أَذْلِيسْ إِقدّْسنْ أَيُوبْ ١٥

١٥

ڒْهَارْدْ وِيسّْ ثْنَاينْ ن إِلِيفَازْ خْ ؤُعفَّانْ

١ خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا:

٢ مَا إِتَّارَّا-د إِجّْ ن ؤُمِيغِيسْ س ثُوسّْنَا إِخْوَانْ؟

مَا أَذْ إِشُّورْ أَعذِّيسْ نّسْ س ؤُسمِّيضْ

إِ د-إِتَّاسنْ زِي مَانِيسْ د-ثْنقَّارْ ثْفُوشْثْ؟

٣ مَا إِتّْشَارَّاعْ س ڒْْهَارْذْ وَارْ إِنفّْعنْ،

س وَاوَاڒنْ نِّي وَارْ إِتَّاكّْوَاضنْ؟

٤ شكْ ثَارْژِيذْ ثِيڭّْوُوذِي ن أَربِّي،

ثكّْسذْ ثَاژَادْجِيثْ زَّاثْ إِ وُوذمْ ن أَربِّي.

٥ مَاغَارْ أَقمُّومْ نّشْ إِسَّارْڭبْ

ڒْْمُوعْصِييّثْ نّشْ،

أَقَا إِتّعْجِيبْ أَشْ ڒْْهَارْذْ س ثْحْرَايْمشْثْ

س يِيڒسْ نّشْ.

٦ أَقمُّومْ نّشْ أَذْ شكْ إِحْكمْ،

وَارْ إِدْجِي نشّْ،

إِينْشِيشنْ نّشْ أَذْ خَاكْ شهْذنْ.

٧ مَا شكْ ذ بْنَاذمْ ذ أَمزْوَارُو

نِّي د-إِتّْوَاخڒْقنْ؟

نِيغْ ثتّْوَارْوذْ قْبڒْ ثِيوْرِيرِينْ؟

٨ مَا ثسّْحسّذْ إِ وڭْرَاوْ

ن إِمْشَاوَارنْ إِمْثِيقَّانْ ن أَربِّي،

مَا ثْجبّْذذْ ثِيغِيثْ غَاركْ؟ ◘

٩ مِينْ ثسّْنذْ شكْ، نشِّينْ وَارْ ث نسِّينْ؟

مِينْ ثْفهّْمذْ شكْ، أَقَا إِنْقصْ غَارْنغْ؟

١٠ ؤُڒَا جَارْ أَنغْ ذ أَمْشَايْبُو ذ ؤُوسَّارْ،

نِيثْنِي ذ إِمْغَارنْ ذڭْ وُوسَّانْ خْ بَابَاشْ. ◘

١١ مَا أَسْفوّجْ ن أَربِّي ذْرُوسْ غَاركْ،

نِيغْ إِجّْ ن وَاوَاڒْ سِّيوْڒنْ ث أَكِيذكْ س ثرْغغْ؟

١٢ مَايمِّي شكْ إِسّثْلَاعْ وُوڒْ نّشْ،

مَايمِّي قدْجْعنْثْ ثِيطَّاوِينْ نّشْ،

١٣ أَقَا ثسّْنقْڒَابذْ بُوحْبڒْ نّشْ خْ أَربِّي،

أَڒَامِي ثسُّوفُّوغذْ مَارَّا أَوَاڒنْ نِّي

زڭْ ؤُقمُّومْ نّشْ؟

١٤ مِينْ إِعْنَا بْنَاذمْ أَقَا نتَّا أَذْ يِيڒِي ذ أَمزْذَاڭْ،

مِينْ إِعْنَا ونِّي د-إِتّْوَاخڒْقنْ زِي ثمْغَارْثْ،

أَقَا نتَّا أَذْ يِيڒِي ذ أَمْسڭّذْ؟ ◘

١٥ خْزَارْ، إِمْقدَّاسنْ نّسْ وَارْ خَاسنْ إِتّْشِيڒْ،

ؤُڒَا ذ إِجنْوَانْ وَارْ دْجِينْ صْفَانْ ذِي ثِيطَّاوِينْ نّسْ! ◘

١٦ أَهْثَاثْ عَاذْ إِجّْ ن نّْعِي ن بْنَاذمْ

ذ بُو-ؤُفسَّاذْ،

ونِّي إِسسّنْ مِينْ وَارْ إِحْڒِينْ أَمْ وَامَانْ!

