14
أَيُوبْ إِسِّيوڒْ أَكْ-ذ صُوفَارْ خْ ڒْموْثْ
1 بْنَاذمْ إِ د-إِتّْوَاخڒْقنْ
زِي ثمْغَارْثْ،
أَقَا ؤُسَّانْ ن ثُوذَارْثْ نّسْ ؤُذْرُوسنْ
ؤُ نتَّا إِشُّورْ س ڒحْوڒْ. ◘14:1 إِزهد. 90:5، 6، 9؛ 102:12؛ 103:15؛ 144:4؛ يَاع. 4:14
2 نتَّا إِغمِّي أَمْ ثْنوَّاشْثْ،
خنِّي إِتّْوَاقْضعْ.
إِتّْرَاكّْوَاڒْ أَمْ ثِيڒِي، وَارْ إِتّْغِيمِي. ◘14:2 أَيُوبْ 8:9؛ إِزهد. 90:6، 10؛ 102:12؛ 103:15؛ 144:4؛ إِشا. 40:6؛ 1 بُط. 1:24
3 وَاخَّا أَمنِّي ثَارزْمذْ
ثِيوَا نّسْ ثِيطَّاوِينْ نّشْ،
ثتَّاوْيذْ أَيِي-د ذِي دّعْوثْ أَكِيذكْ. ◘14:3 أَيُوبْ 7:17، 18؛ 10:20
4 مَانْ ونْ إِزمَّارنْ أَذْ إِسُّوفّغْ
إِجّْ ن ؤُمزْذَاڭْ زڭْ ؤُمخْمُوجْ؟
5 مَارَا ؤُسَّانْ نّسْ ؤُرِينْ،
ڒْْقدّْ ن إِيُورنْ نّسْ أَقَا إِتّْوَاسّنْ غَاركْ
ؤُشَا ثڭِّيذْ أَسْ ڒحْذُوذْ نّسْ
نِّي وَارْ ذ أَسْ إِعدّڒْ أَذْ ثنْ إِعْذُو، ◘14:5 أَيُوبْ 7:1
6 نقْڒبْ خنِّي خَاسْ مَاحنْذْ أَذْ يَاريّحْ،
أَڒَامِي إِزمَّارْ أَذْ يَارّْ مژْرِي
أَمْ يِيجّْ ن ؤُشوَّاڒْ ذڭْ وَاسّْ نّسْ. ◘14:6 أَيُوبْ 7:1، 2، 16، 19؛ 10:20
7 مَاغَارْ إِ ثْشجَّارْثْ أَقَا ذِينْ عَاذْ ڒَايَاسْ!
مَاڒَا ثتّْوَاقسّْ،
أَذْ ثسُّوفّغْ عَاوذْ ڒفْرُوعْ،
ڒفْرُوعْ نّسْ وَارْ تّْبذِّينْ زڭْ ؤُغمِّي.
8 وَاخَّا إِوْسَارْ وژْوَارْ نّسْ ذِي ثمُّورْثْ،
إِمُّوثْ جّْذعْ نّسْ ذڭْ ؤُشَاڒْ،
9 أَذْ ثغْمِي ثْشجَّارْثْ عَاوذْ
خْمِي غَا ثَاشَا أَكْ-ذ وَامَانْ،
أَذْ ثسُّوفّغْ عَاوذْ ڒفْرُوعْ
أَمْ إِشْثْ ن ثْشجَّارْثْ ژُّونْ ت بحْڒَا.
10 مَاشَا مَاڒَا إِمُّوثْ إِجّْ ن ورْيَازْ، إِفنَّا،
مَاڒَا إِفّغْ أَسْ بُوحْبڒْ إِ بْنَاذمْ،
مَانِي إِدْجَا خنِّي؟
11 أَمَانْ تّفّْغنْ-د زِي ڒبْحَارْ،
إِغْزَارْ إِتَّاژغْ ؤُ إِخكّْوَا.
12 إِزّڒْ بْنَاذمْ ذِينْ، وَارْ إِتّكَّارْ عَاذْ.
أَڒْ وَارْ تِّيڒِينْ عَاذْ إِجنْوَانْ، وَارْ ذ تّْفِيقِينْ،
وَارْ تّْوَاسّكَّارنْ زڭْ إِضصْ نْسنْ.
