أَذْلِيسْ إِقدّْسنْ يَاعْقُوبْ ٥

أَعْڒَامْ غَارْ أَيْثْبَابْ ن وَاڭْڒَا

١ إِوَا كنِّيوْ، أَ أَيْثْبَابْ ن وَاڭْڒَا، سْحِيسّْفمْ، رُومْ إِ لْمُوصِيبَاثْ إِ كنِّيوْ إِتّْرَاجَانْ. ◘ ٢ مِينْزِي أَڭْڒَا نْومْ أَقَا إِغُومّْ، يَارْصُوضْ، ؤُشَا أَرُّوضْ نْومْ شِّينْ ث ثْشِينْذَا، ٣ ؤُرغْ نْومْ ذ نُّوقَارْثْ نْومْ أَقَا أَرْشَانْ ؤُشَا أَرشِّي نْسنْ أَذْ خَاومْ ثشْهذْ، أَذْ إِشّْ دَّاثْ نْومْ أَمْ ثْمسِّي. أَقَا كنِّيوْ ثيْرُومْ ثِيمسِّي إِ يِيخفْ نْومْ إِ وُوسَّانْ إِنڭُّورَا. ◘ ٤ خْزَارْ، ڒْْمُونثْ ن إِشوَّاڒنْ نِّي ثسّْعِيزّمْ خْ ينِّي إِمْجَارنْ إِيَّارنْ نْومْ ثسْغُويُّو، ؤُشَا ثْغُويِّيثْ ن يِينِّي إِمْجَارنْ ثِيوضْ أَسْ-د أَڒْ إِمزُّوغنْ ن سِيذِي ن ڒْْعسْكَارَاثْ. ◘ ٥ أَقَا كنِّيوْ ثْفيّْشمْ خْ ثمُّورْثْ، ثضْفَارمْ مژْرِي نْومْ. أَقَا ثسّْجِيوْنمْ أَرِّيمَاثْ نْومْ أَمْ ذڭْ وَاسّْ ن ثْغَارْصِيثْ. ◘ ٦ أَقَا كنِّيوْ ثْحكْممْ خْ ؤُمْسڭَّاذْ س ڒْْموْثْ، أَمْ نتَّا وَارْ خَاومْ إِمّْعَاڒَا شَا.

ضّْبَارْ ذِي ثَامَارَا ؤُ ذڭْ ؤُودّبْ

٧ مَاشَا كنِّيوْ، أَ أَيْثْمَا، صْبَارمْ أَڒْ د غَا يَاسْ سِيذِي، أَمْ مَامّشْ إِتّْرَاجَا ؤُفدْجَاحْ غَارْ ڒْْغِيدْجثْ إِغْڒَانْ ن ثمُّورْثْ، إِصْبَارْ س ڒْْخَاضَارْ أَڒْ خَاسْ إِوّثْ ونْژَارْ ن زِيشْ ذ ؤُنڭَّارْ. ٨ ؤُڒَا ذ كنِّيوْ، صْبَارمْ، سْمحّْذمْ ؤُڒَاونْ نْومْ، أَقَا ثَاوَاسِيثْ ن سِيذِيثْنغْ ثُوذسْ-د. ٩ أَ أَيْثْمَا، وَارْ ثْسُوضمْ خْ وَايَاوْيَا، حِيمَا وَارْ غَارْومْ د-إِتِّيكّْوِيضْ ڒْْحُوكْمْ. مَاغَارْ خْزَارْ، ڒْْقَاضِي إِبدّْ غَارْ ثوَّارْثْ. ١٠ أَ أَيْثْمَا، مْقُودَّامْ أَكْ-ذ إِنَابِييّنْ إِنِّي ثُوغَا إِسِّيوْڒنْ س يِيسمْ ن سِيذِي مَاحنْذْ أَذْ ثصْبَارمْ ذِي ڒحْصَارَاثْ نْومْ. ١١ خْزَارمْ، أَذْ نْبَاركْ إِنِّي إِتّْصبَّارنْ. أَقَا كنِّيوْ ثسْڒَامْ خْ صّْبَارْ ن أَيُوبْ ؤُشَا ثْوَاڒَامْ ڒْْغِيدْجثْ ثنِّي ذ أَسْ إِڭَّا سِيذِي، مَاغَارْ سِيذِي ذ أَرْحِيمْ ذ أَحْنِينْ. ◘

طِيوصَّا ثِينڭُّورَا

١٢ أَمزْوَارُو ن مَارَّا، أَ أَيْثْمَا، وَارْ تّْجَادْجَامْ شَا، ڒَْا غَارْ ؤُجنَّا ڒَْا غَارْ ثمُّورْثْ ؤُشَا ؤُڒَا ذ إِشْثْ ن ثْجَادْجِيثْ نّغْنِي. أَذْ غَارْومْ يِيڒِي ’وَاهْ!‘ نْومْ ذ ’وَاهْ!‘، ذ ’لَّ!‘ نْومْ ذ ’لَّ!‘، نِيغْ أَقَا أَذْ ثِيڒِيمْ سَاذُو ڒْحُوكْمْ. ◘

