١ أَوَاڒْ نِّي د-يُوسِينْ زِي سِيذِي غَارْ إِرْمِييَا، إِنَّا:

٢ ”كَّارْ، هْوَا غَارْ ثَادَّارْثْ ن بُو-ثْڒَاخْثْ. ذِينِّي إِ غَا جّغْ أَوَاڒنْ إِنُو أَذْ تّْوَاسْڒنْ.“ ◼18:‏2 ’أَقدَّارْ‘ - نِيغْ ’بُو-ثْڒَاخْثْ‘. ٣ خنِّي هْوِيغْ غَارْ ثَادَّارْثْ ن بُو-ثْڒَاخْثْ، ؤُشَا خْزَارْ، ؤُفِيغْ ث إِخدّمْ إِشْثْ ن ڒْْقشْعثْ خْ إِژْرَا إِتّنّْضنْ. ٤ مَاڒَا إِخْسَارْ ؤُغَارَّافْ نِّي ثُوغَا إِتّڭّْ زِي ثْڒَاخْثْ نِّي إِدْجَانْ ذڭْ ؤُفُوسْ ن بُو-ثْڒَاخْثْ، نتَّا إِڭَّا زَّايسْ عَاوذْ إِجّْ ن ؤُغَارَّافْ نّغْنِي، أَمْ مَامّشْ ذ أَسْ إِتّْغِيڒْ ذ لمْلِيحْ إِ بُو-ثْڒَاخْثْ مَاحنْذْ أَذْ ث إِڭّْ. ٥ خنِّي يُوسَا-د غَارِي وَاوَاڒْ ن سِيذِي، إِنَّا: ٦ ”مَا وَارْ زمَّارغْ نشّْ أَذْ ڭّغْ أَكِيذْومْ أَمْ بُو-ثْڒَاخْثْ وَانِيثَا، أَ ثَادَّارْثْ ن إِسْرَائِيل، أَمُّو إِ إِقَّارْ سِيذِي. خْزَارْ، أَمْ ثْڒَاخْثْ ذڭْ ؤُفُوسْ ن بُو-ثْڒَاخْثْ، أَمُّو إِ ثدْجَامْ ذڭْ ؤُفُوسْ إِنُو، أَ ثَادَّارْثْ ن إِسْرَائِيل!◘18:‏6 إِشا. 45‏:‏9؛ 64‏:‏8؛ رُوم. 9‏:‏20 ٧ إِشْثْ ن ثْوَاڒَا أَذْ سِّيوْڒغْ خْ إِجّْ نْ ڒْڭنْسْ ؤُ خْ إِشْثْ ن ثْڭلْذِيثْ أَقَا أَذْ ث قڒْعغْ، أَذْ ث هذْمغْ ؤُ أَذْ ث ثحِّيغْ، ◘18:‏7 إِرْم. 1‏:‏10 ٨ مَاشَا مَاڒَا ڒْْڭنْسْ نِّي أَذْ د-إِذْوڒْ زِي ثُوعفّْنَا نّسْ إِ خْ سِّيوْڒغْ أَكِيذْسنْ، خنِّي أَذْ نذْمغْ زِي ڒْْغَارْ إِ ثُوغَا نْوِيغْ أَذْ أَسْ ث ڭّغْ. ٩ إِشْثْ ن ثْوَاڒَا نّغْنِي أَذْ سِّيوْڒغْ خْ إِجّْ نْ ڒْڭنْسْ ؤُ خْ إِشْثْ ن ثْڭلْذِيثْ بلِّي أَذْ ث سّْبدّغْ ؤُ أَذْ ث ژُّوغْ، ١٠ مَاشَا مَاڒَا أَذْ يڭّْ مِينْ إِدْجَانْ ذ أَعفَّانْ ذِي ثِيطَّاوِينْ إِنُو ؤُمِي وَارْ تّسْڒِينْ غَارْ ثْمِيجَّا إِنُو، خنِّي أَذْ نذْمغْ خْ مِينْ إِشْنَانْ إِ نِّيغْ أَذْ كِيذْسنْ ث ڭّغْ. ١١ خنِّي ڒخُّو، سِيوڒْ أَكْ-ذ إِرْيَازنْ ن يَاهُوذَا ؤُ أَكْ-ذ إِمزْذَاغْ ن ؤُرْشَالِيمْ، إِنِي: ’أَمُّو إِ إِقَّارْ سِيذِي: خْزَارْ، نشّْ سّْوجْذغْ إِجّْ نْ ڒْغَارْ ضِيدّْ نْومْ ؤُ نشّْ تّْخَارَّاصغْ ذڭْ إِجّْ ن ونْوَايْ خَاومْ. ذوْڒمْ-د خنِّي، كُوڒْ إِجّْ زڭْ وبْرِيذْ نّسْ أَعفَّانْ، ؤُعذْڒمْ إِبْرِيذنْ نْومْ ذ ثْمڭَّا نْومْ.‘ ◘18:‏11 2 إِج. 17‏:‏13؛ إِرْم. 7‏:‏3؛ 25‏:‏5؛ 26‏:‏13؛ 35‏:‏15 ١٢ مَاشَا نِيثْنِي قَّارنْ: ’ڒَْايَاسْ وَالُو! نشِّينْ أَذْ نضْفَارْ إِنْوَاينْ ن يِيخفْ نّغْ ؤُشَا أَذْ نڭّْ كُوڒْ إِجّْ عْلَاحْسَابْ ڒقْسَاحثْ ن وُوڒْ نّسْ!‘ “ ◘18:‏12 إِرْم. 2‏:‏25

١٣ ”س ؤُيَا، أَمُّو إِ إِقَّارْ سِيذِي: ’سقْسَامْ ڒڭْنُوسْ، مَانْ ونْ إِسْڒِينْ عمَّارْصْ أَمْ وَا؟ ثَاعْزَارشْثْ إِسْرَائِيل ثڭَّا إِجّْ ن نّْعِي ذ أَمقّْرَانْ. ◘18:‏13 إِرْم. 2‏:‏10 ١٤ مَا أَذْ إِحيّذْعمَّارْصْ وذْفڒْ ن لُوبْنَانْ زڭْ إِشْثْ ن ثصْضَارْثْ ذڭْ إِيَّارْ؟ مَا أَذْ أَژْغنْ عمَّارْصْ وَامَانْ إِتّْبُوقْبُوقنْ، إِسمَّاضنْ إِتَّازّْڒنْ؟ ١٥ مَاشَا وَاخَّا أَمنِّي إِتُّو أَيِي ڒْْڭنْسْ إِنُو. نِيثْنِي تَّاوْينْ ثِيوْهِيبِينْ ن ڒبْخُورْ إِ لْ-أَصْنَامْ إِبطّْڒنْ إِنِّي ثنْ إِجِّينْ أَذْ نّْقَارْضنْ ذڭْ إِبْرِيذنْ نْسنْ، ذِي جُّورَاثْ ن وشْحَاڒْ ؤُيَا، مَاحنْذْ أَذْ ؤُيُورنْ ذڭْ إِزُوبَاقْ ن إِجّْ ن وبْرِيذْ وَارْ إِوِيطِينْ، ◘18:‏15 إِرْم. 2‏:‏32؛ 3‏:‏21؛ 6‏:‏16؛ 13‏:‏25 ١٦ مَاحنْذْ أَذْ أَرّنْ ثَامُّورْثْ نْسنْ ذ إِشْثْ ن ڒْْقشْعثْ ن ؤُنخْڒِيعْ ذ ثْسضْحَاشْثْ إِ ڒبْذَا. قَاعْ ونِّي سّنِّي إِ غَا إِكّنْ، أَذْ إِنّخْڒعْ، أَذْ إِهزّْ أَزدْجِيفْ نّسْ. ◘18:‏16 إِرْم. 12‏:‏11؛ 19‏:‏8؛ 49‏:‏13؛ 50‏:‏13 ١٧ أَمْ ؤُسمِّيضْ ن مَانِيسْ إِ د-ثْنقَّارْ ثْفُوشْثْ أَذْ ثنْ زُوزَّارغْ زَّاثْ إِ ڒعْذُو. نشّْ أَذْ أَسنْ سّشْنغْ أَعْرُورْ، وَارْ إِدْجِي ؤُذمْ إِنُو، ذڭْ وَاسّْ ن ؤُهلّكْ نْسنْ.‘ “◘18:‏17 إِشا. 27‏:‏8؛ 29‏:‏6؛ إِرْم. 4‏:‏11، 12، 13؛ 13‏:‏24

