أَذْلِيسْ إِقدّْسنْ أَيُوبْ ٢٧

٢٧

ڒْهَارْدْْ ن أَيُوبْ خْ إِعفَّاننْ

١ يَارْنِي إِسّْڭعّذْ أَيُوبْ ڒْْهَارْذْ ن لْمَاثَالْ نّسْ، إِنَّا:

٢ س ثِيذتّْ أَمْ إِدَّارْ أَربِّي

نِّي إِ ذ أَيِي إِكّْسنْ ثَاسْغَارْثْ إِنُو،

أَمْزمَّارْ خْ كُوڒْشِي

نِّي إِسَّارْزَاڭنْ ڒعْمَارْ إِنُو،

٣ مِينْ غَا يكّْ نّفْسْ عَاذْ ذَايِي

ؤُ أَرُّوحْ ن أَربِّي عَاذْ ذڭْ ونْزَارنْ إِنُو،

٤ وَارْ قَّارنْ إِينْشِيشنْ إِنُو ڒْْغشّْ

ؤُ إِڒسْ إِنُو وَارْ إِقَّارْ إِخَارِّيقنْ!

٥ إِڭّْوجْ خَافِي أَذْ ڭّغْ كنِّيوْ

ذِي ثْسيَّارسْثْ ن ثِيذتّْ.

أَڒْ غَا سُّوفّْغغْ بُوحْبڒْ إِنُو،

وَارْ تّجِّيغْ أَذْ خَافِي كّْسنْ أَسڭّذْ إِنُو.

٦ أَذْ طّْفغْ ذِي ثْسڭْذَا إِنُو،

وَارْ زَّايسْ أَرخُّوغْ شَا.

ؤُڒْ إِنُو وَارْ ذ أَسْ يَارخُّو

ؤُڒَا خْ إِجّنْ زڭْ وُوسَّانْ إِنُو.

٧ مْڒِي د-إِبَانْ ڒعْذُو إِنُو ذ أَعفَّانْ،

ونِّي أَكِيذِي إِتّْمنْغَانْ

ذ مِّيسْ ن ڒْْمُوعْصِييّثْ.

٨ مَاغَارْ مَانْ ڒَْايَاسْ ن ؤُمْنَافقْ،

خْمِي غَا ثتّْوَاقْضعْ ثُوذَارْثْ نّسْ،

خْمِي زَّايسْ إِ غَا إِقْڒعْ أَربِّي ڒعْمَارْ نّسْ؟ ◘

٩ مَا أَذْ إِسڒْ أَربِّي إِ إِغُويَّانْ نّسْ،

خْمِي خَاسْ د غَا إِوْضَا ڒْْحصْرَانْ؟ ◘

١٠ مَا أَذْ إِفَارْحْ غَارْ ؤُمْزمَّارْ خْ كُوڒْشِي؟

مَا أَذْ إِڒَاغَا خْ أَربِّي مڒْمِي مَا؟

١١ نشّْ أَذْ أَومْ سّْڒمْذغْ خْ ؤُفُوسْ ن أَربِّي،

مِينْ إِعوّڒْ ؤُمْزمَّارْ خْ كُوڒْشِي،

وَارْ ث سّْنُوفَّارغْ.

١٢ خْزَارْ، كنِّيوْ مَارَّا إِذْومْ ثژْرِيمْ ث.

مَايمِّي ثَارنّْيمْ

ثسُّوفُّوغمْ مِينْ إِبطّْڒنْ ثقَّارمْ:

١٣ ”ثَا ذ ثَاسْغَارْثْ ن بْنَاذمْ أَعفَّانْ غَارْ سِيذِي،

ثَاسْغَارْثْ ن أَيْثْ ن بُو-ڒخْشُونثْ

نِّي إِ غَا طّْفنْ زڭْ ؤُمْزمَّارْ خْ كُوڒْشِي: ◘

١٤ خْمِي غَا مَّارنْينْ إِحنْجِيرنْ نّسْ،

إِ سِّيفْ ؤُمِي ؤُرِينْ.

