1 إِسِّيوڒْ سِيذِي غَارْ مُوسَا، إِنَّا:

2 ”سِيوڒْ أَكْ-ذ مَارَّا ثَامسْمُونْثْ ن أَيْثْ ن إِسْرَائِيل ؤُشَا إِنِي أَسنْ: ’إِتّْخصَّا أَذْ ثِيڒِيمْ ذ إِمْقدَّاسنْ، مِينْزِي نشّْ ذ سِيذِي، أَربِّي نْومْ، أَقَا أَيِي ذ أَمْقدَّاسْ! ◘19:‏2 لَاوِي 11‏:‏44؛ 20‏:‏7، 26؛ 1 بُط. 1‏:‏16 3 كُوڒْ إِجّْ أَذْ إِوقَّارْ يمَّاسْ ذ بَابَاسْ ؤُشَا ؤُسَّانْ إِنُو ن سّبْثْ أَذْ ثنْ ثحْضَامْ، نشّْ ذ سِيذِي، أَربِّي نْومْ!◘19:‏3 ؤُف. 20‏:‏12؛ 31‏:‏13؛ لَاوِي 26‏:‏2 4 وَارْ دِّيكّْوِيڒمْ غَارْ لْ-أَصْنَامْ ؤُ وَارْ تّڭّمْ إِ يِيخفْ نْومْ ڒخْيَاڒَاثْ إِفسْينْ ذ إِربِّيثنْ. نشّْ ذ سِيذِي، أَربِّي نْومْ! ◘19:‏4 ؤُف. 34‏:‏17 5 خْمِي غَا ثْقدّْمنْ ثَاغَارْصْثْ ن ڒهْنَا إِ سِيذِي، خنِّي أَذْ ت ثْقدّْممْ س إِجّْ ن وبْرِيذْ إِ زِي غَا ثتّْوَاقبْڒمْ س أَرْضَا. 6 إِتّْخصَّا أَذْ ثتّْوَاشّْ ذڭْ وَاسّْ ن ثْغَارْصْثْ نْومْ ؤُڒَا ذِي ثِيوشَّا أَوَارْنِي أَسْ. مِينْ إِقِّيمنْ أَڒْ وَاسّْ وِيسّْ ثْڒَاثَا أَذْ إِتّْوَاسّشْمضْ س ثْمسِّي. ◘19:‏6 لَاوِي 7‏:‏16 7 مَاڒَا ثتّْوَاشّْ عَاذْ ذڭْ وَاسّْ وِيسّْ ثْڒَاثَا، أَذْ ثِيڒِي ذ جّْعِيفشْثْ، وَارْ ثتّْوَاقبّڒْ س أَرْضَا. 8 وِي زَّايسْ غَا إِشّنْ أَذْ يَارْبُو ڒْمُوعْصِييّثْ نّسْ، مِينْزِي إِسّخْسَارَا مِينْ إِدْجَانْ ذ أَمْقدَّاسْ ن سِيذِي ؤُشَا خنِّي أَذْ إِتّْوَاقسّْ بْنَاذمْ نِّي زِي ڒْڭنْسْ نّسْ.

9 مَاڒَا ثمْجَارمْ صَّابثْ ن ثمُّورْثْ نْومْ، وَارْ مجَّارْ شكْ إِيَّارْ نّشْ أَڒْ أَغزْذِيسْ أَنڭَّارْ نِيغْ أَذْ ثْجمْعذْ مِينْ إِقِّيمنْ أَوَارْنِي ثَاميْرَا نّشْ. ◘19:‏9 لَاوِي 23‏:‏22؛ أَعَوذ. 24‏:‏19 10 وَارْ ڒقّضْ ؤُضِيڒْ ن ؤُمَارْجعْ نّشْ كُوڒْشِي، وَارْ حْرُووْ مَارَّا مِينْ ذِينْ إِقِّيمنْ ذِي ثمُّورْثْ ذڭْ ؤُمَارْجعْ نّشْ ن ؤُضِيڒْ. أَذْ ثجّذْ أَيَا إِ ؤُمزْڒُوضْ ؤُ إِ ؤُبَارَّانِي، نشّْ ذ سِيذِي، أَربِّي نْومْ!

