1 أَوَارْنِي ؤُيَا ثُوغَا يَاسُوع إِمّڒْ إِخفْ نّسْ عَاوذْ إِ إِمحْضَارنْ نّسْ غَارْ ڒبْحَارْ ن ثِيبِيرِييَاسْ، إِضْهَارْ-د أَمُّو. 2 ثُوغَا ذِينْ جْمِيعْ شِيمْعُونْ بُوطْرُوسْ ذ ثُومَا، ونِّي ؤُمِي قَّارنْ ’أَشْنِيوْ‘، ذ نَاثَانَايِيلْ، ونِّي ثُوغَا زِي قَانَا ذِي ثمُّورْثْ ن لْجَالِيلْ، ذ ثَارْوَا ن زَابْذِي ؤُڒَا ذ ثْنَاينْ نّغْنِي زڭْ إِمحْضَارنْ نّسْ. ◘21:‏2 مت. 4‏:‏21؛ مك. 1‏:‏19؛ يُوح. 1‏:‏46.

3 إِنَّا أَسنْ شِيمْعُونْ بُوطْرُوسْ: ”نشّْ أَذْ رَاحغْ أَذْ ڭْمَارغْ إِسڒْمَانْ.“ نَّانْ أَسْ: ”أَذْ كِيكْ نْرَاحْ ؤُڒَا ذ نشِّينْ.“ فّْغنْ-د ؤُشَا نْيِينْ ذغْيَا ذِي ثْغَارَّابُوثْ. ذِي دْجِيڒثْ نِّي وَارْ طِّيفنْ وَالُو. 4 غَارْ ثُوفُّوثْ، إِبدّْ-د يَاسُوع خْ ثْمَا ن ڒبْحَارْ، مَاشَا إِمحْضَارنْ وَارْ سِّيننْ شَا أَقَا ذ يَاسُوع. 5 إِنَّا أَسنْ يَاسُوع: ”أَ إِحنْجِيرنْ، مَا أَذْ ثَاغْ غَارْومْ شَا ن مَاشَّا؟“ أَرِّينْ-د خَاسْ ”لَّ!“ 6 إِنَّا أَسنْ: ”نْضَارمْ ثْرَاشَّا نْومْ أَكْ-ذ ؤُغزْذِيسْ أَفُوسِي ن ثْغَارَّابُوثْ، أَذْ ثَافمْ.“ خنِّي نْضَارنْ ثْرَاشَّا ؤُشَا وَارْ زمَّارنْ أَذْ ت-إِ-د-جبْذنْ زِي سِّيبّثْ ن ؤُبَارُّو ن إِسڒْمَانْ إِ ذَايسْ إِتّْوَاطّْفنْ. ◘21:‏6 لك. 5‏:‏4، 6، 7.

7 إِنَّا ؤُمحْضَارْ ونِّي ثُوغَا إِتّخْسْ يَاسُوع إِ بُوطْرُوسْ: ”أَقَا نتَّا ذ سِيذِيثْنغْ.“ ڒَامِي إِسْڒَا شِيمْعُونْ أَقَا نتَّا ذ سِيذِي، إِطّفْ ثْشَامِيرْ نّسْ مِينْزِي ثُوغَا ذ أَعَارْيَانْ، إِنْضَارْ إِخفْ نّسْ ذِي ڒبْحَارْ أَڒَامِي غَا د-إِقَارّبْ غَارْ يَاسُوع. ◘21:‏7 يُوح. 13‏:‏23؛ 20‏:‏2. 8 مَاشَا إِمحْضَارنْ إِنّغْنِي ؤُسِينْ-د س ثْغَارَّابُوثْ مِينْزِي وَارْ إِڭّْوِيجنْ شَا خْ ڒْبَارّْ مْغِيرْ مِيثَاينْ ن إِغَادْجنْ، ؤُشَا جبْذنْ-د ثْرَاشَّا أَكْ-ذ إِسڒْمَانْ. ◼21:‏8 ’مِيثَاينْ ن إِغَادْجنْ‘ - إِخْسْ أَذْ يِينِي عْڒَاحَاڒْ 100 مِيثْرُو.

