١ أَوَاڒْ نِّي د-إِفّْغنْ زِي سِيذِي غَارْ إِرْمِييَا، إِنَّا: ٢ ”سْڒمْ إِ وَاوَاڒنْ ن ڒْْعَاهْذْ-أَ ؤُشَا سِيوڒْ أَكْ-ذ يرْيَازنْ ن يَاهُوذَا ؤُ أَكْ-ذ إِمزْذَاغْ ن ؤُرْشَالِيمْ، ٣ إِنِي أَسنْ: ’أَمُّو إِ إِقَّارْ سِيذِي، أَربِّي ن إِسْرَائِيل: إِتّْوَانْعڒْ ورْيَازْ نِّي وَارْ إِسْڒِينْ إِ وَاوَاڒنْ ن ڒْْعَاهْذْ-أَ، ◘11:‏3 أَعَوذ. 27‏:‏26؛ ڭال. 3‏:‏10. ٤ ونِّي وصِّيغْ إِ ڒجْذُوذْ نْومْ ذڭْ وَاسّْ ؤُمِي ثنْ سُّوفّْغغْ زِي ثمُّورْثْ ن مِيصْرَا، زڭْ ؤُفَارَّانْ ن وُوزَّاڒْ، ڒَْامِي نِّيغْ: سْڒمْ إِ ثْمِيجَّا إِنُو ؤُشَا ڭّمْ أَمْ مَامّشْ إِ كنِّيوْ وصِّيغْ مَارَّا، خنِّي أَذْ أَيِي ثِيڒِيمْ ذ ڒْْڭنْسْ إِنُو ؤُشَا نشّْ أَذْ أَومْ إِڒِيغْ ذ أَربِّي نْومْ، ◘11:‏4 لَاوِي 26‏:‏3، 12؛ أَعَوذ. 4‏:‏20 ٥ حِيمَا أَذْ منْعغْ ذِي ثْجَادْجِيثْ نِّي جُّودْجغْ ذِي طّْوعْ ن ڒجْذُوذْ نْومْ، مَاحنْذْ أَذْ أَسنْ وْشغْ إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ، أَمْ ثدْجَا أَسّْ-أَ.‘ “ خنِّي نشّْ أَرِّيغْ-د، نِّيغْ: ”أَمِينْ، سِيذِي!“ ◘11:‏5 أَعَوذ. 7‏:‏12

٦ إِنَّا أَيِي سِيذِي: ”بَارّحْ س مَارَّا أَوَاڒنْ-أَ ذِي ثْندَّامْ ن يَاهُوذَا ؤُ ذِي ذْشُورَاثْ ن ؤُرْشَالِيمْ، إِنِي: ’سْڒمْ إِ وَاوَاڒنْ ن ڒْْعَاهْذْ-أَ، ڭّمْ زَّايْسنْ، ٧ مَاغَارْ نشّْعڒْمغْ س جّهْذْ إِ ڒجْذُوذْ نْومْ ذڭْ وَاسّْ ؤُمِي ثنْ سُّوفّْغغْ زِي ثمُّورْثْ ن مِيصْرَا، زڭْ ؤُمزْوَارُو أَڒْ أَسّْ-أَ، وَاهْ، شهْذغْ نِّيغْ: سْڒمْ غَارْ ثْمِيجَّا إِنُو‘ ◘11:‏7 إِرْم. 7‏:‏13، 25 ٨ مَاشَا نِيثْنِي وَارْ سْڒِينْ ؤُ وَارْ ذ أَيِي وْشِينْ أَمزُّوغْ نْسنْ، مَاشَا نِيثْنِي ضْفَارنْ مَارَّا إِذْسنْ ڒقْسَاحثْ ن وُوڒْ نْسنْ أَعفَّانْ. س ؤُينِّي سِّيوْضغْ خَاسنْ مَارَّا أَوَاڒنْ ن ڒْْعَاهْذْ-أَ، إِنِّي خْ ثنْ وصِّيغْ مَاحنْذْ أَذْ زَّايْسنْ ڭّنْ، مَاشَا وَارْ زَّايْسنْ ڭِّينْ.‘ “ ◘11:‏8 إِرْم. 3‏:‏17؛ 7‏:‏24، 26؛ 9‏:‏14

