أَذْلِيسْ إِقدّْسنْ مَاتَّا ٧

١ ”وَارْ حكّْممْ، حِيمَا وَارْ ثتّْوَاحَاكَاممْ،◘ ٢ مِينْزِي عْلَاحْسَابْ ڒْْحُوكْمْ إِ زِي غَا ثْحكْممْ، أَذْ ثتّْوَاحَاكْممْ، ؤُ عْلَاحْسَابْ ڒعْبَارْ إِ زِي غَا ثعْبَارمْ، أَذْ ثتّْوَاعْبَارمْ عَاوذْ. ◘ ٣ مَايمِّي ثْخزَّارذْ غَارْ ؤُخشِّيوْ ذِي ثِيطّْ ن ؤُمَاشْ، مَاشَا وَارْ ثْحكَّارذْ شَا إِ ثحْنَاشْثْ ثنِّي ذِي ثِيطّْ نّشْ؟ ◘ ٤ خنِّي مَامّشْ غَا ثڭّذْ أَذْ ثِينِيذْ إِ ؤُمَاشْ: ’أجّْ أَيِي أَذْ أَشْ د-سُّوفّْغغْ أَخشِّيوْ زِي ثِيطّْ نّشْ‘، ؤُشَا خْزَارْ، أَقَا شكْ غَاركْ ثَاحْنَاشْثْ ذِي ثِيطّْ نّشْ؟ ٥ شكْ، أَ أَمْنَافقْ، سُوفّغْ-د أَمزْوَارُو ثَاحْنَاشْثْ زِي ثِيطّْ نّشْ، خنِّي ثْزمَّارذْ أَذْ ثخْزَارذْ مْلِيحْ حِيمَا أَذْ ثسُّوفّْغذْ أَخشِّيوْ زِي ثِيطّْ ن ؤُمَاشْ. ◘

٦ وَارْ تِّيشمْ مِينْ إِقدّْسنْ إِ يِيطَانْ، وَارْ نطَّارمْ شَا ثِييَاقُوثِينْ نْومْ إِ إِڒْفَانْ، حِيمَا وَارْ خَاسنْثْعفّْسنْ س إِضَارنْ نْسنْ ؤُشَا أَذْ غَارْومْ د-نْقڒْبنْ، أَذْ كنِّيوْ مزّْقنْ.“ ◘

٧ ”تَّارمْ، أَذْ أَومْ إِمّوْشْ، أَرْزُومْ، أَذْ ثَافمْ، سْقَارْقْبمْ، أَذْ أَومْ إِتّْوَارْزمْ. ◘ ٨ مَاغَارْ مَارَّا ونِّي إِ غَا إِتَّارنْ، أَذْ إِطّفْ ؤُ ونِّي إِ غَا يَارْزُونْ أَذْ يَافْ، ؤُ ونِّي إِ غَا إِسّْقَارْقْبنْ أَذْ أَسْ إِتّْوَارْزمْ. ◘ ٩ نِيغْ مَانْ بْنَاذمْ جَارْ أَومْ، مَاڒَا مِّيسْ إِتَّارْ أَسْ أَغْرُومْ، أَذْ أَسْ إِوْشْ أَژْرُو؟ ١٠ نِيغْ مَاڒَا إِتَّارْ أَسْ ثَاسْڒمْثْ، أَذْ أَسْ إِوْشْ أَفِيغَارْ؟ ١١ مَاڒَا كنِّيوْ، وَاخَّا كنِّيوْ ذ إِعفَّاننْ، أَقَا ثسّْنمْ مَامّشْ غَا ثوْشمْ مِينْ إِصبْحنْ إِ ثَارْوَا نْومْ، مشْحَاڒْ عَاذْ بَابَاثْومْ إِ إِدْجَانْ ذڭْ إِجنْوَانْ أَذْ يوْشْ مِينْ إِصبْحنْ إِ يِينِّي ذ أَسْ إِ غَا إِتَّارنْ! ◘ ١٢ قَاعْ أَمْ مَامّشْ ثخْسمْ أَذْ أَومْ ڭّنْ إِوْذَانْ، ڭّمْ أَمْيَا كنِّيوْ إِ نِيثْنِي، مِينْزِي مَانْ أَيَا ذ شَّارِيعَا ذ إِنَابِييّنْ.“ ◘

١٣ ”أَذْفمْ زِي ثوَّارْثْ إِحْصَارنْ، مِينْزِي ثَاوَّارْثْ ثمْغَارْ ؤُڒَا ذ أَبْرِيذْ إِ إِتَّاوْينْ غَارْ ؤُهلّكْ ذ مِيرِيوْ، ؤُشَا أَطَّاسْ إِ زَّايسْ إِتَّاذْفنْ. ◘ ١٤ مَامّشْ ثحْصَارْ ثوَّارْثْ ؤُ مَامّشْ إِمْژِي وبْرِيذْ إِ إِتَّاوْينْ غَارْ ثُوذَارْثْ! مْغِيرْ ذْرُوسْ ن يِينِّي ث إِتَّافنْ.“ ◘

