١ ... ٢ ذِي صّْبحْ يُوسَا-د عَاوذْ غَارْ زَّاوشْثْ ثَامقّْرَانْثْ، ؤُسِينْ-د غَارسْ إِوْذَانْ مَارَّا. خنِّي أَمْ إِقِّيمْ، إِبْذَا إِسّڒْمَاذْ إِ-ثنْ. ٣ إِمْسڒْمَاذنْ ن إِذْلِيسنْ ذ إِفَارِيسِييّنْ إِوْينْ أَسْ-د إِشْثْ ن ثمْغَارْثْ، ثتّْوَاطّفْ ثتّڭّْ زِّينَا. سّْبدّنْ ت ذِي ڒْْوسْطْ، ٤ نَّانْ أَسْ: ”أَ أَمْسغَّارْ، ثَامْغَارْثْ-أَ ثتّْوَاطّفْ س بْطَايْطَايْ، ثتّڭّْ زِّينَا. ٥ إِوصَّا مُوسَا ذِي شَّارِيعَا أَذْ نَارْجمْ ثِيمْغَارِينْ أَمْ ثَانِيثَا. مِينْ غَا ثِينِيذْ شكْ؟“ ◘8:‏5 لَاوِي 20‏:‏10؛ أَعَوذ. 22‏:‏22. ٦ نَّانْ أَسْ أَيَا حِيمَا أَذْ ث جَارّْبنْ، حِيمَا أَذْ غَارْسنْ ثِيڒِي مِينْزِي خَاسْ إِ غَا شثْشَانْ. مَاشَا يَاسُوع يُوضَارْ سْوَادَّايْ، يُورَا س ؤُضَاضْ نّسْ ذِي ثمُّورْثْ.

٧ ڒَْامِي قِّيمنْ أَمُّو ث تّسّقْسَانْ، إِبدّْ، إِنَّا أَسنْ: ”وِي زَّايْومْ إِدْجَانْ بْڒَا دّْنُوبْ، أَذْ خَاسْ إِنْضَارْ أَژْرُو أَمزْوَارُو.“ ◘8:‏7 أَعَوذ. 17‏:‏7. ٨ خنِّي يُوضَارْ عَاوذْ سْوَادَّايْ ؤُشَا يُورَا ذِي ثمُّورْثْ. ◘8:‏8 إِرْم. 17‏:‏13 ٩ ڒَْامِي سْڒِينْ مَانْ أَيَا، فّْغنْ إِجّنْ أَوَارْنِي ونّغْنِي، إِمقّْرَاننْ ذ أَمزْوَارُو. ثَامْغَارْثْ نِّي إِبدّنْ ذِي ڒْْوسْطْ جِّينْ ت وحّْذسْ. ١٠ ڒخْذنِّي يَاسُوع إِكَّارْ، إِنَّا إِ ثمْغَارْثْ: ”مَانِي دْجَانْ نِيثْنِي؟ مَا وَارْ شمْ إِحَاكمْ ؤُڒَا ذ إِجّنْ؟“ ١١ نتَّاثْ ثنَّا: ”ؤُڒَا ذ إِجّْ، أَ سِيذِي!“ يَاسُوع إِنَّا أَسْ: ”ؤُڒَا ذ نشّْ وَارْ شمْ تّْحَاكَامغْ شَا. رُوحْ، وَارْ تّْعَاوَاذْ أَذْ ثڭّذْ دّْنُوبْ زِي سَّا ثْسَاونْثْ!“ ◘8:‏11 يُوح. 5‏:‏14.

١٢ إِسِّيوڒْ يَاسُوع عَاوذْ أَكِيذْسنْ، إِنَّا: ”نشّْ ذ ثَافَاوْثْ ن دُّونشْثْ. ونِّي ذ أَيِي غَا إِضْفَارنْ، وَارْ إِڭُّورْعمَّارْصْ ذِي ثَادْجسْثْ، مَاشَا أَذْ يَافْ ثْفَاوْثْ ن ثُوذَارْثْ.“ ◘8:‏12 إِشا. 42‏:‏6، 16؛ يُوح. 1‏:‏9؛ 9‏:‏5؛ 12‏:‏35، 36.

