أَذْلِيسْ إِقدّْسنْ نَاحُومْ ٢

أَوطُّو ن نِينْوَا

١ خْزَارْ، خْ إِذُورَارْ تَّازّْڒنْ إِضَارنْ

ن ونِّي د-يِيوْينْ ڒخْبَارْ أَصبْحَانْ،

ونِّي إِخبَّارنْ س ڒهْنَا.

عيّذْ ڒعْيُوذَاثْ نّشْ، أَ يَاهُوذَا،

سقْفڒْ لْوُوعُوذْ نّشْ،

مَاغَارْ ونِّي يَاردّْدْجنْ

وَارْ إِتّْغِيمِي إِژكّْوِي خَاكْ عَاذْ،

نتَّا إِنّقْضعْ مَارَّا. ◘

٢ إِجّنْ ونِّي يُوژّْڒنْ خْ إِوْذَانْ س لْعُونْفْ

إِ د-إِڭعّذْ خَاكْ!

عسّْ خْ لْبُورْجْ، حْضَا أَبْرِيذْ،

سمْحضْ ثِيجْعِينَّا نّشْ،

أَرْنِي ذِي جّْهذْ نّشْ!

٣ س مِينْزِي سِيذِي أَذْ د-يَارّْ

ڒْْعزّْ ن يَاعْقُوبْ،

أَقَا-ث ذ ڒْْعزّْ ن إِسْرَائِيل.

مَاغَارْ إِكشَّاضنْ كشّْضنْ ثنْ،

ؤُ نِيثْنِيغضْڒنْ ثِيزرْمِينْ نْسنْ. ◘

٤ ثْشَابَّاثْ ن ؤُسڒْقِي

ن أَيْثْ ن بُو-ثغْرُوضْثْ زوْغنْثْ،

إِرْيَازنْ إِمحْضنْ بدّنْ

سّْوجْذنْ إِ ؤُمنْغِي

س وَارُّوضْ أَزڭّْوَاغْ إِحذْقنْ،

غَارْ ثسِّيقْثْ ن ثْمسِّي ن وُوزَّاڒْ

ن إِكَارُّوثنْ ن ؤُمنْغِي،

ذڭْ وَاسّْ إِ ذِي إِ غَا إِسّوْجذْ إِخفْ نّسْ

ؤُ ثِيشجِّيرَا ن ؤُمرْزِي أَذْ نّْهزّنْ. ◼

٥ إِكَارُّوثنْ ن ؤُمنْغِي هَاجنْ ذڭْ إِبْرِيذنْ،

أَقَا ژّعْوَاضنْ زِي سَّا غَارْ ذَا

ذڭْ وَازَّاينْ،

تّْوَاضْهَارنْ أَمْ يِيصفْضَاونْ،

نِيثْنِي ڭمَّارنْ ذَا ذ ذِيهَا أَمْ وَاسَّامنْ.

٦ نتَّا إِتّْخَارّصْ ذڭْ أَيْثْ ن جّهْذْ،

نِيثْنِي مَاشَا تّْنقْرَاضنْ أَمْ ڭُّورنْ

نِيثْنِي تَّازّْڒنْ غَارْ ڒْْحِيضْ نْسنْ،

مَانِي إِبدّْ سّْقفْ ن ؤُهْجَامْ إِوْجذْ.

٧ ثِيوُّورَا ن إِغزْرَانْ نُّورزْمنْثْ،

ؤُ ڒقْصَارْ أَذْ إِفْسِي.

٨ أَقَا ثَامسْڒَاشْثْ ثْبدّْ نِيشَانْ!

نتَّاثْ أَذْ ثتّْوَاعَارَّا،

أَذْ ثتّْوَاسّْڭعّذْ،

ؤُ ثِييَّا نّسْ سْغُويُّونْثْ

أَمشْنَاوْ أَبَارِّي ن ثذْبِيرِينْ،

أَمْ شَّاثنْثْ ذڭْ إِذْمَارنْ نْسنْثْ. ◼

٩ نِينْوَا أَمْ يِيجّْ ن ؤُيڒْمَامْ ن وَامَانْ

زڭْ وَاسّْ إِ ذِي إِدْجَا.