١٥ ”حْضَامْ إِخفْ نْومْ زڭْ إِنَابِييّنْ إِسّْخَارِّيقنْ إِ د-إِتَّاسنْ غَارْومْ س ثْهِيضُورْثْ ن إِزْمَارنْ، مَاشَا ذڭْ إِعذِّيسنْ نْسنْ أَقَا نِيثْنِي ذ ؤُشَّاننْ إِتّطّْفنْ. ◘ ١٦ زِي ڒْْغِيدْجثْ نْسنْ أَذْ ثنْ ثسّْنمْ. مَا أَذْ ڒقْضنْ أَضِيڒْ زڭْ إِسنَّاننْ نِيغْ ثَازَارْثْ زِي ثْزڭّْوَارْثْ؟ ١٧ أَمُّو كُوڒْ ثَاشجَّارْثْ ثَاصبْحَانْثْ ثتَّاوِي-د ڒْْغِيدْجثْ ثصْبحْ، ؤُشَا ثَاشجَّارْثْ ثَاعفَّانْثْ ثتَّاوِي-د ڒْْغِيدْجثْ ثَاعفَّانْثْ. ◼ ◘ ١٨ ثَاشجَّارْثْ ثَاصبْحَانْثْ وَارْ ثْزمَّارْ أَذْ ثوْشْ ڒْْغِيدْجثْ ثَاعفَّانْثْ، ؤُشَا ثَاشجَّارْثْ ثَاعفَّانْثْ وَارْ ثْزمَّارْ أَذْ ثوْشْ ڒْْغِيدْجثْ ثَاصبْحَانْثْ. ١٩ كُوڒْ ثَاشجَّارْثْ ثنِّي وَارْ إِتِّيشنْ ڒْْغِيدْجثْ ثصْبحْ، أَذْ ثتّْوَاقسّْ ؤُشَا أَذْ ثمّنْضَارْ ذِي ثْمسِّي. ٢٠ س ؤُينِّي أَذْ ثنْ ثسّْنمْ زِي ڒْْغِيدْجثْ نْسنْ.“

٢١ ”وَارْ إِدْجِي شَا كُوڒْ إِجّنْ ونِّي ذ أَيِي غَا إِنِينْ: ’أَ سِيذِي، أَ سِيذِي!‘، أَذْ يَاذفْ غَارْ ثْڭلْذِيثْ ن إِجنْوَانْ، مَاشَا ذ ونِّي إِتّڭّنْ مِينْ إِخْسْ بَابَا إِ إِدْجَانْ ذڭْ إِجنْوَانْ. ◘ ٢٢ أَطَّاسْ إِ ذ أَيِي غَا إِنِينْ ذڭْ وَاسّْ نِّي: ’أَ سِيذِي، أَ سِيذِي، مَا وَارْ نتّْنَابّْ شَا س يِيسمْ نّشْ، مَا وَارْ نُوژِّيڒْ خْ شّْوَاطنْ س يِيسمْ نّشْ ؤُ س يِيسمْ نّشْ مَا وَارْ نڭِّي أَطَّاسْ ن ڒعْجَايبْ؟‘ ◘ ٢٣ خنِّي نشّْ أَذْ أَسنْ إِنِيغْ نِيشَانْ: ’عمَّارْصْ وَارْ كنِّيوْ سِّينغْ، بعّْذمْ خَافِي، أَ كنِّيوْ إِنِّي إِتّڭّنْ ڒْْمُوعْصِييّثْ!‘ “ ◘

٢٤ ”س ؤُيَا مَارَّا ونِّي إِتّسْڒَانْ إِ وَاوَاڒنْ إِنُو، إِتّڭّْ زَّايْسنْ، أَذْ إِتّْوَامْقُودَّا أَكْ-ذ إِجّْ ن بْنَاذمْ ذ أَمِيغِيسْ ونِّي إِبْنَانْ ثَادَّارْثْ نّسْ خْ سّدْجَاحْ. ◘ ٢٥ خنِّي إِوْثَا ونْژَارْ، حمْڒنْ-د إِغزْرَانْ، سُوضنْ-د إِسمِّيضنْ ؤُشَا ڒقْفنْ ثَادَّارْثْ نِّي، مَاشَا وَاخَّا أَمنِّي وَارْ د-ثوْضِي شَا، مِينْزِي ذْسَاسْ نّسْ إِمَّارْسْ خْ سّدْجَاحْ. ٢٦ مَاشَا مَارَّا ونِّي إِتّسْڒَانْ إِ وَاوَاڒنْ إِنُو، وَارْ زَّايْسنْ إِتّڭّْ، أَذْ يِيڒِي أَمْ يِيجّْ ن بْنَاذمْ ذ أَفْغُوڒْ إِ إِبْنَانْ ثَادَّارْثْ نّسْ خْ إِجْذِي. ◘ ٢٧ خنِّي إِوْثَا ونْژَارْ، حمْڒنْ-د إِغزْرَانْ، سُوضنْ-د إِسمِّيضنْ، ڒقْفنْ ثَادَّارْثْ نِّي ؤُشَا ثوْضَا، ثُوغَا أَوطُّو نّسْ ذ أَمقّْرَانْ.“

