١ ”سْڒمْ أَوَاڒْ إِ زِي غَارْومْ د-إِسَّاوَاڒْ سِيذِي، أَ ثَادَّارْثْ ن إِسْرَائِيل! ٢ أَمُّو إِ إِقَّارْ سِيذِي: ’وَارْ ڒمّْذمْ أَبْرِيذْ ن ڒڭْنُوسْ إِ يِيخفْ نّمْ ؤُ وَارْ تّْنخْڒِيعمْ زِي ڒعْڒَامَاثْ ن ؤُجنَّا، وَاخَّا ڒڭْنُوسْ تّْنخْڒَاعنْ زَّايْسنْثْ. ٣ مَاغَارْ مِينْ حسّْبنْ ڒڭْنُوسْ ذ ڒْْحقّْ أَقَا-ث ذِي ڒْْبَاطڒْ، مِينْزِي أَقَا أَيَا ذ أَكشُّوضْ نِّي د-قسّنْ زڭْ وزْغَارْ، ذْ ڒْخذْمثْ ن إِفَاسّنْ ن بُو-صّنْعثْ نِّي إِڭَّا س إِميْذِي ن ومْزِيڒْ. ◼10:‏3 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘.  ◘10:‏3 إِشا. 44‏:‏14‏-‏17 ٤ زوّْقنْ ت س نُّوقَارْثْ ذ وُورغْ، س إِمسْمِيرنْ ذ إِفْضِيسنْ سّْمثْننْ ت أَڒَامِي وَارْ ثقِّيمْ ثتّنْخُوخُوڒْ. ◘10:‏4 إِشا. 41‏:‏7 ٥ أَقَا أَثنْثْ أَمْ يِيشْثْ ن ثْشجَّارْثْ إِسَّاوَاڒنْ إِ ذِينْ إِبدّنْ، مَاشَا وَارْ زمَّارنْ أَذْ سِّيوْڒنْ، إِتّْخصَّا أَذْ ثنْثْ أَرْبُونْ، مِينْزِي وَارْ زمَّارنْثْ أَذْ ؤُيُورنْثْ. وَارْ زَّايْسنْثْ ثڭّْوذمْ شَا، مَاغَارْ نِيثنْثِي وَارْ زمَّارنْثْ أَذْ ڭّنْثْ مِينْ إِعفّْننْ، ؤُ وَارْ زمَّارنْثْ أَذْ ڭّنْثْ مِينْ إِصبْحنْ.‘ “ ◘10:‏5 إِزهد. 115‏:‏5؛ إِشا. 41‏:‏23؛ 46‏:‏1، 7

٦ ”ؤُڒَا ذ إِجّْ مَا أَمْ شكْ، أَ سِيذِي! شكْ ذ أَمقّْرَانْ ؤُ إِسمْ نّشْ ذ أَمقّْرَانْ س جّهْذْ. ◘10:‏6 إِزهد. 86‏:‏8، 10 ٧ مَانْ ونْ وَارْ شكْ إِتّڭّْوِيذنْ، شكْ، أَ أَجدْجِيذْ ن ڒڭْنُوسْ؟ مِينْزِي أَيَا يُوسَا-د خَاكْ، مَاغَارْ جَارْ مَارَّا إِمِيغِيسنْ ن ڒڭْنُوسْ ؤُ ذِي مَارَّا ثَاڭلْذِيثْ نْسنْ ؤُڒَا ذ إِجّْ أَمْ شكْ.“ ◘10:‏7 أَسَا. 15‏:‏4

٨ ”أَقَا-ثنْ جْمِيعْ ذ إِفْغَارْ ذ إِبُوهَاڒِييّنْ، مِينْزِي تَّارْبِييّثْ ن لْ-أَصْنَامْ إِبطّْڒنْ ثفّغْ-د زڭْ ؤُكشُّوضْ وَاهَا. ◘10:‏8 إِشا. 41‏:‏29؛ حَاب. 2‏:‏18؛ زَاك. 10‏:‏2 ٩ إِوْينْ-د نُّوقَارْثْ إِتّْوَابزّْعنْ زِي ثَارْشِيشْ ذ وُورغْ زِي ؤُفَازْ، أَقَا-ت ذ ڒْْخذْمثْ ن ؤُحْرَايْفِي ؤُڒَا ن إِفَاسّنْ ن ومْزِيڒْ ن وُورغْ. أَرُّوضْ نْسنْ ن إِفِيڒَانْ إِذهْمَانِييّنْ ذ أَرْجُووَانِييّنْ، مَارَّا ڒخْيَاڒَاثْ ڭِّينْ ثنْثْ يرْيَازنْ إِنِّي غَارْسنْ ثِيزمَّارْ.“

