١ يُوسَا-د غَارِي وَاوَاڒْ ن سِيذِي، إِنَّا: ٢ ”وَارْ تَّاوِي ثَامْغَارْثْ إِ يِيخفْ نّشْ ؤُ وَارْ غَاركْ تِّيڒِينْ إِحنْجِيرنْ ذ ثْحنْجِيرِينْ ذڭْ ومْشَانْ-أَ، ٣ مَاغَارْ أَمُّو إِ إِقَّارْ سِيذِي خْ إِحنْجِيرنْ ذ ثْحنْجِيرِينْ إِ د غَا إِتّْوُورْونْ ذڭْ ومْشَانْ-أَ ؤُ خْ يمَّاثْسنْ إِ ثنْ د-يُورْونْ ؤُ خْ بَابَاثْسنْ إِ ثنْ د-إِجِّينْ ذِي ثمُّورْثْ-أَ: ٤ ’نِيثْنِي أَذْ مّْثنْ سْ  إِبْرِيذنْ إِوْعَارنْ أَطَّاسْ، وَارْ خَاسنْ شطّنْ ؤُ وَارْ ثنْ نطّْڒنْ، نِيثْنِي أَذْ ذوْڒنْ ذ ڒغْبَارْ إِ وُوذمْ ن ثمُّورْثْ ؤُشَا أَذْ تّْوَاغزّنْ س سِّيفْ ذ ڒَْاژْ، ؤُ ڒْْخشْبَاثْ نْسنْ أَذْ ذوْڒنْثْ ذ مَاشَّا إِ إِجْضَاضْ ن ؤُجنَّا ؤُ إِ ڒوْحُوشْ ن ڒخْڒَا.‘ “ ◘16:‏4 إِرْم. 7‏:‏33؛ 9‏:‏22؛ 14‏:‏16؛ 15‏:‏2، 3؛ 25‏:‏33؛ 34‏:‏20

٥ ”مَاغَارْ أَمُّو إِ إِقَّارْ سِيذِي: ’وَارْ تَّاذفْ غَارْ إِشْثْ ن ثَادَّارْثْ ن وشْضَانْ ؤُ وَارْ شَّاثْ أَڭجْذُورْ، وَارْ أَرحّمْ، مَاغَارْ نشّْ كّْسغْ ڒهْنَا إِنُو خْ ڒْْڭنْسْ-أَ، ثَامخْسِيوْثْ إِنُو إِشوَّارنْ ذ أَرّحْمثْ، أَمُّو إِ إِقَّارْ سِيذِي.‘ ٦ إِمقّْرَاننْ ذ إِمژْيَاننْ أَذْ مّْثنْ ذِي ثمُّورْثْ-أَ. وَارْ ثنْ نطّْڒنْ، وَارْ خَاسنْ شَّاثنْ أَڭجْذُورْ، وَارْ خبّْشنْ إِخفْ نْسنْ نِيغْ أَذْ سّْقُوشَّارنْ إِخفْ نْسنْ ذِي طّْوعْ نْسنْ. ◘16:‏6 لَاوِي 19‏:‏28؛ أَعَوذ. 14‏:‏1 ٧ وَارْ ذ أَسنْ إِتّْوَارْژْ وغْرُومْ زِي سِّيبّثْ ن وشْضَانْ حِيمَا أَذْعزَّانْ شَا ن يِيجّنْ خْ إِجّْ ن ؤُمتِّي، ؤُ وَارْ ذ أَسنْ تِّيشنْ أَذْ سْونْ زڭْ ؤُغَارَّافْ ن ؤُعزِّي خْ بَابَاسْ نِيغْ يمَّاسْ. ◘16:‏7 مت. 26‏:‏26‏-‏28؛ مك. 14‏:‏22‏-‏24؛ لك. 22‏:‏19‏-‏20 ٨ وَارْ تَّاذفْ غَارْ ثَادَّارْثْ مَانِي تّڭّنْ زَّارْذثْ مَاحنْذْ أَذْ ثقِّيمذْ غَارْسنْ إِ مَاشَّا ذ ثْسسِّيثْ. ٩ مَاغَارْ أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: خْزَارْ، نشّْ أَذْ سّْبدّغْ زَّاثْ إِ ثِيطَّاوِينْ نْومْ ذڭْ ومْشَانْ-أَ ثْمِيجَّا ن وَارْشَاقْ ذ ثْمِيجَّا ن ڒفْرَاحثْ، ثْمِيجَّا ن مُوڒَايْ ذ ثْمِيجَّا ن ثسْڒِيثْ.“ ◘16:‏9 إِشا. 24‏:‏7، 8؛ إِرْم. 7‏:‏34؛ 25‏:‏10؛ حِز. 26‏:‏13

