١٣
أَيُوبْ يَارنِّي ذڭْ وَاوَاڒْ نّسْ إِ صُوفَارْ
١ خْزَارْ، قَاعْ مَانْ أَيَا ثژْرَا إِ-ث ثِيطّْ إِنُو،
إِسْڒَا إِ-ث ؤُمزُّوغْ إِنُو، إِفْهمْ أَسْ مْلِيحْ.
٢ مِينْ ثسّْنمْ كنِّيوْ،
سّْنغْ ث ؤُڒَا ذ نشّْ،
وَارْ وطِّيغْ شَا ذڭْ ؤُسمْقُوذِّي أَكِيذْومْ.
٣ مَاشَا نشّْ خْسغْ أَذْ سِّيوْڒغْ
غَارْ ؤُمْزمَّارْ خْ كُوڒْشِي،
مژْرغْ أَذْ وْثغْ ثَامسْڒَاشْثْ إِنُو
زَّاثْ إِ أَربِّي.
٤ مَاشَا كنِّيوْ ثسُّوفُّوغمْ إِخَارِّيقنْ،
مَارَّا كنِّيوْ ذ إِضْبِيبنْ إِخْوَانْ. ◘13:4 أَيُوبْ 16:2
٥ أَخْ، مْڒِي ثسّغْذمْ كنِّيوْ مَارَّا!
أَيَا أَذْ ثِيڒِي ذ ثِيغِيثْ إِ كنِّيوْ. ◘13:5 أَوڒن. 17:28
٦ سْڒمْ خنِّي مَامّشْ غَا وْثغْ
خْ يِيخفْ إِنُو،
حكَّارمْ خْ ؤُمْشَارَّاعْ ن إِينْشِيشنْ إِنُو!
٧ مَا ثخْسمْ أَذْ ثِينِيمْ ڒْْغشّْ
إِ ڒفْضڒْ ن أَربِّي،
مَا ثخْسمْ أَذْ ثسِّيوْڒمْ إِخَارِّيقنْ
ذِي ثِيزِي نّسْ؟ ◘13:7 أَيُوبْ 17:5؛ 32:21؛ 36:4
٨ مَا ثْزمَّارمْ أَذْ ثوْثمْ ثَامسْڒَاشْثْ
ذِي طّْوعْ نّسْ؟
مَا ثخْسمْ أَذْ ثْشَارّْعمْ إِ أَربِّي؟
٩ مَا مْلِيحْ إِ كنِّيوْ،
مَاڒَا نتَّا أَذْ كنِّيوْ إِقدْجبْ؟
مَا ثخْسمْ أَذْ زَّايسْ ثسْثهْزَامْ
أَمْ مَامّشْ سْثهزَّانْ إِوْذَانْ
زڭْ إِجّْ ن بْنَاذمْ؟
١٠ نتَّا أَذْ كنِّيوْ إِوبّخْ،
مَاڒَا كنِّيوْ ثتّڭّمْ
س وُوذْمَاونْ س ثْنُوفّْرَا.
١١ مَا وَارْ كنِّيوْ إِسّْنخْڒِيعْ ؤُعُودْجِي نّسْ،
مَا وَارْ د خَاومْ ثْوطِّي ثِيڭّْوُوذِي زَّايسْ؟
١٢ أَوَاڒنْ نْومْ إِ ڒِْيذَارثْ
أَقَا أَثنْ ذ ڒمْثُوڒْ نْ وَالُو،
ڒڭْعُوذِي نْومْ ذ ڒڭْعُوذِي ن ؤُبدْجَاعْ.
١٣ سغْذمْ زَّاثِي، مَاحنْذْ أَذْ سِّيوْڒغْ،
أجّْ أَذْ خَافِي د-يَاسْ مِينْ إِ د غَا يَاسْ.
١٤ مَايمِّي غَا طّْفغْ أَيْسُومْ ن أَرِّيمثْ إِنُو
جَارْ ثغْمَاسْ إِنُو،
مَايمِّي إِ غَا طّْفغْ ثُوذَارْثْ إِنُو
ذڭْ ؤُفُوسْ إِنُو؟
١٥ خْزَارْ، نتَّا إِخْسْ أَذْ أَيِي إِنغْ،
نشّْ أَذْ ث رَاجِيغْ،
مَاشَا أَذْ وْثغْ خْ إِبْرِيذنْ إِنُو زَّاثسْ. ◘13:15 إِزهد. 23:4؛ أَوڒن. 14:32
١٦ ذ وَا إِ ذ أَيِي غَا إِذْوڒْ ذ أَسنْجمْ إِنُو،
مَاشَا أَمْنَافقْ وَارْ د-إِتِّيسْ
زَّاثْ إِ ؤُغمْبُوبْ نّسْ. ◼13:16 ’أَمْنَافقْ‘ - بْنَاذمْ نِّي إِتّڭّنْ س ثْنَاينْ ن وُوذْمَاونْ.
