أَذْلِيسْ إِقدّْسنْ يُوحَانَّا ٢٠

٢٠

أَنْضڒْ ن يَاسُوع إِخْوَا

١ ذڭْ وَاسّْ أَمزْوَارُو ن سِّيمَانَا ثُوسَا-د مَارْيَامْ ن مَاجْذَالَا ذِي صّْبحْ زِيشْ غَارْ ونْضڒْ، ثُوغَا عَاذْ ذ ثَادْجسْثْ. ثژْرَا ثَاصْضَارْثْ أَقَا ثمّكْسِي خْ ونْضڒْ. ◘ ٢ ثُوزّڒْ-د، ثُوسَا-د غَارْ شِيمْعُونْ بُوطْرُوسْ ؤُ غَارْ ؤُمحْضَارْ نّغْنِي ونِّي ؤُمِي ثُوغَا إِتّخْسْ يَاسُوع، ثنَّا أَسنْ: ”كْسِينْ سِيذِيثْنغْ زڭْ ونْضڒْ، وَارْ سِّينغْ مَانِي ث ڭِّينْ.“ ◘

٣ إِفّغْ-د شِيمْعُونْ ذ ؤُمحْضَارْ نّغْنِي ؤُشَا ؤُسِينْ-د غَارْ ونْضڒْ. ◘ ٤ نِيثْنِي ؤُزّْڒنْ س ثْنَاينْ إِذْسنْ، مَاشَا أَمحْضَارْ نّغْنِي إِزْوَارْ إِ شِيمْعُونْ ؤُشَا يِيوضْ ذ أَمزْوَارُو غَارْ ونْضڒْ. ٥ إِخْزَارْ، إِژْرَا ڒشْفُونْ نْ ڒقْطنْ أَزْذَاذْ مَّارْسنْ ذِينْ، مَاشَا وَارْ يُوذِيفْ شَا. ◘ ٦ إِضْفَارْ إِ-ث شِيمْعُونْ، يُوذفْ غَارْ ونْضڒْ، إِژْرَا عَاوذْ ڒشْفُونْ ن ڒقْطنْ أَزْذَاذْ مَّارْسنْ ذِينْ. ٧ أَمنْذِيڒْ نِّي ثُوغَا خْ ؤُزدْجِيفْ نّسْ، وَارْ إِمَّارْسْ شَا أَكْ-ذ ڒشْفُونْ ن ڒقْطنْ أَزْذَاذْ، مَاشَا ثُوغَا إِضْفصْ، إِتّْوَاڭّْ ذڭْ ومْشَانْ وحّْذسْ. ◘ ٨ ڒخْذنِّي يُوذفْ-د ؤُڒَا ذ أَمحْضَارْ نّغْنِي نِّي د-يُوسِينْ ذ أَمزْوَارُو غَارْ ونْضڒْ، إِژْرَا ؤُشَا يُومنْ. ٩ مِينْزِي نِيثْنِي ثُوغَا عَاذْ وَارْ سِّيننْ ثِيرَا إِقدّْسنْ، بلِّي إِتّْخصَّا أَسْ أَذْ إِكَّارْ جَارْ إِمتِّيننْ. ◘

١٠ خنِّي ذوْڒنْ إِمحْضَارنْ نِّي غَارْ ثَادَّارْثْ نْسنْ.

