1 أَوَاڒْ نِّي د-إِفّْغنْ زِي سِيذِي غَارْ إِرْمِييَا ذڭْ ؤُسڭّْوَاسْ وِيسّْعشْرَا ن صِيذْقِييَا، أَجدْجِيذْ ن يَاهُوذَا. أَسڭّْوَاسْ-أَ ثُوغَا ذ أَسڭّْوَاسْ وِيسّْ ثْمنْطَاشْ ن نابُوخَاذْرَاصَّارْ. 2 ذڭْ وُوسَّانْ نِّي ثُوغَا ڒْعسْكَارْ ن ؤُجدْجِيذْ ن بَابِيلْ إِحصَّارْ-د ؤُرْشَالِيمْ ؤُشَا أَنَابِي إِرْمِييَا ثُوغَا إِتّْوَاحبّسْ ذِي ڒمْرَاحْ ن ڒحْبسْ نِّي ثُوغَا ذِي ثَادَّارْثْ ن ؤُجدْجِيذْ ن يَاهُوذَا. 3 مَاغَارْ ثُوغَا إِحبّسْ إِ-ث صِيذْقِييَا، أَجدْجِيذْ ن يَاهُوذَا، أَمْ ذ أَسْ إِنَّا: ”مَايمِّي ثتّْنَابّذْ، ثقَّارذْ: ’أَمُّو إِ إِقَّارْ سِيذِي: خْزَارْ، نشّْ أَذْ ڭّغْ ثَانْذِينْثْ-أَ ذڭْ ؤُفُوسْ ن ؤُجدْجِيذْ ن بَابِيلْ ؤُ نتَّا أَذْ ت ثطّفْ. 4 صِيذْقِييَا، أَجدْجِيذْ ن يَاهُوذَا، وَارْ إِنجّمْ زڭْ ؤُفُوسْ ن إِكَالْذَانِييّنْ، مَاشَا أَذْ إِمّوْشْ ذڭْ ؤُفُوسْ ن ؤُجدْجِيذْ ن بَابِيلْ. نتَّا أَذْ كِيذسْ إِسِّيوڒْ زڭْ ؤُقمُّومْ غَارْ ؤُقمُّومْ ؤُ نتَّا أَذْ ث إِژَارْ ثِيطّْ ذِي ثِيطّْ. ◘32:‏4 إِرْم. 34‏:‏3 5 نتَّا أَذْ يَاوِي صِيذْقِييَا غَارْ بَابِيلْ ؤُ نتَّا أَذْ ذِينِّي إِقِّيمْ، أَڒْ غَارسْ إِ غَا رَاحغْ، أَمُّو إِ إِقَّارْ سِيذِي. وَاخَّا كنِّيوْ أَذْ ثمّنْغمْ أَكْ-ذ إِكَالْذَانِييّنْ، وَارْ تِّيكّْوِيضمْ شَا.‘ “

6 إِرْمِييَا إِنَّا: ”يُوسَا-د غَارِي وَاوَاڒْ ن سِيذِي، إِنَّا: 7 ’خْزَارْ، حَانَامْ‘إِلْ، مِّيسْ نعمِّيشْ شَالُّومْ، أَذْ غَاركْ د-يَاسْ ؤُشَا أَذْ يِينِي: سغْ إِ يِيخفْ نّشْ إِيَّارْ إِنُو ذِي عَانَاثُوثْ، مَاغَارْ شكْ غَاركْ ڒْحقّْ نْ ڒفْذِييّثْ مَاحنْذْ أَذْ ث ثسْغِيذْ.‘ “ 8 خنِّي يُوسَا-د غَارِي حَانَامْ‘إِلْ، مِّيسْ نعمِّي، عْلَاحْسَابْ أَوَاڒْ ن سِيذِي، ذِي ڒمْرَاحْ ن ڒحْبسْ، إِنَّا أَيِي: ”سغْ خنِّي إِيَّارْ إِنُو ذِي عَانَاثُوثْ، ذِي ثمُّورْثْ ن بِينْيَامِينْ، مَاغَارْ شكْ غَاركْ ڒْحقّْ أَذْ ث ثْوَارْثذْ ؤُشَا غَاركْ ڒْحقّْ ن ؤُسُوفغْ مَاحنْذْ أَذْ ث ثفْذِيذْ، أَذْ ث ثسْغذْ.