١ مَانِيسْ د-إِكَّا ؤُمنْغِي ذ إِمْشُوبّشنْ جَارْ أَومْ؟ مَا زعْمَا زڭْ شّهْوَاثْ إِ إِمّنْغنْ ذڭْ إِغزْذِيسنْ نْومْ؟ ◘4:‏1 رُوم. 7‏:‏23؛ 1 بُط. 2‏:‏11. ٢ كنِّيوْ ثمّژْرمْ مَاشَا كنِّيوْ وَارْ غَارْومْ وَالُو. كنِّيوْ ثْنقّمْ ؤُ ثتَّاسْممْ ؤُشَا قَاعْ أَمنِّي وَارْ د أَومْ إِتِّيكّْوِيضْ وَالُو. كنِّيوْ ثتّمْشُوبُّوشمْ ؤُ ثتّْمنْغَامْ، مَاشَا وَارْ غَارْومْ وَالُو، مِينْزِي كنِّيوْ وَارْ ثتّتَّارَامْ. ٣ نِيغْ كنِّيوْ ثتّتَّارَامْ، مَاشَا وَارْ ثكْسِيمْ شَا، مِينْزِي ثتّتَّارمْ مِينْ وَارْ إِحْڒِينْ، حِيمَا أَذْ ثڭّمْ غَارْ شّهْوَاثْ نْومْ. ◘4:‏3 مت. 20‏:‏22؛ رُوم. 8‏:‏26. ٤ أَ كنِّيوْ إِنِّي إِزنَّانْ! مَا وَارْ ثسِّينمْ شَا بلِّي ثَامخْسِيوْثْ ن دُّونشْثْ أَقَا-ت ذ ڒعْذَاوثْ خْ أَربِّي؟ أَحقَّا ونِّي إِتّخْسنْ أَذْ يِيڒِي ذ أَمدُّوكّڒْ ن دُّونشْثْ، أَذْ يِيڒِي ذ ڒعْذُو ن أَربِّي. ◘4:‏4 يُوح. 15‏:‏9؛ ڭال. 1‏:‏10؛ 1 يُوح. 2‏:‏15. ٥ نِيغْ إِتّْغِيڒْ أَومْ بلِّي ثِيرَا إِقدّْسنْ وَارْ غَارْسنْثْ لْمعْنَا:

”أَرُّوحْ إِ ذَايْنغْ إِزدّْغنْ

إِتَّاسمْ س ثُوسْمِي!“؟ ◘4:‏5 ڒخْڒ. 11‏:‏29.

٦ مَاشَا سِيذِيثْنغْ إِتِّيشْ أَنغْ أَرْضَا كْثَارْ، مَاغَارْ إِنَّا:

”أَربِّي إِسّْوَاضّعْ إِمْعفَّارنْ،

مَاشَا إِ إِمْوَاضْعنْ إِتِّيشْ أَسنْ أَرْضَا.“ ◘4:‏6 أَوڒن. 3‏:‏34؛ 1 بُط. 5‏:‏5.

٧ س ؤُيَا مَارْسمْ إِخفْ نْومْ زَّاثْ إِ أَربِّي، مْعَاڒَامْ أَكْ-ذ شِّيطَانْ ؤُشَا نتَّا أَذْ زَّايْومْ يَارْوڒْ. ◘4:‏7 أَفا. 4‏:‏27؛ 1 بُط. 5‏:‏9. ٨ أَذْسمْ أَربِّي ؤُشَا نتَّا أَذْ كنِّيوْ د-يَاذسْ. سِيرْذمْ إِفَاسّنْ نْومْ، أَ إِمذْنَابْ، قدّْسمْ ؤُڒَاونْ نْومْ، أَ كنِّيوْ، إِنِّي غَارْ إِدْجَا ثْنَاينْ ن إِزدْجِيفنْ. ٩ مَارْسمْ إِخفْ نْومْ، شضْنمْ! جّمْ ثَاضحَّاشْثْ نْومْ أَذْ ثذْوڒْ ذ أَشْضَانْ ؤُ ڒفْرَاحثْ نْومْ أَذْ ثذْوڒْ ذ ڒحْزنْ. ◘4:‏9 مت. 5‏:‏4. ١٠ مَارْسمْ إِخفْ نْومْ زَّاثْ إِ سِيذِي ؤُشَا نتَّا أَذْ كنِّيوْ إِسّْعُودْجْ. ◘4:‏10 أَيُوبْ 22‏:‏29؛ أَوڒن. 29‏:‏23؛ مت. 23‏:‏12؛ لك. 14‏:‏11؛ 18‏:‏14؛ 1 بُط. 5‏:‏6.

