١ ”مَاڒَا ڭِّيغْ أَذْ شَارّْعغْ أَكِيذكْ، أَ سِيذِي، شكْ أَذْ ثْبَانذْ ذ أَمْسڭّذْ. قَاعْ أَمنِّي تّخْسغْ أَذْ سِيوْڒغْ أَكِيذكْ خْ إِبْرِيذنْ ن ڒْْحقّْ: مَايمِّي أَبْرِيذْ ن إِعفَّاننْ إِسڭّمْ، ؤُ مَايمِّي إِغدَّارنْ ڒبْذَا ذِي أَرَّاحثْ؟ ◘12:‏1 أَيُوبْ 21‏:‏7؛ إِزهد. 73‏:‏11، 12؛ حَاب. 1‏:‏3 ٢ شكْ ثژُّوذْ ثنْ ؤُ نِيثْنِي وْثِينْ إِژوْرَانْ، نِيثْنِيغمْينْ-د ؤُ إِوْينْ-د ڒْْغِيدْجثْ. شكْ أَقَا ثُوذْسذْ أَقمُّومْ نْسنْ، مَاشَا ثِيڭّْوجذْ خْ ثِيژَّاڒْ نْسنْ.“ ◼12:‏2 ’ثِيژَّاڒْ‘ - س ثْعِيبْرَانِيثْ ’ؤُڒْ‘.  ◘12:‏2 إِشا. 29‏:‏13

٣ ”شكْ، أَ سِيذِي، ثسّْنذْ أَيِي، ثتّْوَارِيذْ أَيِي ؤُ ثْقدْجْبذْ ؤُڒْ إِنُو، مَا أَقَا-ث أَكِيذكْ. جْبذْ إِ-ثنْ أَمْ وُودْجِي إِ ثْغَارْصْثْ ؤُ عْزڒْ إِ-ثنْ إِ وَاسّْ ن ونْغَايْ. ◼12:‏3 ’قدّسْ إِ-ثنْ‘ - إِخْسْ أَذْ يِينِي ’حَارّمْ إِ-ثنْ‘.  ◘12:‏3 إِزهد. 17‏:‏3؛ 139‏:‏1؛ إِرْم. 11‏:‏20 ٤ مشْحَاڒْ عَاذْ إِ غَا ثكّْ ثمُّورْثْ ثشْضنْ ؤُ أَفْسُو أَزِيزَا أَذْ يَاژغْ ذڭْ إِيَّارْ مَارَّا؟ س ثُوعفّْنَا ن يِينِّي ذِينْ إِزدّْغنْ ضيّْعنْ ڒْْمَاڒْ ذ يجْضَاضْ، مَاغَارْ نِيثْنِي قَّارنْ: ’نتَّا وَارْ إِتّْوِيڒِي أَنڭَّارْ نّغْ.“ ◘12:‏4 إِرْم. 4‏:‏25؛ 7‏:‏20؛ 9‏:‏10

٥ ”مَاڒَا ثُوزّْڒذْ أَكْ-ذ إِنِّي إِتَّازّْڒنْ خْ إِضَارنْ، نِيثْنِي سَّاحَاڒنْ شكْ، مَامّشْ ثخْسذْ أَذْ ثڭّذْ خنِّي حَامَاثْ أَكْ-ذ إِيْسَانْ؟ مَاڒَا ثتَّاشِيذْ أَقَا شكْ ذِي ڒَْامَانْ مْغِيرْ ذِي ثمُّورْثْ ن ڒهْنَا، مَامّشْ غَا ثڭّذْ خنِّي ذِي شْبَارْقْ إِقّْننْ ن يغْزَارْ ن لْ-ؤُرْذُونْ؟ ٦ مَاغَارْ ؤُڒَا ذ أَيْثْمَاشْ ذ ثَادَّارْثْ ن بَابَاشْ، ؤُڒَا ذ نِيثْنِيغدَّارنْ شكْ، ؤُڒَا ذ نِيثْنِي سْغُويُّونْ س جّْهذْ أَوَارْنِي أَشْ. وَارْ ثنْ تِّيقّمْ، وَاخَّا سَّاوَاڒنْ أَكِيذكْ مْلِيحْ.“ ◘12:‏6 أَوڒن. 26‏:‏25

٧ ”نشّْ سمْحغْ ذِي ثَادَّارْثْ إِنُو، نشّْ نْضَارغْ ثَاسْغَارْثْ إِنُو. ثنِّي إِسّْعِيزّْ ڒعْمَارْ إِنُو سلّْمغْ ت ذڭْ ؤُفُوسْ ن ڒْْعذْيَانْ نّسْ. ٨ ثَاسْغَارْثْ إِنُو ثذْوڒْ-د أَكِيذِي أَمْ يِيجّْ ن وَايْرَاذْ ذڭْ وزْغَارْ. ثسّْڭعّذْ-د أَكِيذِي ثْمِيجَّا نّسْ، خْ ؤُيَا نشّْ ذوْڒغْ شَارّْهغْ ت. ◼12:‏8 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘. ٩ ثَاسْغَارْثْ إِنُو إِ نشّْ أَمْ ؤُجْضِيضْ إِبقّْضنْ إِتّْكشَّاضنْ. تّنّْضنْ أَسْ إِجْضَاضْ إِكشّْضنْ. كَّارمْ، سْمُونمْ-د مَارَّا ڒْْمَاڒْ ن ييَّارْ، أجّْ إِ-ثنْ أَذْ د-أَسنْ حِيمَا أَذْ شّنْ!“ ◘12:‏9 إِرْم. 7‏:‏33

