١٦
أَيُوبْ إِڒَاغَا خْ أَربِّي أَمْ د-إِتَّارَّا خْ إِلِيفَازْ
١ خَاسْ ؤُشَا يَارَّا-د أَيُوبْ، إِنَّا:
٢ مَانَاوْيَا سْڒِيغْ أَسْ أَطَّاسْ،
كنِّيوْ مَارَّا إِذْومْ
ثسّْبطّْڒمْ أَيِي أَفوّجْ. ◘16:2 أَيُوبْ 13:4
٣ مَا أَذْ قْضَانْ وَاوَاڒنْ إِخْوَانْ؟
نِيغْ مِينْ شكْ إِعَارّْننْ عَاذْ
أَذْ د-ثَارّذْ أَوَاڒْ؟
٤ ؤُڒَا ذ نشّْ زمَّارغْ
أَذْ سِّيوْڒغْ أَمْ كنِّيوْ،
مَاڒَا أَقَا كنِّيوْ ذڭْ ومْشَانْ إِنُو.
إِڒِي أَذْ مُوذغْ أَوَاڒنْ خَاومْ
ؤُ أَذْ خَاومْ هزّغْ أَزدْجِيفْ إِنُو.
٥ أَذْ كنِّيوْ سّْمحْضغْ س ؤُقمُّومْ إِنُو
ؤُ أَفوّجْ ن إِينْشِيشنْ إِنُو
أَذْ أَومْ يَاوِي ڒفْسَاسثْ.
٦ مَاڒَا سِّيوْڒغْ، وَارْ خَافِي إِتّجِّي ڒحْڒِيقْ إِنُو
ؤُ مَاڒَا سّغْذغْ، مَا أَذْ خَافِي إِحيّذْ؟
٧ ڒخُّو إِسِّيحڒْ أَيِي نتَّا،
ثسَّارْجْفذْ شكْ مَارَّا ثَاوَاشُونْثْ إِنُو.
٨ شكْ ثسّْذُورُويذْ أَيِي س ثقْشُورْثْ ن ثڒْمشْثْ،
ثنِّي ذ ثَاشهَّاذْثْ خَافِي،
ؤُشَا ثكَّارْ خَافِي أَرِّيمثْ إِنُو ثَامُوسْرِيوْثْ،
ثتّْشثْشَا زَّايِي ذڭْ ؤُغمْبُوبْ إِنُو.
٩ أَغْضَابْ نّسْ إِمزّقْ، إِضفَّارْ أَيِي-د.
نتَّا إِتّْغزَّا غَارِي ثِيغْمَاسْ.
أَغْرِيمْ إِنُو إِسّْقطَّاعْ-د غَارِي ثِيطَّاوِينْ. ◘16:9 أَيُوبْ 10:16، 17؛ 13:24
١٠ نِيثْنِي تّْشَارَّاڭنْ أَقمُّومْ نْسنْ خَافِي،
شَّاثنْ أَيِي س ڒْْحڭْرَا غَارْ ؤُقَابْسِي،
تّكَّارنْ خَافِي تّْمُوننْ.
١١ إِسلّمْ أَيِي أَربِّي
إِ يِيجّْ ن مِّيسْ ن ڒْْمُوعْصِييّثْ،
إِعَارّنْ أَيِي ذڭْ ؤُفُوسْ ن إِعفَّاننْ.
١٢ ثُوغَا أَيِي ذِي ڒْْهُوذْنثْ،
مَاشَا نتَّا يَارْژَا أَيِي،
إِشبَّارْ أَيِي ذڭْ إِجِيمَانْ، إِڒْبزْ أَيِي.
إِسّْبدّْ أَيِي ذ ثَاحْجُورْثْ إِ يِيخفْ نّسْ. ◘16:12 أَيُوبْ 7:20؛ إِڭجذ. 3:12
١٣ إِمْجبَّاذنْ نّسْ ن ڒْْقوْسْ نّْضنْ أَيِي-د،
نتَّا إِسّْنُوقُّوبْ أَيِي ثِيژَّاڒْ بْڒَا أَهَاوڒْ،
إِتّْزدْجَاعْ غَارْ ثمُّورْثْ إِژِي إِنُو، ◼16:13 ’ثِيژَّاڒْ‘ - نِيغْ ’ثِيڭژْڒِينْ‘.
١٤ يَارژَّا أَيِي ثَارژِّيثْ
أَوَارْنِي إِ ثْرژِّيثْ نّغْنِي،
إِعْرفْ-د خَافِي أَمْ بُو-ثغْرُوضْثْ.
١٥ خيّْضغْ ثَاخَانْشثْ ن وشْضَانْ
إِ ثڒْمشْثْ إِنُو،
إِشّْ إِنُو سّْوسّْخغْ ذِي ثْعجَّاشْثْ. ◘16:15 أَيُوبْ 30:19
١٦ أَغمْبُوبْ إِنُو إِزْوغْ زڭْ إِمطَّاونْ،
ثِيڒِي نْ ڒْموْثْ أَقَا-ت خْ وَابْڒِيونْ إِنُو،
١٧ وَاخَّا وَارْ يَارْسِي لْعُونْفْ خْ إِفَاسّنْ إِنُو
ؤُ ثَاژَادْجِيثْ إِنُو ثصْفَا.
١٨ ؤُهْ ثَامُّورْثْ، وَارْ دَّاڒْ إِذَامّنْ إِنُو،
وَارْ تّجِّي إِغُويَّانْ إِنُو
أَذْ أَفنْ أَمْشَانْ إِ أَرَّاحثْ!
١٩ خْزَارْ، ؤُڒَا ذ ڒخُّو،
أَشهَّاذْ إِنُو ذڭْ ؤُجنَّا،
أَمْشَافعْ إِنُو خْ ڒڭْعُوذِي.
٢٠ إِمدُّوكَّاڒْ إِنُو ذ يِينِّي زَّايِي إِسْثْهزَّانْ،
مَاشَا ثتّْرُو ثِيطّْ إِنُو غَارْ أَربِّي.
٢١ أجّْ-إِ-ث أَذْ إِوّثْ دّعْوثْ
خْ ورْيَازْ غَارْ أَربِّي،
أَمْ إِجّْ ن مِّيسْ ن بْنَاذمْ
خْ ؤُمدُّوكّڒْ نّسْ. ◘16:21 أَيُوبْ 31:35؛ أَمب. 6:10؛ إِشا. 45:9؛ رُوم. 9:20
٢٢ مَاغَارْ ذْرُوسْ ن إِسڭّْوُوسَا
إِ-د غَا يَاسنْ عَاذْ،
قْبڒْ إِ غَا ؤُيُورغْ أَبْرِيذْ
وَارْ زَّايسْ تّْعِيقِّيبغْ.