١٠ ”خْمِي غَا ثْبَارّْحذْ مَارَّا أَوَاڒنْ-أَ إِ ڒْْڭنْسْ-أَ ؤُشَا نِيثْنِي أَذْ سّقْسَانْ: ’مَايمِّي إِقَّارْ سِيذِي مَارَّا ڒْْغَارْ-أَ أَمقّْرَانْ خَانغْ ؤُ مِينْ إِدْجَانْ ذ لْجَارِيمَا نّغْ ؤُ مِينْ إِدْجَانْ ذ دّنْبْ نّغْ إِ نڭَّا نشِّينْ أَكْ-ذ سِيذِي، أَربِّي نّغْ؟‘، ◘16:‏10 إِرْم. 5‏:‏19 ١١ خنِّي أَذْ أَسنْ ثِينِيذْ: ’مَاغَارْ ڒجْذُوذْ نْومْ سمْحنْ ذَايِي، أَمُّو إِ إِقَّارْ سِيذِي، ؤُشَا ؤُيُورنْ أَوَارْنِي إِ إِربِّيثنْ نّغْنِي ؤُشَاعبْذنْ ؤُ سجْذنْ أَسنْ، مَاشَا سمْحنْ ذَايِي ؤُ وَارْ حْضِينْ شَّارِيعَا إِنُو. ١٢ ؤُ كنِّيوْ سِيمَانْثْ نْومْ ثڭِّيمْ مَاهُو خْ ڒجْذُوذْ نْومْ، مِينْزِي خْزَارْ، كُوڒْ  إِجّْ زَّايْومْ إِضَافَّارْ ڒقْسَاحثْ ن وُوڒْ نّسْ أَعفَّانْ، أَڒَامِي كنِّيوْ وَارْ د غَارِي ثسْڒِيمْ قَاعْ. ◼16:‏12 ’ؤُڒْ أَعفَّانْ نْومْ‘ - س ثْعِيبْرَانِيثْ ’ؤُڒْ أَعفَّانْ نّسْ‘.  ◘16:‏12 إِرْم. 3‏:‏17؛ 7‏:‏26؛ 9‏:‏14؛ 11‏:‏10؛ 13‏:‏10؛ 17‏:‏23 ١٣ س ؤُينِّي أَذْ كنِّيوْ حجَّارغْ غَارْ بَارَّا زِي ثمُّورْثْ-أَ غَارْ إِشْثْ ن ثمُّورْثْ إِ وَارْ ثسِّينمْ كنِّيوْ ؤُڒَا ذ ڒجْذُوذْ نْومْ، ؤُشَا ذِينِّي إِ غَا ثْعبْذمْ إِربِّيثنْ نّغْنِي، أَسّْ ذ دْجِيڒثْ، مِينْزِي نشّْ وَارْ غَارْومْ د-تَّارْزِيفغْ عَاذْ س شَا ن ڒْْخَاضَارْ.‘ “ ◘16:‏13 أَعَوذ. 4‏:‏27؛ 28‏:‏64، 65