“ ڒخْذنِّي سّْنغْ إِلَّا أَوَاڒْ-أَ يُوسَا-د زِي سِيذِي. 9 أَمُّو إِ سْغِيغْ إِيَّارْ نِّي إِدْجَانْ ذِي عَانَاثُوثْ خْ حَانَامْ‘إِلْ، مِّيسْ نعمِّي، ؤُشَا وزْنغْ أَسْ نُّوقَارْثْ: سْبعْطَاشْ شِيقْلُو ن نُّوقَارْثْ. 10 نشّْ وقّْعغْ خْ ثَابْرَاثْ، شمّْعغْ ت ؤُشَا جِّيغْ شّْهُوذْ أَذْ ت سّْمثْننْ ؤُشَا وزْنغْ نُّوقَارْثْ ذِي ڒْمِيزَانْ. 11 كْسِيغْ ثَابْرَاثْ إِتّْوَانّْضنْ ن ثْمسْغِيوْثْ، ثنِّي ثُوغَا إِتّْوَاشمّْعنْ، إِتّْوَارِي ذَايسْ مَامّشْ إِتّْوَاڭّْ ڒْعَاهْذْ ؤُ مِينْ دْجَانْثْ لْفَارَايِيضْ، ؤُڒَا ثَابْرَاثْ يَارزْمنْ 12 ؤُشَا وْشِيغْ ثَابْرَاثْ إِتّْوَانْضنْ ن ثْمسْغِيوْثْ إِ بَارُوخْ، مِّيسْ ن نِيرِي-يَاهْ، مِّيسْ ن مَاحْسِييَا، زَّاثْ إِ ثِيطَّاوِينْ ن حَانَامْ‘إِلْ، مِّيسْ نعمِّي، ؤُ زَّاثْ إِ ثِيطَّاوِينْ نْ ڒشْهُوذْ نِّي ثُوغَا إِوقّْعنْ ثَابْرَاثْ إِتّْوَانّْضنْ ن ثْمسْغِيوْثْ زَّاثْ إِ ثِيطَّاوِينْ ن مَارَّا وُوذَاينْ نِّي إِقِّيمنْ ذِي ڒمْرَاحْ ن ڒحْبسْ. 13 نشّْ ؤُمُورغْ بَارُوخْ زَّاثْ إِ ثِيطَّاوِينْ نْسنْ، نِّيغْ: 14 ”أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: ’كْسِي ثِيبْرَاثِينْ-أَ، ثَابْرَاثْ إِتّْوَانّْضنْ ن ثْمسْغِيوْثْ، أَمْ ثنِّي إِشمّْعنْ أَمْ ثَانِيثَا، ثنِّي يَارزْمنْ، ؤُشَا سَّارْسْ إِ-ثنْثْ ذڭْ إِشْثْ ن ڒْقشْعثْ ن ثْڒَاخْثْ، مَاحنْذْ أَذْ قِّيمنْثْ أَطَّاسْ ن وُوسَّانْ حْضَانْثْ!‘ 15 مَاغَارْ أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: ’أَذْ تّْوَاسْغنْ عَاوذْ ثُوذْرِينْ ذ إِيَّارنْ ذ إِمَارْجَاعنْ ن ؤُضِيڒْ ذِي ثمُّورْثْ-أَ.‘ “