١٣ مَا أَقَا ذِينْ شَا ن إِجّنْ جَارْ أَومْ إِودّبْ؟ أجّْ إِ-ث أَذْ إِتَّارْ. مَا أَقَا ذِينْ شَا ن إِجّنْ إِفَارْحْ؟ أجّْ إِ-ث أَذْ إِغنّجْ س إِزْڒَانْ ن ؤُصبّحْ. ◘ ١٤ مَا ذِينْ جَارْ أَومْ حذْ إِهْڒشْ؟ أجّْ إِ-ث أَذْ د-إِڒَاغَا خْ إِمْغَارنْ ن ثْمسْمُونْثْ غَارسْ، حِيمَا أَذْ أَسْ كْسِينْ س ڒْْمعْرُوفْ، أَذْ ث رثْفنْ س زّشْثْ ن وذْهَانْ س يِيسمْ ن سِيذِيثْنغْ. ◘ ١٥ ؤُشَا ثَاژَادْجِيثْ ن لْ-إِيمَانْ أَذْ ثسّْڭنْفَا أَمهْڒُوشْ ؤُشَا سِيذِيثْنغْ أَذْ ث إِسّْنكَّارْ. ؤُشَا مَاڒَا ثُوغَا إِتّڭّْ دّْنُوبْ، أَذْ أَسْ تّْوَاغْفَارنْ. ١٦ نعْممْ إِجّْ إِ ونّغْنِي س إِعذِييّنْ نْومْ ؤُ ژَتدْجمْ إِ وَايَاوْيَا، حِيمَا أَذْ ثتّْوَاسّْڭنْفَامْ، مَاغَارْ جّهْذْ ن ثْژَادْجِيثْ ن ؤُمْسڭَّاذْ أَقَا-ث ذ أَمقّْرَانْ.

١٧ إِلِييَا ثُوغَا ذ بْنَاذمْ إِتَّاشَا أَمْ نشِّينْ. إِژُّودْجْ حِيمَا وَارْ إِشِّيثْ ونْژَارْ خْ ثمُّورْثْ. خنِّي أَنْژَارْ وَارْ إِوْثِي شَا خْ ثمُّورْثْ ثْڒَاثَا ن إِسڭّْوُوسَا ذ ستَّا ن إِيُورنْ. ◘ ١٨ ؤُشَا ثُوغَا إِژُّودْجْ عَاوذْ، ڒخْذنِّي أَجنَّا إِوْثَا أَنْژَارْ ؤُشَا ثَامُّورْثْ ثوْشَا صَّابثْ نّسْ. ◘

١٩ أَ أَيْثْمَا، مَاڒَا ذِينْ حذْ جَارْ أَومْ إِفّغْ خْ وبْرِيذْ ن ثِيذتّْ ؤُشَا شَا ن يِيجّنْ يَارّْ إِ-ث-إِ-د أَذْ د-إِذْوڒْ زڭْ ؤُودَّارْ نّسْ، ◘ ٢٠ أجّْ إِ-ث أَذْ إِسّنْ، أَقَا ونِّي د غَا يَارّنْ أَمذْنُوبْ زڭْ ؤُودَّارْ نّسْ، أَذْ إِسّنْجمْ ڒعْمَارْ زِي ڒْْموْثْ ؤُشَا أَذْ إِسّْذُورِييْ أَطَّاسْ ن دّْنُوبْ. ◘

◘٥:١ 5:‏1 أَوڒن. 11‏:‏28؛ عَام. 6‏:‏1؛ لك. 6‏:‏24؛ 1 تِيم. 6‏:‏9.

◘٥:٣ 5:‏3 مت. 6‏:‏19؛ رُوم. 2‏:‏5.

◘٥:٤ 5:‏4 لَاوِي 19‏:‏13؛ أَعَوذ. 24‏:‏14.

◘٥:٥ 5:‏5 أَيُوبْ 21‏:‏13؛ لك. 16‏:‏19، 25.

◘٥:١١ 5:‏11 ڒخْڒ. 14‏:‏18؛ أَيُوبْ 1‏:‏21، 22؛ إِزهد. 103‏:‏8؛ مت. 5‏:‏11.

◘٥:١٢ 5:‏12 مت. 5‏:‏34؛ 2 كُور. 1‏:‏17، 18.

◘٥:١٣ 5:‏13 أَفا. 5‏:‏19؛ كُول. 3‏:‏16.

◘٥:١٤ 5:‏14 لَاوِي 14‏:‏17، 18؛ مك. 6‏:‏13.

◘٥:١٧ 5:‏17 1 إِج. 17‏:‏1؛ لك. 4‏:‏25.

◘٥:١٨ 5:‏18 1 إِج. 18‏:‏45.

◘٥:١٩ 5:‏19 مت. 18‏:‏15.

◘٥:٢٠ 5:‏20 أَوڒن. 10‏:‏12؛ 1 بُط. 4‏:‏8.