١٣
أَوَاڒْ غَارْ ؤُنڭَّارْ أَكْ-ذ ؤُسدْجمْ
١ أجّْ أَذْ ثقِّيمْ ثَايْرِي ن ثَاوْمَاثْ جَارْ أَومْ.
◘ ٢ وَارْ ثتُّومْ شَا أَذْ ثِيڒِيمْ ثشْنَامْ أَكْ-ذ إِبَارَّانِييّنْ، أَقَا زعْمَا س ؤُيَا أَرحّْبنْ شَا س لْمَالَاكَاثْ أَمْ وَارْ سِّيننْ.
◘ ٣ خَارّْصمْ ذڭْ إِمحْبَاسْ أَخْمِي كنِّيوْ حبّْسمْ أَكِيذْسنْ، خَارّْصمْ ذڭْ إِنِّي إِتّْوَاحْسَارنْ، أَمْ إِوْذَانْ
أَمْ كنِّيوْ، إِنِّي يَارْضنْ أَيْسُومْ
ن أَرِّيمثْ.
◘ ٤ أجّْ أَذْ يِيڒِي ڒمْڒَاشْ ذ أَوقَّارْ غَارْ مَارَّا، ذ قَامَا نْسنْ ن ڒمْڒَاشْ ذ أَمزْذَاڭْ، مَاشَا أَربِّي أَذْ إِحْكمْ خْ أَيْثْ ن فَارْقْ-شّْغڒْ ؤُ خْ يِينِّي إِتّڭّنْ زِّينَا.
٥ وَارْ تّڭّمْ نّيّثْ نْومْ ذِي ثنْعَاشِينْ، مَاشَا قنْعمْ س مِينْ غَارْومْ، مِينْزِي سِيذِي إِنَّا:
”نشّْ وَارْ شكْ تّجِّيغْ
نِيغْ أَذْ سمّْحغْ ذڭْ ؤُفُوسْ نّشْ.“ ◘
٦ مَانْ أَيَا إِتّْوَانَّا إِ نشِّينْ، مَاحنْذْ أَذْ نِينِي س ثرْيَاسْثْ:
”سِيذِي ذ أَمْعَاونْ إِنُو، وَارْ تّڭّْوْذغْ شَا،
مِينْ ذ أَيِي غَا يڭّْ بْنَاذمْ؟“ ◘
٧ عقْڒمْ خْ إِمْڭوَّاذنْ نْومْ، إِنِّي ذ أَومْ إِسِّيوْڒنْ أَوَاڒْ ن أَربِّي. بقّْشمْ ڒْْغِيدْجثْ ن ثشْرِي نْسنْ ؤُشَا ضْفَارمْ لْ-إِيمَانْ نْسنْ.
◘
٨ يَاسُوع لْمَاسِيحْ ذ نتَّا نتَّا إِضنَّاضْ ذ يِيضَا، ؤُ إِ ڒبْذَا.
٩ وَارْ ثجِّيمْ أَذْ كنِّيوْ غَارّنْ س ثْغُورِيوِينْ إِتّْبدَّاڒنْ
ن ذغْيَا، مِينْزِي ڒْْحَاجّثْ ن لمْلِيحْ مَاڒَا شبَّارنْ وُوڒَاونْ نّغْ ذِي أَرْضَا، وَارْ إِدْجِي ذِي مَاشَّا، مِينْزِي إِنِّي ثُوغَا ذَايسْ يڒْهَانْ، وَارْ ذَايسْ ؤُفِينْ بُو نّْفعْ.
◘ ١٠ غَارْنغْ إِجّْ ن ؤُعَالْطَارْ إِ ؤُمِي وَارْ إِعدّڒْ أَذْ زَّايسْ شّنْ إِنِّي إِتّْسخَّارنْ ذِي ثْزذِّيغْثْ.
١١ مِينْزِي زڭْ إِمُودَّارنْ، إِنِّي إِذَامّنْ نْسنْ تّْوَاكْسِينْ غَارْ زَّاوشْثْ إِقدّْسنْ س ؤُفُوسْ ن أَرَّايْسْ ن إِكهَّاننْ، إِتّْوَاسَّارْغْ ويْسُومْ نْسنْ بَارَّا إِ ڒْْمَارْڭحْ.
◼ ◘ ١٢ س ؤُينِّي ثُوغَا يَاسُوع إِمَارّثْ عَاوذْ بَارَّا إِ ثنْذِينْثْ، حِيمَا أَذْ إِسّْقدّسْ ڒْْڭنْسْ س إِذَامّنْ نّسْ.
