12
ثَامْوَارِّيثْ ن أَيُوبْ خْ صُوفَارْ
1 يَارَّا-د أَيُوبْ، إِنَّا:
2 ذ ثِيذتّْ، كنِّيوْ ذ إِجّْ ن دَّارْبْ ن ڒْڭنْسْ،
أَقَا ثِيغِيثْ أَذْ ثمّثْ أَكِيذْومْ!
3 نشّْ غَارِي ڒعْقڒْ أَمْ كنِّيوْ،
نشّْ وَارْ وطِّيغْ ذڭْ ؤُمْقُوذِّي أَكِيذْومْ.
وِي وَارْ إِسِّيننْ مَارَّا أَيَا؟
4 نشّْ أَمْ ونِّي إِدْجَانْ إِ ثْسضْحَاشْ
إِ ؤُمدُّوكّڒْ نّسْ،
نشّْ ذ ونِّي ثُوغَا إِتّْڒَاغَانْ غَارْ أَربِّي
ؤُشَا خنِّي نتَّا إِسْڒَا غَارِي،
نشّْ ذ أَمْسڭّذْ ذ نِيشَانْ،
أَقَا ذوْڒغْ ذ ڒْقشْعثْ ن ثْسضْحَاشْثْ. ◘12:4 أَيُوبْ 16:10؛ 17:2؛ 21:3؛ 30:1؛ أَوڒن. 14:2
5 ’ڒْْحڭْرَا ذ ثَاسْغَارْثْ ن ونِّي إِتّْوَارْژَانْ!‘،
أَمُّو إِ إِتّْخَارَّاصنْ يِينِّي
ؤُمِي إِتّْغِيڒْ أَقَا أَثنْ ذِي ڒَامَانْ،
إِتّْغِيڒْ أَسنْ أَيَا إِتّْرَاجَا
إِنِّي إِتّْنقْرَاضنْ ذڭْ إِضَارنْ نْسنْ.
6 إِقِيضَانْ ن إِمْثحَّايّنْ أَرْسَانْ،
ؤُ إِنِّي إِسعَّارنْ أَربِّي
غَارْسنْ أَطَّاسْ ن ڒَامَانْ.
مَاشَا وِي إِزمَّارنْ
أَذْ يَاوِي أَربِّي س ؤُفُوسْ نّسْ؟ ◘12:6 أَيُوبْ 21:7؛ إِزهد. 73:11، 12؛ إِرْم. 12:1؛ حَاب. 1:3، 4
7 سقْسَا خنِّي ڒْمَاڒْ،
أَذْ أَشْ ث سّْڒمْذنْ،
إِجْضَاضْ ن ؤُجنَّا أَذْ شكْ ث حَاجَانْ.
8 نِيغْ خزَّارغْ مْلِيحْ غَارْ ثمُّورْثْ،
نتَّاثْ أَذْ شكْ ثسّْغَارْ،
ؤُڒَا ذ إِسڒْمَانْ ن ڒبْحَارْ
أَذْ أَشْ ث عَاوْذنْ.
9 مَانْ ونْ وَارْ إِسِّيننْ مَارَّا أَيَا،
أَقَا أَفُوسْ ن سِيذِي إِ ث إِڭِّينْ؟
10 نتَّا ذ ونِّي ذڭْ ؤُفُوسْ نّسْ إِدْجَا
ڒعْمَارْ ن مَارَّا مِينْ إِدَّارنْ،
ؤُڒَا ذ بُوحْبڒْ ن كُوڒْ أَرِّيمثْ ن بْنَاذمْ.
11 مَا وَارْ إِتّْقدْجِيبْ ؤُمزُّوغْ أَوَاڒنْ،
أَمْ إِتّْقَاسَا وَانغْ مَاشَّا؟ ◘12:11 أَيُوبْ 6:30؛ 34:3
12 غَارْ إِوسُّورَا إِ ثدْجَا ثِيغِيثْ
ؤُ ذِي ثُوذَارْثْ ثَازِيرَارْثْ ثدْجَا ڒفْهَامثْ؟
13 نتَّا غَارسْ إِ ثدْجَا ثِيغِيثْ ذ جّهْذْ س ثِيذتّْ،
نتَّا غَارسْ إِ يدْجَا
شّْوَارْ ذ ڒفْهَامثْ نِيشَانْ.