١٧ نشّْ خْسغْ أَذْ أَشْ ث سّشْنغْ، سڒْ-د غَارِي،

خنِّي أَذْ عَاوْذغْ مِينْ ژْرِيغْ،

١٨ مِينْ عَاوْذنْ إِمِيغِيسنْ،

أَمْ وَارْ فَّارنْ شَا ن ڒجْذُوذْ نْسنْ.

١٩ إِ نِيثْنِي وَاهَا ؤُمِي ثمّوْشْ ثمُّورْثْ،

ؤُڒَا ذ إِجّْ ن ڒْْبَارَّانِي وَارْ خَاسْ إِعْذُو.

٢٠ مَارَّا ؤُسَّانْ إِ إِدَّارْ ؤُعفَّانْ،

إِمَارّثْ إِخفْ نّسْ،

ڒْْقدّْ ن إِسڭّْوُوسَا

إِ إِتّْوَاخمّْڒنْ إِ بُو-ڒخْشُونثْ،

أَقَا إِنُوفَّارْ خَاسْ.

٢١ يُوذفْ-د ڒْْحسّْ ن إِغُويَّانْ إِسّْنخْڒَاعنْ

غَارْ إِمزُّوغنْ نّسْ.

عَاذْ ذِي ڒْْوقْثْ ن ڒهْنَا أَذْ خَاسْ إِوْضَا ؤُمْثحَّايْ. ◘

٢٢ نتَّا وَارْ إِتّْرِيجِي أَذْ د-إِعْقبْ زِي ثَادْجسْثْ،

مَاشَا أَقَا نتَّا إِتّْوَاڭّْ إِ سِّيفْ.

٢٣ نتَّا إِتّمْهَافَا ذَا ذ ذِيهَا خْ وغْرُومْ.

’أَ، مَانِي إِ يدْجَا؟‘

نتَّا إِسّنْ أَقَا إِتّْرَاجَا إِ-ث

وَاسّْ ذ أَبَارْشَانْ ذغْيَا. ◘

٢٤ ضِّيقثْ ذ ڒحْصَارثْ سَّاڭّْوَاذنْثْ نتَّا،

أَرْنِينْثْ إِ-ث أَمْ يِيجّْ ن ؤُجدْجِيذْ

إِوْجذْ إِ ؤُمنْغِي.

٢٥ مَاغَارْ غَارْ أَربِّي

إِسّْوِيژَّاضْ نتَّا أَفُوسْ نّسْ،

أَكْ-ذ ؤُمْزمَّارْ خْ كُوڒْشِي

إِمنّعْ ثَاغنَّانْثْ ثَامقّْرَانْثْ. ◘

٢٦ س يِيرِي إِمحْضنْ إِتَّازّڒْ غَارسْ،

إِنُّوفْرَارْ غَارْ ضفَّارْ

ن ثْسدَّارِييِينْ نْسنْ ن ؤُعسْكَارِي

س إِبُوطُوننْ إِڭْذَارنْ.

٢٧ مَاغَارْ إِڒحّفْ إِ ؤُغمْبُوبْ نّسْ س ثَاذُونْثْ،

إِڭَّا ثَاذُونْثْ إِ ثجْعِينَّا نّسْ.

٢٨ إِزدّغْ ذِي ثْندَّامْ إِتّْوَاهذْمنْ،

ذِي ثُوذْرِينْ وَارْ ذَايْسنْثْ إِزدّغْ

عَاذْ ؤُڒَا ذ إِجّْ،

ثِينِّي يُورَانْ مَاحنْذْ أَذْ ذوْڒنْثْ ذ ڒْْخِيرْبَاثْ.