أَنڭَّارْ ن ؤُبَارّحْ خْ وذْرَارْ

٢٨ أَوَارْنِي ڒَْامِي إِكمّڒْ يَاسُوع أَوَاڒنْ-أَ، أَقَا إِمْسَارْ بلِّي ڒْْغَاشِي إِقِّيمْ إِتّبْهثْ س ثْغُورِي نّسْ، ٢٩ مِينْزِي ثُوغَا إِسّڒْمَاذْ إِ-ثنْ أَمشْنَاوْ ونِّي غَارْ ثدْجَا صُّولْطَا، وَارْ إِدْجِي شَا أَمْ يِيمْسڒْمَاذنْ ن إِذْلِيسنْ ذ إِفَارِيسِييّنْ. ◘

◘٧:١ 7:‏1 [لك. 6‏:‏37‏-‏38؛ 41‏-‏42] — رُوم. 2‏:‏1؛ 1 كُور. 4‏:‏3، 5.

◘٧:٢ 7:‏2 مك. 4‏:‏24؛ لك. 6‏:‏38.

◘٧:٣ 7:‏3 لك. 6‏:‏41، 42.

◘٧:٥ 7:‏5 أَوڒن. 18‏:‏17.

◘٧:٦ 7:‏6 أَوڒن. 9‏:‏8؛ 23‏:‏9.

◘٧:٧ 7:‏7 [لك. 11‏:‏9‏-‏13] — مت. 21‏:‏22؛ مك. 11‏:‏24؛ يُوح. 14‏:‏13؛ 16‏:‏24؛ يَاع. 1‏:‏5، 6؛ 1 يُوح. 3‏:‏22؛ 5‏:‏14.

◘٧:٨ 7:‏8 أَوڒن. 8‏:‏17؛ إِرْم. 29‏:‏12.

◘٧:١١ 7:‏11 أَمز. 6‏:‏5؛ 8‏:‏21.

◘٧:١٢ 7:‏12 لك. 6‏:‏31.

◘٧:١٣ 7:‏13 [لك. 13‏:‏24]

◘٧:١٤ 7:‏14 ڒخ. 14‏:‏22.

◘٧:١٥ 7:‏15 [لك. 6‏:‏43‏-‏44؛ 13‏:‏25‏-‏27] — أَعَوذ. 13‏:‏4؛ إِرْم. 23‏:‏16؛ مت. 24‏:‏4؛ رُوم. 16‏:‏17؛ أَفا. 5‏:‏6؛ كُول. 2‏:‏8؛ 1 يُوح. 4‏:‏1.

◼٧:١٧ 7:‏17 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

◘٧:١٧ 7:‏17 مت. 3‏:‏10؛ 12‏:‏33؛ مك. 11‏:‏13؛ لك. 8‏:‏8.

◘٧:٢١ 7:‏21 مت. 25‏:‏11؛ لك. 6‏:‏46؛ 13‏:‏25‏-‏27؛ ڒخ. 19‏:‏13؛ رُوم. 2‏:‏13؛ يَاع. 1‏:‏22.

◘٧:٢٢ 7:‏22 إِرْم. 14‏:‏14؛ 27‏:‏15؛ لك. 13‏:‏26.

◘٧:٢٣ 7:‏23 إِزهد. 6‏:‏9؛ مت. 25‏:‏12،41؛ لك. 13‏:‏25، 27.

◘٧:٢٤ 7:‏24 إِرْم. 17‏:‏8؛ لك. 6‏:‏47؛ رُوم. 2‏:‏13؛ يَاع. 1‏:‏25.

◘٧:٢٦ 7:‏26 حِز. 13‏:‏11؛ رُوم. 2‏:‏13؛ يَاع. 1‏:‏23.

◘٧:٢٩ 7:‏29 مك. 1‏:‏22؛ 6‏:‏2؛ لك. 4‏:‏32.