٢
إِعْڒَامنْ إِ إِسْرَائِيل ؤُ إِ ڒْْحُوكَّامْ نّسْ
١ ”ؤُشْثْ خْ يِينِّي إِتّْخمَّامنْ
ذِي ڒْْمُوعْصِييّثْ
ؤُ خْ يِينِّي إِتّْخمَّامنْ
ذِي ڒْْغَارْ ذِي قَامَاثْ نْسنْ.
غَارْ ثُوفُّوثْ أَذْ ث ڭّنْ،
مَاغَارْ أَفُوسْ نْسنْ
ذَايسْ أَطَّاسْ ن ثْزمَّارْ.
٢ نِيثْنِي مّژْڒنْ ذڭْ إِيَّارنْ
ؤُشَا تّْكشّْضنْ ثنْ عَاوذْ،
ؤُڒَا ذ ثُوذْرِينْ، ؤُشَا تّطّْفنْ ثنْثْ.
أَمُّو إِ ڭِّينْ نِيثْنِي س ڒخْشُونثْ
إِ ورْيَازْ ؤُ إِ ثَادَّارْثْ نّسْ،
وَاهْ، إِ كُوڒْ أَرْيَازْ ؤُ إِ ثسْغَارْثْ نّسْ.“ ◘2:2 إِشا. 5:8
٣ ”س ؤُيَا، أَمُّو إِ إِقَّارْ سِيذِي:
خْزَارْ، نشّْ ثْونِّيغْ إِجّْ ن ڒْْغَارْ
خْ ڒَْادْجْ-أَ، إِ زِي وَارْ ثْزمَّارمْ
أَذْ ثْجبْذمْ إِرَاونْ نْومْ،
ؤُ إِ زِي وَارْ ثْزمَّارنْ
أَذْ ثُويُورمْ عَاذْ س ؤُعفَّارْ،
مَاغَارْ أَذْ ثِيڒِي ذ إِشْثْ ن ڒْْوقْثْ ثَاعفَّانْثْ.◘2:3 عَام. 5:13
٤ ذڭْ وَاسّْ نِّي أَذْ خَاومْ سّْڭعّْذنْ
إِجّْ ن لْمَاثَالْ
ؤُ أَذْغنّْجنْ إِجّْ ن يژْرِي ن وشْضَانْ
أَمْ تّْشثْشَانْ،
ؤُ أَذْ إِنِينْ: نشِّينْ نتّْوَاردّدْجْ قَاعْ!
نتَّا يَارَّا ثَاسْغَارْثْ ن ڒْْڭنْسْ إِنُو
غَارْ ونّغْنِي.
مَامّشْ ت إِكْسِي زَّايِي؟
نتَّا إِوْشَا إِيَّارنْ نّغْ
إِ ونِّي د-إِفّْغنْ زڭْ وبْرِيذْ!
٥ س ؤُيَا وَارْ غَاركْ إِتِّيڒِي ؤُڒَا ذ إِجّنْ
ونِّي إِ غَا إِنْضَارنْ أَفِيڒُو ن ڒقْيَاسْ
عْلَاحْسَابْ ثَاقدُّوحْثْ
ذڭْ وڭْرَاوْ ن ڒْْڭنْسْ ن سِيذِي.“ ◘2:5 أَعَوذ. 32:8، 9
٦ ” ’وَارْ سُّوفُّوغمْ أَوَاڒْ
أَمُّو س ؤُكُوفُّو!‘،
أَمُّو إِ سَّاوَاڒنْ نِيثْنِي
أَمْ سُّوفُّوغنْ كُوفُّو.
