١ ”وَارْ فَارّحْ شَا أَمُّو، إِسْرَائِيل، أَڒَامِي إِ غَا ثسْڒِيوْڒِيوذْ أَمْ ڒڭْنُوسْ. مَاغَارْ ثِيڭّْوجذْ خْ أَربِّي نّشْ أَمْ ثسّفْسذذْ إِخفْ نّشْ. ثتّخْسذْ ڒْْمُونثْ ن إِشْثْ ن ثمْغَارْثْ ن فَارْقْ-شّْغڒْ ذِي مَارَّا إِنذْرَارْ ن ؤُسَارْوثْ ن إِمنْذِي. ٢ أَنْذْرَارْ ذ ثْسِيرْثْ ن ؤُضِيڒْ وَارْ ذ أَسنْ سّشّنْ شَا ؤُ بِينُو ن جْذِيذْ أَذْ ت إِخيّبْ. ٣ نِيثْنِي وَارْ تّْغِيمَانْ شَا ذِي ثمُّورْثْ ن سِيذِي. إِفْرَايِيمْ أَذْ د-إِذْوڒْ غَارْ مِيصْرَا ؤُ نِيثْنِي أَذْ شّنْ مِينْ إِخمْجنْ ذِي أَشُّورْ. ٤ نِيثْنِي وَارْ سيّْبنْ شَا ثِيوْهِيبِينْ ن بِينُو إِ سِيذِي ؤُ ثِيغَارْصَا نْسنْ وَارْ خَاسْ أَرطَّانْثْ. أَذْ أَسنْ إِڒِينْثْ أَمْ وغْرُومْ ن يِينِّي إِشطّْننْ. مَارَّا إِنِّي ث إِشّنْ، أَذْ ذوْڒنْ خمْجنْ، مَاغَارْ أَغْرُومْ نْسنْ أَذْ يِيڒِي إِ ڒعْمَارْ نْسنْ، وَارْ د-إِتِّيسْ ذِي ثَادَّارْثْ ن سِيذِي. ٥ مِينْ غَا ثڭّمْ خنِّي ذڭْ إِجّْ ن وَاسّْ ن ڒْْعِيذْ إِتّْوَاڭّنْ، ذڭْ وَاسّْ ن ڒْْعِيذْ ن سِيذِي؟ ٦ مَاغَارْ، خْزَارْ، أَقَا نِيثْنِي تَّاڭّْوجنْ زِي سِّيبّثْ ن ؤُردّدْجْ. مِيصْرَا أَذْ ثنْ إِسّْمُونْ، مُوفْ أَذْ ثنْ ثنْضڒْ. إِرزَّازنْ أَذْ مژّْرنْ ذِي نُّوقَارْثْ نْسنْ، شْبَارْقْ أَكْ-ذ إِسنَّاننْ أَذْ إِطّفْ أَمْشَانْ ن إِقِيضَانْ نْسنْ. ◼9:‏6 ’مُوفْ‘ - إِسمْ وَانِيثَا إِخْسْ أَذْ يِينِي ’مِيمْفِيسْ‘، ثَانْذِينْثْ ثَاقْذِيمْثْ أَطَّاسْ ن مِيصْرَا. أَذْ ثَافذْ إِسمْ وَانِيثَا ذِي إِشا. 19:13، إِرْم. 2:16، 44:1 ذ حِز. 30:13، 16 ذ هُوشِييَا 9:6.