٩ إِنَّا أَيِي سِيذِي: ”أَقَا ثتّْوَاعَارَّا إِشْثْ ن ثْمعْمُوتْشْ جَارْ إِرْيَازنْ ن يَاهُوذَا ؤُ جَارْ إِمزْذَاغْ ن ؤُرْشَالِيمْ. ١٠ نِيثْنِي ذوْڒنْ-د غَارْ ڒْْمُوعْصِييّثْ ن ڒجْذُوذْ نْسنْ نِّي يُوڭِينْ أَذْ سْڒنْ غَارْ وَاوَاڒنْ إِنُو. نِيثْنِي رُوحنْ ضفَّارَانْ إِربِّيثنْ نّغْنِي مَاحنْذْ أَذْ أَسنْ سخَّارنْ. ثَادَّارْثْ ن إِسْرَائِيل ذ ثَادَّارْثْ ن يَاهُوذَا أَرْژِينْ ڒْْعَاهْذْ إِنُو نِّي ڭِّيغْ أَكْ-ذ ڒجْذُوذْ نْسنْ.“

١١ ”س ؤُيَا، أَمُّو إِ إِقَّارْ سِيذِي: ’خْزَارْ، نشّْ أَذْ خَاسنْ نْضَارغْ إِجّْ ن ڒْْغَارْ إِ زِي وَارْ زمَّارنْ أَذْ نجْمنْ. مَاڒَا ڒَْاغَانْ أَيِي-د خنِّي، نشّْ وَارْ د غَارْسنْ تّسْڒِيغْ شَا. ◘11:‏11 أَوڒن. 1‏:‏28؛ إِشا. 1‏:‏15؛ إِرْم. 14‏:‏12؛ حِز. 8‏:‏18؛ مِيخَا 3‏:‏4 ١٢ خنِّي أَذْ فّْغنْ ثِيندَّامْ ن يَاهُوذَا ذ إِمزْذَاغْ ن ؤُرْشَالِيمْ، أَذْ ڒَْاغَانْ غَارْ إِربِّيثنْ إِ يِينِّي ؤُمِي قدّْمنْ ثِيوْهِيبِينْ نْ ڒبْخُورْ، مَاشَا يِينَا وَارْ زمَّارنْ أَذْ أَسنْ وْشنْ أَفُوسْ ذِي ڒْْوقْثْ ؤُمِي ثنْ إِڒْقفْ ڒْْغَارْ. ١٣ مَاغَارْ إِربِّيثنْ نّشْ ذڭْ وَاطَّاسْ أَنشْثْ ن ثْندَّامْ نّشْ، أَ يَاهُوذَا، ؤُ إِعَالْثَارنْ إِ ثسّْبدّمْ إِ نّْعِي ن صَّانَامْ نِّي ذڭْ وَاطَّاسْ أَنشْثْ ن إِبْرِيذنْ ن ؤُرْشَالِيمْ، إِعَالْطَارنْ مَاحنْذْ أَذْ خَاسنْ وهّْبنْ ثِيوْهِيبِينْ ن ڒبْخُورْ إِ بَاعْلْ.‘ “ ◘11:‏13 إِرْم. 2‏:‏28

١٤ ”شكْ خنِّي وَارْ ثتَّارْ إِ ڒْْڭنْسْ-أَ، وَارْ تّكَّارذْ أَذْ أَسنْ ثْرُوذْ نِيغْ أَذْ أَسنْ ثذْعِيذْ، مَاغَارْ نشّْ وَارْ تّسْڒِيغْ ذِي ڒْْوقْثْ نِّي خَافِي د غَا ڒَْاغَانْ زِي سِّيبّثْ ن ڒْْغَارْ إِ ثنْ إِڒقْفنْ.“ ◘11:‏14 إِرْم. 7‏:‏16؛ 14‏:‏11

