمَارْ إِنُو.“ ◘10:‏38 حَاب. 2‏:‏4؛ رُوم. 1‏:‏17؛ ڭال. 3‏:‏11.

٣٩ مَاشَا نشِّينْ وَارْ غَارْنغْ مِينْ غَا نڭّْ س ثَارخُّوثْ إِ إِتَّاوْينْ غَارْ ثْخسَّارْثْ، مَاشَا غَارْنغْ لْ-إِيمَانْ إِ إِتَّاوْينْ غَارْ ؤُسنْجمْ ن ڒعْمَارْ نّغْ.