١٤ ”س ؤُيَا، خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، نِّي ذِي وَارْ قَّارنْ عَاذْ: ’س ثِيذتّْ أَمْ إِدَّارْ سِيذِي إِ د إِسُّوفّْغنْ أَيْثْ ن إِسْرَائِيل زِي مِيصْرَا!‘ ◘16:‏14 إِرْم. 23‏:‏7، 8 ١٥ مَاشَا: ’س ثِيذتّْ أَمْ إِدَّارْ سِيذِي ونِّي د-إِسُّوفّْغنْ أَيْثْ ن إِسْرَائِيل زِي ثمُّورْثْ ن شَّامَالْ ؤُ زِي مَارَّا ثِيمُّورَا مَانِي خَاسنْ يُوژّڒْ!‘ مِينْزِي نشّْ أَذْ ثنْ أَرّغْ غَارْ ثمُّورْثْ نِّي وْشِيغْ إِ ڒجْذُوذْ نْسنْ. ١٦ خْزَارْ، نشّْ أَذْ سّكّغْ أَطَّاسْ ن إِنيْمَارنْ ن إِسڒْمَانْ، أَمُّو إِ إِقَّارْ سِيذِي، إِنِّي ثنْ إِ غَا يْمَارنْ، ؤُ خنِّي أَذْ سّكّغْ أَطَّاسْ ن إِنيْمَارنْ نِّي خَاسنْ إِ غَا يَاژّْڒنْ زِي مْكُوڒْ أَذْرَارْ ؤُ زِي مْكُوڒْ ثَاوْرِيرْثْ ؤُ زڭْ إِفدْجِيقنْ جَارْ ڒجْرُوفْ. ١٧ مَاغَارْ ثِيطَّاوِينْ إِنُو تّْوَاڒَانْثْ مَارَّا إِبْرِيذنْ نْسنْ، نِيثْنِي وَارْ زمَّارنْ أَذْ زَّايِي نُّوفَّارنْ ؤُشَا ڒْْمُوعْصِييّثْ نْسنْ وَارْ ثْزمَّارْ أَذْ ثنُّوفَّارْ زَّاثْ إِ ثِيطَّاوِينْ إِنُو. ◘16:‏17 أَيُوبْ 34‏:‏21؛ أَوڒن. 5‏:‏21؛ إِرْم. 32‏:‏19 ١٨ أَمزْوَارْ أَذْ خڒْفغْ س ؤُضفُّوسْ مَارَّا ڒْْمُوعْصِييّثْ نْسنْ ذ مَارَّا دّْنُوبْ نْسنْ، مِينْزِي نِيثْنِي سّْعِيدْجْثنْ ثَامُّورْثْ إِنُو. نِيثْنِي شُّورنْ ثَاسْغَارْثْ إِنُو س ڒْْخشْبَاثْ ن نّْعَاوَاثْ ن لْ-أَصْنَامْ نْسنْ ؤُ س جّْعَايفْ نْسنْ.“ ◘16:‏18 إِرْم. 3‏:‏2؛ حِز. 43‏:‏7

١٩ ”أَ سِيذِي، شكْ ذ جّهْذْ إِنُو ذ لْبُورْجْ إِنُو ذ أَمْشَانْ إِنُو ن ثَاروْڒَا ذڭْ وَاسّْ ن ڒحْصَارثْ. أَذْ غَاركْ د-أَسنْ ڒڭْنُوسْ زڭْ إِنڭُّورَا ن دُّونشْثْ، أَذْ إِنِينْ: ’ثَاسْغَارْثْ نِّي طّْفنْ ڒجْذُوذْ نّغْ، ذَايسْ مْغِيرْ أَشْمَاثْ ذ أَعْبذْ ن لْ-أَصْنَامْ إِبطِّيڒنْ، ثِيمسْڒَايِينْ إِ وَارْ إِنفّْعنْ.‘ ٢٠ مَا إِزمَّارْ بْنَاذمْ أَذْ إِڭّْ إِربِّيثنْ إِ يِيخفْ نّسْ؟ نِيثْنِي وَارْ دْجِينْ ذ إِربِّيثنْ. ٢١ س ؤُيَا، خْزَارْ، ثْوَاڒَا-يَا نشّْ أَذْ ثنْ أَرّغْ أَذْ شهْذنْ، أَذْ ثنْ أَرّغْ أَذْ سّْننْ أَفُوسْ إِنُو ذ جّهْذْ إِنُو، ؤُشَا خنِّي أَذْ سّْننْ بلِّي إِسمْ إِنُو ’سِيذِي‘.“ ◘16:‏21 إِرْم. 33‏:‏2