١٧ سْڒمْ مْلِيحْ غَارْ ڒْْهَارْذْ إِنُو،
س إِمزُّوغنْ يَارزْمنْ غَارْ ؤُشَارّحْ إِنُو.
١٨ خْزَارْ، نشّْ إِوْيغْ دّعْوثْ س ؤُستّفْ،
سّْنغْ أَذْ تّْوَاسڭّْذغْ.
١٩ مَانْ ونْ إِزمَّارنْ أَذْ كِيذِي إِمْشَارّْعنْ؟
خنِّي أَذْ سغْذغْ ذغْيَا،
أَذْ سُّوفّْغغْ بُوحْبڒْ.
٢٠ مْغِيرْ وَارْ ذ أَيِي تّڭّْ ثْنَاينْ ن ڒحْوَايجْ،
خنِّي وَارْ زَّايكْ تّْنُوفَّارِيغْ: ◘13:20 أَيُوبْ 9:34؛ 33:7
٢١ أَفُوسْ نّشْ سِيڭّْوجْ إِ-ث خَافِي،
وَارْ ذ أَيِي سْنخْڒِيعْ س ؤُهُوذِّي نّشْ!
٢٢ ڒَْاغَا شكْ، نشّْ أَذْ خَاكْ د-أَرّغْ،
نِيغْ نشّْ أَذْ سِّيوْڒغْ
ؤُ شكْ أَذْ خَافِي د-ثَارّذْ!
٢٣ مشْحَاڒْ خَافِي ن ڒْْمُوعْصِييّثْ ذ دّنْبْ؟
سْشنْ أَيِي أَخطُّو إِنُو ذ دّنْبْ إِنُو.
٢٤ مَايمِّي ثسّْنُوفَّارذْ أَغمْبُوبْ نّشْ،
ثْحسّْبذْ أَيِي ذ ڒعْذُو نّشْ؟ ◘13:24 أَيُوبْ 16:9؛ 19:11؛ 33:10؛ إِڭجذ. 2:5
٢٥ مَا ثخْسذْ أَذْ ثسّنْخڒْعذْ
ثَافَارْشْثْ إِ إِعَارّنْ ؤُسمِّيضْ سَّا غَارْ ذَا،
مَا ثخْسذْ أَذْ ثضْفَارذْ إِغدْجْ يُوژْغنْ؟
٢٦ مَاغَارْ ثتَّارِيذْ خَافِي
ثِيمسْڒَايِينْ ثِيمَارْزَاڭِينْ،
ثْبطِّيذْ أَيِي دّْنُوبْ ن ثمْژِي إِنُو. ◘13:26 إِزهد. 25:7
٢٧ ثسّْرُوسِيذْ إِضَارنْ إِنُو ذڭْ ؤُكشُّوضْ،
شكْ ثْحطِّيذْ مَارَّا إِمسْرَاقْ إِنُو.
ثْحطِّيذْ ثِيڒقَّا ن إِضَارنْ إِنُو، ◘13:27 أَيُوبْ 33:11
٢٨ ن ونِّي إِڭِّينْ أَمْ ؤُكشُّوضْ،
شِّينْ ث إِكشَّاونْ، خنِّي يَارشَّا،
أَمْ وَارُّوضْ إِشَّا إِ-ث ثْشِينْذَا.
◘١٣:٤ 13:4 أَيُوبْ 16:2
◘١٣:٥ 13:5 أَوڒن. 17:28
◘١٣:٧ 13:7 أَيُوبْ 17:5؛ 32:21؛ 36:4
◘١٣:١٥ 13:15 إِزهد. 23:4؛ أَوڒن. 14:32
◼١٣:١٦ 13:16 ’أَمْنَافقْ‘ - بْنَاذمْ نِّي إِتّڭّنْ س ثْنَاينْ ن وُوذْمَاونْ.
◘١٣:٢٠ 13:20 أَيُوبْ 9:34؛ 33:7
◘١٣:٢٤ 13:24 أَيُوبْ 16:9؛ 19:11؛ 33:10؛ إِڭجذ. 2:5
◘١٣:٢٦ 13:26 إِزهد. 25:7
◘١٣:٢٧ 13:27 أَيُوبْ 33:11