١ أَمُّو إِ إِقَّارْ سِيذِي: ”ؤُيُورْ ؤُشَا سغْ إِجّْ ن ؤُغَارَّافْ ن ثْڒَاخْثْ ؤُشَا أَوِي شَا زڭْ إِمْغَارنْ ن ڒْْڭنْسْ ؤُ زڭْ إِمْغَارنْ ن إِكهَّاننْ أَكِيذكْ. ٢ فّغْ غَارْ بَارَّا غَارْ ثغْزُورْثْ ن مِّيسْ ن هِينُّومْ، ثنِّي غَارْ وَاذَافْ ن ثوَّارْثْ ن إِشقْفَانْ، ؤُشَا بَارّحْ ذِينِّي أَوَاڒنْ نِّي إِ ذ أَشْ غَا إِنِيغْ، ٣ إِنِي: ’سْڒمْ إِ وَاوَاڒْ ن سِيذِي، أَ إِجدْجِيذنْ ن يَاهُوذَا ذ إِمزْذَاغْ ن ؤُرْشَالِيمْ! أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: خْزَارْ، نشّْ أَذْ سِّيوْضغْ إِشْثْ ن ثشْثِي ثَامقّْرَانْثْ خْ ومْشَانْ-أَ، مَاحنْذْ ن مَارَّا نِّي ت غَا إِسْڒنْ، أَذْ طْنطْننْ إِمزُّوغنْ، ◘19:‏3 1 صم. 3‏:‏11؛ 2 إِج. 21‏:‏12 ٤ مَاغَارْ نِيثْنِي حيّْذنْ خَافِي، أَرِّينْ أَمْشَانْ-أَ ذ إِجّْ ن ومْشَانْ إِ إِبَارَّانِييّنْ ؤُشَا قدّْمنْ ثِيوْهِيبِينْ ن ڒبْخُورْ إِ إِربِّيثنْ نّغْنِي نِّي وَارْ سِّيننْ، وَارْ إِدْجِي نِيثْنِي ؤُڒَا ذ إِبَابَاثنْ نْسنْ ذ إِجدْجِيذنْ ن يَاهُوذَا. نِيثْنِيعمَّارنْ أَمْشَانْ-أَ س إِذَامّنْ ن إِمزْذَاڭنْ. ◘19:‏4 إِشا. 65‏:‏11؛ إِرْم. 2‏:‏13، 17، 19؛ 5‏:‏7، 19؛ 7‏:‏6؛ 15‏:‏6؛ 17‏:‏13 ٥ مِينْزِي نِيثْنِي سّْبدّنْ ڒڭْعُوذِي مَانِي تّْوهّْبنْثْ دّْبَايحْ نْسنْ إِ بَاعْلْ، حِيمَا أَذْ سّْشمْضنْ إِحنْجِيرنْ نْسنْ س ثْمسِّي، أَمْ ثْغَارْصَا ن وشْمَاضْ إِ بَاعْلْ، مِينْ وَارْ ذ أَسنْ ؤُمُورغْ ذ مِينْ وَارْ غَارْسنْ سِّيوْڒغْ ذ مِينْعمَّارْصْ وَارْ ث ڭِّيغْ ذڭْ وُوڒْ إِنُو.‘ “

٦ ”س ؤُيَا، خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، وَارْ ذَايْسنْ قَّارنْ عَاذْ إِ ومْشَانْ-أَ ’ثُوفَاثْ‘ نِيغْ ’ثَاغْزُورْثْ ن مِّيسْ ن هِينُّومْ‘، مَاشَا ’ثَاغْزُورْثْ ن ونْغَايْ‘. ◘19:‏6 إِرْم. 7‏:‏32 ٧ مَاغَارْ أَذْ سّْبطّْڒغْ إِنْوَاينْ ن يَاهُوذَا ذ ؤُرْشَالِيمْ ذڭْ ومْشَانْ-أَ ؤُ أَذْ ثنْغضْڒغْ زَّاثْ إِ وُوذمْ ن ڒْْعذْيَانْ نْسنْ س سِّيفْ ؤُ س ؤُفُوسْ ن يِينِّي يَارزُّونْ ثُوذَارْثْ نْسنْ. نشّْ أَذْ وْشغْ ڒْْخشْبَاثْ نْسنْ ذ مَاشَّا إِ إِجْضَاضْ ن ؤُجنَّا ؤُ إِ ڒْْمَاڒْ ن ثمُّورْثْ. ◼19:‏7 ’ثُوذَارْثْ نْسنْ‘ - س ثْعِيبْرَانِيثْ ’ڒعْمَارْ نْسنْ‘.  ◘19:‏7 إِرْم. 15‏:‏3؛ 16‏:‏4 ٨ نشّْ أَذْ أَرّغْ ثَانْذِينْثْ-أَ ذ إِشْثْ ن ڒْْقشْعثْ ن ؤُنخْڒِيعْ ذ ثْسضْحَاشْ. كُوڒْ إِجّْ ونِّي خَاسْ د غَا إِكّنْ أَذْ إِنّخْڒعْ ؤُ أَذْ إِصفَّارْ س أَسْرُوبِي خْ مَارَّا جّْعَايفْ نّسْ. ٩ نشّْ أَذْ أَسنْ ڭّغْ أَذْ شّنْ أَيْسُومْ ن إِحنْجِيرنْ نْسنْ ذ ويْسُومْ ن يسِّيثْسنْ. نِيثْنِي أَذْ شّنْ، كُوڒْ إِجّْ أَيْسُومْ ن جَّارْ نّسْ، ذِي ڒْْوقْثْ نِّي ذِي غَا قُووَّارنْ إِ ثنْذِينْثْ، ذِي ڒحْصَارثْ إِ زِي ثنْ إِ غَا حْصَارنْ ڒْْعذْيَانْ نْسنْ ذ يِينِّي يَارزُّونْ ثُوذَارْثْ نْسنْ.“◼19:‏9 ’ثُوذَارْثْ نْسنْ‘ - س ثْعِيبْرَانِيثْ ’ڒعْمَارْ نْسنْ‘.  ◘19:‏9 لَاوِي 26‏:‏29؛ أَعَوذ. 28‏:‏53؛ إِڭجذ. 4‏:‏10 ١٠ خنِّي إِتّْخصَّا أَشْ أَذْ ثَارْژذْ أَغَارَّافْ جَارْ ثِيطَّاوِينْ ن يرْيَازنْ نِّي أَكِيذكْ يُويُورنْ. ١١ إِتّْخصَّا أَذْ أَسنْ ثِينِيذْ: ”أَمُّو إِ إِقَّارْ سِيذِي ن ڒْْعسْكَارَاثْ: ’أَمُّو إِ غَا أَرْژغْ ڒْْڭنْسْ-أَ ذ ثنْذِينْثْ-أَ، أَمْ مَامّشْ تَّارژَّانْ إِجّْ ن ؤُغَارَّافْ ن بُو-ثْڒَاخْثْ نِّي وَارْ إِزمَّارنْ أَذْ ثعذْڒنْ عَاذْ. نِيثْنِي أَذْ ثنْ نضْڒنْ ذِي ثُوفَاثْ ؤُمِي وَارْ ذِينْ إِقِّيمْ ومْشَانْ مَانِي غَا نضْڒنْ. ◼19:‏11 ’أَقدَّارْ‘ - نِيغْ ’بُو-ثْڒَاخْثْ‘.  ◘19:‏11 إِرْم. 7‏:‏32 ١٢ أَمُّو إِ غَا ڭّغْ زڭْ ومْشَانْ-أَ ؤُ زڭْ إِمزْذَاغْ نّسْ، إِقَّارْ سِيذِي، حِيمَا أَذْ أَرّغْ ثَانْذِينْثْ-أَ أَمْ ثُوفَاثْ. ١٣ ثُوذْرِينْ ن ؤُرْشَالِيمْ ذ ثُوذْرِينْ ن إِجدْجِيذنْ ن يَاهُوذَا أَذْ ذوْڒنْثْ خمْجنْثْ أَمْ ومْشَانْ ن ثُوفَاثْ، زِي سِّيبّثْ ن مَارَّا ثُوذْرِينْ إِ زِي خْ ثْزغْوِينْ نْسنْثْ قدّْمنْ نِيثْنِي ڒبْخُورْ إِ مَارَّا ڒْْعسْكَارْ ن ؤُجنَّا ذ ثوْهِيبِينْ ن ؤُسيّبْ إِ إِربِّيثنْ نّغْنِي.‘ “ ◘19:‏13 إِرْم. 7‏:‏18

١٤ ؤُمِي د-إِعْقبْ إِرْمِييَا زِي ثُوفَاثْ، مَانِي ثُوغَا ث إِسّكّْ سِيذِي مَاحنْذْ أَذْ إِنبَّا، يُويُورْ ذِي ڒمْرَاحْ ن زَّاثْ ن ثَادَّارْثْ ن سِيذِي ؤُشَا إِنَّا إِ ڒْْڭنْسْ مَارَّا: ١٥ ”أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: ’خْزَارْ، نشّْ أَذْ سِّيوْضغْ خْ ثنْذِينْثْ-أَ ؤُ خْ مَارَّا ثِيندَّامْ نّسْ مَارَّا ڒْْغَارْ نِّي خْ سِّيوْڒغْ، مِينْزِي نِيثْنِي منْعنْ ثَاغنَّانْثْ أَمْ ؤُڭِينْ أَذْ سْڒنْ غَارْ وَاوَاڒنْ إِنُو.‘ “ ◘19:‏15 إِرْم. 7‏:‏26؛ 17‏:‏23