3
1 ؤُشْثْ خْ ثنْذِينْثْ ن إِذَامّنْ!
أَقَا-ت ذ أَخَارِّيقْ ذ لْعُونْفْ مَارَّا،
ثُوكَّارْضَا وَارْ ثتّْبذِّي شَا. ◼3:1 ’ثَانْذِينْثْ ن إِذَامّنْ‘ - إِخْسْ أَذْ يِينِي أَقَا ثَانْذِينْثْ-أَ ثشُّورْ س ؤُسِيزّڒْ ن إِذَامّنْ.
2 ڒْحسّْ ن ؤُركُّوضْ،
ڒْحسّْ ن ؤُقَارْقبْ ن ثْجَارَّارِينْ،
إِيْسَانْ إِتَّازّْڒنْ ذڭْ ونّضْ
ذ إِكَارُّوثنْ إِنطّْونْ.
3 أَمنَّايْ إِنْيَا،
سِّيفْ إِتّْوسّڭْ،
فْڒِيثْشَا أَقَا-ت أَمْ وَاسَّامْ.
أَطَّاسْ ذ إِنِّي إِتّْوَانْغنْ
ؤُ أَقَا ذِينْ أَعُورِّيشْ ن إِمتَّانْ،
ڒْخشْبَاثْ وَارْ غَارْسنْثْ ڒْحذْ،
وَاهْ، تّنْقْرَاضنْ ذِي ڒْخشْبَاثْ نْسنْ.
4 زِي سِّيبّثْ ن وَاطَّاسْ ن فَارْقْ-شّْغڒْ
ن ثمْغَارْثْ ڒْمُوحسْنَا،
ن لَالَّا ن ثْسحَّارْثْ،
ثنِّي إِزّْنُوزَانْ ڒڭْنُوسْ س فَارْقْ-شّْغڒْ نّسْ
ؤُڒَا ذ مَارَّا ڒَادْجَاثْ س ؤُسحَّارْ نّسْ،
5 خْزَارْ، س ؤُيَا أَذْ خَامْ إِڒِيغْ،
أَمُّو إِقَّارْ سِيذِي ن ڒْعسْكَارَاثْ،
ؤُ نشّْ أَذْ سّْڭعّْذغْ
ثِيمُووَّا ن وَارُّوضْ نّمْ
ثِيوَّا إِ ؤُغمْبُوبْ نّمْ،
ؤُ نشّْ أَذْ سّشْنغْ إِ ڒڭْنُوسْ ثُوعَّارْينْثْ نّمْ،
ؤُ ڒفْضِيحثْ نّمْ إِ ثْڭلْذِيوِينْ.
6 نشّْ أَذْ شمْ ڒقْفغْ س نّْعَاوَاثْ،
ؤُ أَذْ شمْ سّْفضْحغْ
ؤُ أَذْ شمْ أَرّغْ إِ ؤُسْفُورّجْ.
7 خنِّي أَذْ إِمْسَارْ
أَقَا مَانْ ونْ شمْ إِ غَا إِژَارنْ،
أَذْ زَّايمْ يَارْوڒْ، أَذْ يِينِي
”ثَانْذِينْثْ ن نِينْوَا ثْخَارّبْ!
وِي زَّايسْ إِ غَا إِشضْننْ؟“
مَانِي ذ أَمْ إِ غَا يَارْزُوغْ
إِنِّي شمْ إِ غَا إِسّْفوّْجنْ؟
8 مَا شمْ حْسنْ زِي نُو-أَمُونْ
نِّي إِتّْغِيمَانْ غَارْ إِغزْرَانْ،
أَمْ ذ أَسْ قوَّارنْ وَامَانْ،
أَڒَامِي ڒبْحَارْ ذ أَشْبَارْ نّسْ ن زَّاثْ،
أَقَا ڒْحِيضْ نّسْ إِڭعّذْ زِي ڒبْحَارْ.
9 كُوشْ ثُوغَا ذ صُّولْطَا نّسْ، ؤُڒَا ذ مِيسْڒَا،
وَارْ ثُوغِي غَارسْ أَنڭَّارْ.
فُوطْ ذ أَيْثْ ن لِيبِييَا
ثُوغَا أَثنْ زڭْ إِمْعَاوْننْ نّشْ.
10 ؤُڒَا ذ نتَّاثْ ثُويُورْ ذِي لْمنْفَا،
ذِي ثْمحْبَاسْثْ.
ؤُڒَا ذ إِحنْجِيرنْ نّسْ تّْوَاڒبْزنْ
ذِي ثْغمُّورَا ن مَارَّا ن ثبْرِيذِينْ،
ؤُ خْ إِمْشنّْعنْ نّسْ
نْضَارنْ خَاسنْ ثَاقدُّوحْثْ
ؤُ مَارَّا إِمْغَارنْ نّسْ
تّْوَاشَارْفنْ س سّْنَاسڒْ.