9 ڒَامِي د-فّْغنْ غَارْ ڒْبَارّْ، ژْرِينْ ذِيهَا أَقَا إِتّْوَاسّوْجذْ إِجّْ ن ؤُفنِّيشْ ن ڒفْحمْ مِيخفْ مَّارْسنْ إِسڒْمَانْ ذ وغْرُومْ. 10 إِنَّا أَسنْ يَاسُوع: ”أَوْيمْ-د زڭْ إِسڒْمَانْ إِ ثڭْمَارمْ ڒخُّو.“ ◘21:‏10 لك. 24‏:‏41. 11 شِيمْعُونْ بُوطْرُوسْ يُويُورْ، إِجْبذْ ثْرَاشَّا ثشُّورْ س إِسڒْمَانْ إِمقّْرَاننْ غَارْ ڒْبَارّْ، أَقَا-ت ذَايسْ مْيَا ؤُ-ثْڒَاثَا ؤُ-خمْسِينْ. وَاخَّا ذَايسْ س وَانشْثْ ؤُيَا أَطَّاسْ، وَارْ ثْشَارّڭْ شَا ثْرَاشَّا. 12 إِنَّا أَسنْ يَاسُوع: ”أَرَاحمْ-د ذَا، أَذْ ثَارِييّْقمْ!“ ؤُڒَا ذ إِجّْ زڭْ إِمحْضَارنْ وَارْ إِزْعِيمْ أَذْ ث إِسّقْسَا ’مِينْ ثعْنِيذْ شكْ؟‘، مِينْزِي سّْننْ أَقَا-ث ذ سِيذِيثْنغْ. 13 ڒخْذنِّي يُوسَا-د يَاسُوع، إِكْسِي أَغْرُومْ ذ إِسڒْمَانْ، إِوْشَا أَسنْ. 14 وَانِيثَا ذ ثْوَاڒَا وِيسّْ ثْڒَاثَا إِ د-إِضْهَارْ يَاسُوع إِ إِمحْضَارنْ نّسْ أَوَارْنِي ڒَامِي د-إِتّْوَاسّْنكَّارْ زِي ثَادَّارْثْ ن إِمتِّيننْ.

15 أَوَارْنِي ڒَامِي أَرِييّْقنْ، إِنَّا يَاسُوع إِ شِيمْعُونْ بُوطْرُوسْ: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي كْثَارْ زڭْ يِينَا؟“ إِنَّا أَسْ: ”وَاهْ، أَ سِيذِي، شكْ ثسّْنذْ أَقَا نشّْ تّخْسغْ شكْ.“ إِنَّا أَسْ: ”أَرْوسْ إِزْمَارنْ إِنُو!“ 16 إِنَّا أَسْ عَاوذْ إِ ثْوَاڒَا وِيسّْ ثْنَاينْ: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي؟“ إِنَّا أَسْ: ”وَاهْ أَ سِيذِي، شكْ ثسّْنذْ أَقَا نشّْ تّخْسغْ شكْ.“ إِنَّا أَسْ: ”أَرْوسْ إِشَارِّييّنْ إِنُو!“ 17 إِنَّا أَسْ إِ ثْوَاڒَا وِيسّْ ثْڒَاثَا: ”أَ شِيمْعُونْ، مِّيسْ ن يُونَا، مَا ثتّخْسذْ أَيِي؟“ إِشْضنْ بُوطْرُوسْ مِينْزِي إِنَّا أَسْ ث ثْوَاڒَا وِيسّْ ثْڒَاثَا: ’مَا ثتّخْسذْ أَيِي؟‘، ؤُشَا إِنَّا أَسْ: ”أَ سِيذِي، شكْ ثسّْنذْ كُوڒْشِي، ثسّْنذْ أَقَا نشّْ تّخْسغْ شكْ.“ إِنَّا أَسْ يَاسُوع: ”أَرْوسْ ثِيخْسِيوِينْ إِنُو! ◘21:‏17 يُوح. 16‏:‏30. 18 س ثِيذتّْ، س ثِيذتّْ، نشّْ أَذْ أَشْ إِنِيغْ: ڒَامِي شكْ ثُوغَا ذ أَمژْيَانْ، ثْبيْسذْ إِ يِيخفْ نّشْ، ثْرُوحذْ مَانِي ثخْسذْ، مَاشَا خْ مِينِّي إِ غَا ثوْسَارذْ، أَذْ ثسّْوِيژّْضذْ إِفَاسّنْ نّشْ ؤُشَا ونّغْنِي أَذْ شكْ إِبْيسْ ؤُشَا أَذْ شكْ يَاوِي غَارْ مَانِي وَارْ ثتّخْسذْ.“ ◘21:‏18 يُوح. 13‏:‏36؛ ڒخ. 12‏:‏3؛ 2 بُط. 1‏:‏14. 19 إِنَّا أَمُّو حِيمَا أَذْ إِسّْشنْ إِ مَانْ ڒْموْثْ إِ زِي غَا إِسّْعُودْجْ أَربِّي. أَوَارْنِي ڒَامِي ذ أَسْ إِنَّا أَمُّو، إِنَّا أَسْ: ”ضْفَارْ أَيِي-د!“ ◘21:‏19 2 بُط. 1‏:‏14.

