أَذْلِيسْ إِقدّْسنْ أَيُوبْ ١٨

١٨

ڒْهَارْدْ وِيسّْ ثْنَاينْ ن بِيلْذَاذْ: أَنڭَّارُو ن بْنَاذمْ ذ أَعفَّانْ

١ خَاسْ ؤُشَا يَارَّا-د بِيلْذَاذْ، ونِّي د-يُوسِينْ زِي شُوحَا، إِنَّا:

٢ أَڒْ مڒْمِي عَاذْ ثَارزُّومْ

أَذْ ثطّْفمْ إِجّْ ن بْنَاذمْ خْ وَاوَاڒنْ نّسْ؟

مَاڒَا ثْفهْممْ، خنِّي أَوَارْنِي إِ ؤُيَا أَذْ نسِّيوڒْ.

٣ مَايمِّي ذ أَنغْ إِتّْوَاڭّْ أَمْ ڒْْمَاڒْ

ؤُ نتّْوَاحْصَارْ ذِي بُوحْبڒْ

ذِي ثِيطَّاوِينْ نْومْ؟

٤ شكْ، أَ يَارْيَازْ ونِّي إِتّْمزّْقنْ إِخفْ نّسْ

ذڭْ ؤُخيّقْ نّسْ!

مَا أَذْ جّنْ ثمُّورْثْ ذِي سِّيبّثْ نّشْ،

أَذْ إِتّْوَاسّْمُوطِّي جَّارْفْ

زڭْ ومْشَانْ نّسْ ذِي سِّيبّثْ نّشْ؟ ◼ ◘

٥ وَاهْ، ثَافَاوْثْ ن إِعفَّاننْ أَذْ ثخْسِي،

أَشعَّاڒْ ن ثْمسِّي ن ؤُعفَّانْ

وَارْ إِتّڭّْ ثَافَاوْثْ عمَّارْصْ عَاذْ.

٦ ثَافَاوْثْ ذِي ثْقِيذُونْثْ نّسْ أَذْ ثبَّارْشنْ،

ڒفْنَارْ نّسْ ثِيوَا نّسْ أَذْ ث سّْخسْينْ.

٧ تَّارْجِيجنْ إِصُورَافْ نّسْ إِجهْذنْ،

شّْوَارْ ن يِيخفْ نّسْ أَذْ ث إِغْضڒْ.

٨ مَاغَارْ س إِضَارنْ نّسْ أَذْ إِنَّاغْ ذڭْ ؤُصنَّاجْ،

أَذْ يُويُورْ خْ ثْرَاشَّا، مُّوذنْ ت إِ ثْنيْمَارْثْ.

٩ ثَاخْشفْثْ أَذْ ث ثمْنعْ زڭْ ؤُنِيرْزْ،

ڒْْفخْ أَذْ ذَايسْ ثطّفْ. ◘

١٠ ثنُّوفَّارْ ثسْغُونْثْ ن ڒْْفخْ ذِي ثمُّورْثْ،

ڒْْفخْ أَقَا-ت خْ وبْرِيذْ.

١١ سِّيڭّْوذنْ ث إِنخْڒِيعنْ

زِي مَارَّا إِغزْذِيسنْ،

ضفَّارنْ ث غَارْ إِضَارنْ نّسْ. ◘

١٢ إِتّْوَاحْصَارْ ذَايسْ جّهْذْ نّسْ،

أَضيّعْ إِتّْرَاجَا إِ-ث غَارْ ؤُغزْذِيسْ نّسْ. ◘

١٣ أَرْژِييّثْ أَذْ ثشّْ

مَارَّا إِغزْذِيسنْ ن أَرِّيمثْ نّسْ،

إِغزْذِيسنْ ن أَرِّيمثْ نّسْ

أَذْ ثنْ يشّْ إِجّْ ن ڒحْڒَاشْ إِنقّنْ.

١٤ مِينْخفْ ثُوغَا إِتّْشڒْ،

إِتّْوَاقْڒعْ زِي ثْقِيضُونْثْ نّسْ.

ثْندّهْ إِ-ث أَرْژِييّثْ

غَارْ ؤُجدْجِيذْ ن إِنخْڒِيعنْ. ◘

١٥ إِوْذَانْ نِّي وَارْ دْجِينْ ذ يِينِّي نّسْ،

زدّْغنْ ذڭْ ؤُقِيضُونْ نّسْ،

ڒشْبَارِييّثْ ثتّْوَازُوزَّارْ

خْ ثْزذِّيغْثْ نّسْ.

١٦ سَاذُو نتَّا تَّاژْغنْ إِژوْرَانْ نّسْ،

زِي سنّجْ تّْوَاقسّنْ ڒفْرُوعْ نّسْ.

١٧ ڒِْيذَارثْ نّسْ أَذْ ثتّْوَاكّسْ زِي ثمُّورْثْ،

وَارْ ذ أَسْ إِتّْغِيمِي عَاذْ إِسمْ ذڭْ وبْرِيذنْ. ◘

١٨ أَذْ ث عَارْننْ زِي ثْفَاوْثْ غَارْ ثَادْجسْثْ،

أَذْ سّْثوّْجنْ زِي دُّونشْثْ. ◼

١٩ وَارْ غَارسْ إِتِّيڒِي وَارَّاوْ

نِيغْ جَّاذِيرَا ذِي ڒْْڭنْسْ نّسْ،

وَارْ إِتّْغِيمِي ؤُڒَا ذ إِجّْ أَذْ إِدَّارْ

ذِي ثْزذِّيغِينْ نّسْ. ◘

٢٠ خْ وَاسّْ نّسْ أَذْ أَرْجِيجنْ إِنِّي إِزدّْغنْ

غَارْ مَانِي ثْغدْجِي ثْفُوشْثْ،

إِنِّي إِزدّْغنْ غَارْ مَانِيسْ إِ د-ثْنقَّارْ ثْفُوشْثْ

أَذْ ثنْ ثطّفْ ثِيڭّْوُوذِي.

٢١ وَاهْ، أَمُّو إِ ثتّمْسَارْ

إِ ثْزذِّيغِينْ ن إِمقْجَاحنْ،

وَا ذ أَمْشَانْ ن يِينِّي وَارْ إِسِّيننْ أَربِّي.

◼١٨:٤ 18:‏4 ’إِخفْ نّسْ‘ - س ثْعِيبْرَانِيثْ ’ڒعْمَارْ نّسْ‘.

◘١٨:٤ 18:‏4 أَيُوبْ 13‏:‏14

◘١٨:٩ 18:‏9 أَيُوبْ 5‏:‏5

◘١٨:١١ 18:‏11 أَيُوبْ 15‏:‏21؛ إِرْم. 6‏:‏25؛ 46‏:‏5؛ 49‏:‏29

◘١٨:١٢ 18:‏12 أَيُوبْ 15‏:‏23

◘١٨:١٤ 18:‏14 أَيُوبْ 8‏:‏13، 14؛ 11‏:‏20؛ أَوڒن. 10‏:‏28

◘١٨:١٧ 18:‏17 إِزهد. 109‏:‏13؛ أَوڒن. 10‏:‏7

◼١٨:١٨ 18:‏18 ’زِي دُّونشْثْ‘ - نِيغْ ’زڭْ ؤُمَاضَالْ‘.

◘١٨:١٩ 18:‏19 إِشا. 14‏:‏22؛ إِرْم. 22‏:‏30