24
أَيُوبْ إِسّقْسَا إِلِيفَازْ خْ مِينْ ث إِشْقَانْ إِ أَربِّي إِنِّي إِتّْوَاحْصَارنْ
1 مَايمِّي وَارْ تّْوَاسّْنُوفَّارنْثْ
ڒْْمِيجَاڒَاثْ ن ؤُخدْجصْ
س ؤُفُوسْ ن ونِّي إِدْجَانْ ذ أَمْزمَّارْ خْ كُوڒْشِي،
مَايمِّي وَارْ تّْوِيڒِينْ إِنِّي ث إِسّْننْ
ؤُسَّانْ نّسْ ن نّقْمثْ؟
2 نِيثْنِي سّْمُوطُّوينْ ڒهْذُوذْ،
تَّاشَارنْ ثَاحِيمَارْثْ ؤُشَا أَركّْوْسنْ ت. ◘24:2 أَعَوذ. 19:14؛ 27:17؛ أَوڒن. 22:28؛ 23:10
3 أَغْيُوڒْ ن إِيُوجِيڒنْ سَّاڭّْوَاجنْ ث،
تّْحوّْسنْ أَفُونَاسْ ن ثَاجَّاتْشْ.
4 نِيثْنِي عَارّْننْ إِمزْڒَاضْ زڭْ وبْرِيذْ.
إِنِّي إِتّْوَاحْصَارنْ ذِي ثمُّورْثْ
تّْنُوفَّارنْ جْمِيعْ. ◘24:4 أَوڒن. 28:28
5 خْزَارْ، أَقَا أَثنْ أَمْ يِيغْيَاڒْ ن ڒخْڒَا.
تّفّْغنْ غَارْ ڒْخذْمثْ نْسنْ،
أَرزُّونْ ثَانيْمَارْثْ.
ڒخْڒَا إِوْشَا أَسْ مَاشَّا إِ إِحنْجِيرنْ نْسنْ.
6 ذڭْ إِيَّارْ حتّْشنْ ڒحْثِيشْ نّسْ،
ڒقّْضنْ ذڭْ ؤُمَارْجعْ ن ؤُضِيڒْ نْ إِعفَّاننْ.
7 سّْعدُّونْ دْجِيڒثْ ذ إِعَارْيَاننْ، نْهْڒَا أَرُّوضْ،
وَارْ غَارْسنْ بُو دُّورِي ذِي ثصْمضْ.
8 زڭْ ونْژَارْ إِشَّاثنْ زڭْ إِذُورَارْ تُّوفّنْ،
تّْشبَّارنْ ذِي جَّارْفْ
مَاغَارْ وَارْ غَارْسنْ أَذُورِّي.
9 زڭْ إِفَّانْ ن يمَّاثْسنْ تّكّْسنْ أَيُوجِيڒْ،
ؤُشَا تّطّْفنْ أَضْمَانْ زڭْ ؤُمزْڒُوضْ.
10 ڭُّورنْ ذ إِعَارْيَاننْ، نْهْڒَا أَرُّوضْ،
أَمْ دْجُوژنْ أَربُّونْ إِشوَّافنْ ن إِمنْذِي. ◘24:10 لَاوِي 19:13
11 جَارْ ڒحْيُوضْ تّْعسَّارنْ زّشْثْ،
عفّْسنْ خْ ثْسِيرْثْ ن ؤُضِيرْ،
مَاشَا تّْغِيمَانْ فُّوذنْ. ◘24:11 أَعَوذ. 25:4؛ يَاع. 5:4
12 زِي ثنْذِينْثْ إِتّفّغْ-د ڒْحسّْ
ن ؤُسغْنفْ ن يرْيَازنْ،
ڒعْمَارْ ن يِينِّي إِسُّوفّْغنْ بُوحْبڒْ
إِسْغُويُّو ذڭْ ؤُجنَّا.
وَاخَّا أَمنِّي أَربِّي وَارْ إِحطِّي
مِينْ وَارْ إِحْڒِينْ.
13 إِنّغْنِي ذ إِمْغوّْغنْ خْ ثْفَاوْثْ،
وَارْ سِّيننْ إِبْرِيذنْ نّسْ،
وَارْ تّْغِيمِينْ ذِي ثِيبْرِيذِينْ نّسْ.
