أَذْلِيسْ إِقدّْسنْ مَاتَّا ٢٨

٢٨

ثَانُوكْرَا

١ أَوَارْنِي ڒَْامِي ثعْذُو سّبْثْ، غَارْ ڒفْجَارْ ن وَاسّْ أَمزْوَارُو ن سِّيمَانَا، ثُوسَا-د مَارْيَامْ ن مَاجْذَالَا ذ مَارْيَامْ نّغْنِيثْ حِيمَا أَذْ سِّيجّنْثْ خْ ونْضڒْ. ◘ ٢ خْزَارْ، إِمْسَارْ إِجّْ ن ونْهزِّي ن ثمُّورْثْ إِمْغَارْ، مِينْزِي لْمَالَاكْ ن سِيذِي إِهْوَا-د زڭْ ؤُجنَّا، إِقَارّبْ-د، إِسّقْنُونِّي ثَاصْضَارْثْ زڭْ وَاذَافْ ؤُشَا إِقِّيمْ خَاسْ. ٣ ثُوغَا صِّيفثْ نّسْ أَمْ وَاجَّاجْ ؤُ وَارُّوضْ نّسْ ذ أَشمْڒَاڒْ أَمْ وذْفڒْ. ◘ ٤ إِعسَّاسنْ فشْڒنْ زِي ثڭّْوُوذِي زَّايسْ ؤُشَا ذوْڒنْ أَمْ يِيمتِّيننْ.

٥ لْمَالَاكْ إِطّفْ ذڭْ وَاوَاڒْ، إِنَّا إِ ثمْغَارِينْ: ”وَارْ تّڭّْوذنْثْ شَا، مِينْزِي سّْنغْ أَقَا كنِّينْثْ ثَارزُّونْثْ خْ يَاسُوع ونِّي إِتّْوَاصلّْبنْ. ◘ ٦ وَارْ ذَا إِدْجِي، مِينْزِي نتَّا إِكَّارْ-د، أَمْ مَامّشْ إِنَّا. أَسنْثْ-إِ-د ذَا، خْزَارنْثْ أَمْشَانْ مَانِي ثُوغَا إِمَّارْسْ سِيذِيثْنغْ. ◘ ٧ رُوحنْثْ ذغْيَا، إِنِينْثْ إِ إِمحْضَارنْ نّسْ، أَقَا إِتّْوَاسّْنكَّارْ-د زِي ثَادَّارْثْ ن إِمتِّيننْ، ؤُ خْزَارْ نتَّا ذ أَومْ إِ غَا إِزْوَارنْ غَارْ لْجَالِيلْ. ذِينْ أَذْ ث ثْژَارمْ. خْزَارْ، أَقَا نِّيغْ أَومْ ت.“ ◘

٨ فّْغنْثْ نِيثنْثِي ذغْيَا زڭْ ونْضڒْ س ثِيڭّْوُوذِي ذ ڒفْرَاحثْ إِمْغَارنْ، تَّازّْڒنْثْ حِيمَا أَذْ ت خبَّارنْثْ إِمحْضَارنْ. ◘ ٩ ؤُشَا خْزَارْ، يَاسُوع إِڒْقَا ثنْثْ ذڭْ وبْرِيذْ، إِنَّا أَسنْ: ”سْڒَامْ خَاكنْثْ!“ نِيثنْثِي ؤُسِينْثْ-إِ-د غَارسْ، طّْفنْثْ ذڭْ إِضَارنْ نّسْ ؤُشَا سجْذنْثْ أَسْ. ◘ ١٠ ڒخْذنِّي إِنَّا أَسنْثْ يَاسُوع: ”وَارْ تّڭّْوذنْثْ شَا، سِّيوْضنْثْ ڒخْبَارْ-أَ إِ أَيْثْمَا، حِيمَا أَذْ رَاحنْ غَارْ لْجَالِيلْ، ذِيهَا أَذْ أَيِي ژَترنْ.“ ◘

١١ أَمْ رُوحنْثْ، خْزَارْ، أَقَا شَا زڭْ إِعسَّاسنْ ؤُسِينْ-د غَارْ ثنْذِينْثْ، حِيمَا أَذْ خبَّارنْ إِمقّْرَاننْ ن إِكهَّاننْ خْ مَارَّا مِينْ إِمْسَارنْ. ١٢ ڒخْذنِّي مُوننْ نِيثْنِي أَكْ-ذ إِمْغَارنْ ن ڒْْڭنْسْ ؤُشَا مْشَاوَارنْ أَكِيذْسنْ، ؤُشَا وْشِينْ أَسنْ إِ إِعسَّاسنْ تّْمنْيَاثْ ن نُّوقَارْثْ، وَارْ إِدْجِي ذْرُوسْ، ١٣ نَّانْ: ”إِنِيمْ: ’إِمحْضَارنْ نّسْ ؤُسِينْ-د س دْجِيڒثْ ؤُشَا ؤُشَارنْ ث أَمْ ثُوغَا نطّصْ!‘ ١٤ مَاڒَا إِسْڒَا إِ-ث لْعَامِيلْ، أَذْ ث نسّقْنعْ ؤُشَا أَذْ نڭّْ وَارْ ثتِّيڒِيمْ ذڭْ إِمُونَاسْ.“ ١٥ طّْفنْ ثْمنْيَاثْ ن نُّوقَارْثْ ؤُشَا ڭِّينْ أَمْ مَامّشْ ذ أَسنْعڒْمنْ. أَمُّو إِ د-إِتّفّغْ ڒخْبَارْ-أَ جَارْ وُوذَاينْ أَڒْ أَسّْ ن يِيضَا.