٧ أَقَا ؤُسَّانْ ن ؤُجَارّبْ ؤُسِينْ-د، أَقَا ؤُسَّانْ ن لْعِيقَابْ ؤُسِينْ-د. نِيثْنِي أَذْ ت سّْننْ، إِنِّي ن إِسْرَائِيل. أَنَابِي أَمْ يِيجّْ ن أَبُوهَاڒِي إِ نِيثْنِي، أَرْيَازْ أَرُّوحَانِي أَمْ يِيجّْ ن بُو-جْنُونْ زڭْ وَاطَّاسْ ن ڒْْمُوعْصِييّثْ نّشْ ذ وَاطَّاسْ ن ڒعْذَاوثْ نّشْ. ٨ أَعسَّاسْ ن إِفْرَايِيمْ إِتّْعسَّاسْ أَكْ-ذ ؤُعَاونْ ن أَربِّي إِنُو، وَاهْ، نتَّا، أَنَابِي إِتَّافْ إِجّْ ن ڒْْفخْ ن ؤُنڭْمَارْ ذِي مَارَّا إِبْرِيذنْ نّسْ، ڒعْذَاوثْ ذِي ثَادَّارْثْ ن أَربِّي نّسْ. ◘9:‏8 إِرْم. 6‏:‏17 ٩ مَاغَارْ أَقَا أَثنْ غَارْقنْ أَڒْ إِڒِي، أَمْ ذڭْ وُوسَّانْ نِّي ن جِيبْعَا. نتَّا أَذْ إِعْقڒْ خْ ڒْْمُوعْصِييّثْ نْسنْ ؤُ أَذْ إِخْڒفْ دّْنُوبْ نْسنْ.“

١٠ ”نشّْ ؤُفِيغْ إِسْرَائِيل أَمْ ؤُضِيڒْ ذِي ڒخْڒَا، ژْرِيغْ ڒجْذُوذْ نْومْ أَمْ يِيمنْزَا ن وَارْثُو ذِي ثمْژِي نْسنْ. نِيثْنِي مَاشَا ؤُذْفنْ غَارْ بَاعْلْ-فَاغُورْ ؤُشَا وْشِينْ إِخفْ نْسنْ س ڒفْضِيحثْ إِ نتَّا ؤُشَا نِيثْنِي ذوْڒنْ ذ نّْعَاوَاثْ أَمْ ونِّي ثُوغَا تّخْسنْ. ◘9:‏10 ڒخْڒ. 25‏:‏3؛ إِزهد. 106‏:‏28 ١١ خْ يِينِّي ن إِفْرَايِيمْ، أَقَا أَعُودْجِي نْسنْ أَذْ إِضُو أَمْ وجْضِيضْ، أَذْ يَاڭّْوجْ خْ وخْڒَاقْ ؤُ خْ ؤُعذِّيسْ ن يمَّاسْ ؤُ خْ ثْكسِّيثْ ن ثَارْوَا. ١٢ وَاخَّا نِيثْنِي سّْيَامنْ إِحنْجِيرنْ نْسنْ أَڒْ غَا مْغَارنْ، نشّْ أَذْ ثنْ أَرّغْ نْهْڒَا إِحنْجِيرنْ أَڒَامِي وَارْ ذِينْ إِقِّيمْ بْنَاذمْ. مَاغَارْ ؤُڒَا إِ نِيثْنِي س ثِيذتّْ، ؤُشْثْ، خْمِي خَاسنْ غَا حيّْذغْ. ١٣ أَخْمِي ژْرِيغْ صُورْ، أَمُّو إِ إِتّْوَاژُّو إِفْرَايِيمْ ذڭْ إِشْثْ ن جِّيهثْ أَرْضَانْ. ؤُ ڒخُّو إِتّْخصَّا إِ إِفْرَايِيمْ أَذْ إِسلّمْ ثَارْوَا نّسْ إِ ؤُقتَّاڒْ. ١٤ أوْشْ أَسنْ، أَ سِيذِي! مِينْ إِ غَا ثوْشذْ؟ أوْشْ أَسنْ إِجّْ ن ؤُعذِّيسْ س وطُّووْ ن إِسيْمَانْ ذ يبَّاشْ يُوژْغنْ. ◘9:‏14 لك. 23‏:‏29 ١٥ مَارَّا ثَاعفَّانْثْ نْسنْ ثْعَارَّا ذِي جِيلْجَالْ، مَاغَارْ ذِينِّي شَارْهغْ ثنْ خْ ثْعفَّانْثْ ن ثْمڭَّا نْسنْ. نشّْ أَذْ خَاسنْ أَژّْڒغْ زِي ثَادَّارْثْ إِنُو.عمَّارْصْ عَاذْ أَذْ ثنْ خْسغْ عَاذْ، مَارَّا ڒْْحُوكَّامْ نْسنْ ذ إِمْغوّْغنْ. ◘9:‏15 إِشا. 1‏:‏23؛ حُوش. 4‏:‏15؛ 12‏:‏12 ١٦ إِفْرَايِيمْ إِتّْوَاوّثْ، إِژوْرَانْ نْسنْ ؤُژْغنْ، وَارْ تِّيرْونْ عَاذْ. وَاخَّا نِيثْنِي تَّارْونْ، نشّْ أَذْ نْغغْ إِمْعِيزَّانْ ن ؤُعذِّيسْ نْسنْ. ١٧ أَربِّي إِنُو أَذْ ثنْ إِنْضَارْ، مَاغَارْ نِيثْنِي وَارْ غَارسْ تّسْڒِينْ، ؤُ نِيثْنِي أَذْ ذوْڒنْ تّثْلِيعنْ جَارْ ڒڭْنُوسْ.“