16 أَوَارْنِي ؤُمِي ثُوغَا وْشِيغْ ثَابْرَاثْ ن ثْمسْغِيوْثْ إِ بَارُوخْ، مِّيسْ ن نِيرِي-يَاهْ، ژُّودْجغْ س ڒَادْجَاغْ غَارْ سِيذِي، نِّيغْ: 17 ”أَخْ، سِيذِي إِنُو، سِيذِي، خْزَارْ، شكْ ثڭِّيذْ إِجنْوَانْ ذ ثَامُّورْثْ س جّْهذْ نّشْ أَمقّْرَانْ ؤُ س ؤُغِيڒْ نّشْ إِسّْوِيژّْضنْ. وَارْ خَاكْ إِوْعَارْ وَالُو. 18 شكْ ذ ونِّي إِڭِّينْ ثَامخْسِيوْثْ إِشوَّارنْ إِ ڒُوڒُوفْ ؤُشَا ثْخدْجْصذْ ڒْمُوعْصِييّثْ ن إِبَابَاثنْ ذڭْ وحْسِينْ ن إِحنْجِيرنْ نْسنْ أَوَارْنِي أَسنْ، أَ شكْ أَربِّي ذ أَمقّْرَانْ ذ أَجبَّارْ، ونِّي ؤُمِي قَّارنْ: سِيذِي ن ڒْعسْكَارَاثْ. ◘32:‏18 ؤُف. 34‏:‏7 19 شكْ ذ أَمقّْرَانْ ن شّْوَارْ ؤُ ثجْهذْ ذِي ثْمڭَّا، مَاغَارْ ثِيطَّاوِينْ نّشْ تّْعسّنْثْ خْ مَارَّا إِبْرِيذنْ ن ثَارْوَا ن بْنَاذمْ، حِيمَا أَذْ ثْخدْجْصضْ كُوڒْ إِجّْ عْلَاحْسَابْ إِبْرِيذنْ نّسْ ؤُ عْلَاحْسَابْ ڒْغِيدْجثْ ن ثْمڭَّا نّسْ.◘32:‏19 أَيُوبْ 34‏:‏21؛ أَوڒن. 5‏:‏21؛ إِشا. 28‏:‏29؛ إِرْم. 16‏:‏17؛ 17‏:‏10 20 شكْ ثڭِّيذْ ڒعْڒَامَاثْ ذ لْمُوجِيزَاثْ ذِي مِيصْرَا، أَڒْ أَسّْ-أَ، أَمْ ذڭْ إِسْرَائِيل أَمْ ذڭْ إِوْذَانْ نّغْنِي. ثڭِّيذْ إِجّْ ن يِيسمْ إِ يِيخفْ نّشْ، أَمْ مَامّشْ إِ ثدْجَا أَسّْ-أَ. 21 شكْ ثسُّوفّْغذْ-د ڒْڭنْسْ نّشْ إِسْرَائِيل زِي ثمُّورْثْ ن مِيصْرَا س ڒعْڒَامَاثْ ذ لْمُوعْجِيزَاثْ، س إِجّْ ن ؤُفُوسْ  إِجهْذنْ ذ إِجّْ ن ؤُغِيڒْ  إِسّْوِيژَّاضنْ، ؤُمِي ثسّكَّارذْ إِشْثْ ن ثڭّْوُوذِي ثَامقّْرَانْثْ جَارْ ڒڭْنُوسْ.◘32:‏21 ؤُف. 6‏:‏7؛ 2 صم. 7‏:‏23؛ 1 إِم. 17‏:‏21 22 شكْ ثوْشِيذْ أَسنْ ثَامُّورْثْ-أَ، ثنِّي ثجُّودْجذْ إِ ڒجْذُوذْ نْسنْ مَاحنْذْ أَذْ أَسنْ ت ثوْشذْ، إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ. 23 نِيثْنِي ؤُذْفنْ-د غَارسْ ؤُشَا طّْفنْ ت ذ ثَاسْغَارْثْ، مَاشَا نِيثْنِي وَارْ سْڒِينْ إِ ثْمِيجَّا نّشْ ؤُ وَارْ ؤُيُورنْ ذڭْ وبْرِيذْ ن شَّارِيعَا نّشْ ؤُ وَارْ ڭِّينْ عْلَاحْصَابْ مَارَّا مِينْزِي ثنْ ثْوصِّيذْ. س ؤُيَا إِ ثنْ إِڒْقفْ مَارَّا ڒْغَارْ-أَ. 