١٨ ”نِيثْنِي مَاشَا نَّانْ: ’أَسمْ-د، جّمْ أَنغْ أَذْ نڭّْ ثَامعْمُوتْشْ خْ إِرْمِييَا، مَاغَارْ شَّارِيعَاعمَّارْصْ أَذْ إِقْضَا غَارْ ؤُكهَّانْ، شّْوَارْ غَارْ ؤُمِيغِيسْ ؤُ أَوَاڒْ غَارْ ؤُنَابِي. أَسمْ-د، أجّْ أَنغْ أَذْ ث نوّثْ س وَاوَاڒنْ ن يِيڒسْ نّغْ ؤُشَا أجّْ أَنغْ وَارْ نتِّيشْ ثَايْنِيثْ إِ ؤُڒَا ذ إِجّْ زڭْ وَاوَاڒنْ إِ إِقَّارْ.‘ “ ◘18:‏18 إِرْم. 9‏:‏7؛ مـَال. 2‏:‏7

١٩ ”حْضَا أَيِي، أَ سِيذِي، ؤُ سڒْ-د غَارْ ثْمِيجَّا ن يِينِّي أَكِيذِي إِتّْمنْغَانْ. ٢٠ مَا خنِّي أَذْ إِتّْوَاخْڒفْ مِينْ إِصبْحنْ س مِينْ وَارْ إِحْڒِينْ؟ مَاغَارْ نِيثْنِي غْزِينْ أَيِي إِشْثْ ن ثنْضتْشْ! إِذَارْ مَامّشْ بدّغْ زَّاثكْ حِيمَا أَذْ سِّيوْڒغْ ذِي ڒْْخِيرْ نْسنْ، حِيمَا أَذْ خَاسنْ حيّْذغْ أَسْعَارْ نّشْ. ٢١ س ؤُيَا، أوْشْ إِحنْجِيرنْ نْسنْ إِ ڒَْاژْ ؤُشَا سلّمْ إِ-ثنْ إِ ثْزمَّارْ ن سِّيفْ ؤُشَا أجّْ ثِيمْغَارِينْ نْسنْ أَذْ أَسنْثْ أَشَارنْ إِحنْجِيرنْ، أَذْ ذوْڒنْثْ ذ ثِيجَّاڒْ، أجّْ إِرْيَازنْ نْسنْثْ أَذْ تّْوَانْغنْ ؤُ إِحُوضْرِييّنْ نْسنْثْ أَذْ مّْثنْ س سِّيفْ ذڭْ ؤُمنْغِي. ◘18:‏21 إِزهد. 109‏:‏10 ٢٢ أجّْ أَذْ ثتّْوَاسڒْ ثْغُويِّيثْ زِي ثُوذْرِينْ نْسنْ، مَاڒَا شكْ ذغْيَا ثْغضْرذْ-د خَاسنْ إِشْثْ ن بَانْذِييَّا ؤُمِي غْزِينْ إِشْثْ ن ثنْضتْشْ حِيمَا أَذْ أَيِي طّْفنْ، ؤُ سَّارْسنْ ڒفْخُوخْ إِنُّوفَّارنْ إِ إِضَارنْ إِنُو. ٢٣ أَ سِيذِي، شكْ ثسّْنذْ مَارَّا أَنْوَايْ نْسنْ مَاحنْذْ أَذْ أَيِي نْغنْ. وَارْ سْذُورِييْ ڒْْمُوعْصِييّثْ نْسنْ ؤُ وَارْ محِّي دّْنُوبْ نْسنْ زَّاثْ إِ وُوذمْ نّشْ، مَاشَا أجّْ إِ-ثنْ أَذْ وْضَانْ زَّاثكْ. أڭّْ أَسنْ أَمُّو ذِي ڒْْوقْثْ ن وغْضَابْ نّشْ.“