’خْ مَانْ أَيَا وَارْ زمَّارنْ نِيثْنِي
أَذْ سُّوفّْغنْ أَوَاڒْ س ؤُكُوفُّو!‘
أَمُّو إِ غَا ثِيڒِي ڒفْضِيحثْ
وَارْ ثتّْوَاكّسّْ! ◘2:6 إِشا. 30:10؛ عَام. 7:16
٧ أَ كنِّيوْ، ثَادَّارْثْ ن يَاعْقُوبْ،
مَا إِزمَّارْ أَذْ إِتّْوَانَّا أَيَا؟
’مَا إِجَّا شَا أَرُّوحْ ن سِيذِي وَارْ ث إِڭِّي؟‘
نِيغْ: ’مَا ثِينَا ذ ثِيمڭَّا نّسْ؟‘
مَا وَارْ تّڭّنْ وَاوَاڒنْ إِنُو ڒْْخَارْ
إِ يِينِّي إِڭُّورنْ س ثْسڭْذَا؟
٨ مَاشَا عَاذْ إِذنَّاضْ إِكَّارْ ڒْْڭنْسْ إِنُو
أَمْ يِيجّْ ن ڒعْذُو.
ثْقڒْعمْ أَرُّوضْ ذ ؤُپَارْثسُّو
زڭْ إِمْسبْرِيذنْ إِقفْڒنْ
إِ وَارْ ت إِتّْرِيجِينْ،
إِنِّي إِتّْعِيفّنْ ؤُمنْغِي.
٩ كنِّيوْ ثسُّوفُّوغمْ
ثِيمْغَارِينْ ن ڒْْڭنْسْ إِنُو
زِي ثَادَّارْثْ نْسنْثْ إِعِيزّنْ.
إِحنْجِيرنْ نّسْ ثكّْسمْ أَسنْ
ثَالْوِيزْثْ إِنُو إِ ڒبْذَا.
١٠ كَّارمْ ؤُ أَڭّْوجمْ،
مِينْزِي وَا وَارْ إِدْجِي ذ أَمْشَانْ ن أَرَّاحثْ!
مَاغَارْ أَقَا ثَامُّورْثْ ثتّْوَاسّخْمجْ،
أَذْ ثَاوِي أَردّدْجْ،
وَاهْ إِجّْ ن نّْعِي ن ؤُردّدْجْ.
١١ مَاڒَا شَا ن إِجّْ إِضفَّارْ أَسمِّيضْ،
إِقَّارْ إِخَارِّيقنْ، ؤُشَا إِقَّارْ:
’نشّْ أَذْ أَشْ سُّوفّْغغْ أَوَاڒنْ س ؤُكُوفُّو
ذِي طّْوعْ ن بِينُو ذ شّْرَابْ!‘
أَقَا نتَّا إِڭَّا
أَخْمِي نتَّا ذ أَنَابِي ن ڒْْڭنْسْ
نِّي إِسُّوفُّوغنْ أَوَاڒنْ س ؤُكُوفُّو.“
١٢ ”س ثِيذتّْ، أَ يَاعْقُوبْ،
نشّْ أَذْ شكْ كْسِيغْ غَارِي قَاعْ،
نِيشَانْ نشّْ أَذْ سّْمُونغْ
مِينْ إِقِّيمنْ زِي إِسْرَائِيل.
أَذْ ثنْ سّْمُونغْ أَمْ وُودْجِي ن بُوصْرَا،
أَمْ إِشْثْ ن ثْحِيمَارْثْ ذِي ڒْْوسْطْ ن ثْركّْوَاسْثْ
أَذْ ذِينْ يِيڒِي إِجّْ نْ ؤُعُورِّيشْ ن إِوْذَانْ. ◘2:12 إِشا. 34:6؛ 63:1؛ إِرْم. 48:24؛ 49:13، 22، عَام. 1:12.
١٣ أَمْفدْجقْ أَذْ إِزْوَارْ زَّاثْ إِ وُوذمْ نْسنْ،
نِيثْنِي أَذْ فدْجْقنْ ؤُ أَذْ عْذُونْ خْ ثوَّارْثْ،
ؤُ أَذْ زَّايسْ د-فّْغنْ.
أَجدْجِيذْ نْسنْ أَذْ إِزْوَارْ
زَّاثْ إِ ؤُغمْبُوبْ نْسنْ،
ؤُ سِيذِي غَارْ ؤُزدْجِيفْ نْسنْ.“