١٧
أَيُوبْ إِسِّيوڒْ أَكْ-ذ إِلِيفَازْ خْ ڒمْحَايمْ نّسْ
١ بُوحْبڒْ إِنُو يَارْجفْ،
ؤُسَّانْ إِنُو إِنڭُّورَا خسْينْ،
مْغِيرْ إِمضْڒَانْ ذ أَيِي إِقِّيمنْ.
٢ س ثِيذتّْ، إِنِّي إِسْثهْزَانْ أَقَا أَثنْ غَارِي،
ؤُ ثِيطّْ إِنُو ثسّْعدُّو دْجِيڒثْ
جَارْ إِخَارِّيصنْ نْسنْ إِمَارْزَاڭنْ!
٣ أڭّْ إِخفْ نّشْ ذ أَضْمَانْ إِ نشّْ ذِينْ غَاركْ.
مَانْ ونْ خنِّي إِ غَا إِوْثنْ أَفُوسْ نّسْ
ذڭْ ؤُفُوسْ إِنُو إِ مَانْ أَيَا؟ ◘17:3 2 كُور. 5:19
٤ مَاغَارْ شكْ ثكّْسذْ
مَارَّا ڒفْهَامثْ خْ وُوڒْ نْسنْ،
خْ ؤُيَا شكْ وَارْ ثنْ ثسّْعُودْجِيذْ شَا.
٥ وِي غَا إِغْذَارنْ إِمدُّوكَّاڒْ نّسْ
ذِي طّْوعْ ن ثْكشَّاضْثْ،
ثِيطَّاوِينْ ن إِحنْجِيرنْ نّسْ أَذْ نْعذْمنْثْ.
٦ نتَّا إِڭَّا أَيِي ذ لْمَاثَالْ جَارْ ڒڭْنُوسْ،
أَڒَامِي ذوْڒغْ أَمْ يِيجّنْ
سُّوسُوفنْ أَسْ خْ ؤُغمْبُوبْ. ◘17:6 أَيُوبْ 30:9
٧ س ؤُيَا إِ ثعْمشْ ثِيطّْ إِنُو زڭْ وشْضَانْ،
مَارَّا إِغزْذِيسنْ إِنُو أَقَا أَثنْ أَمْ ثِيڒِي.
٨ إِنِّي إِڭُّورنْ نِيشَانْ
تّْنخْڒَاعنْ زِي مَانْ أَيَا،
أَمزْذَاڭْ إِتّْنقْڒَابْ خْ ؤُمْنَافقْ.
٩ أَمْسڭّذْ إِمنّعْ ذڭْ وبْرِيذْ نّسْ،
ونِّي غَارْ إِدْجَا إِفَاسّنْ إِمزْذَاڭنْ،
يَارنِّي ذِي جّْهذْ.
١٠ مَاشَا مَارَّا كنِّيوْ، ذوْڒمْ-د،
أَستِّيوْ-د ذَا،
مَاغَارْ وَارْ ؤُفِيغْ
ؤُڒَا ذ إِجّْ ن ؤُمِيغِيسْ جَارْ أَومْ. ◘17:10 أَيُوبْ 6:29
١١ عْذُونْ وُوسَّانْ إِنُو،
تّْوَاقضْعنْ إِنْوَاينْ إِنُو،
مَارَّا مژْرِي ن وُوڒْ إِنُو. ◘17:11 أَيُوبْ 7:6؛ 9:25
١٢ دْجِيڒثْ تّڭّنْ ت ذ أَسّْ،
قَّارنْ: أَقَا ثَافَاوْثْ ثتَّاذسْ-د
خْمِي د غَا ثوْضَا ثَادْجسْثْ.
١٣ مَاڒَا سِّيثْمغْ عَاذْ، سِّيثِيمغْ
أَقَا ڒَْاخَارْثْ أَذْ ثِيڒِي ذ ثَادَّارْثْ إِنُو،
أَذْ بزّْعغْ ثَاسُّوثْ إِنُو ذِي ثَادْجسْثْ.
١٤ غَارْ وحْفُورْ ن ثُورْصُوضِي ڒَْاغِيغْ:
’شكْ ذ بَابَا!‘،
غَارْ إِكشَّا: ’يمَّا!‘ ذ: ’ؤُتْشْمَا!‘
١٥ مَانِي إِدْجَا خنِّي ڒَْايَاسْ إِنُو؟
ڒَْايَاسْ إِنُو،
مَانْ ونْ إِزمَّارنْ أَذْ ث إِژَارْ؟
١٦ أَذْ هْوَانْ غَارْ طّْرُوفَا ن ڒَْاخَارْثْ،
خْمِي إِ غَا نَافْ نْمُونْ أَرَّاحثْ ذڭْ ؤُشَاڒْ. ◘17:16 أَيُوبْ 3:17، 18، 19؛ 30:23، 24