١٠ ”سِيذِي أَربِّي ذ ثِيذتّْ، نتَّا ذ أَربِّي إِدَّارنْ، ذ أَجدْجِيذْ نْ ڒبْذَا. ثَامُّورْثْ ثتّنْهزَّا س ؤُذُوقّزْ ن وغْضَابْ نّسْ ؤُشَا ڒڭْنُوسْ وَارْ زمَّارنْ أَذْ كْسنْ أَسْخضْ نّسْ.“

١١ ”ذ مَانْ أَيَا ذ أَسنْ إِ غَا ثِينِيمْ: ’إِربِّيثنْ نِّي وَارْ إِڭِّينْ أَجنَّا ؤُڒَا ذ ثَامُّورْثْ، نِيثْنِي أَذْ تّْوَاقْضَانْ زِي ثمُّورْثْ ذ سَاذُو أَجنَّا.‘ “

١٢ ”مَاشَا نتَّا إِڭَّا ثَامُّورْثْ س جّْهذْ نّسْ، إِڭَّا دُّونشْثْ زِي ثِيغِيثْ ؤُ س ڒفْهَامثْ نّسْ إِبزّعْ أَجنَّا. ◘10:‏12 أَمز. 1‏:‏1؛ أَيُوبْ 9‏:‏8؛ إِزهد. 104‏:‏2؛ إِشا. 40‏:‏22؛ 44‏:‏24؛ 51‏:‏13؛ إِرْم. 51‏:‏15 ١٣ ڒَْامِي إِتّجَّا ثْمِيجَّا نّسْ أَذْ ت سْڒنْ، خنِّي ثڭَّا أَمْ ؤُشَارْشُورْ ن وَامَانْ ذڭْ ؤُجنَّا. إِسيْنُوثنْ إِسّْڭعَّاذْ إِ-ثنْ زڭْ إِنڭُّورَا ن دُّونشْثْ، إِتّڭّْ أَسَّامنْ أَكْ-ذ ونْژَارْ ؤُ إِسّكَّا-د أَسمِّيضْ زڭْ إِخَّامنْ نّسْ ن ثْخُوبَايْ.“ ◘10:‏13 إِزهد. 135‏:‏7؛ إِرْم. 51‏:‏16؛ أَسَا. 14‏:‏3

١٤ ”كُوڒْ بْنَاذمْ ذ أَڭَارُّوضْ، بْڒَا ثُوسّْنَا، كُوڒْ أَمْزِيڒْ ن وُورغْ إِتّْسضْحَا زِي سِّيبّثْ ن ڒخْيَاڒْ إِنقْشنْ إِ إِڭَّا، مَاغَارْ ڒخْيَاڒْ نّسْ إِفسْينْ ذ إِخَارِّيقنْ، وَارْ ذَايسْ إِدْجِي بُوحْبڒْ. ◘10:‏14 إِرْم. 51‏:‏17، 18 ١٥ أَقَا ثنْثْ ذ لْ-أَصْنَامْ إِبطّْڒنْ، أَقَا أَثنْثْ ذ ثِيمسْڒَايِينْ ن ثْسضْحَاشْثْ. ذِي ڒْْوقْثْ مَانِي ثنْثْ إِ غَا عَاقْبنْ، أَذْ فْنَانْثْ. ١٦ ثَاسْغَارْثْ ن يَاعْقُوبْ وَارْ ثدْجِي أَمْ ثسْغَارْثْ نْسنْثْ، مِينْزِي نتَّا ذ ونِّي إِڭِّينْ مَارَّا، ؤُشَا إِسْرَائِيل ذ ثَاقْبِيتْشْ ن ثسْغَارْثْ نّسْ، أَقَا سِيذِي ن ڒْْعسْكَارَاثْ ذ إِسمْ نّسْ.“ ◘10:‏16 إِزهد. 74‏:‏2؛ إِرْم. 51‏:‏19