11 وَارْ تَّاشَارْ ؤُ وَارْ سّْخَارِّيقْ، ؤُڒَا ذ إِجّْ أَذْ إِشْمثْ جَّارْ نّسْ. ◘19:‏11 ؤُف. 20‏:‏15 12 وَارْ تّْجَادْجَامْ ژُورْ س يِيسمْ إِنُو. وَارْ سّخْسَارَا إِسمْ ن أَربِّي نّشْ. نشّْ ذ سِيذِي.◘19:‏12 ؤُف. 20‏:‏7؛ أَعَوذ. 5‏:‏11

13 وَارْ سّْحِيسِّيفْ جَّارْ نّشْ نِيغْ أَذْ ث ثَاشَارذْ. وَارْ تّطّفْ ڒْمُونثْ ن إِشوَّاڒنْ زِي دْجِيڒثْ أَڒْ ثِيوشَّا. ◼19:‏13 ’وَارْ تّطّفْ‘ - نِيشَانْ زِي ثْعِيبْرَانِيثْ ’وَارْ تّْنُوسِي‘.  ◘19:‏13 أَعَوذ. 24‏:‏14؛ يَاع. 5‏:‏4 14 وَارْ تّكّْوَارْ أَذهْشُورْ ؤُ وَارْ تّڭّْ شَا مِينْ ذِي غَا إِنْقَارضْ ؤُذَارْغَاڒْ، مَاشَا إِتّْخصَّا أَذْ ثڭّْوذذْ أَربِّي، نشّْ ذ سِيذِي!

15 غَارْ وحْكَامْ وَارْ تّْغشِّيمْ. وَارْ سْعِيزِّي أَمزْڒُوضْ ؤُ وَارْ سْعدُّو غَارْ بُو-ثْخُوبَا. إِتّْخصَّا أَذْ ثْحكْمذْ خْ جَّارْ نّشْ س ؤُسڭّذْ. ◘19:‏15 أَعَوذ. 1‏:‏17؛ 16‏:‏19؛ أَوڒن. 24‏:‏23 16 وَارْ ڭُّورْ جَارْ ڒْڭنْسْ نّشْ س ؤُنمّمْ، وَارْ تّْبذِّي خْ إِذَامّنْ ن جَّارْ نّشْ، نشّْ ذ سِيذِي! ◘19:‏16 ؤُف. 23‏:‏1

17 وَارْ شَارّهْ ؤُمَاشْ ذڭْ وُوڒْ نّشْ. أَذْ ثْعڒْمذْ أَعْڒَامْ إِ جَّارْ نّشْ ؤُ وَارْ ثْكسِّيذْ دّنْبْ خَاكْ زِي سِّيبّثْ نّسْ. ◘19:‏17 مت. 18‏:‏15؛ لك. 17‏:‏3؛ 1 يُوح. 2‏:‏9، 11؛ 3‏:‏15 18 وَارْ تّنْثِيقِيمْ نِيغْ أَذْ ثْخمّْڒذْ أَنْثَاقمْ خْ ثَارْوَا ن ڒْڭنْسْ نّشْ. أَذْ ثخْسذْ جَّارْ نّشْ أَمشْنَاوْ إِخفْ نّشْ، نشّْ ذ سِيذِي.◘19:‏18 مت. 5‏:‏39،43،44؛ 22‏:‏39؛ لك. 6‏:‏27؛ رُوم. 12‏:‏19؛ 13‏:‏9؛ 1 كُور. 6‏:‏7؛ ڭال. 5‏:‏14؛ 1 تس. 5‏:‏15؛ 1 بُط. 3‏:‏9؛ يَاع. 2‏:‏8