١٥ ”مِينْ إِ ثڭِّيذْ، أَ ثَامْعِيزْثْ إِنُو، ذِي ثَادَّارْثْ إِنُو، ؤُمِي ثدْجَا ڒفْضِيحثْ نّسْ ذ ثَا: أَقَا أَطَّاسْ تَّاڭّْوجنْ خَامْ أَكْ-ذ ويْسُومْ إِقدّْسنْ. مَاغَارْ س ثُوعفّْنَا إِ ثڭِّيذْ، مَا ثْزمَّارذْ أَذْ ثْنڭْزذْ س ڒفْرَاحثْ؟ ١٦ ’ثَازِيثُونْثْ ثَازيْزَاوْثْ، أَ شمْ، ڒمْڒَاحثْ، س ڒْْغِيدْجثْ إِشْنَانْ ذِي ڒوْصِيفثْ!‘، أَمُّو إِ ثُوغَا إِڭَّا سِيذِي إِسمْ نّمْ، مَاشَا ڒخُّو إِقّذْ أَسْ ثِيمسِّي أَمْ إِتّْوَاسڒْ ڒْْحسّْ ن إِجّْ ن زّْهِيرْ ذ أَمقّْرَانْ ؤُشَا تّْوَارْژنْ ڒفْرُوعْ نّسْ. ١٧ سِيذِي ن ڒْْعسْكَارَاثْ، ذ ونِّي شمْ إِژُّونْ، إِڭَّا خَامْ إِجّْ ن ڒْْغَارْ زِي سِّيبّثْ ن ڒْْغَارْ إِ ثڭَّا ثَادَّارْثْ ن إِسْرَائِيل ذ ثَادَّارْثْ ن يَاهُوذَا، ڒْْغَارْ إِ ڭِّينْثْ إِ يِيخفْ نْسنْثْ ؤُمِي ذ أَيِي سْعَارنْثْ س ثوْهِيبِينْ ن ڒبْخُورْ إِ بَاعْلْ.“ ◘11:‏17 إِرْم. 2‏:‏21

١٨ ”سِيذِي إِسّْشنْ ث أَيِي ؤُشَا ڒخُّو سّْنغْ، ڒَْامِي ثسّشْنذْ أَيِي ثِيمڭَّا نْسنْ. ١٩ نشّْ سِيمَانْثْ إِنُو ثُوغَا أَيِي أَمْ يِيجّْ ن يزْمَارْ أَيْنَاوْ ن ثَادَّارْثْ، ندّْهنْ ث إِ ثْغَارْصْثْ، مَاغَارْ ثُوغَا وَارْ سِّينغْ أَقَا نِيثْنِي ڭِّينْ أَيِي إِجّْ ن ڒْْفخْ ؤُمِي قَّارنْ: ’أجّْ أَنغْ أَذْ نْضيّعْ ثَاشجَّارْثْ أَكْ-ذ ڒْْغِيدْجثْ نّسْ ؤُ أَذْ ت نْثحَّا زِي ثمُّورْثْ ن يِينِّي إِدَّارنْ مَاحنْذْ إِسمْ نّسْ وَارْ ث تِّيذَارنْ عَاذْ.‘ “ ◼11:‏19 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

٢٠ ”سِيذِي ن ڒْْعسْكَارَاثْ، أَ شكْ ڒْْقَاضِي إِسڭّْذنْ نِّي إِتّْجَارَّابنْ ثِيژَّاڒْ ذ وُوڒْ، سْشنْ أَيِي نّقْمثْ نّشْ، مَاغَارْ نشّْ سلّْمغْ دّعْوثْ إِنُو ذڭْ إِفَاسّنْ نّشْ.“ ◼11:‏20 ’ثِيژَّاڒْ‘ - نِيغْ ’ثِيڭژْڒِينْ‘.  ◘11:‏20 1 صم. 16‏:‏7؛ 1 إِم. 28‏:‏9؛ إِزهد. 7‏:‏10؛ 26‏:‏2؛ أَسَا. 2‏:‏23

٢١ ”س ؤُيَا، أَمُّو إِ إِقَّارْ سِيذِي خْ يرْيَازنْ ن عَانَاثُوثْ، إِنِّي يَارزُّونْ ڒعْمَارْ نّشْ، قَّارنْ: ’وَارْ تّْنَابْ س يِيسمْ ن سِيذِي أَڒَامِي وَارْ ثْمتِّيذْ س ؤُفُوسْ نّغْ.‘ ٢٢ س ؤُيَا، أَمُّو إِ إِقَّارْ سِيذِي ن ڒْْعسْكَارَاثْ: ’خْزَارْ، نشّْ أَذْ ثنْ خدْجْصغْ: إِحُوذْرِييّنْ أَذْ مّْثنْ س سِّيفْ، إِحنْجِيرنْ ذ يسِّيثْسنْ أَذْ مّْثنْ س ڒَْاژْ. ٢٣ وَارْ إِتّْغِيمِي مِينْ إِقِّيمنْ زَّايْسنْ، مَاغَارْ نشّْ أَذْ خَاسنْ د-سِّيوْضغْ إِجّْ ن ڒْْغَارْ ذ أَعفَّانْ خْ يرْيَازنْ ن عَانَاثُوثْ ذڭْ ؤُسڭّْوَاسْ نِّي ذِي ثنْ إِ غَا خدْجْصغْ.‘ “