أَضْهَارْ ن يَاسُوع إِ مَارْيَامْ زِي مَاجْذَالَا

١١ مَارْيَامْ ثقِّيمْ ثْبدّْ غَارْ ونْضڒْ بَارَّا، ثتّْرُو. ڒَْامِي ثُوغَا ثتّْرُو، ثسْوضْ ذڭْ ونْضڒْ، ◘ ١٢ ثژْرَا ثْنَاينْ ن لْمَالَاكَاثْ س وَارُّوضْ ذ أَشمْڒَاڒْ، قِّيمنْثْ مَانِي ثُوغَا ثمَّارْسْ أَرِّيمثْ ن يَاسُوع، إِجّنْ غَارْ ثْسُومّْثِينْ نّسْ ن ؤُزدْجِيفْ، إِجّنْ غَارْ إِضَارنْ نّسْ. ١٣ نَّانْ أَسْ: ”أَ ثَامْغَارْثْ، مَايمِّي ثتّْرُوذْ؟“ ثنَّا أَسنْ: ”مَاغَارْ كّْسنْ سِيذِي إِنُو، وَارْ سِّينغْ مَانِي ث سَّارْسنْ.“ ١٤ ؤُمِي ثنَّا أَيَا، ثنّقْڒبْ غَارْ ضفَّارْ، ثژْرَا يَاسُوع إِبدّْ، مَاشَا وَارْ ثسِّينْ شَا أَقَا-ث ذ يَاسُوع. ◘ ١٥ يَاسُوع إِنَّا أَسْ: ”أَ ثَامْغَارْثْ، مَايمِّي ثتّْرُوذْ؟ مِينْ خفْ ثَارزُّوذْ؟“ ثتّْغِيڒْ أَسْ نتَّا ذ بَابْ ن ثحْوِيشْثْ، ثنَّا أَسْ: ”أَ سِيذِي مَاڒَا شكْ إِ-ث إِكْسِينْ، إِنِي أَيِي مَانِي ث ثسَّارْسذْ، خنِّي أَذْ ث كْسِيغْ.“ ١٦ يَاسُوع إِنَّا أَسْ: ”أَ مَارْيَامْ!“ نتَّاثْ ثنّقْڒبْ، ثنَّا أَسْ س ثْعِيبْرَانِيثْ: ”أَ رَابُّولِي!“، إِخْسْ أَذْ يِينِي: ’أَ أَمْسغَّارْ إِنُو‘. ١٧ يَاسُوع إِنَّا أَسْ: ”وَارْ ذ أَيِي ثتّْحِيذِي شَا، أَقَا نشّْ عَاذْ وَارْ ڭعّْذغْ شَا غَارْ بَابَا، مَاشَا رُوحْ غَارْ أَيْثْمَا، إِنِي أَسنْ: ’نشّْ أَقَا أَذْ ڭعّْذغْ غَارْ بَابَا ذ بَابَاثْومْ، غَارْ أَربِّي إِنُو ذ أَربِّي نْومْ.‘ “ ◘ ١٨ ثعْقبْ-د مَارْيَامْ ن مَاجْذَالَا ثْخبَّارْ إِمحْضَارنْ بلِّي نتَّاثْ ثژْرَا سِيذِيثْنغْ ؤُ بلِّي نتَّا إِنَّا أَسْ مَانْ أَيَا. ◘

أَضْهَارْ ن يَاسُوع إِ إِمحْضَارنْ نّسْ

١٩ غَارْ ثْمذِّيثْ ن وَاسّْ نِّي، نتَّا ذ أَسّْ أَمزْوَارُو ن سِّيمَانَا، ؤُمِي ثُوغَا ثِيوُّورَا مَانِي ثُوغَا قِّيمنْ إِمحْضَارنْ قّْننْثْ س ثِيڭّْوُوذِي زڭْ وُوذَاينْ، يُوذفْ-د يَاسُوع، إِبدّْ ذِي ڒْْوسْطْ نْسنْ، إِنَّا أَسنْ: ”سْڒَامْ خَاومْ.“ ◘ ٢٠ أَوَارْنِي ڒَْامِي إِنَّا أَيَا، إِمّڒْ أَسنْ إِفَاسّنْ نّسْ ذ ؤُغزْذِيسْ نّسْ. فَارْحنْ إِمحْضَارنْ ڒَْامِي ژْرِينْ سِيذِيثْنغْ. ◘ ٢١ إِنَّا أَسنْ عَاوذْ يَاسُوع: ”سْڒَامْ خَاومْ، أَمْ مَامّشْ ذ أَيِي د-إِسّكّْ بَابَا، أَذْ كنِّيوْ د-سّكّغْ ؤُڒَا ذ نشّْ.“ ◘ ٢٢ أَوَارْنِي ڒَْامِي إِنَّا مَانْ أَيَا، إِسُوضْ ذَايْسنْ، إِنَّا أَسنْ: ”قبْڒمْ أَرُّوحْ إِقدّْسنْ.“ ٢٣ ونِّي ؤُمِي غَا ثغْفَارمْ دّْنُوبْ نّسْ، أَذْ أَسْ تّْوَاغْفَارنْ دّْنُوبْ نّسْ. ونِّي ؤُمِي ذ أَسْ إِ غَا ثطّْفمْ ذِي دّْنُوبْ نّسْ، أَذْ أَسْ تّْوَاطّْفنْ دّْنُوبْ نّسْ.“ ◘

يَاسُوع إِسّْشنْ إِخفْ نّسْ إِ ثُومَا

٢٤ مَاشَا ثُومَا، إِجّنْ زِي ثنْعَاشْ، ونِّي ؤُمِي قَّارنْ ’أَشْنِيوْ‘، وَارْ ثُوغِي شَا أَكِيذْسنْ ڒَْامِي د-يُوسَا يَاسُوع. ٢٥ نَّانْ أَسْ إِمحْضَارنْ: ”أَقَا نژْرَا سِيذِيثْنغْ!“ مَاشَا نتَّا إِنَّا أَسنْ: ”مَاڒَا وَارْ ژْرِيغْ ڒِْيمَاڒْثْ ن إِمسْمِيرنْ ذڭْ إِفَاسّنْ نّسْ، أَذْ سَّارْسغْ أَضَاضْ إِنُو ذڭْ ومْشَانْ ن إِمسْمِيرنْ ؤُشَا أَذْ سَّارْسغْ أَفُوسْ إِنُو ذڭْ ؤُغزْذِيسْ نّسْ، وَارْ تِّيمْنغْ.“