20 إِنّقْڒبْ شِيمْعُونْ بُوطْرُوسْ، إِژْرَا أَمحْضَارْ نِّي ثُوغَا إِتّخْسْ يَاسُوع، إِضْفَارْ إِ-ث، نتَّا ذ ونِّي ثُوغَا يَارَّا إِخفْ نّسْ أَذْ إِميّڒْ غَارْ إِذْمَارنْ ن يَاسُوع غَارْ ؤُمنْسِي إِ إِنَّانْ: ”أَ سِيذِي إِنُو، وِي شكْ إِ غَا إِغْذَارنْ؟“ ◘21:‏20 يُوح. 13‏:‏23؛ 20‏:‏2؛ 21‏:‏7. 21 ڒَامِي إِژْرَا بُوطْرُوسْ وَا، إِنَّا إِ يَاسُوع: ”أَ سِيذِي، إِ وَا، مِينْ ذ أَسْ غَا إِمْسَارنْ؟“ 22 إِنَّا أَسْ يَاسُوع: ”مَاڒَا خْسغْ أَذْ إِقِّيمْ أَڒْ د غَاعقْبغْ، مِينْ ذ أَشْ إِرُوحنْ؟ شكْ ضْفَارْ أَيِي-د!“ 23 ؤُشَا إِفّغْ-د وَاوَاڒْ-أَ جَارْ وَاوْمَاثنْ بلِّي أَمحْضَارْ نِّي وَارْ إِتّْمتِّي شَا، مَاشَا يَاسُوع وَارْ ذ أَسْ إِنِّي شَا بلِّي نتَّا وَارْ إِتّْمتِّي شَا، مَاشَا: ”مَاڒَا خْسغْ أَذْ إِقِّيمْ أَڒْ د غَاعقْبغْ، مِينْ ذ أَشْ إِرُوحنْ؟“

24 ذ وَا ذ أَمحْضَارْ إِ إِشهّْذنْ س مَانْ أَيَا ؤُشَا نتَّا يُورَا مَانْ أَيَا، ؤُ نشِّينْ نسّنْ أَقَا شّْهَاذثْ نّسْ ذ ثِيذتّْ. ◘21:‏24 يُوح. 19‏:‏35. 25 أَقَا ذِينْ عَاذْ أَطَّاسْ ن ثْمسْڒَايِينْ نّغْنِي إِ إِڭَّا يَاسُوع. مَاڒَا تّْوَارِينْثْ إِشْثْ أَوَارْنِي ثنّغْنِيثْ، إِتّْغِيڒْ أَيِي، أَذْ ثِيڒِي دُّونشْثْ سِيمَانْثْ نّسْ وَارْ ذَايسْ شَا تَّاسِيعْ حِيمَا أَذْ ثكْسِي إِذْلِيسنْ إِ غَا إِتّْوَارِينْ. أَمِينْ!

أَنڭَّارْ ن لْ-إِنْجِيلْ إِقدّْسنْ أَمْ مَامّشْ ث إِبَارّحْ يُوحَانَّا.

أَنڭَّارْ ن ثِيرَا ن إِذْلِيسنْ ن أَربْعَا ن إِذْلِيسنْ ن لْ-إِنْجِيلْ.

أَعُودْجِي إِ بَابَاسْ، إِ مِّيسْ ؤُ إِ أَرُّوحْ إِقدّْسنْ، ڒخُّو، ڒبْذَا ؤُ إِ ڒبْذَا ن ڒبْذَاثْ. ◘21:‏25 يُوح. 20‏:‏30.