١٧ ”سڭّْوجْ سّڒْعثْ زِي ثمُّورْثْ نّمْ، أَ شمْ ثَامْغَارْثْ نِّي إِزدّْغنْ ذِي لْقلْعَا! ١٨ مَاغَارْ أَمُّو إِ إِقَّارْ سِيذِي: ’خْزَارْ، ثْوَاڒَا-يَا أَذْ نْضَارغْ إِمزْذَاغْ ن ثمُّورْثْ غَارْ ڒَْاڭّْوَاجْ ؤُشَا أَذْ أَسنْ د-أَوْيغْ ذِي ڒحْصَارثْ، حِيمَا أَذْ تّْوَاطّْفنْ!‘ ◘10:‏18 إِرْم. 6‏:‏24 ١٩ ؤُشْثْ إِنُو زِي سِّيبّثْ ن ثْرژِّيثْ إِنُو، أَيزِّيمْ إِنُو إِتّقّسْ أَيِي أَطَّاسْ. وَاخَّا نشّْ نِّيغْ: أَيَا ذ إِجّْ ن ڒهْڒَاشْ ؤُ نشّْ أَذْ ث كْسِيغْ! ٢٠ إِتّْوَاخَارّبْ ؤُقِيضُونْ إِنُو، مَارَّا إِمُورَارْ ن ؤُقِيضُونْ قطّْسنْ، إِحنْجِيرنْ إِنُو ؤُيُورنْ خَافِي ؤُ وَارْ ذَا دْجِينْ عَاذْ. وَارْ ذِينْ وِي غَا إِسّْبدّنْ أَقِيذُونْ إِنُو ؤُشَا أَذْ خَاسْ يَايڒْ ثِيجَارْثِيڒِينْ نّسْ. ٢١ مَاغَارْ إِمكْسَاونْ ثُوغَا قجْحنْ، سِيذِي وَارْ خَاسْ أَرْزُونْ. خْ ؤُيَا وَارْ تّْڭعَّاذنْ ؤُ مَارَّا ثَاحِيمَارْثْ ن دّْمَانِي نْسنْ ثتّْوَازُوزَّارْ. ◼10:‏21 ’إِمكْسَاونْ‘ - نِيغْ ’إِنِيتْشَانْ‘. ٢٢ ڒحْوڒْ ذ أَمقّْرَانْ، أَقَا ذَا، دّْرِيزْ زِي ثمُّورْثْ ذِي شَّامَالْ، حِيمَا أَذْ أَردّْدْجنْ ثِيندَّامْ ن يَاهُوذَا، مَاحنْذْ أَذْ ت أَرّنْ ذ ثَامُّورْثْ ن ثْزذِّيغْثْ إِ وُوشَّاننْ ن ڒخْڒَا.“ ◘10:‏22 إِرْم. 1‏:‏14؛ 4‏:‏6؛ 9‏:‏11

٢٣ ”نشّْ سّْنغْ، أَ سِيذِي، أَقَا وَارْ د-ثقِّيمْ غَارْ بْنَاذمْ أَذْ إِخْضَارْ أَبْرِيذْ نّسْ، ؤُڒَا إِ ورْيَازْ إِڭُّورْ، مَاحنْذْ أَذْ إِنْذهْ إِصُورَافْ نّسْ. ◘10:‏23 أَوڒن. 16‏:‏1؛ 20‏:‏24 ٢٤ سڭّمْ أَيِي، سِيذِي، مَاشَا س ڒْْحقّْ، وَارْ إِدْجِي ذڭْ وغْضَابْ نّشْ، حِيمَا وَارْ ذ أَيِي ثَارِّيذْ ذ وَالُو. ◘10:‏24 إِزهد. 6‏:‏2؛ 38‏:‏2؛ إِرْم. 30‏:‏11؛ 46‏:‏28 ٢٥ زدْجعْ أَسْعَارْ نّشْ خْ ڒڭْنُوسْ نِّي وَارْ شكْ إِسِّيننْ، ؤُ خْ ثْقبَّاڒْ نِّي وَارْ إِتّْڒِيغِينْ إِسمْ نّشْ، مِينْزِي نِيثْنِي صَارْضنْ يَاعْقُوبْ، صَارْضنْ ث ؤُشَا قْضَانْ خَاسْ، هذْمنْ أَمْشَانْ ن ثْزذِّيغْثْ نّسْ.“ ◘10:‏25 إِزهد. 79‏:‏6؛ إِرْم. 8‏:‏16؛ 9‏:‏16