أَذْلِيسْ إِقدّْسنْ مَاتَّا ٨

أَسْڭنْفِي ن إِجّْ ن بُو-ڒْْبَارْصْ

١ ڒَْامِي د-إِهْوَا زڭْ وذْرَارْ، ضْفَارنْ ث-إِ-د أَطَّاسْ ن ڒْْغَاشِي. ◘ ٢ خْزَارْ، يُوسَا-د غَارسْ إِجّنْ إِ ذِي إِدْجَا ڒْْبَارْصْ، إِسْجذْ أَسْ، إِنَّا: ”أَ سِيذِي، مَاڒَا ثخْسذْ، ثْزمَّارذْ أَذْ أَيِي ثسِّيزْذڭذْ!“ ◘ ٣ يَاسُوع إِسّْوِيژّضْ أَفُوسْ نّسْ ؤُشَا إِحَاذَا ث، إِنَّا: ”نشّْ خْسغْ، زْذڭْ!“ ؤُشَا إِتّْوَاسِّيزْذڭْ زِي ڒْْبَارْصْ نّسْ ڒخْذنِّي. ٤ خنِّي إِنَّا أَسْ يَاسُوع: ”خْزَارْ، وَارْ تّقَّارْ إِ حذْ، مَاشَا رُوحْ، سْشنْ إِخفْ نّشْ إِ ؤُكهَّانْ ؤُشَا أوْشْ ثَاغَارْصْثْ إِ أَربِّي عْلَاحْسَابْ مِينْ زَّايسْ إِوصَّا مُوسَا، أَقَا-ت ذ شّْهَاذثْ إِ نِيثْنِي.“ ◘

أَمْسخَّارْ نْ ڒْقبْطَانْ أَرُومَانِي

٥ ڒَْامِي يُوذفْ يَاسُوع غَارْ كَافَارْنَاحُومْ، يُوسَا-د غَارسْ إِجّْ ن ڒْْقبْطَانْ خْ مْيَا، إِتَّارْ زَّايسْ أَمُّو، ◘ ٦ إِنَّا: ”أَ سِيذِي، أَمْسخَّارْ أَمژْيَانْ إِنُو إِزّڒْ ذِي ثَادَّارْثْ ذ أَنعْضَابْ، أَقَا ذَايسْ ڒحْرِيقْ أَطَّاسْ!“ ٧ إِنَّا أَسْ يَاسُوع: ”نشّْ أَذْ د-أَسغْ، أَذْ ث سّْڭنْفِيغْ!“ ٨ ؤُشَا ڒْْقبْطَانْ خْ مْيَا يَارَّا-د، إِنَّا: ”أَ سِيذِي، نشّْ وَارْ سْذِيهدْجغْ أَذْ ثَاذْفذْ سْوَادَّايْ إِ ثْزقَّا إِنُو، مَاشَا إِنِي إِجّْ ن وَاوَاڒْ وَاهَا، خنِّي أَذْ إِڭّنْفَا ؤُمْسخَّارْ أَمژْيَانْ إِنُو. ◘ ٩ مِينْزِي ؤُڒَا ذ نشّْ عَاوذْ ذ بْنَاذمْ سَاذُو إِفَاسّنْ ؤُشَا غَارِي إِعسْكَارِييّنْ سَاذُو ؤُفُوسْ إِنُو، قَّارغْ إِ وَا: ’رُوحْ!‘، خنِّي أَذْ إِرَاحْ، ؤُ إِ ونّغْنِي: ’أَسْ-د!‘، خنِّي أَذْ د-يَاسْ، ؤُ إِ ؤُمْسخَّارْ إِنُو قَّارغْ أَسْ: ’أڭّْ مَانْ أَيَا!‘، ؤُشَا أَذْ ث إِڭّْ.“ ١٠ ڒَْامِي إِسْڒَا يَاسُوع مَانْ أَيَا، إِتّبْهثْ، إِنَّا إِ يِينِّي أَكِيذسْ إِدْجَانْ: ”س ثِيذتّْ نشّْ أَذْ أَومْ إِنِيغْ، وَارْ ؤُفِيغْ ؤُڒَا ذِي إِسْرَائِيل لْ-إِيمَانْ أَمْ وَانِيثَا. ١١ نشّْ أَذْ أَومْ إِنِيغْ، بلِّي أَطَّاسْ إِ د غَا يَاسنْ زِي شَّارْقْ ؤُ زِي ڒْْغَارْبْ، أَذْ قِّيمنْ غَارْ طَّابْڒَا أَكْ-ذ إِبْرَاهِيمْ ذ إِسْحَاقْ ذ يَاعْقُوبْ ذِي ثْڭلْذِيثْ ن إِجنْوَانْ، ◘ ١٢ مَاشَا ثَارْوَا ن ثْڭلْذِيثْ أَذْ مّنْضَارنْ بَارَّا غَارْ طَّارْفْ أَنڭَّارُو ن ثَادْجسْثْ. ذِينِّي أَذْ إِڒِينْ إِمطَّاونْ ذ ؤُغزِّي ن ثغْمَاسْ.“ ◘ ١٣ يَاسُوع إِنَّا إِ ڒْْقبْطَانْ خْ مْيَا: ”رُوحْ، أَذْ إِمْسَارْ أَمْ مَامّشْ ثُومْنذْ.“ ؤُشَا إِڭّنْفَا ؤُحنْجِيرْ نّسْ ذِي ثْسَاعّثْ نِّي.