١٣ نَّانْ أَسْ إِفَارِيسِييّنْ: ”شكْ ثْشهّْذذْ خْ يِيخفْ نّشْ، شّْهَاذثْ نّشْ وَارْ ثدْجِي شَا ذ ثِيذتّْ.“ ١٤ يَاسُوع يَارَّا-د، إِنَّا أَسنْ: ”عَاذْ مَاڒَا نشّْ شهّْذغْ خْ يِيخفْ إِنُو، شّْهَاذثْ إِنُو أَقَا ذ ثِيذتّْ، مِينْزِي نشّْ سّْنغْ مَانِيسْ د-ؤُسِيغْ ؤُ مَانِي غَا رَاحغْ، مَاشَا كنِّيوْ وَارْ ثسِّينمْ شَا مَانِيسْ د-ؤُسِيغْ ؤُڒَا مَانِي غَا رَاحغْ. ◘8:‏14 يُوح. 5‏:‏31. ١٥ كنِّيوْ ثتّْحَاكَاممْ عْلَاحْسَابْ دَّاثْ، نشّْ وَارْ تّْحَاكَامغْ ؤُڒَا خْ إِجّنْ. ١٦ ؤُ نشّْ، مَاڒَا حَاكْمغْ، أَذْ يِيڒِي ڒحْكَامْ إِنُو ذ ثِيذتّْ، مِينْزِي نشّْ وَارْ دْجِيغْ بُو وحّْذِي، مَاشَا نشّْ ذ بَابَا ونِّي ذ أَيِي د-إِسّكّنْ. ١٧ ثُورَا عَاوذْ ذِي شَّارِيعَا نْومْ، بلِّي شّْهَاذثْ ن ثْنَاينْ ن إِوْذَانْ ذ ثِيذتّْ. ◘8:‏17 ڒخْڒ. 35‏:‏30؛ أَعَوذ. 17‏:‏6؛ 19‏:‏15؛ مت. 18‏:‏16؛ 2 كُور. 13‏:‏1؛ عبر. 10‏:‏28. ١٨ نشّْ ذ ونِّي إِشهّْذنْ خْ يِيخفْ إِنُو، ؤُشَا ؤُڒَا ذ بَابَا ونِّي ذ أَيِي-د إِسّكّنْ، إِشْهذْ خَافِي.“ ◘8:‏18 مت. 3‏:‏17؛ 17‏:‏5؛ مك. 1‏:‏11؛ 9‏:‏7؛ لك. 3‏:‏22؛ 9‏:‏35؛ يُوح. 1‏:‏33؛ 5‏:‏37؛ 6‏:‏27. ١٩ نِيثْنِي نَّانْ أَسْ: ”مَانِي إِدْجَا بَابَاشْ؟“ يَاسُوع يَارَّا-د، إِنَّا أَسنْ: ”كنِّيوْ وَارْ ذ أَيِي ثسِّينمْ شَا ؤُ وَارْ ثسِّينمْ بَابَا. معْلِيكْ كنِّيوْ ذ أَيِي ثسّْنمْ، أَذْ ثِيڒِي ثسّْنمْ ؤُڒَا ذ بَابَا.“ ◘8:‏19 يُوح. 14‏:‏9؛ 16‏:‏3.

٢٠ إِنَّا أَوَاڒنْ-أَ ذِي مَانِي ثُوغَا ڒخْزنْ ن صّذْقثْ، أَمْ ثُوغَا إِسّڒْمَاذْ ذِي زَّاوشْثْ ثَامقّْرَانْثْ. وَارْ ث إِطِّيفْ ؤُڒَا ذ إِجّْ، مِينْزِي ثَاسَاعّثْ نّسْ ثُوغَا عَاذْ وَارْ د-ثِيوِيضْ. ◘8:‏20 يُوح. 7‏:‏30.