ڒُومُورْ أَمقّْرَانْ إِ ؤُبَارّحْ ن ڒخْبَارْ أَصبْحَانْ

١٦ حِيطَاشْ ن إِمحْضَارنْ نِّي رُوحنْ غَارْ لْجَالِيلْ، غَارْ وذْرَارْ مَانِي ثنْ يُومُورْ يَاسُوع. ◘ ١٧ أَڒَامِي ث ژْرِينْ، سجْذنْ أَسْ، مَاشَا شَا شكّنْ. ١٨ إِقَارّبْ-د غَارْسنْ يَاسُوع، إِسِّيوڒْ أَكِيذْسنْ، إِنَّا: ”ثمّوْشْ أَيِي مَارَّا صُّولْطَا ذڭْ ؤُجنَّا ؤُ خْ ثمُّورْثْ. أَمْ مَامّشْ إِ ذ أَيِي د-إِسّكّْ بَابَا، أَمُّو كنِّيوْ إِ غَا سّكّغْ نشّْ. ◘ ١٩ رُوحمْ، أَرّمْ مَارَّا ڒڭْنُوسْ ذ إِمحْضَارنْ إِنُو ؤُ سّْغضْصمْ ثنْ س يِيسمْ ن بَابَا ذ مِّيسْ ذ أَرُّوحْ إِقدّْسنْ، ◘ ٢٠ ؤُ سْڒمْذمْ أَسنْ أَذْ طّْفنْ ذِي مَارَّا مِينْ خفْ كنِّيوْ ؤُمُورغْ زَّايسْ، ؤُ خْزَارْ، نشّْ أَقَا أَيِي أَكِيذْومْ مَارَّا ؤُسَّانْ أَڒْ قطُّو ن دُّونشْثْ.“

أَنڭَّارْ ن لْ-إِنْجِيلْ إِقدّْسنْ أَمْ مَامّشْ ث إِبَارّحْ مَاتَّا. ◘

◘٢٨:١ 28:‏1 [مك. 16‏:‏1‏-‏8؛ لك. 24‏:‏1‏-‏12؛ يُوح. 20‏:‏1‏-‏10]

◘٢٨:٣ 28:‏3 دَان. 7‏:‏9؛ ڒخ. 1‏:‏10.

◘٢٨:٥ 28:‏5 مك. 16‏:‏6؛ لك. 24‏:‏4.

◘٢٨:٦ 28:‏6 مت. 16‏:‏21؛ 17‏:‏23؛ 20‏:‏19؛ مك. 8‏:‏31؛ 9‏:‏31؛ 10‏:‏34؛ لك. 9‏:‏22؛ 18‏:‏33؛ 24‏:‏6.

◘٢٨:٧ 28:‏7 مت. 26‏:‏32؛ مك. 16‏:‏7.

◘٢٨:٨ 28:‏8 مك. 16‏:‏8؛ يُوح. 20‏:‏18.

◘٢٨:٩ 28:‏9 مك. 16‏:‏9؛ يُوح. 20‏:‏14.

◘٢٨:١٠ 28:‏10 ڒخ. 1‏:‏3؛ 13‏:‏31؛ 1 كُور. 15‏:‏5.

◘٢٨:١٦ 28:‏16 [مك. 16‏:‏14‏-‏18؛ لك. 24‏:‏36‏-‏49؛ يُوح. 20‏:‏19‏-‏23؛ ؤُف. 1‏:‏6‏-‏8] — مت. 26‏:‏32؛

◘٢٨:١٨ 28:‏18 إِزهد. 8‏:‏7؛ مت. 11‏:‏27؛ لك. 10‏:‏22؛ يُوح. 3‏:‏35؛ 17‏:‏2؛ 1 كُور. 15‏:‏27؛ أَفا. 1‏:‏22؛ عبر. 2‏:‏8.

◘٢٨:١٩ 28:‏19 مك. 16‏:‏15؛ يُوح. 15‏:‏16.

◘٢٨:٢٠ 28:‏20 يُوح. 14‏:‏18.