أَسْڭنْفِي ن ثْضكّْوَاتْشْ ن بُوطْرُوسْ

١٤ ڒخْذنِّي يُوسَا-د يَاسُوع غَارْ ثَادَّارْثْ ن شِيمْعُونْ، إِژْرَا ثَاضكّْوَاتْشْ نّسْ ثزّڒْ، ذَايسْ ثِيمسِّي. ◘ ١٥ إِحَاذَا أَفُوسْ نّسْ ؤُشَا ثْرُوحْ أَسْ ثْمسِّي، ڒخْذنِّي ثكَّارْ، ثْسخَّارْ خَاسْ. ١٦ غَارْ ؤُعشِّي إِوْينْ-د غَارسْ أَطَّاسْ ن إِمَارْيَاحنْ إِ ذَايْسنْ شّْوَاطنْ. إِسُّوفّغْ شّْوَاطنْ نْسنْ س يِيجّْ ن وَاوَاڒْ وَاهَا، ؤُشَا إِسّْڭنْفَا مَارَّا إِمهْڒَاشْ، ١٧ حِيمَا أَذْ إِتّْوَاكمّڒْ مِينْ إِتّْوَانَّانْ زڭْ ؤُنَابِي إِشَاعْيَا: ”أَذْ إِكْسِي ڒحْرِيقْ نّغْ ؤُ أَذْ يَارْبُو ڒهْڒَاشْ نّغْ.“ ◘

أَضْفَارْ ن يَاسُوع

١٨ ڒَْامِي إِژْرَا يَاسُوع ڒْْغَاشِي أَمقّْرَانْ إِ ذ أَسْ د-إِنّْضنْ، يُومُورْ إِ-ثنْ أَذْ ژْوَانْ غَارْ ؤُجمَّاضْ. ◘ ١٩ ؤُشَا يُوسَا-د غَارسْ إِجّْ ن ؤُمْسڒْمَاذْ ن إِذْلِيسنْ، إِنَّا أَسْ: ”أَ أَمْسڒْمَاذْ إِنُو، أَذْ شكْ ضْفَارغْ مَانِي مَا إِ غَا ثْرَاحذْ!“ ◘ ٢٠ إِنَّا أَسْ يَاسُوع: ”إِشعْبَانْ غَارْسنْ إِفْرَانْ ؤُ إِجْضَاضْ ن ؤُجنَّا غَارْسنْ ڒعْوَاشّْ، مَاشَا مِّيسْ ن بْنَاذمْ وَارْ يُوفِي شَا مَانِي غَا إِسنّذْ أَزدْجِيفْ نّسْ.“ ٢١ إِنَّا أَسْ إِجّنْ نّغْنِي زڭْ إِمحْضَارنْ نّسْ: ”أَ سِيذِي، أجّْ أَيِي ذ أَمزْوَارْ أَذْ ؤُيُورغْ أَذْ نضْڒغْ بَابَا!“ ٢٢ إِنَّا أَسْ يَاسُوع: ”ضْفَارْ أَيِي-د، أجّْ إِمتِّيننْ أَذْ نضْڒنْ إِمتِّيننْ نْسنْ!“ ◘

يَاسُوع ذ ثْحَارْيَاضْثْ

٢٣ ڒَْامِي إِنْيَا ذِي ثْغَارَّابُوثْ، نْيِينْ إِمحْضَارنْ نّسْ أَكِيذسْ. ◘ ٢٤ ؤُشَا خْزَارْ، ثكَّارْ-د إِشْثْ ن ثْحَارْيَاضْثْ ذِي ڒبْحَارْ أَڒْ مَانِي ذْڒِينْثْ ڒمْوَاجْ أَغَارَّابُو، مَاشَا يَاسُوع ثُوغَا إِطّصْ. ٢٥ ؤُسِينْ-د غَارسْ إِمحْضَارنْ نّسْ ؤُشَا سّْفَاقنْ ث-إِ-ذ، نَّانْ أَسْ: ”أَ سِيذِيثْنغْ، سنْجمْ أَنغْ، أَقَا أَذْ نتّْوَاهلّكْ!“ ٢٦ إِنَّا أَسنْ: ”مَايمِّي ثتّڭّْوذمْ، أَ كنِّيوْ إِ ذِي إِدْجَا ذْرُوسْ ن لْ-إِيمَانْ؟“ خنِّي إِكَّارْ، إِوبّخْ أَسمِّيضْ ذ ڒبْحَارْ، ؤُشَا ثُوسَا-د ڒْْهُوذْنثْ ثَامقّْرَانْثْ. ◘ ٢٧ ثْبهْثنْ إِوْذَانْ، نَّانْ: ”مِينْ إِعْنَا وَا ؤُمِي إِسمِّيضنْ ذ ڒبْحَارْ تّطَّاعنْ أَسْ؟“