11 ؤُڒَا ذ شمْ أَذْ ثسْشَارذْ
أَذْ ثسّْنُوفَّارذْ إِخفْ نّمْ.
عَاوذْ شمْ أَذْ ثَارْزُوذْ إِجّْ ن لْبُورْجْ
إِ ؤُذُورِّي زِي ڒعْذُو نّمْ.
12 مَارَّا لْقلْعَاثْ نّمْ أَمْ وُورْثَانْ
أَكْ-ذ ڒْبَاشُورْ.
مَاڒَا تّْوَانْهزّنْ،
أَذْ وْضَانْ ذڭْ ؤُقمُّومْ
ن ونِّي إِخْسنْ أَذْ ثنْ يشّْ.
13 خْزَارْ، أَقَا ذ وَا ذ ڒْڭنْسْ نّمْ،
أَقَا-ث ذ ثِيمْغَارِينْ.
تّْنُورْزْمنْثْ ثوُّورَا ن ثمُّورْثْ نّمْ
قَاعْ إِ ڒعْذُو،
ثِيمسِّي أَذْ ثشّْ إِعُومَاذْ نّمْ ن وفْرَايْ.
14 أَيمْ أَمَانْ إِ يِيخفْ نّمْ إِ ڒحْصَارثْ،
سمْثنْ لْقلْعَاثْ نّمْ،
بدّْ ذِي ثْڒَاخْثْ،
عفْسْ ذِي ثَارِّيسْثْ،
سقْسحْ إِژْرَا إِتّْوَاسُّويْذَانْ!
15 ثِيمسِّي أَذْ شمْ ثشّْ ذِينْ،
سِّيفْ أَذْ شمْ إِنغْ،
أَذْ شمْ ثشّْ أَمْ بُو-وڒْسَاحْ!
أَرْنِي ذڭْ إِخفْ نّمْ أَمْ بُو-وڒْسَاحْ،
أَرْنِي ذڭْ يِيخفْ نّمْ أَمْ ثْمُورْغِي.
16 شكْ ثسّْمَارْنِيذْ ذڭْ إِسبَّابنْ نّمْ
كْثَارْ زڭْ إِثْرَانْ ن ؤُجنَّا.
بُو-وڒْسَاحْ أَذْ إِسَّارْسْ ثِيڒْمشْثْ نّسْ
ؤُشَا أَذْ إِضْوَا.
17 ثَارْوَا ن ثَاصِيڒثْ نّمْ
أَمْ يِيجّْ ن ويْڒَافْ ن ثْمُورْغِي
ؤُ ڒْعسْكَارَاثْ نّمْ
أَمْ يِيخنْفُوسنْ إِمقّْرَاننْ،
إِنِّي يَارْسَانْ ذِي ڒحْيُوضْ
ذڭْ يِيجّْ ن وَاسّْ ذ أَصمَّاضْ.
ڒَْامِي د-ثنْقَارْ ثْفُوشْثْ،
طَّاونْ سّنِّي ذغْيَا.
وَارْ إِسِّينْ حذْ أَمْشَانْ نْسنْ.
مَانِي رُوحنْ نِيثْنِي؟
18 إِمكْسَاونْ نّشْ تّْنُوذُومنْ،
أَيَا، أَجدْجِيذْ ن أَشُّورْ،
أَيْثْ ن جّهْذْ نّشْ تّطّْصنْ،
ڒْْڭنْسْ نّشْ أَذْ ث زدْجْعنْ خْ إِذُورَارْ،
ؤُشَا ؤُڒَا ذ إِجّنْ وَارْ ثنْ إِسّْمُونْ شَا.
19 وَارْ ذِينْ أَسْڭنْفِي إِ ثَارژِّيثْ نّشْ،
إِتّكّسْ أَشْ ؤُيزِّيمْ!
مَارَّا إِنِّي إِ خَاكْ إِسْڒِينْ ڒخْبَارْ،
أَذْ شَّاثنْ ذڭْ إِفَاسّنْ زِي سِّيبّثْ نّشْ،
مَاغَارْ خْ مَانْ ونْ
وَارْ إِعدُّو شَا ڒبْذَا ڒْغَارْ نّشْ؟
◼3:1 3:1 ’ثَانْذِينْثْ ن إِذَامّنْ‘ - إِخْسْ أَذْ يِينِي أَقَا ثَانْذِينْثْ-أَ ثشُّورْ س ؤُسِيزّڒْ ن إِذَامّنْ.