٢١ يَاسُوع إِنَّا أَسنْ عَاوذْ: ”نشّْ أَذْ رَاحغْ، كنِّيوْ أَذْ خَافِي ثَارْزُومْ، أَذْ ثمّْثمْ ذِي دّْنُوبْ نْومْ. مَانِي غَا رَاحغْ نشّْ، وَارْ ثْزمَّارمْ كنِّيوْ أَذْ د-ثَاسمْ.“ ◘8:‏21 يُوح. 7‏:‏34؛ 13‏:‏33. ٢٢ ؤُذَاينْ نَّانْ: ”مَا أَذْ إِنغْ إِخفْ نّسْ ڒخُّو، مِينْزِي نتَّا إِنَّا: ’مَانِي غَا رَاحغْ نشّْ، وَارْ ثْزمَّارمْ كنِّيوْ أَذْ د-ثَاسمْ‘؟“ ٢٣ نتَّا إِنَّا أَسنْ: ”كنِّيوْ زِي سْوَادَّايْ، نشّْ زِي سنّجْ، كنِّيوْ زِي دُّونشْثْ-أَ، مَاشَا نشّْ وَارْ دْجِيغْ شَا زِي دُّونشْثْ-أَ. ◘8:‏23 يُوح. 3‏:‏31. ٢٤ نشّْ نِّيغْ أَومْ، أَذْ ثمّْثمْ ذِي دّْنُوبْ نْومْ، مَاغَارْ مَاڒَا وَارْ ثُومِينمْ شَا أَقَا ذ نشّْ، أَذْ ثمّْثمْ ذِي دّْنُوبْ نْومْ.“ ◘8:‏24 يُوح. 8‏:‏21. ٢٥ ؤُذَاينْ نَّانْ: ”مِينْ ثعْنِيذْ شكْ؟“ يَاسُوع إِنَّا أَسنْ: ”وَاخَّا نشّْ بْذِيغْ أَذْ كِيذْومْ سِّيوْڒغْ - ٢٦ ؤُشَا نشّْ غَارِي أَطَّاسْ ن ثْمسْڒَايِينْ إِ خفْ زمَّارغْ أَذْ خَاومْ سِّيوْڒغْ ؤُشَا أَذْ خَاومْ حكْمغْ - إِتّْخصَّا عَاذْ أَذْ ثسّْنمْ، أَقَا ونِّي ذ أَيِي د-إِسّكّنْ أَقَا-ث ذ ثِيذتّْ، ؤُشَا مِينْ زَّايسْ سْڒِيغْ، أَذْ ث إِنِيغْ إِ دُّونشْثْ.“ ◘8:‏26 يُوح. 7‏:‏28؛ 15‏:‏15؛ رُوم. 3‏:‏4. ٢٧ نِيثْنِي وَارْ فْهِيمنْ شَا، بلِّي ثُوغَا إِسَّاوَاڒْ أَكِيذْسنْ خْ بَابَاسْ. ٢٨ يَاسُوع إِنَّا أَسنْ عَاوذْ: ”خْمِي غَا ثسّْڭعّْذمْ مِّيسْ ن بْنَاذمْ، أَذْ ثْفهْممْ بلِّي أَقَا ذ نشّْ، ؤُ بلِّي وَارْ تّڭّغْ ؤُڒَا ذ إِشْثْ ن ڒْْحَاجّثْ زڭْ إِخفْ إِنُو، مَاشَا سَّاوَاڒغْ أَمْ مَامّشْ ذ أَيِي إِسّڒْمذْ بَابَا. ◘8:‏28 ڒخْڒ. 21‏:‏9؛ 2 إِج. 18‏:‏4؛ يُوح. 3‏:‏11، 14؛ 7‏:‏16؛ 12‏:‏32، 49؛ 14‏:‏10. ٢٩ ونِّي ذ أَيِي د-إِسّكّنْ أَقَا-ث أَكِيذِي. بَابَا وَارْ ذ أَيِي إِجِّي شَا وحّْذِي، مِينْزِي تّڭّغْ ڒبْذَا مِينْ ث يَارْضَانْ.“ ◘8:‏29 يُوح. 14‏:‏10؛ 16‏:‏32. ٣٠ ؤُمِي ثُوغَا إِسَّاوَاڒْ خْ ثْمسْڒَايِينْ-أَ، ؤُمْننْ ذَايسْ أَطَّاسْ. ◘8:‏30 يُوح. 7‏:‏31.

