11
ڒْهَارْدْ أَمزْوَارُو ن صُوفَارْ
1 خنِّي يَارَّا-د صُوفَارْ، ونِّي د-يُوسِينْ زِي نَاعْمَا، إِنَّا:
2 مَا أَذْ قِّيمنْ وَاطَّاسْ ن وَاوَاڒنْ
بْڒَا ثَامْوَارِّيثْ،
ؤُ مَا أَذْ غَارسْ يِيڒِي
إِ يِيجّْ ن بُو-ؤُقمُّومْ ڒْحقّْ ڒبْذَا؟
3 مَا إِزمَّارْ ڒْهَارْذْ نّشْ
أَذْ إِسّْغذْ إِوْذَانْ،
أَڒَامِي ثْزمَّارذْ أَذْ ثسْثهْزِيذْ
بْڒَا شكْ إِ غَا إِسّحْشمْ ؤُڒَا ذ إِجّْ؟
4 شكْ ثنِّيذْ: ’ثصْفَا ثْغُورِي إِنُو،
أَقَا أَيِي ذ أَمزْذَاڭْ ذِي ثِيطَّاوِينْ نّشْ!‘
5 ؤُهْ، مْڒِي أَربِّي سِيمَانْثْ نّسْ إِسَّاوَاڒْ،
مْڒِي يَارزّمْ إِينْشِيشنْ نّسْ قِيبَاتْشْ نّشْ.
6 مْڒِي نتَّا ذ أَشْ إِ غَا إِسّْشنْ
ثِيمسْڒَايِينْ إِخمّْڒنْ ن ثِيغِيثْ،
مَاغَارْ نِيثنْثِي سكّْوَانْثْ دُّوبلْ إِ ؤُفكِّي.
سّنْ، أَقَا أَربِّي
أَذْ إِتُّو أَطَّاسْ ن ڒْمُوعْصِييّثْ نّشْ
ذِي ثِيزِي نّشْ.
7 مَا ثْزمَّارذْ أَذْ ثْبقّْشذْ
ذِي مُومُّو ن أَربِّي؟
مَا ثْزمَّارذْ أَذْ ثَاذْفذْ
غَارْ ڒكْمَارثْ ن ؤُمْزمَّارْ خْ كُوڒْشِي؟
8 أَقَا-ثنْ ذِي ڒُوعْڒَاثْ ن ؤُجنَّا!
مِينْ ثخْسذْ أَذْ ثڭّذْ عَاذْ؟
ثِيغِيثْ ثُودْجغْ خْ ڒَاخَارْثْ!
مِينْ ثْزمَّارذْ أَذْ زَّايسْ ثسّْنذْ؟
9 ڒعْبَارْ نّسْ يُوعْڒَا أَطَّاسْ خْ ثمُّورْثْ،
ثِيرُو نّسْ ثعْذُو أَطَّاسْ خْ ثْمِيرِيوْثْ ن ڒبْحَارْ.
10 مَاڒَا إِعْذُو نتَّا، إِبلّعْ خْ شَا ن يِيجّنْ
ؤُشَا إِڒَاغَا أَسْ إِ دّعْوثْ،
مَانْ ونْ إِ ث غَا إِسّْبدّنْ؟
11 مَاغَارْ نتَّا إِسّنْ إِغشَّاشنْ،
إِتّْوَاڒَا ڒْغشّْ بْڒَا مَا ث إِحْضَا. ◘11:11 إِزهد. 10:11، 14؛ 35:22
12 مَاشَا مَاڒَا أَبُوهَاڒِي
إِزمَّارْ أَذْ يَافْ ڒفْهَامثْ،
خنِّي أَغْيُوڒْ ن ڒخْڒَا إِزمَّارْ
أَذْ إِذْوڒْ ذ بْنَاذمْ. ◘11:12 أَيُوبْ 5:8؛ 22:21؛ أَمب. 3:18
13 مَاڒَا شكْ ثْعذْڒذْ ؤُڒْ نّشْ،
خنِّي بزّعْ إِفَاسّنْ نّشْ غَارسْ.
14 مَاڒَا إِرْصقْ ڒْغشّْ غَارْ ؤُفُوسْ نّشْ،
سَاڭّْوجْ إِ-ث،
وَارْ تّجِّي دّدْجْ أَذْ إِزْذغْ ذِي ثْقِيذُونِينْ نّشْ،
15 مَاغَارْ خنِّي ثْزمَّارذْ
أَذْ ثسّْڭعّْذذْ ؤُذمْ نّشْ بْڒَا ڒْعِيبْ،
أَذْ ثْبدّذْ نِيشَانْ، وَارْ تّڭّْوذذْ شَا.
16 مَاغَارْ أَذْ ثتُّوذْ ڒغْبنْ نّشْ،
عمَّارْصْ وَارْ ذَايسْ ثتّْخمِّيمذْ عَاذْ
أَمْ عمَّارْصْ وَارْ ثتّْخمِّيمذْ عَاذْ
غَارْ وَامَانْ إِعْذُونْ.
17 أَبْرِيذْ ن ثُوذَارْثْ نّشْ أَذْ يَارْغْ
ثِيوَا خْ طّْحَا ن ؤُزِيڒْ،
وَاخَّا ذِينْ ثَادْجسْثْ،
أَذْ ثِيڒِي أَمْ ثفُّوثْ. ◘11:17 إِزهد. 37:6؛ 112:4
18 أَذْ ثَاشِيذْ إِخفْ نّشْ ذِي ڒَامَانْ،
مِينْزِي أَقَا ذِينْ ڒَايَاسْ،
أَذْ ثخْزَارذْ ذڭْ ونّضْ،
أَذْ ثطّْصذْ ذِي ڒْهُوذْنثْ. ◘11:18 لَاوِي 26:5
19 أَذْ ثزّْڒذْ نْهْڒَا شكْ إِسّْنخْڒعْ ؤُڒَا ذ إِجّْ،
ؤُشَا أَطَّاسْ إِ شكْ إِ غَا زَاوْڭنْ
زَّاثْ إِ وُوذمْ نّشْ. ◘11:19 لَاوِي 26:6؛ إِزهد. 3:6؛ 4:9؛ أَوڒن. 3:24
20 مَاشَا ثِيطَّاوِينْ ن إِعفَّاننْ
أَذْ دَّارْغْڒنْثْ،
قَاعْ ثَاروْڒَا أَذْ أَسنْ ثْودَّارْ،
أَذْ مژْرنْ أَذْ ذڒْقنْ إِ بُوحْبڒْ. ◘11:20 أَيُوبْ 8:13، 14؛ 18:14