١١ أَ أَيْثْمَا، وَارْ تّْشقَّافمْ شَا ذڭْ وَايَاوْيَا! ونِّي إِشقَّافنْ ذڭْ ؤُمَاسْ نِيغْ إِحكّمْ خْ ؤُمَاسْ، أَقَا وَا إِتّْشقَّافْ ذِي شَّارِيعَا ؤُشَا إِحكّمْ خْ شَّارِيعَا. ؤُشَا مَاڒَا ثْحكْمذْ خْ شَّارِيعَا، أَقَا وَارْ ثدْجِيذْ شَا ذ ونِّي إِتّڭّنْ شَّارِيعَا، مَاشَا ثَارِّيذْ إِخفْ نّشْ ذ ڒْْقَاضِي ن شَّارِيعَا. ١٢ إِجّنْ وَاهَا إِ إِدْجَانْ ذ بَابْ ن شَّارِيعَا، نتَّا ذ ونِّي غَارْ ثدْجَا ثْزمَّارْ، حِيمَا أَذْ إِوْشْ ثُوذَارْثْ نِيغْ أَذْ ت يَاريّبْ. مَاشَا مِينْ ثعْنِيذْ شكْ ؤُمِي ثْحكّْمذْ خْ جَّارْ نْومْ؟

١٣ مَا خنِّي إِ غَا نِينِي خْ يِينِّي إِقَّارنْ: ”أَسّْ-أَ نِيغْ ثِيوشَّا أَذْ نْرَاحْ غَارْ ثنْذِينْثْ-أَ غَارْ ثنْذِينْثْ-إِنْ، أَذْ ذِينْ نڭّْ ثَاسبَّابْثْ ڒْْمِيجَاڒْ ن إِجّْ ن ؤُسڭّْوَاسْ، أَذْ نْسغْ أَذْ نزّنْزْ أَذْ نَارْبحْ!“؟ ◘4:‏13 لك. 12‏:‏18. ١٤ نِيثْنِي وَارْ سِّيننْ مَامّشْ غَا ثِيڒِي ثِيوشَّا. مِينْ ثعْنَا ثُوذَارْثْ نّغْ؟ أَقَا-ت مْغِيرْ ذ إِجّْ ن ڒفْوَارْ إِ غَا د-إِضْهَارْ، أَذْ إِذُورّقْ، أَذْ ثفْسِي ڒخْذنِّي. ◘4:‏14 إِشا. 40‏:‏6؛ 1 كُور. 7‏:‏31؛ يَاع. 1‏:‏10؛ 1 بُط. 1‏:‏24؛ 1 يُوح. 2‏:‏17. ١٥ س ؤُيَا إِتّْخصَّا أَذْ إِنِينْ: ”مَاڒَا إِخْسْ سِيذِي، أَذْ ندَّارْ، أَذْ نڭّْ ثَا ذ ثِينْ.“ ◘4:‏15 ڒخ. 18‏:‏21؛ 1 كُور. 4‏:‏19؛ عبر. 6‏:‏3. ١٦ إِوَا نِيثْنِي تّْفيّْشنْ ذڭْ ؤُعفَّارْ نْسنْ، مَاشَا قَاعْ أَفيّشْ-أَ ذ أَعفَّانْ. ١٧ ونِّي إِسّْننْ مَامّشْ إِ غَا إِڭّْ ڒْْخَارْ ؤُشَا وَارْ ث إِتّڭّْ، أَذْ أَسْ د-إِتّْوَاحْسبْ ذ دّنْبْ. ◘4:‏17 لك. 12‏:‏47.