٢٩ نتَّا وَارْ إِذِّيكّْوِيڒْ ذ بُو-وَاڭْڒَا،

أَڭْڒَا نّسْ وَارْ إِتّْغِيمِي،

مَاڒَا مِينْ د-إِكْسبْ

وَارْ يَارنِّي خْ ثمُّورْثْ.

٣٠ نتَّا وَارْ إِنجّمْ إِ ثَادْجسْثْ،

أَشعَّاڒْ ن ثْمسِّي أَذْ يشّْ ڒفْرُوعْ نّسْ،

أَذْ إِفْنَا س ڒعْوِينْ ن ؤُقمُّومْ نّسْ.

٣١ أجّْ إِ-ث وَارْ إِتّْشِيڒِي خْ ڒْْغشّْ،

مَاغَارْ خنِّي إِ غَا ثِيڒِي

ؤُڒَا ذ ڒْْمُونثْ نّسْ ذ ڒْْغشّْ.

٣٢ مَاڒَا وَارْ د-يُوسِي عَاذْ وَاسّْ نّسْ،

أَذْ إِتّْوَاكمّڒْ عَاذْ،

مَاغَارْ ثَاسطَّا ن ثِينِي نّسْ وَارْ ثْزيْزِيوْ. ◘

٣٣ أَذْ إِسّغْضڒْ أَضِيڒْ وَارْ إِسّْنذْينْ نّسْ

أَمْ يِيشْثْ ن ثْزَايَارْثْ،

أَذْ إِمّنْضَارْ نُّووَارْ نّسْ أَمْ ثْزِيثُونْثْ. ◼

٣٤ مَاغَارْ أَبَارُّو ن إِمْنَافْقنْ

أَقَا-ث بْڒَا ڒْْغِيدْجثْ

ؤُ ثِيمسِّي ثتّتّْ إِقِيضَانْ إِ إِشُّورنْ س ڒْْغشّْ. ◼

٣٥ أَقَا أَثنْ س دّيْسثْ زِي ثَامَارَا،

تُّورْونْ ڒْْغشّْ،

ڒخْذعْ أَقَا-ث ذڭْ ؤُعذِّيسْ نْسنْ. ◘

◘١٥:٨ 15:‏8 رُوم. 11‏:‏34

◘١٥:١٠ 15:‏10 أَيُوبْ 32‏:‏7

◘١٥:١٤ 15:‏14 1 إِج. 8‏:‏46؛ 2 إِم. 6‏:‏36؛ أَيُوبْ 14‏:‏4؛ إِزهد. 14‏:‏3؛ أَوڒن. 20‏:‏9؛ أَمب. 7‏:‏20؛ 1 يُوح. 1‏:‏8، 10

◘١٥:١٥ 15:‏15 أَيُوبْ 4‏:‏18؛ 25‏:‏5

◘١٥:٢١ 15:‏21 1 تس. 5‏:‏3

◘١٥:٢٣ 15:‏23 أَيُوبْ 18‏:‏12؛ إِزهد. 109‏:‏10

◘١٥:٢٥ 15:‏25 أَسَا. 13‏:‏5

◘١٥:٣٢ 15:‏32 أَيُوبْ 22‏:‏16؛ إِزهد. 55‏:‏24

◼١٥:٣٣ 15:‏33 ’نتَّا‘ - إِخْسْ أَذْ يِينِي ’أَربِّي‘.

◼١٥:٣٤ 15:‏34 ’أَمْنَافقْ‘ - بْنَاذمْ نِّي إِتّڭّنْ س ثْنَاينْ ن وُوذْمَاونْ.

◘١٥:٣٥ 15:‏35 إِزهد. 7‏:‏15؛ إِشا. 59‏:‏4؛ حُوش. 10‏:‏13