٣١ خنِّي إِنَّا يَاسُوع إِ وُوذَاينْ نِّي ذَايسْ يُومْننْ: ”مَاڒَا ثقِّيممْ ثطّْفمْ ذڭْ وَاوَاڒْ إِنُو، أَذْ ثِيڒِيمْ س ثِيذتّْ ذ إِمحْضَارنْ إِنُو، ٣٢ ؤُشَا أَذْ ثسّْنمْ ثِيذتّْ ؤُشَا ثِيذتّْ أَذْ كنِّيوْ ثْحَارّْ.“ ◘8:‏32 رُوم. 6‏:‏18؛ ڭال. 5‏:‏1؛ 1 بُط. 2‏:‏16. ٣٣ نَّانْ أَسْ: ”نشِّينْ ذ زَّارِيعثْ ن إِبْرَاهِيمْ،عمَّارْصْ وَارْ نعْبِيذْ حذْ س ثسْمُوغِي. مَامّشْ ثْزمَّارذْ أَذْ ثِينِيذْ: ’كنِّيوْ أَذْ ثتّْوَاحَارّمْ‘؟“ ◘8:‏33 مت. 3‏:‏9. ٣٤ يَاسُوع يَارَّا-د خَاسنْ: ”س ثِيذتّْ، س ثِيذتّْ، نشّْ أَذْ أَومْ إِنِيغْ، مَارَّا ونِّي إِتّڭّنْ دّْنُوبْ نتَّا ذ أَمْسخَّارْ ن دّْنُوبْ. ◘8:‏34 رُوم. 6‏:‏20؛ 2 بُط. 2‏:‏1. ٣٥ أَمْسخَّارْ وَارْ إِتّْغِيمِي شَا ذِي ثَادَّارْثْ ڒبْذَا، مَاشَا مِّيسْ أَذْ ذِينْ إِقِّيمْ إِ ڒبْذَا. ٣٦ خْمِي كنِّيوْ إِ غَا إِحَارّْ مِّيسْ، أَذْ ثِيڒِيمْ س ثِيذتّْ ذ إِحُورِّييّنْ. ◘8:‏36 رُوم. 8‏:‏2.

٣٧ نشّْ سّْنغْ، أَقَا كنِّيوْ ذ ثَارْوَا ن إِبْرَاهِيمْ، مَاشَا كنِّيوْ ثَارزُّومْ أَذْ أَيِي ثنْغمْ، مِينْزِي أَوَاڒْ إِنُو وَارْ ثْزمَّارمْ أَذْ ث ثْفهْممْ. ٣٨ نشّْ سَّاوَاڒغْ س مِينْ ژْرِيغْ زِي بَابَا. ؤُڒَا ذ كنِّيوْ ثتّڭّمْ زِي مِينْ ثژْرِيمْ زِي بَابَاثْومْ.“ ◘8:‏38 يُوح. 3‏:‏11؛ 7‏:‏16؛ 12‏:‏49؛ 14‏:‏10، 24. ٣٩ أَرِّينْ-د، نَّانْ أَسْ: ”بَابَاثْنغْ ذ إِبْرَاهِيمْ.“ إِنَّا أَسنْ يَاسُوع: ”مَاعْلِيكْ كنِّيوْ ثدْجِيمْ ذ ثَارْوَا ن إِبْرَاهِيمْ، أَذْ يِيڒِي أَقَا ثتّڭّمْ ڒخْذَايمْ ن إِبْرَاهِيمْ. ◘8:‏39 رُوم. 2‏:‏28؛ 9‏:‏7. ٤٠ مَاشَا ڒخُّو ثَارزُّومْ أَذْ أَيِي ثنْغمْ، نشّْ ذ إِجّْ ن بْنَاذمْ إِ ثُوغَا أَكِيذْومْ إِسَّاوَاڒنْ س ثِيذتّْ إِ سْڒِيغْ زِي أَربِّي. مَانْ أَيَا وَارْ ث إِڭِّي شَا إِبْرَاهِيمْ. ◘8:‏40 يُوح. 17‏:‏17. ٤١ كنِّيوْ ثتّڭّمْ ڒخْذَايمْ ن بَابَاثْومْ.