24 خْزَارْ، إِشْبَارنْ إِ ڒحْصَارثْ! نِيثْنِي إِوْضنْ-د أَڒْ ثَانْذِينْثْ مَاحنْذْ أَذْ ت طّْفنْ، ؤُشَا ثَانْذِينْثْ ثمّوْشْ ذڭْ ؤُفُوسْ ن إِكَالْذَانِييّنْ نِّي أَكِيذسْ إِتّْمنْغَانْ، زِي سِّيبّثْ ن سِّيفْ ذ ڒَاژْ ذ طَّاعُونْ. مِينْ ثسِّيوْڒذْ أَقَا يِيوضْ-د. خْزَارْ، ثتّْوَارِيذْ ث سِيمَانْثْ نّشْ. 25 وَاخَّا أَمنِّي ثنِّيذْ أَيِي، أَ سِيذِي إِنُو، سِيذِي: سغْ إِ يِيخفْ نّشْ إِيَّارْ نِّي س نُّوقَارْثْ ؤُشَا أجّْ ڒشْهُوذْ أَذْ ت سّْمثْننْ، ڒَْامِي ثمّوْشْ ثنْذِينْثْ ذڭْ ؤُفُوسْ ن إِكَالْذَانِييّنْ.“

26 خنِّي يُوسَا-د وَاوَاڒْ ن سِيذِي غَارْ إِرْمِييَا، إِنَّا: 27 ”خْزَارْ، نشّْ ذ سِيذِي، أَربِّي ن مَارَّا نِّي غَارْسنْ أَرِّيمثْ ن ويْسُومْ. مَا إِوْعَارْ خَافِي شَا؟‘ ◘32:‏27 ڒخْڒ. 16‏:‏22 28 س ؤُيَا، أَمُّو إِ إِقَّارْ سِيذِي: ’نشّْ أَذْ ڭّغْ ثَانْذِينْثْ-أَ ذڭْ ؤُفُوسْ ن إِكَالْذَانِييّنْ ؤُ ذڭْ ؤُفُوسْ ن نابُوخَاذْرَاصَّارْ، أَجدْجِيذْ ن بَابِيلْ، ؤُ نتَّا أَذْ ت إِطّفْ. 29 إِكَالْذَانِييّنْ، إِنِّي إِتّْمنْغَانْ أَكْ-ذ ثنْذِينْثْ-أَ، أَذْ غَارسْ د-أَذْفنْ، أَذْ قدّنْ ثَانْذِينْثْ س ثْمسِّي ؤُشَا أَذْ ت سّْشمْضنْ أَكْ-ذ ثُوذْرِينْ نِّي خْ ثْزغْوِينْ نْسنْثْ إِ زِي قدّْمنْ ثِيوْهِيبِينْ ن ڒبْخُورْ إِ بَاعْلْ ؤُشَا سيّْبنْ ثِيوْهِيبِينْ ن ؤُسيّبْ إِ إِربِّيثنْ نّغْنِي حِيمَا أَذْ أَيِي سْعَارنْ. ◘32:‏29 إِرْم. 21‏:‏10 30 مَاغَارْ أَيْثْ ن إِسْرَائِيل ذ أَيْثْ ن يَاهُوذَا زِي ثمْژِي نْسنْ تّڭّنْ مْغِيرْ مِينْ إِدْجَانْ ذ أَعفَّانْ ذِي ثِيطَّاوِينْ إِنُو. أَيْثْ ن إِسْرَائِيل سْعَارنْ أَيِي س ڒْخذْمثْ ن إِفَاسّنْ نْسنْ!