14 قْبڒْ د-ثُوسَا ثْفَاوْثْ، إِتّكَّارْ ؤُقتَّاڒْ،
إِنقّْ ڒْمسْكِينْ ذ ؤُمزْڒُوضْ
ؤُ ذِي دْجِيڒثْ إِڭَّا أَمْ ؤُخوَّانْ. ◘24:14 إِزهد. 10:8، 9
15 ثِيطّْ ن ؤُزنَّايْ ثْحطَّا ثَادْجسْثْ.
إِقَّارْ: ’ؤُڒَا ذ إِشْثْ ن ثِيطّْ وَارْ ذ أَيِي ثْحطِّي!‘
إِڒحّفْ إِ ؤُغمْبُوبْ نّسْ. ◘24:15 إِزهد. 10:11؛ أَوڒن. 7:8، 9
16 ذِي ثَادْجسْثْ تَّاذْفنْ غَارْ ثُوذْرِينْ.
س وَاسّْ تّْنُوفَّارنْ،
وَارْ سِّيننْ وَالُو خْ ثْفَاوْثْ. ◘24:16 أَيُوبْ 38:15؛ يُوح. 3:20
17 مَاغَارْ ثُوفُّوثْ ثْبَانْ أَسنْ-د أَمْ ثِيڒِي ن ڒْموْثْ،
مَاغَارْ سّْننْ إِنخْڒِيعنْ ن ثِيڒِي ن ڒْموْثْ.
18 نتَّا ذ أَفْسُوسْ أَمْ ؤُكُوفُّو
خْ وُوذمْ ن وَامَانْ إِ يدْجَا.
ثتّْوَانْعڒْ ثسْغَارْثْ نْسنْ خْ ثمُّورْثْ.
وَارْ إِتّطّفْ عَاذْ أَبْرِيذْ
غَارْ إِمَارْجَاعنْ ن ؤُضِيڒْ.
19 ڒَاژَاغْ ذ ڒحْمُو قطَّانْ
خْ وَامَانْ ن وذْفڒْ،
أَمُّو إِ ثتّكّسْ ڒَاخَارْثْ ؤُڒَا ذ إِنِّي إِخْضَانْ.
20 أَعذِّيسْ ن يمَّاسْ أَذْ ث إِتُّو،
إِكشَّاونْ أَذْ زَّايسْ أَرّنْ مژْرِي.
عمَّارْصْ وَارْ ث تِّيذَارنْ عَاذْ.
إِتّْوَارْژْ ڒْغشّْ أَمْ إِشْثْ ن ثْفْروْثْ ن ؤُكشُّوضْ،
21 أَمُّو ؤُڒَا ذ ونِّي إِتّڭّنْ ڒْغَارْ
ذِي ثمْغَارْثْ بْڒَا ثَارْوَا،
ذِي ثنِّي وَارْ إِتِّيرْونْ،
ؤُڒَا ذ ونِّي إِتّڭّنْ
مِينْ وَارْ إِحْڒِينْ أَكْ-ذ ثَاجَّاتْشْ.
22 س جّهْذْ نّسْ إِسّْبدَّا
إِنِّي غَارْ ثدْجَا صُّولْطَا.
إِبدّْ وَانِيثَا، مَاشَا وَارْ إِسِّينْ نِيشَانْ
أَقَا ثُوذَارْثْ نّسْ ذِي ڒَامَانْ.
23 نتَّا إِوْشَا أَسْ ڒَامَانْ،
أَڒَامِي غَارسْ د-ثُوذفْ تِّيقّثْ،
عَاذْ ثِيطَّاوِينْ نّسْ
أَقَا أَثنْثْ خْ وبْرِيذْ نْسنْ.
24 تّْوَاسُّوعْڒَانْ إِ يِيجّْ ن ڒْحَاڒْ ذ أَقُوضَاضْ،
خنِّي وَارْ دْجِينْ عَاذْ.
أَذْ هْوَانْ، أَذْ تّْوَاكّْسنْ
أَمْ مَارَّا إِوْذَانْ،
أَمْ إِخْفَاونْ ن ؤُغدُّويْ ن يِيرْذنْ
أَذْ تّْوَاقسّنْ.
25 مَا وَارْ إِدْجِي أَمنِّي؟
مَانْ ونْ إِ ذ أَيِي غَا إِطّْفنْ إِخَارِّيقنْ،
مَانْ ونْ إِ غَا إِسّبْضڒْ ڒْهَارْذْ إِنُو؟