“ نِيثْنِي نَّانْ أَسْ: ”نشِّينْ وَارْ د-نخْڒِيقْ شَا زِي فَارْقْ-شّْغڒْ، أَقَا غَارْنغْ إِجّنْ ونِّي ذ بَابَاثْنغْ، أَقَا-ث ذ أَربِّي.“

٤٢ إِنَّا أَسنْ يَاسُوع: ”مَاعْلِيكْ أَربِّي ذ بَابَاثْومْ، إِڒِي أَقَا ثخْسمْ أَيِي، مِينْزِي نشّْ فّْغغْ-د زِي أَربِّي. نشّْ وَارْ د-ؤُسِيغْ شَا زڭْ إِخفْ إِنُو، مَاشَا نتَّا إِسّكّْ أَيِي-د. ◘8:‏42 يُوح. 5‏:‏43؛ 7‏:‏29. ٤٣ مَايمِّي وَارْ ثفْهِيممْ إِ وَاوَاڒنْ إِنُو؟ مِينْزِي كنِّيوْ وَارْ ثْزمَّارمْ أَذْ ثسْڒمْ إِ وَاوَاڒْأنْ إِنُو! ٤٤ أَقَا كنِّيوْ ثفّْغمْ زِي بَابَاثْومْ، إِبْڒِيسْ، ؤُشَا ثخْسمْ أَذْ ثڭّمْ إِمژْرَانْ ن بَابَاثْومْ. نتَّا ثُوغَا إِنقّْ إِوْذَانْ زڭْ ؤُمزْوَارُو ؤُ وَارْ إِبدّْ ذِي ثِيذتّْ، مِينْزِي وَارْ ذَايسْ بُو ثِيذتّْ. مڒْمِي مَا إِسَّاوَاڒْ س ؤُخَارِّيقْ، إِسَّاوَاڒْ س مِينْ ذَايسْ، مِينْزِي نتَّا ذ بُو-إِخَارِّيقنْ ؤُڒَا ذ بَابَاسْ ن ؤُخَارِّيقْ. ◘8:‏44 أَمز. 3‏:‏1؛ 2 كُور. 11‏:‏3؛ 1 يُوح. 3‏:‏8. ٤٥ مَاشَا ؤُمِي نشّْ قَّارغْ أَومْ ثِيذتّْ، كنِّيوْ وَارْ ذَايِي ثتِّيمْنمْ شَا. ٤٦ وِي زَّايْومْ أَذْ أَيِي إِسّقْنعْ خْ دّْنُوبْ؟ ؤُمِي قَّارغْ ثِيذتّْ، مَايمِّي وَارْ ذَايِي ثتِّيمْنمْ شَا؟ ٤٧ ونِّي إِدْجَانْ زِي أَربِّي، إِتّسْڒَا إِ وَاوَاڒنْ ن أَربِّي. مِينْزِي كنِّيوْ وَارْ ثدْجِيمْ شَا زِي أَربِّي، س ؤُينِّي كنِّيوْ وَارْ ثتّسْڒِيمْ شَا.“ ◘8:‏47 يُوح. 6‏:‏37؛ 10‏:‏26، 27؛ 1 يُوح. 4‏:‏6.