◘ ١٣ س ؤُينِّي أجّْ أَنغْ أَذْ نفّغْ غَارْ بَارَّا ن ڒْْمَارْڭحْ، أَمْ نَاربُّو ڒْْعَارْ نّسْ.
١٤ مِينْزِي وَارْ غَارْنغْ ذَا ثَانْذِينْثْ ن ڒبْذَا، مَاشَا نَارزُّو خْ ثنِّي إِ د غَا يَاسنْ.
◘ ١٥ أجّْ أَنغْ ڒبْذَا أَذْ زَّايسْ نْقدّمْ ثِيوْهِيبِينْ ن ؤُسمْغَارْ إِ أَربِّي، ڒْْغِيدْجثْ ن إِينْشِيشنْ نِّي د-إِتّْوَاينْ أَقَاذِي إِ يِيسمْ نّسْ.
◘ ١٦ وَارْ تّتُّومْ شَا أَرّحْمثْ ؤُڒَا ذ ثشْرِيمثْ إِ إِمژْڒَاضْ، مِينْزِي س ثوْهِيبِينْ-أَ أَذْ يَارْضَا بْنَاذمْ أَربِّي.
◘ ١٧ إِڒِيمْ ذ إِمْثِيقَّانْ إِ يِينِّي إِ كنِّيوْ إِتّْڭوَّاذنْ، طَاعمْ أَسنْ، مِينْزِي نِيثْنِي تّْعسَّانْ خْ ڒعْمُورْ نْومْ أَمْ يِينِّي إِتّڭّنْ ڒحْسَابْ خَاومْ، حِيمَا أَذْ ت ڭّنْ س ڒفْرَاحثْ، وَارْ إِدْجِي س ؤُوحْوحْ، مِينْزِي مَانْ أَيَا وَارْ كنِّيوْ إِنفّعْ.
◘ ١٨ ژَتدْجمْ خَانغْ، مِينْزِي غَارْنيْ تِّيقّثْ بلِّي غَارْنغْ ثَانفْسشْثْ ثشْنَا، أَمْ ذَايْنغْ مژْرِي، حِيمَا أَذْ نُويُورْ نِيشَانْ ذِي مَارَّا. ١٩ تّْزَاوْڭغْ كنِّيوْ س جّهْذْ أَذْ ثڭّمْ أَمُّو غَارْ ؤُمزْوَارُو، حِيمَا خنِّي نشّْ ذغْيَا أَذْ غَارْومْ د-ذوْڒغْ.
٢٠ أَربِّي ن ڒهْنَا ونِّي د-إِسّْنكَّارنْ أَمكْسَاوْ أَمقّْرَانْ ن وُودْجِي، يَاسُوع لْمَاسِيحْ، سِيذِيثْنغْ، زِي ثَادَّارْثْ ن إِمتِّيننْ س إِذَامّنْ ن ڒْْعَاهْذْ إِ ڒبْذَا،
◘ ٢١ أَذْ كنِّيوْ إِكمّڒْ ذِي كُوڒْ ڒْْخذْمثْ إِشْنَانْ، حِيمَا أَذْ ثڭّمْ مِينْ إِخْسْ نتَّا. نتَّا أَذْ ذَايْنغْ إِڭّْ مِينْ إِدْجَانْ إِ أَرْضَا نّسْ س يَاسُوع لْمَاسِيحْ ونِّي غَارْ إِدْجَا ؤُعُودْجِي إِ ڒبْذَا قَاعْ. أَمِينْ.
◘ ٢٢ خنِّي تّْزَاوَاڭغْ زَّايْومْ، أَ أَيْثْمَا إِنُو، قبْڒمْ أَوَاڒْ-أَ ن ؤُسجّعْ س تَّاسِيعْ ن ڒْْخَاضَارْ، مِينْزِي ؤُرِيغْ أَومْ-د س ذْرُوسْ.
٢٣ سْنمْ أَقَا أَرْخُونْ إِ ؤُمَاثْنغْ ثِيمُوثِييُو. مَاڒَا يُوسَا-د ذغْيَا، أَذْ كنِّيوْ ژَترغْ أَكِيذسْ.
٢٤ سدْجْممْ خْ مَارَّا إِنِّي إِ كنِّيوْ إِتّْڭوَّاذنْ س ڒحْنَا ؤُ خْ مَارَّا إِمْقدَّاسنْ. مَارَّا أَوْمَاثنْ ن إِطَالْيَا تّْسدْجَامنْ-د خَاومْ س ڒهْنَا.
٢٥ أَرْضَا أَذْ كِيذْومْ يِيڒِي مَارَّا. أَمِينْ.