٢٦ أَوَارْنِي ثْمنْيَا ن وُوسَّانْ ثُوغَا إِمحْضَارنْ نّسْ عَاوذْ غَارْ ذَاخڒْ ؤُ ثُومَا ثُوغَا أَكِيذْسنْ. يُوذفْ-د يَاسُوع، وَاخَّا ثِيوُّورَا ثُوغَا قّْننْثْ، ؤُشَا إِبدّْ-د ذِي ڒْْوسْطْ نْسنْ، إِنَّا: ”سْڒَامْ خَاومْ!“ ٢٧ إِنَّا إِ ثُومَا: ”أَوِي-د أَضَاضْ نّشْ ؤُشَا خْزَارْ ذڭْ إِفَاسّنْ إِنُو، سَارْسْ أَفُوسْ نّشْ ذَانِيثَا ؤُ سِيذفْ إِ-ث ذڭْ ؤُغزْذِيسْ إِنُو. وَارْ تِّيڒِي ذ أَكَافْرِيوْ، مَاشَا ذ ڒْْمُومنْ.“ ◘ ٢٨ يَارَّا-د ثُومَا، إِنَّا أَسْ: ”أَ سِيذِي إِنُو ذ أَربِّي إِنُو!“ ٢٩ إِنَّا أَسْ يَاسُوع: ”ؤُمِي ثژْرِيذْ أَيِي ڒخُّو، أَقَا ثُومْنذْ، أَ ثُومَا! سّعْذْ ن يِينِّي يُومْننْ، وَاخَّا نِيثْنِي وَارْ ذ أَيِي ژْرِينْ.“ ◘

٣٠ يَاسُوع إِڭَّا أَطَّاسْ ن ڒعْڒَامَاثْ نّغْنِي قِيبَاتْشْ إِ إِمحْضَارنْ نّسْ، ثِينِّي وَارْ يُورِينْثْ شَا ذڭْ وذْلِيسْ-أَ، ◘ ٣١ مَاشَا ثِينَا ؤُرَانْثْ حِيمَا أَذْ ثَامْنمْ بلِّي يَاسُوع نتَّا ذ لْمَاسِيحْ، مِّيسْ ن أَربِّي، ؤُشَا خْمِي غَا ثَامْنمْ، أَذْ غَارْومْ ثِيڒِي ثُوذَارْثْ س يِيسمْ نّسْ.

◘٢٠:١ 20:‏1 [مت. 28‏:‏1‏-‏10؛ مك. 16‏:‏1‏-‏8؛ لك. 24‏:‏1‏-‏12] — مت. 28‏:‏1؛ مك. 16‏:‏1؛ لك. 24‏:‏1.

◘٢٠:٢ 20:‏2 يُوح. 13‏:‏23؛ 21‏:‏7، 20.

◘٢٠:٣ 20:‏3 لك. 24‏:‏12.

◘٢٠:٥ 20:‏5 يُوح. 19‏:‏40.

◘٢٠:٧ 20:‏7 يُوح. 11‏:‏44.

◘٢٠:٩ 20:‏9 إِزهد. 16‏:‏10؛ ڒخ. 2‏:‏25، 31؛ 13‏:‏35.

◘٢٠:١١ 20:‏11 [مك. 16‏:‏9‏-‏11] — مت. 28‏:‏1؛ مك. 16‏:‏5؛ لك. 24‏:‏4.

◘٢٠:١٤ 20:‏14 مت. 28‏:‏9؛ مك. 16‏:‏9.

◘٢٠:١٧ 20:‏17 إِزهد. 22‏:‏23؛ مت. 28‏:‏10؛ يُوح. 16‏:‏2؛ عبر. 2‏:‏11.

◘٢٠:١٨ 20:‏18 مت. 28‏:‏8؛ مك. 16‏:‏10؛ لك. 24‏:‏9.

◘٢٠:١٩ 20:‏19 [مت. 28‏:‏16‏-‏20؛ مك. 16‏:‏14‏-‏18؛ لك. 24‏:‏36‏-‏49] — مك. 16‏:‏14؛ لك. 24‏:‏36؛ 1 كُور. 15‏:‏5.

◘٢٠:٢٠ 20:‏20 يُوح. 16‏:‏22.

◘٢٠:٢١ 20:‏21 إِشا. 61‏:‏1؛ مت. 28‏:‏18؛ مك. 16‏:‏15؛ لك. 4‏:‏18؛ يُوح. 17‏:‏18.

◘٢٠:٢٣ 20:‏23 مت. 16‏:‏19؛ 18‏:‏18.

◘٢٠:٢٧ 20:‏27 1 يُوح. 1‏:‏1.

◘٢٠:٢٩ 20:‏29 1 بُط. 1‏:‏8.

◘٢٠:٣٠ 20:‏30 يُوح. 21‏:‏25.