٢٦
ثَامْوَارِّيثْ ن أَيُوبْ خْ بِيلْذَاذْ: ڒمْغَارثْ ن أَربِّي
١ خَاسْ ؤُشَا يَارَّا-د أَيُوبْ، إِنَّا:
٢ مَامّشْ ثڭِّيذْ ثوْشِيذْ أَفُوسْ
إِ ونِّي وَارْ غَارْ إِدْجِي جّهْذْ،
مَامّشْ ثْبدّذْ غَارْ ؤُغِيڒْ
ن ونِّي وَارْ غَارْ ثدْجِي ثْزمَّارْ!
٣ زعْمَا أَقَا ثوْشِيذْ أَوصِّي إِسبْحنْ
إِ ونِّي وَارْ غَارْ ثدْجِي ثِيغِيثْ،
مَامّشْ إِ ثسَّارْڭْبذْ أَطَّاسْ ن ثْوَاڒَاوِينْ
مُومُّو ن ثْمسْڒَاشْثْ!
٤ إِ ؤُمِي ثْعَاوْذذْ ڒخُّو أَوَاڒنْ نّشْ؟
مَانْ نّفْسْ د-إِفّْغنْ زَّايكْ؟
٥ ڒخْيَاڒَاثْ ن إِمتَّانْ فسّْينْ
سَاذُو وَامَانْ ذ إِمزْذَاغْ نْسنْ.
٦ ذ أَعَارْيَانْ ثزّڒْ زَّاثسْ ڒَْاخَارْثْ،
وَارْ ذِينْ ثدْجِي ثْقبَّارْثْ إِ ثسْرَافْثْ ن ؤُهلّكْ. ◘26:6 إِزهد. 139:8، 11؛ أَوڒن. 15:11؛ عبر. 4:13
٧ إِبزّعْ أَجنَّا ذِي شَّامَالْ
ثِيوَا ڒْْخَاوِي ن وُوذمْ ن وَامَانْ،
يُويڒْ ثَامُّورْثْ غَارْ وَالُو. ◘26:7 إِزهد. 104:2
٨ نتَّا إِتّْشدَّا أَمَانْ ذڭْ إِسيْنُوثنْ نّسْ،
مَاشَا وَارْ إِتَّارژِّي أَسيْنُو سْوَادَّايْ.
٩ إِسّْذُورُّويْ ؤُذمْ ن ڒْْعَارْشْ نّسْ،
إِتّْبزَّاعْ خَاسْ أَسيْنُو نّسْ. ◘26:9 أَيُوبْ 9:8؛ إِزهد. 104:2، 3
١٠ يَارْشمْ ثَاقُورَاشْثْ خْ وُوذمْ ن وَامَانْ،
أَڒْ ثْمَا ن ثْفَاوْثْ أَكْ-ذ ثَادْجسْثْ. ◘26:10 أَمز. 1:9؛ أَيُوبْ 38:8؛ إِزهد. 33:7؛ 104:9؛ أَوڒن. 8:29؛ إِرْم. 5:22
١١ إِپِيلَارنْ ن ؤُجنَّا تَّارْجِيجِينْ،
تّْنخْڒَاعنْ زڭْ ؤُودّبْ نّسْ.
١٢ س جّهْذْ نّسْ إِسّْهَاجْ ڒبْحَارْ،
س ڒفْهَامثْ نّسْ إِڒْبزْ رَاهَابْ. ◘26:12 إِشا. 51:15
١٣ س أَرُّوحْ نّسْ إِتِّيسِّيقْ ؤُجنَّا
أَمْ وُوذمْ ن ثنِّي وَارْ إِتّْڒحِّيفنْ،
أَفُوسْ نّسْ إِسّْنُوقّبْ
أَفِيغَارْ إِتّحْڒُودْجُوضنْ س ثَازْڒَا. ◘26:13 إِزهد. 33:6
١٤ خْزَارْ، مَانْ أَيَا وَاهَا
إِخفْ ن إِبْرِيذنْ نّسْ،
نسْڒَا مْغِيرْ ثَاحسّشْثْ
ن شَا ن وَاوَاڒنْ زَّايسْ.
وِي إِزمَّارنْ خنِّي
أَذْ إِسّنْ أَجَّاجْ ن جّْهذْ نّسْ؟