‘، إِقَّارْ سِيذِي. 31 ’مَاغَارْ ثَانْذِينْثْ ثُوغَا ت إِ نشّْ ذ سِّيبّثْ ن وغْضَابْ ذ وسْعَارْ زڭْ وَاسّْ نِّي ذِي ثتّْوَابْنَا أَڒْ أَسّْ-أَ، أَڒَامِي ت غَا نْضَارغْ خْ وُوذمْ إِنُو 32 زِي سِّيبّثْ ن مَارَّا ڒْغَارْ ن أَيْثْ ن إِسْرَائِيل ذ أَيْثْ ن يَاهُوذَا مَاحنْذْ أَذْ أَيِي سْعَارنْ، نِيثْنِي ذ إِجدْجِيذنْ نْسنْ ذ ڒْحُوكَّامْ نْسنْ ذ إِكهَّاننْ نْسنْ ذ إِنَابِييّنْ نْسنْ ذ إِرْيَازنْ ن يَاهُوذَا ذ إِمزْذَاغْ ن ؤُرْشَالِيمْ. 33 نِيثْنِي وْشِينْ أَيِي-د س وعْرُورْ، وَارْ إِدْجِي س ؤُغمْبُوبْ، وَاخَّا نشّْ سّْڒمْذغْ ثنْ، عَاذْ زڭْ ؤُمزْوَارُو سّْغَارغْ ثنْ، مَاشَا نِيثْنِي وَارْ خْسنْ أَذْ سْڒنْ مَاحنْذْ أَذْ طّْفنْ تَّارْبِييّثْ. ◘32:‏33 إِرْم. 2‏:‏27؛ 7‏:‏13، 24، 25؛ 25‏:‏3؛ 26‏:‏5؛ 29‏:‏19 34 نِيثْنِي سّْبدّنْ نّْعَاوَاثْ نْسنْ ن لْ-أَصْنَامْ ذِي ثَادَّارْثْ إِ خفْ إِتّْوَابَارّحْ إِسمْ إِنُو مَاحنْذْ أَذْ ت سّْخمْجنْ. 35 نِيثْنِي سّْبدّنْ ڒڭْعُوذِي ن بَاعْلْ مَانِي إِ ذ أَسْ تّْوهّْبنْ دّْبَايحْ نْسنْ ذِي ثغْزُورْثْ ن مِّيسْ ن هِينُّومْ مَاحنْذْ أَذْ سّعْذُونْ إِحنْجِيرنْ نْسنْ ذ ثْحنْجِيرِينْ نْسنْثْ إِ مُولَاكْ ذِي ثْمسِّي، مِينْ وَارْ ذ أَسنْ ؤُمُورغْعمَّارْصْ ؤُ مِينْ وَارْ ذ أَيِي د-إِدَّارنْ ذِي ڒْبَاڒْ إِنُو، أَقَا أَذْ ڭّنْ نّْعِي أَمْ وَا أَڒَامِي عَارْننْ يَاهُوذَا غَارْ دّْنُوبْ.‘ “ ◘32:‏35 إِرْم. 19‏:‏5

36 ”س ؤُيَا، ڒخُّو، أَمُّو إِ إِقَّارْ سِيذِي، أَربِّي ن إِسْرَائِيل، خْ ثنْذِينْثْ-أَ إِ خْ ثقَّارمْ: ’أَقَا ثمّوْشْ ذڭْ ؤُفُوسْ ن ؤُجدْجِيذْ ن بَابِيلْ، س سِّيفْ، س ڒَاژْ ؤُ س طَّاعُونْ!‘: 37 خْزَارْ، نشّْ أَذْ ثنْ سّْمُونغْ زِي مَارَّا ثِيمُّورَا مَانِي خَاسنْ ؤُژّْڒغْ ذڭْ وغْضَابْ إِنُو ؤُ ذڭْ وسْعَارْ إِنُو ؤُ ذڭْ ؤُذُوقّزْ ن وغْضَابْ إِنُو، ؤُ نشّْ أَذْ ثنْ أَرّغْ غَارْ ومْشَانْ-أَ ؤُ أَذْ ثنْ سّْزذْغغْ ذِي ڒَامَانْ. ◘32:‏37 إِرْم. 23‏:‏3؛ 