٤٨ ؤُذَاينْ أَرِّينْ-د، نَّانْ أَسْ: ”مَا وَارْ إِدْجِي نِيشَانْ ؤُمِي ننَّا، أَقَا شكْ زِي سَامَارْيَا ؤُ ذَايكْ إِجّْ ن شِّيطَانْ؟“ ◘8:‏48 يُوح. 7‏:‏20؛ 10‏:‏20. ٤٩ يَاسُوع يَارَّا-د، إِنَّا: ”نشّْ وَارْ ذَايِي ؤُڒَا ذ إِجّْ ن شِّيطَانْ، مَاشَا نشّْ تّْوقَّارغْ بَابَا، ؤُشَا كنِّيوْ ثسّحْقَارَامْ أَيِي. ◘8:‏49 يُوح. 7‏:‏18. ٥٠ نشّْ وَارْ أَرزُّوغْ شَا أَعُودْجِي إِنُو. أَقَا ذِينْ إِجّنْ إِ خَاسْ يَارزُّونْ ذ ونِّي إِ غَا إِحكْمنْ. ٥١ س ثِيذتّْ، س ثِيذتّْ، نشّْ أَذْ أَومْ إِنِيغْ: مَاڒَا شَا ن يِيجّنْ إِطّفْ ذڭْ وَاوَاڒْ إِنُو،عمَّارْصْ وَارْ إِتّْوِيڒِي ڒْْموْثْ إِ ڒبْذَا.“ ◘8:‏51 يُوح. 5‏:‏24؛ 11‏:‏25. ٥٢ نَّانْ أَسْ وُوذَاينْ: ”ڒخُّو نسّنْ بلِّي ذَايكْ إِجّْ ن شِّيطَانْ. أَقَا إِبْرَاهِيمْ ذ إِنَابِييّنْ مُّوثنْ. شكْ ثقَّارذْ: ’مَاڒَا شَا ن يِيجّنْ إِطّفْ ذڭْ وَاوَاڒْ إِنُو،عمَّارْصْ أَذْ إِقَّاسْ ڒْْموْثْ إِ ڒبْذَا!‘ ٥٣ مَا شكْ ثمْغَارذْ خْ جذِّيثْنغْ إِبْرَاهِيمْ ونِّي إِمُّوثنْ، ؤُڒَا خْ إِنَابِييّنْ نِّي إِمُّوثنْ؟ مِينْ ثْحسْبذْ إِخفْ نّشْ؟“ ◘8:‏53 عبر. 11‏:‏13. ٥٤ إِنَّا أَسنْ يَاسُوع: ”مَاڒَا نشّْ سّْعُودْجِيغْ إِخفْ إِنُو، أَعُودْجِي إِنُو وَارْ إِدْجِي ذ وَالُو. بَابَا، أَقَا إِسّْعُودْجْ أَيِي، ونِّي خفْ ثقَّارمْ: ’نتَّا ذ أَربِّي نّغْ!‘ ٥٥ كنِّيوْ وَارْ ث ثسِّينمْ، مَاشَا نشّْ أَقَا سّْنغْ ث. مَاڒَا نِّيغْ: ’وَارْ ث سِّينغْ!‘، أَذْ إِڒِيغْ نشّْ ذ بُو-إِخَارِّيقنْ أَمْ كنِّيوْ. مَاشَا نشّْ سّْنغْ ث ؤُ تّطّْفغْ ذڭْ وَاوَاڒْ نّسْ. ٥٦ جذِّيثْومْ إِبْرَاهِيمْ ثُوغَا إِتّْرَاجَا س ڒفْرَاحثْ حِيمَا أَذْ إِژَارْ أَسّْ إِنُو، ؤُشَا إِژْرَا إِ-ث، إِفَارْحْ.“ ◘8:‏56 أَمز. 17‏:‏17؛ لك. 10‏:‏24؛ عبر. 11‏:‏13. ٥٧ نَّانْ أَسْ وُوذَاينْ: ”عَاذْ وَارْ غَاركْ بُو خمْسِينْ ن إِسڭّْوُوسَا، مَامّشْ ثڭِّيذْ ثژْرِيذْ إِبْرَاهِيمْ؟“ ٥٨ إِنَّا أَسنْ يَاسُوع: ”س ثِيذتّْ، س ثِيذتّْ، نشّْ أَذْ أَومْ إِنِيغْ، قْبڒْ مَا ثُوغَا إِبْرَاهِيمْ، ثُوغَا نشّْ دْجِيغْ.“ ٥٩ خنِّي كْسِينْ إِژْرَا حِيمَا أَذْ ث أَرجْمنْ. مَاشَا يَاسُوع إِسّْنُوفَّارْ إِخفْ نّسْ ؤُشَا إِفّغْ زِي زَّاوشْثْ ثَامقّْرَانْثْ أَمْ إِشُوقْ ذِي ڒْْوسْطْ نْسنْ، ؤُشَا أَمُّو إِ إِرُوحْ. ◘8:‏59 لك. 4‏:‏29؛ يُوح. 10‏:‏31، 39؛ 11‏:‏8.