13 أَخْ، مْڒِي ذ أَيِي غَا ثَارّذْ غَارْ ڒَاخَارْثْ،
أَذْ أَيِي ثسّْنُوفَّارذْ
أَڒْ غَا إِحيّذْ وغْضَابْ نّشْ،
مْڒِي ذ أَيِي ثُورِيذْ إِجّْ ن ڒْمِيجَاڒْ إِمْثنْ،
حِيمَا أَذْ أَيِي ثِيذَارذْ عَاوذْ!
14 مَاڒَا إِجّْ ن ورْيَازْ إِمُّوثْ،
مَا أَذْ د-إِذْوڒْ غَارْ ثُوذَارْثْ؟
خنِّي أَذْ قِّيمغْ تّْرَاجِيغْ
مَارَّا ؤُسَّانْ ن ؤُمنْغِي إِنُو،
أَڒْ د-يُوسَا ؤُفكِّي إِنُو.
15 مَاڒَا خنِّي شكْ ثْڒَاغِيذْ،
نشّْ أَذْ شكْ د-أَرّغْ
ؤُشَا شكْ أَذْ ثمّژْڒذْ
غَارْ ڒْخذْمثْ ن إِفَاسّنْ نّشْ.
16 مَاشَا ڒخُّو ثْحسّْبذْ إِصُورَافْ إِنُو،
وَارْ ثْمنّْعذْ لْغَاضَابْ نّشْ خْ دّْنُوبْ إِنُو. ◘14:16 أَيُوبْ 31:4؛ 34:21؛ إِزهد. 56:9؛ 139:2، 3، 4؛ أَوڒن. 5:21؛ إِرْم. 32:19
17 أَخطُّو إِنُو إِتّْوَاشمّعْ ذِي ثْشمُّوسْثْ،
غَارْ ڒْمُوعْصِييّثْ إِنُو ثَارْنِيذْ ذَايسْ كْثَارْ.
18 وَاهْ، أَذْرَارْ إِوطَّانْ، إِفسِّي،
جَارْفْ إِحْرُودْجذْ زڭْ ومْشَانْ نّسْ،
19 أَمَانْ تّدّْزنْ إِژْرَا،
إِغزْرَانْ نّسْ تّكّْسنْ أَشَاڒْ ن ثمُّورْثْ،
أَمُّو إِ ثَاردّْدْجذْ ڒَايَاسْ ن بْنَاذمْ.
20 شكْ ثَارنِّيذْ ذَايسْ إِ ڒبْذَا، خنِّي يُويُورْ.
ثتّْبدَّاڒذْ ؤُذمْ نّسْ
ؤُشَا ثسّكّذْ إِ-ث.
21 مَاڒَا إِحنْجِيرنْ نّسْ طّْفنْ شَّانْ،
نتَّا وَارْ ث إِسِّينْ،
مَاڒَا ثنْ ذدْجنْ،
وَارْ كِيذْسنْ إِتِّيشِي.
22 مَاشَا أَرِّيمثْ نّسْ ثتّْنزْبَارْ
ذِي طّْوعْ ن يِيخفْ نّسْ وَاهَا،
ؤُ ڒعْمَارْ نّسْ إِتّشْضِينْ
ذِي طّْوعْ نّسْ.
◘14:1 14:1 إِزهد. 90:5، 6، 9؛ 102:12؛ 103:15؛ 144:4؛ يَاع. 4:14
◘14:2 14:2 أَيُوبْ 8:9؛ إِزهد. 90:6، 10؛ 102:12؛ 103:15؛ 144:4؛ إِشا. 40:6؛ 1 بُط. 1:24
◘14:3 14:3 أَيُوبْ 7:17، 18؛ 10:20
◘14:4 14:4 أَمز. 5:3؛ إِزهد. 51:7؛ يُوح. 3:6؛ رُوم. 5:12؛ أَفا. 2:3
◘14:5 14:5 أَيُوبْ 7:1
◘14:6 14:6 أَيُوبْ 7:1، 2، 16، 19؛ 10:20
◘14:16 14:16 أَيُوبْ 31:4؛ 34:21؛ إِزهد. 56:9؛ 139:2، 3، 4؛ أَوڒن. 5:21؛ إِرْم. 32:19