مِيخَا
1
ڒْحُوكْمْ خْ سَامَارْيَا ذ ؤُرْشَالِيمْ
1 أَوَاڒْ ن سِيذِي إِ د-يُوسِينْ غَارْ مِيخَا، أَمُورَاشْثِي، ذڭْ وُوسَّانْ ن يُوثَامْ ذ أَحَازْ ذ حِيزْقِييَا، إِجدْجِيذنْ ن يَاهُوذَا، أَوَاڒْ إِ إِژْرَا خْ سَامَارْيَا ذ ؤُرْشَالِيمْ. ◘1:1 إِرْم. 26:18
2 ”سْڒمْ-د، مَارَّا كنِّيوْ، أَ ڒڭْنُوسْ،
إِڒِيمْ ثْفثْنمْ، أَ شمْ، ثَامُّورْثْ
ذ ؤُعمَّارْ نّسْ!
سِيذِي إِنُو، سِيذِي،
أَذْ يِيڒِي ذ أَشهَّاذْ خَاومْ،
سِيذِي إِنُو زِي زَّاوشْثْ نّسْ إِقدّْسنْ. ◘1:2 أَعَوذ. 32:1؛ إِشا. 1:2
3 مَاغَارْ خْزَارمْ، سِيذِي إِفّغْ-د
زڭْ ومْشَانْ نّسْ ن ثْزذِّيغْثْ،
ؤُ نتَّا أَذْ د-إِهْوَا
ؤُ أَذْ إِصُورْفْ خْ ڒڭْعُوذِي ن ثمُّورْثْ. ◘1:3 أَعَوذ. 32:13؛ 33:29؛ إِزهد. 115:3؛ إِشا. 26:21، عَام. 4:13
4 إِذُورَارْ أَذْ فسْينْ سَاذُو نّسْ،
ؤُ ثِيغْزُورِينْ أَذْ تّْوَابْضَانْثْ،
أَمْ شّْمعْ زَّاثْ إِ وُوذمْ ن ثْمسِّي،
أَمْ وَامَانْ نِّي د-إِتّْوَافَارّْغنْ
5 أَيَا مَارَّا إِتّمْسَارْ
زِي سِّيبّثْ ن ؤُخطُّو ن يَاعْقُوبْ،
ؤُ زِي سِّيبّثْ ن دّْنُوبْ
ن ثَادَّارْثْ ن إِسْرَائِيل.
مِينْ إِدْجَانْ ذ خطُّو ن يَاعْقُوبْ؟
مَا وَارْ إِدْجِي ذ سَامَارْيَا؟
ؤُ مِينْ دْجَانْ ذ ڒڭْعُوذِي ن يَاهُوذَا؟
مَا وَارْ ثدْجِي ذ ؤُرْشَالِيمْ؟
6 نشّْ أَذْ أَرّغْ سَامَارْيَا
ذ ڒْخَارْبثْ ذڭْ إِيَّارْ،
ذ أَمَارْجعْ مَانِي غَا ژُّونْ ثَازَايَارْثْ،
ؤُ نشّْ أَذْ نْضَارغْ إِژْرَا نّسْ ذِي ثغْزُورْثْ،
ؤُ أَذْ عَارِّيغْ خْ ذْسُوسَا نّسْ.
7 مَارَّا ڒخْيَاڒَاثْ نّسْ إِنقْشنْ
أَذْ تّْوَاڒذْدْجنْثْ
ؤُ مَارَّا ڒْمُونثْ نّسْ ن فَارْقْ-شّْغڒْ
أَذْ ت سّْشمْضنْ س ثْمسِّي،
ؤُ مَارَّا ڒخْيَاڒَاثْ نّسْ إِنقْشنْ
أَذْ ثنْثْ أَردّْدْجغْ نشّْ،
مَاغَارْ نتَّاثْ ثْيَاروْ إِ-ثنْثْ
زِي ڒْمُونثْ ن فَارْقْ-شّْغڒْ،
ؤُ نِيثنْثِي أَذْ د-ذوْڒنْثْ عَاوذْ
ذْ ڒْمُونثْ ن فَارْقْ-شّْغڒْ.“
أَشْضَانْ أَمقّْرَانْ ن مِيخَا
8 ”خْ ؤُيَا أَذْ شضْنغْ ؤُ أَذْ وْثغْ أَڭجْذُورْ،
أَذْ ؤُيُورغْ س ڒحْفَا ذ أَعَارْيَانْ،
أَذْ سّْمِيعْوغْ أَمْ وُوشَّاننْ ن ڒخْڒَا،
ؤُ أَذْ سْغُويغْ أَمْ يسِّيسْ ن نّْعَامثْ. ◘1:8 أَيُوبْ 30:29
9 مَاغَارْ إِيزِّيمنْ نّسْ نقّنْ،
مَاغَارْ أَيَا يُوسَا-د أَڒْ يَاهُوذَا،
إِوسّعْ ڒْحُوكْمْ أَڒْ ثِيوُّورَا ن ڒْڭنْسْ إِنُو،
أَڒْ ؤُرْشَالِيمْ.