19 أَذْ ثحْضَامْ ثِيوصَّا إِنُو. وَارْ تّْڒقَّامْ شَا ڒبْهِيمثْ نّشْ أَكْ-ذ إِجّْ ن مَارْكَا نّغْنِي. وَارْ زَارّعْ ثْنَاينْ ن مَارْكَاثْ ن زَّارِيعثْ ذڭْ إِيَّارْ نّشْ ؤُ وَارْ يَارّضْ أَرُّوضْ إِتّْوَاڭّنْ س ثْنَاينْ ن مَارْكَاثْ ن ؤُكتَّانْ. ◘19:‏19 أَعَوذ. 22‏:‏9، 11

20 مَاڒَا أَرْيَازْ إِطّصْ أَكْ-ذ إِشْثْ ن ثمْغَارْثْ، إِشْثْ ن ثَايَّا إِخْضبْ إِ-ت يِيجّْ ن ورْيَازْ نّغْنِي، مَاشَا وَارْ إِتّْوَاخدْجصْ عَاذْ تَّامَانْ نّسْ ن ؤُفكِّي نِيغْ ثمّوْشْ أَسْ ثْڒلِّي، خنِّي أَذْ يِيڒِي ڒحْسَابْ، مَاشَا وَارْ تّْوَانقّنْ شَا، مِينْزِي نتَّاثْ ثُوغَا عَاذْ وَارْ ثتّْوَاحَارْ شَا. 21 نتَّا أَذْ يَاوِي ثَاغَارْصْثْ ن ؤُمَارْوَاسْ نّسْ إِ سِيذِي غَارْ وَاذَافْ ن ؤُقِيضُونْ ن ؤُمْسَاڭَارْ، إِجّْ ن إِشَارِّي أَمْ ثْغَارْصْثْ ن ؤُمَارْوَاسْ. 22 أَكهَّانْ أَذْ خَاسْ إِڭّْ أَصْڒَاحْ س إِشَارِّي ن ثْغَارْصْثْ ن ؤُمَارْوَاسْ زَّاثْ إِ وُوذمْ ن سِيذِي إِ دّنْبْ نّسْ إِ إِڭَّا ؤُشَا دّنْبْ نّسْ إِ إِڭَّا أَذْ أَسْ إِتّْوَاغْفَارْ. ◼19:‏22 ’إِفْذِي‘ - خْزَارْ إِزهد. 78:35.

23 خْمِي غَا ثَاوْضمْ ذِي ثمُّورْثْ ؤُشَا ثژُّومْ عْڒَامْ كُوڒْ ثِيشجُّورَا، مَاحنْذْ أَذْ زَّايْسنْثْ ثشّمْ، خنِّي وَارْ ثْختّْنمْ ’ڒعْذَاڒْيثْ نّسْ‘، ثنِّي ذ ڒْغِيدْجثْ نّسْ. ثْڒَاثَا ن إِسڭّْوُوسَا وَارْ ثنْثْ ثْختّْنمْ، وَارْ زَّايْسنْثْ تّتّمْ شَا. 24 ذڭْ ؤُسڭّْوَاسْ وِيسّْ أَربْعَا أَذْ ثِيڒِي مَارَّا ڒْغِيدْجثْ نّسْ ثْقدّسْ، إِ ؤُسمْغَارْ إِ سِيذِي. 25 ذڭْ ؤُسڭّْوَاسْ وِيسّْ خمْسَا أَذْ ثشّمْ ڒْغِيدْجثْ نّسْ ؤُشَا صَّابثْ نّسْ أَذْ ت ثوْشمْ إِ يِيخفْ نْومْ. نشّْ ذ سِيذِي، أَربِّي نْومْ!

26 وَارْ تّتّمْ شَا أَكْ-ذ إِذَامّنْ. وَارْ إِعدّڒْ أَذْ ثْڭزّْنمْ نِيغْ أَذْ ثْشغْڒمْ إِخفْ نْومْ س ثْبزْڭِيوْثْ. 27 وَارْ تّْحفِّيمْ أَشُوَّافْ ن ؤُزدْجِيفْ نْومْ ذڭْ ونّضْ نّسْ ؤُ وَارْ تّْضيِّيعمْ شَا ثْمَا ن ثْمَارْثْ نْومْ. ◘19:‏27 لَاوِي 21‏:‏5؛ إِرْم. 9‏:‏25؛ 25‏:‏23؛ 49‏:‏32 28 وَارْ إِعدّڒْ أَذْ ثْشَارْضمْ أَرِّيمثْ نْومْ زِي سِّيبّثْ ن يِيجّْ ن ؤُمتِّينْ نِيغْ أَذْ ثَارشْممْ ثِيڭَّازْ ذِي أَرِّيمثْ نْومْ. نشّْ ذ سِيذِي! ◘19:‏28 أَعَوذ. 14‏:‏1