إِغدُّوثنْ نّسْ وَارْ تّْيَاوَاننْ أَغْرُومْ، ◼ ◘

١٥ وِي زَّايسْ إِ غَا يَاروْڒنْ

أَذْ تّْوَانضْڒنْ س طَّاعُونْ،

ثِيجَّاڒْ نّسْ وَارْ تّْرُونْثْ شَا. ◘

١٦ وَاخَّا إِجَارُّووْ نُّوقَارْثْ أَنشْثْ ن ؤُشَاڒْ،

ؤُ إِسّوْجَاذْ أَرُّوضْ أَنشْثْ ن ؤُشَاڒْ،

١٧ إِوَا، وَاخَّا أَذْ ث إِسّوْجذْ،

أَمْسڭّذْ أَذْ زَّايسْ يَارْضْ

ؤُشَا أَمزْذَاڭْ أَذْ إِبْضَا نُّوقَارْثْ. ◘

١٨ أَذْ إِبْنَا ثَادَّارْثْ نّسْ أَمْ ثْشِينْذَا،

أَمشْنَاوْ ثَانْوَالْثْ

إِ إِسّْبدَّا ؤُعسَّاسْ إِ يِيخفْ نّسْ.

١٩ أَذْ ذَايسْ إِطّصْ ذ بُو-وَاڭْڒَا،

مَاشَا وَارْ يَارنِّي ذڭْ وَاڭْڒَا نّسْ.

مَاڒَا يَارْزمْ ثِيطَّاوِينْ نّسْ،

وَارْ ذِينْ إِتّْغِيمِي عَاذْ وَالُو. ◘

٢٠ إِنخْڒِيعنْ أَذْ خَاسْ أَرنْينْ

أَمْ إِغزْرَانْ ن وَامَانْ،

ثَاحَارْيَاضْثْ أَذْ ث-إِ-د-ثقْضعْ س دْجِيڒثْ. ◘

٢١ أَسمِّيضْ زِي شَّارْقْ أَذْ ث إِكْسِي،

إِوَا ذِينِّي إِتّْرَاحْ،

أَذْ ث-إِ-د-إِقْڒعْ زڭْ ومْشَانْ نّسْ.

٢٢ أَربِّي أَذْ إِسِّيوضْ مَارَّا أَيَا

خْ ؤُزدْجِيفْ نّسْ، وَارْ خَاسْ إِسّْعِيزِّي شَا.

أَذْ يَارْوڒْ ذغْيَا زِي ثشْثِي ن ؤُفُوسْ نّسْ.

٢٣ إِوْذَانْ أَذْ خَاسْ وّْثنْ ذڭْ إِفَاسّنْ نْسنْ

أَمْ زَّايسْ سْثْهزَّانْ

ؤُشَا أَذْ خَاسْ صفَّارنْ

زڭْ ومْشَانْ ن ثْزذِّيغْثْ نّسْ.“

◘٢٧:٨ 27:‏8 مت. 16‏:‏26؛ لك. 12‏:‏20

◘٢٧:٩ 27:‏9 أَيُوبْ 35‏:‏12؛ إِزهد. 18‏:‏42؛ 109‏:‏7؛ أَوڒن. 1‏:‏28؛ 28‏:‏9؛ إِشا. 1‏:‏15؛ إِرْم. 14‏:‏12؛ حِز. 8‏:‏18؛ مِيخَا 3‏:‏4؛ يُوح. 9‏:‏31؛ يَاع. 4‏:‏3

◘٢٧:١٣ 27:‏13 أَيُوبْ 20‏:‏29

◼٢٧:١٤ 27:‏14 ’إِغدُّوثنْ‘ - إِخْسْ أَذْ يِينِي ’إِحنْجِيرنْ نّسْ‘.

◘٢٧:١٤ 27:‏14 أَعَوذ. 28‏:‏41؛ حُوش. 9‏:‏13

◘٢٧:١٥ 27:‏15 إِزهد. 78‏:‏64

◘٢٧:١٧ 27:‏17 أَوڒن. 28‏:‏8؛ أَمب. 2‏:‏26

◘٢٧:١٩ 27:‏19 إِزهد. 49‏:‏18

◘٢٧:٢٠ 27:‏20 أَيُوبْ 15‏:‏21؛ 18‏:‏11