أَسْڭنْفِي ن ثْنَاينْ ن إِمرْيَاحنْ

٢٨ ڒَْامِي يِيوضْ غَارْ ؤُجمَّاضْ غَارْ ثمُّورْثْ ن ڭَاذَارِينِيسْ، ڒْْقَانْ ث-إِ-د ثْنَاينْ ن إِمَارْيَاحنْ، فّْغنْ-د زڭْ إِمضْڒَانْ، ثُوغَا مُّوزَّارنْ أَطَّاسْ أَڒْ مَانِي ؤُڒَا ذ إِجّْ وَارْ إِزمَّارْ أَذْ يكّْ أَبْرِيذْ نِّي. ◘ ٢٩ سْغُويّنْ، نَّانْ: ”مِينْ ذِينْ جَارْ أَنغْ ذ شكْ، أَ يَاسُوع، مِّيسْ ن أَربِّي؟ مَا ثُوسِيذْ-د ذَانِيثَا حِيمَا أَذْ أَنغْ ثْعدّْبذْ قْبڒْ ڒْْوقْثْ؟“ ٣٠ ثُوغَا ذِينْ إِشْثْ ن ثْحِيمَارْثْ ن إِڒْفَانْ ثَامقّْرَانْثْ ثِيڭّْوجْ خَاسنْ، ثْهدَّا ذِينْ. ٣١ ؤُشَا شّْوَاطنْ تَّارنْ زَّايسْ، نَّانْ: ”مَاڒَا ثسُّوفّْغذْ أَنغْ، أجّْ أَنغْ أَذْ نَاذفْ غَارْ ثْحِيمَارْثْ ن يڒْفَانْ!“ ٣٢ إِنَّا أَسنْ: ”رُوحمْ!“ ڒخْذنِّي فّْغنْ-د، ؤُذْفنْ ذڭْ إِڒْفَانْ. ؤُشَا خْزَارْ، ثَاحِيمَارْثْ ن إِڒْفَانْ أَمنْ ثْمُونْ ثحْذُودَّارْ زِي ثيْسَارْثْ، ؤُشَا إِڒْفَانْ وْضَانْ ذِي ڒبْحَارْ، مُّوثنْ ذڭْ وَامَانْ. ٣٣ أَروْڒنْ إِمكْسَاونْ ؤُشَا ڒَْامِي إِوْضنْ غَارْ ثنْذِينْثْ، خبَّارنْ خْ كُوڒْشِي مِينْ إِمْسَارنْ، ؤُڒَا خْ إِمَارْيَاحنْ. ٣٤ ؤُشَا خْزَارْ، فّْغنْ-د أَيْثْبَابْ ن ثنْذِينْثْ مَارَّا إِ ؤُمْسَاڭَارْ أَكْ-ذ يَاسُوع. ؤُمِي ث ژْرِينْ، تَّارنْ زَّايسْ مَاحنْذْ أَذْ إِفّغْ زِي ثمُّورْثْ نْسنْ.

◘٨:١ 8:‏1 [مك. 1‏:‏40‏-‏45؛ لك. 5‏:‏12‏-‏16]

◘٨:٢ 8:‏2 مك. 1‏:‏40؛ لك. 5‏:‏12.

◘٨:٤ 8:‏4 لَاوِي 13‏:‏2؛ 14‏:‏2؛ لك. 5‏:‏14.

◘٨:٥ 8:‏5 [لك. 7‏:‏1‏-‏10؛ يُوح. 4‏:‏43‏-‏54] — لك. 7‏:‏1

◘٨:٨ 8:‏8 إِزهد. 107‏:‏20.

◘٨:١١ 8:‏11 لك. 13‏:‏29.

◘٨:١٢ 8:‏12 مت. 13‏:‏42؛ 21‏:‏43؛ 22‏:‏13؛ 24‏:‏51؛ لك. 13‏:‏28.

◘٨:١٤ 8:‏14 [مك. 1‏:‏29‏-‏34؛ لك. 4‏:‏38‏-‏41] — مك. 1‏:‏29؛ لك. 4‏:‏38.

◘٨:١٧ 8:‏17 إِشا. 53‏:‏4؛ 1 بُط. 2‏:‏24.

◘٨:١٨ 8:‏18 [لك. 9‏:‏57‏-‏62]

◘٨:١٩ 8:‏19 لك. 9‏:‏57.

◘٨:٢٢ 8:‏22 1 تِيم. 5‏:‏6.

◘٨:٢٣ 8:‏23 [مك. 4‏:‏35‏-‏41؛ لك. 8‏:‏22‏-‏25] — مك. 4‏:‏35؛ لك. 8‏:‏22

◘٨:٢٦ 8:‏26 أَيُوبْ 26‏:‏12؛ إِزهد. 107‏:‏29؛ إِشا. 51‏:‏10.

◘٨:٢٨ 8:‏28 [مك. 5‏:‏1‏-‏20؛ لك. 8‏:‏26‏-‏39] — مك. 5‏:‏1؛ لك. 8‏:‏26