29  وَارْ سْذدْجِي يدْجِيشْ، أَذْ ت ثَارّذْ ذ ثَامْغَارْثْ ن فَارْقْ-شّْغڒْ، حِيمَا وَارْ ثْوطِّي ثمُّورْثْ ذِي فَارْقْ-شّْغڒْ ؤُشَا خنِّي أَذْ ثشُّورْ ثمُّورْثْ س ڒفْضِيحثْ. 30 أَذْ ثحْضَامْ ؤُسَّانْ إِنُو ن سّبْثْ ؤُشَا أَذْ ثْوقَّارمْ زَّاوشْثْ إِنُو إِقدّْسنْ. نشّْ ذ سِيذِي! 31 وَارْ تّْذِيكّْوِيڒمْ غَارْ يِينِّي إِسَّاوَاڒَانْ أَكْ-ذ إِمتَّانْ ؤُ غَارْ إِڭزَّاننْ، وَارْ غَارْسنْ أَرزّْفمْ، حِيمَا أَذْ زَّايْسنْ ثتّْوَاخمْجمْ. نشّْ ذ سِيذِي، أَربِّي نْومْ! ◘19:‏31 لَاوِي 20‏:‏6

32 أَذْ ثكَّارذْ إِ ونِّي غَارْ إِدْجَا ؤُشُوَّافْ إِشَابْ ؤُشَا أَذْ ثْوقَّارذْ ؤُذمْ ن إِوسُّورَا ؤُشَا أَذْ ثڭّْوذذْ أَربِّي نّشْ. نشّْ ذ سِيذِي!

33 خْمِي كِيذكْ غَا إِزْذغْ إِجّْ ن ؤُبَارَّانِي ذِي ثمُّورْثْ نْومْ، وَارْ ث تّْضدْجْممْ. ◘19:‏33 ؤُف. 22‏:‏21 34 أَبَارَّانِي، ونِّي غَارْومْ إِزدّْغنْ، أَذْ أَومْ يِيڒِي أَمْ يِيجّنْ زِي ثَارْوَا ن ثمُّورْثْ نْومْ. أَذْ ث ثخْسذْ أَمْ يِيخفْ نّشْ، مِينْزِي ثُوغَا كنِّيوْ ذ إِبَارَّانِييّنْ ذِي ثمُّورْثْ ن مِيصْرَا. نشّْ ذ سِيذِي، أَربِّي نْومْ!

35 خْمِي غَا ثِيڒِيمْ غَارْ وحْكَامْ وَارْ تّْغشّمْ شَا س ڒعْبَارْ ن ثُوزّڭَّارْثْ نِيغْ ن دّْقڒْ نِيغْ س ڒعْبَارْ ن مِينْ ذَايسْ. 36 أَذْ غَارْومْ يِيڒِي ذ إِجّْ ن ڒْمِيزَانْ نِيشَانْ ذ إِژْرَا ن ڒْمِيزَانْ نِيشَانْ ؤُڒَا ذ إِجّْ ن إِفَا نِيشَانْ ذ إِجّْ ن ؤُهِينُو نِيشَانْ، نشّْ ذ سِيذِي، أَربِّي نْومْ، ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا. ◘19:‏36 أَوڒن. 11‏:‏1؛ 16‏:‏11؛ 20‏:‏10 37 أَذْ ثحْضَامْ مَارَّا ثِيوصَّا ذ ڒُومُورْ إِنُو ؤُشَا أَذْ ثنْ ثڭّمْ. نشّْ ذ سِيذِي!‘ “