14 خْزَارْ، مَاڒَا نتَّا إِهدّمْ،
وَارْ إِبنِّي ؤُڒَا ذ إِجّْ عَاوذْ،
مَاڒَا نتَّا إِبلّعْ خْ شَا ن يِيجّنْ،
وَارْ ذ أَسْ يَارزّمْ عَاذْ. ◘12:14 أَيُوبْ 9:12؛ 11:10؛ أَسَا. 3:7
15 خْزَارْ، مَاڒَا نتَّا إِسّْبدّْ أَمَانْ،
أَذْ أَژْغنْ نِيثْنِي،
مَاڒَا يَارْخُو أَسنْ،
أَذْ سّنْقڒْبنْ ثَامُّورْثْ.
16 نتَّا غَارسْ جّهْذْ ذ ؤُفكِّي،
نّسْ ذ ونِّي إِودَّارنْ
ؤُڒَا ذ ونِّي إِسّْودَّارنْ.
17 نتَّا إِتّجَّا إِرْيَازنْ ن شّْوَارْ
ڭُّورنْ س ڒحْفَا،
ڒْْقُوضَاثْ إِتَّارَّا إِ-ثنْ ذ إِبُوهَاڒِييّنْ. ◘12:17 2 صم. 15:31؛ 17:14، 23؛ إِشا. 19:12؛ 29:14؛ 1 كُور. 1:19
18 أَزِييَّارْ ن إِجدْجِيذنْ إِسّْبطّڒْ إِ-ث
ؤُ خنِّي نتَّا إِتّْشدَّا إِ-ثنْ
س إِجّْ ن وبْيَاسْ زِي ثجْعِينَّا نْسنْ.
19 نتَّا إِندّهْ إِكهَّاننْ س ڒحْفَا،
أَيْثْ ن جّهْذْ إِغطّرْ إِ-ثنْ.
20 إِتّكّسْ أَوَاڒْ إِ إِرْيَازنْ إِتّْوَاقدْجْبنْ،
إِ إِوسُّورَا إِتّكّسْ أَسنْ ڒفْهَامثْ. ◘12:20 أَيُوبْ 32:9؛ إِشا. 3:2، 3
21 أَسحْقَارْ إِتّْزدْجَاعْ إِ-ث خْ ثَارْوَا ن ثَاصِيڒثْ،
إِ أَيْثْ ن بُو-ڒخْشُونثْ إِسَّارخُّو أَسنْ أَبْيَاسْ. ◘12:21 إِزهد. 107:40
22 إِمُوشَانْ يُودْجْغنْ ن ثَادْجسْثْ إِتّْعَارَّا خَاسنْ،
ذ ثِيڒِي ن ڒْموْثْ إِسُّوفُّوغْ إِ-ت غَارْ ثْفَاوْثْ. ◘12:22 مت. 10:26؛ 1 كُور. 4:5
23 ڒڭْنُوسْ إِسّمْغَارْ إِ-ثنْ ؤُشَا إِغطّرْ إِ-ثنْ،
نتَّا إِتّْبزَّاعْ ڒڭْنُوسْ ؤُشَا إِندّحْ إِ-ثنْ.◘12:23 إِزهد. 107:38
24 إِتّكّسْ ڒفْهَامثْ
إِ إِزدْجِيفنْ ن ڒْڭنْسْ خْ ثمُّورْثْ،
إِجَّا إِ-ثنْ تّثْلِيعنْ ذِي ڒخْڒَا
25 نِيثْنِي تّمْهَافَانْ ذَا ذ ذِيهَا ذِي ثَادْجسْثْ،
مَانِي وَارْ ثدْجِي ثْفَاوْثْ،
نتَّا إِتّجَّا إِ-ثنْ
أَذْ مّْهَافَانْ أَمْ يِيمسْشَارْأنْ.
◘12:4 12:4 أَيُوبْ 16:10؛ 17:2؛ 21:3؛ 30:1؛ أَوڒن. 14:2
◘12:6 12:6 أَيُوبْ 21:7؛ إِزهد. 73:11، 12؛ إِرْم. 12:1؛ حَاب. 1:3، 4
◘12:11 12:11 أَيُوبْ 6:30؛ 34:3
◘12:14 12:14 أَيُوبْ 9:12؛ 11:10؛ أَسَا. 3:7
◘12:17 12:17 2 صم. 15:31؛ 17:14، 23؛ إِشا. 19:12؛ 29:14؛ 1 كُور. 1:19
◘12:20 12:20 أَيُوبْ 32:9؛ إِشا. 3:2، 3
◘12:21 12:21 إِزهد. 107:40
◘12:22 12:22 مت. 10:26؛ 1 كُور. 4:5
◘12:23 12:23 إِزهد. 107:38
◘12:24 12:24 إِزهد. 107:4، 40