ڒخُّو مَاشَا أَركّْوڒنْ نِيثْنِي.

بدّمْ! بدّمْ!، تّْڒَاغَانْ نِيثْنِي،

مَاشَا ؤُڒَا ذ إِجّْ وَارْ د-إِتّْنقْڒِيبْ.

١٠ كشّْضمْ نُّوقَارْثْ، كشّْضمْ ؤُرغْ!

وَارْ ذِينْ قطُّو إِ ڒكْنُوزْ،

غَارْ ؤُشوَّارْ ن عْڒَامْ كُوڒْ ڒقْشُوعْ.

١١ ثخْوَا، ثتّْوَاكشّضْ

ؤُ ثتّْوَاردّدْجْ نتَّاثْ،

ؤُڒْ إِفْسِي ؤُشَا إِفَادّنْ فشْڒنْ،

تّكّْسنْثْ أَسْ ثِيجْعِينَّا مَارَّا

ؤُ إِغمْبَابْ نْسنْ وَارْغنْ مَارَّا. ◘

١٢ مَانِي إِدْجَا ڒخُّو ڒْْمَارْڭحْ ن وَايْرَاذنْ،

ذ ڒْْمذْوڒْ ن وَايْرَاذنْ إِمژْيَاننْ،

مَانِي يُويُورْ ويْرَاذْ،

أَقَا-ت ذ ثَايْرَاذْثْ أَكْ-ذ ويْرَاذْ أَمژْيَانْ

أَمْ ؤُڒَا ذ إِجّْ إِسّْنخْڒعْ إِ-ثنْ؟

١٣ مَانِي إِدْجَا ڒخُّو وَايْرَاذْ نِّي إِمزّْقنْ

مِينْ حْذَاجنْ ثَارْوَا نّسْ

ؤُ إِجيّفْ إِ ثَايْرَاذِينْ نّسْ،

ذ ونِّي إِشُّورنْ إِفْرَانْ نّسْ س ؤُكشّضْ،

ذ إِمُوشَانْ نّسْ ن ؤُذُورِّي

زِي مِينْ إِتّْوَاشَارّْڭنْ؟

١٤ خْزَارْ، نشّْ أَذْ إِڒِيغْ خَاكْ،

أَمُّو إِ إِقَّارْ سِيذِي ن ڒْْعسْكَارَاثْ،

نشّْ أَذْ أَرّغْ إِكَارُّوثنْ نّشْ ذ دّخَّانْ.

أَذْ شّغْ سِّيفْ إِيْرَاذنْ نّشْ إِمژْيَاننْ،

ؤُ نشّْ أَذْ قضْعغْ ثَاكشَّاضْثْ نّشْ

زِي ثمُّورْثْ

ؤُعمَّارْصْ عَاذْ أَذْ ثتّْوَاسڒْ

ثْمِيجَّا ن إِرقَّاسنْ نّشْ. ◼

◘٢:١ 2:‏1 إِشا. 52‏:‏7؛ رُوم. 10‏:‏15

◘٢:٣ 2:‏3 إِزهد. 80‏:‏13؛ إِشا. 10‏:‏12

◼٢:٤ 2:‏4 ’أَمرْزِي‘ - نِيغْ ’أَمضْزِي‘.

◼٢:٨ 2:‏8 ’ذڭْ إِذْمَارنْ نْسنْثْ‘ - س ثْعِيبْرَانِيثْ ’ذڭْ وُوڒَاونْ نْسنْثْ‘.

◘٢:١١ 2:‏11 أَعَوذ. 1‏:‏28؛ 20‏:‏8؛ ياش. 2‏:‏11؛ 5‏:‏1؛ 7‏:‏5؛ إِشا. 13‏:‏8، 7؛ 21‏:‏3؛ حِز. 21‏:‏12

◼٢:١٤ 2:‏14 ’ثْمِيجَّا ن إِرقَّاسنْ نّكْ‘ - خْزَارْ إِشا. 36‏:13، 37‏:9.