29‏:‏14؛ 31‏:‏10 38 نِيثْنِي أَذْ إِڒِينْ ذ ڒْڭنْسْ إِنُو ؤُ نشّْ أَذْ إِڒِيغْ ذ أَربِّي نْسنْ. ◘32:‏38 إِرْم. 24‏:‏7؛ 30‏:‏22؛ 31‏:‏1، 33 39 نشّْ أَذْ أَسنْ وْشغْ ؤُڒْ ذ إِجّْ ؤُڒَا ذ وبْرِيذْ ذ إِجّْ حِيمَا أَذْ أَيِي ڭّْوذنْ مَارَّا ؤُسَّانْ إِ ثِيزِي نْسنْ ؤُ إِ ثِيزِي ن إِحنْجِيرنْ نْسنْ أَوَارْنِي أَسنْ. 40 نشّْ أَكِيذْسنْ ڭّغْ إِجّْ ن ڒْعَاهْذْ إِتّْذُومَانْ، أَقَا وَارْ تّْحيِّيذغْ زِي أَوَارْنِي أَسنْ، حِيمَا أَذْ أَسنْ ڭّغْ مِينْ إِصبْحنْ، ؤُ نشّْ أَذْ أَسنْ سَّارْسغْ ثِيڭّْوُوذِي زَّايِي ذڭْ وُوڒْ نْسنْ، مَاحنْذْ وَارْ خَافِي تّْحيِّيذنْ عَاذْ. 41 نشّْ أَذْ زَّايْسنْ فَارْحغْ مَاحنْذْ أَذْ ذَايْسنْ تّْهِيلِّيغْ ؤُ زِي ڒْمَانثْ إِنُو أَذْ ثنْ ژُّوغْ ذِي ثمُّورْثْ-أَ س مَارَّا ؤُڒْ إِنُو ؤُ س مَارَّا ڒعْمَارْ إِنُو.‘ “ ◘32:‏41 إِرْم. 24‏:‏6؛ عَام. 9‏:‏15

42 ”مَاغَارْ أَمُّو إِ إِقَّارْ سِيذِي: ’أَمْ مَامّشْ إِ د إِوْيغْ خْ ڒْڭنْسْ-أَ ثُوعفّْنَا-يَا ثَامقّْرَانْثْ، أَمُّو إِ خَاسنْ إِ غَا سِّيوْضغْ مَارَّا ثَاصبْحَانْثْ إِ خَاسنْ نِّيغْ. 43 أَذْ سْغنْ عَاوذْ إِيَّارنْ ذِي ثمُّورْثْ-أَ إِ خفْ ثقَّارمْ كنِّيوْ: ’أَقَا-ت ذ إِشْثْ ثمُّورْثْ إِتّْوَاردّْدْجنْ نْهْڒَا بْنَاذمْ ذ ڒْمَارْ، ثمّوْشْ ذڭْ ؤُفُوسْ ن إِكَالْذَانِييّنْ.‘ 44 أَذْ سْغنْ عَاوذْ إِيَّارنْ س تّْمنْيَاثْ ن نُّوقَارْثْ، أَذْ وقّْعنْ ؤُ أَذْ شمّْعنْ ثِيبْرَاثِينْ ن ثْمسْغِيوْثْ، أَذْ أَوْينْ ڒشْهُوذْ حِيمَا أَذْ سّْمثْننْ ثَامسْغِيوْثْ ذِي ثمُّورْثْ ن بِينْيَامِينْ، ذِي جّْوَايهْ ن ؤُرْشَالِيمْ، ذِي ثْندَّامْ ن يَاهُوذَا، ذِي ثْندَّامْ ن ثمُّورْثْ ن إِذُورَارْ، ذِي ثْندَّامْ ن ثمُّورْثْ إِوَاطَانْ ؤُ ذِي ثْندَّامْ ن ثمُّورْثْ ن لْجَانُوبْ، مَاغَارْ نشّْ أَذْ سّنْقڒْبغْ ثَامحْبَاسْثْ نْسنْ، أَمُّو إِ إِقَّارْ سِيذِي.‘ “