10 وَارْ تّْبَارّْحمْ شَا مَانْ أَيَا ذِي جَاثْ،
وَارْ ثتّْرُومْ، وَارْ خَاسْ نسِّيوِيڒْ.
ذِي بَايْثْ-لِيئَافْرَا زُوزَّارغْ أَشَاڒْ
خْ يِيخفْ إِنُو. ◘1:10 2 صم. 1:20؛ إِرْم. 6:26
11 عْذُو، شمْ ثنِّي إِزدّْغنْ ذِي شَافِيرْ،
ذ أَعَارْيَانْ ؤُ س ڒحْيَا.
ثنِّي إِزدّْغنْ ذِي صَانَانْ وَارْ ثفِّيغْ شَا.
ثَاغُويِّيثْ ن وشْضَانْ ن بَايْثْ-هَا-إِطْصِيلْ
ثكّسْ زَّايْومْ أَبذِّي نّسْ أَكِيذْومْ. ◘1:11 إِشا. 47:3
12 مَاغَارْ ثنِّي إِزدّْغنْ ذِي مَارُوثْ،
ثتّقْنُونُّويْ غَارْ مَارَّا ثِيغمُّورَا
ذِي طّْوعْ ن ڒْخَارْ،
مِينْزِي أَقَا إِهْوَا-د ڒْغَارْ ن سِيذِي،
أَڒْ ثَاوَّارْثْ ن ؤُرْشَالِيمْ. ◼1:12 ’مَارُوثْ‘ - إِسمْ وَانِيثَا إِخْسْ أَذْ يِينِي ’ثَارْزُوڭِي‘. ◘1:12 عَام. 3:6
13 حزّْممْ إِيْسَانْ ن ثَازْڒَا زَّاثْ إِ ؤُكَارُّو،
أَ شمْ، ثنِّي إِزدّْغنْ ذِي لَاخِيشْ!
نتَّاثْ ذ بطُّو ن دّنْبْ
ن يدْجِيسْ ن صِيهْيُونْ،
مَاغَارْ ذَايكْ تّْوَافنْ إِخطَّانْ ن إِسْرَائِيل.
14 س ؤُيَا أوْشْ أَرِّيغَالُوثنْ ن ؤُمْسبْضِي
إِ مُورَاشَاثْ-جَاثْ!
ثُوذْرِينْ ن أَكْزِيبْ أَذْ ذوْڒنْثْ ذ ڒْغشّْ
إِ إِجدْجِيذنْ ن إِسْرَائِيل.
15 عَاوذْ نشّْ أَذْ أَمْ د-أَوْيغْ أَوْرِيثْ،
أَ شمْ ثنِّي إِزدّْغنْ ذِي مَارِيشَا!
أَعُودْجِي ن إِسْرَائِيل أَذْ د-يَاسْ
أَڒْ غَارْ عَاذُولَّامْ.
16 أڭّْ إِخفْ نّمْ ذ ثَاقشَّارْثْ
ؤُ حفّْ إِ إِخفْ نّمْ
ذِي سِّيبّثْ ن إِحنْجِيرنْ نّمْ إِعِيزّنْ.
أَرّْ ثَاقشَّارْثْ نّمْ ذ ثَامقّْرَانْثْ
أَمشْنَاوْ أَڭِيذرْ،
مِينْزِي تّْوَاوْينْ زَّايمْ
غَارْ ثْمحْبَاسْثْ.“
◘1:1 1:1 إِرْم. 26:18
◘1:2 1:2 أَعَوذ. 32:1؛ إِشا. 1:2
◘1:3 1:3 أَعَوذ. 32:13؛ 33:29؛ إِزهد. 115:3؛ إِشا. 26:21، عَام. 4:13
◘1:4 1:4 ڒقض. 5:4؛ إِزهد. 18:8، 10؛ إِزهد. 68:3، 9؛ إِزهد. 97:5؛ عَام. 9:5
◘1:8 1:8 أَيُوبْ 30:29
◘1:10 1:10 2 صم. 1:20؛ إِرْم. 6:26
◘1:11 1:11 إِشا. 47:3
◼1:12 1:12 ’مَارُوثْ‘ - إِسمْ وَانِيثَا إِخْسْ أَذْ يِينِي ’ثَارْزُوڭِي‘.
◘1:12 1:12 عَام. 3:6