١٠ ”إِمكْسَاونْ أَطَّاسْ خَارّْبنْ أَمَارْجعْ إِنُو ن ؤُضِيڒْ،عفْسنْ خْ ييَّارْ إِنُو، أَقَا أَرِّينْ إِيَّارْ إِعِيزّنْ إِنُو ذ إِجّْ ن ڒخْڒَا إِخْوَا. ◼12:‏10 ’إِمكْسَاونْ‘ - نِيغْ: ’إِنِيتْشَانْ‘.  ◘12:‏10 إِرْم. 6‏:‏3 ١١ أَرِّينْ إِيَّارْ ذ إِشْثْ ن ثمُّورْثْ إِتّْوَاردّْدْجنْ، أَقَا إِتّْوَاخَارّبْ ييَّارْ، إِزّڒْ زَّاثِي إِشْضنْ. مَارَّا ثَامُّورْثْ ثْخَارّبْ مِينْزِي ؤُڒَا ذ إِجّْ وَارْ ذ أَسْ يشْقِي. ١٢ خْ مَارَّا ثِيوْرِيرِينْ إِقشَّارنْ ذِي ڒخْڒَا ؤُسِينْ-د إِمْثحَّايّنْ، مَاغَارْ سِّيفْ إِسَارْضْ زِي طَّارْفْ ن ثمُّورْثْ أَڒْ طَّارْفْ نّغْنِي ن ثمُّورْثْ. وَارْ ذِينْ إِقِّيمْ ڒهْنَا إِ مَارَّا دَّاثْ. ١٣ نِيثْنِي زَارْعنْ إِرْذنْ، مَاشَا مْجَارنْ إِسنَّاننْ، نِيثْنِي ؤُحْڒنْ، مَاشَا بْڒَا نّْفَاعْ. نِيثْنِي أَذْ سضْحَانْ خْ صَّابثْ نْومْ زِي سِّيبّثْ ن ڒْْحَاذُوقْ ن وغْضَابْ ن سِيذِي.“ ◘12:‏13 لَاوِي 26‏:‏16؛ أَعَوذ. 28‏:‏38

١٤ ”أَمُّو إِ إِقَّارْ سِيذِي: مَارَّا أَجَّارنْ إِنُو إِعفَّاننْ نِّي إِتّْحَاذَانْ ثَاسْغَارْثْ إِنُو إِ وْشِيغْ إِ ڒْْڭنْسْ إِنُو إِسْرَائِيل ذ ثَاسْغَارْثْ، خْزَارْ، نشّْ أَذْ ثنْ قڒْعغْ زِي ثمُّورْثْ، مَاشَا ثَادَّارْثْ ن يَاهُوذَا أَذْ ت قڒْعغْ زِي ڒْْوسْطْ نْسنْ. ◘12:‏14 أَعَوذ. 30‏:‏3؛ إِرْم. 32‏:‏37 ١٥ أَوَارْنِي ڒَامِي ثنْ قڒْعغْ، أَذْ د-ذوْڒغْ ؤُ أَذْ خَاسنْ حِينّغْ ؤُشَا نشّْ أَذْ ثنْ أَرّغْ أَذْعقْبنْ، كُوڒْ إِجّْ غَارْ ثسْغَارْثْ نّسْ ؤُ كُوڒْ إِجّْ غَارْ ثمُّورْثْ نّسْ. ١٦ خْمِي غَا ڒمْذنْ س ثِيذتّْ إِبْرِيذنْ ن ڒْْڭنْسْ إِنُو مَاحنْذْ أَذْ جَّادْجنْ غَارْ يِيسمْ إِنُو: ’س ثِيذتّْ أَمْ إِدَّارْ سِيذِي!‘، أَمْ مَامّشْ نِيثْنِي سّْڒمْذنْ ڒْْڭنْسْ إِنُو مَاحنْذْ أَذْ جَّادْجنْ غَارْ بَاعْلْ، خنِّي أَذْ تّْوَاسّْبدّنْ نِيثْنِي ذِي ڒْْوسْطْ نْ ڒْڭنْسْ إِنُو. ١٧ مَاشَا مَاڒَا نِيثْنِي وَارْ تّخْسنْ أَذْ سْڒنْ، خنِّي نشّْ أَذْ قڒْعغْ ڒْْڭنْسْ نِّي ؤُشَا أَذْ ثنْ أَردّْدْجغْ، أَمُّو إِ إِقَّارْ سِيذِي.“ ◘12:‏17 إِشا. 60‏:‏12