1 إِنَّا سِيذِي إِ هَارُونْ:

”شكْ ذ وَارَّاوْ نّشْ ذ ثَادَّارْثْ ن بَابَاشْ أَكِيذكْ، أَذْ ثَارْبُومْ ڒْْمُوعْصِييّثْ ن زَّاوشْثْ إِقدّْسنْ نْومْ. شكْ ذ وَارَّاوْ نّشْ أَكِيذكْ أَذْ أَرْبُونْ ڒْْمُوعْصِييّثْ ن ثُوكهَّانْثْ نْومْ. 2 أَذْ د-ثِيوْيذْ أَكِيذكْ ؤُڒَا ذ أَيْثْمَاشْ، ثَاقْبِيتْشْ ن لَاوِي، ثَاقْبِيتْشْ ن بَابَاشْ. نِيثْنِي أَذْ د-مَّارنْينْ غَاركْ، أَذْ أَشْ سخَّارنْ، مَاشَا شكْ، جْمِيعْ أَكْ-ذ إِحنْجِيرنْ نّشْ، أَذْ ثْسخَّارذْ زَّاثْ إِ وُوذمْ ن ؤُقِيضُونْ ن شّْهَاذثْ. 3 أَذْ طّْفنْ أَشْبَارْ نّشْ ؤُشَا أَذْ حْضَانْ خْ مَارَّا أَقِيضُونْ، مَاشَا وَارْ زمَّارنْ أَذْ د-قَارّْبنْ غَارْ ڒقْشُوعْ ن زَّاوشْثْ إِقدّْسنْ ؤُ غَارْ ؤُعَالْطَارْ حِيمَا وَارْ تّتّْمتِّينْ، وَارْ إِدْجِي ڒَْا ذ نِيثْنِي ؤُڒَا ذ كنِّيوْ. 4 إِتّْخصَّا أَسنْ أَذْ مَّارنْينْ غَاركْ ؤُشَا أَذْ طّْفنْ أَشْبَارْ خْ ؤُقِيضُونْ ن ؤُمْسَاڭَارْ ؤُ خْ مَارَّا ثَاسخَّارْثْ ن ؤُقِيضُونْ. ونِّي وَارْ غَارْ إِدْجِي تّسْرِيحْ وَارْ إِزمَّارْ أَذْ غَارْومْ د-إِقَارّبْ. 5 أَذْ ثطّْفمْ أَشْبَارْ خْ زَّاوشْثْ إِقدّْسنْ ؤُڒَا خْ ؤُعَالْطَارْ، حِيمَا وَارْ د-إِتِّيسْ عَاذْ ؤُذُوقّزْ ن وغْضَابْ خْ أَيْثْ ن إِسْرَائِيل. 6 نشّْ، أَقَا ذَا نشّْ، كْسِيغْ أَوْمَاثنْ نْومْ، إِلَاوِييّنْ، زِي جَارْ ڒْْوسْطْ ن أَيْثْ ن إِسْرَائِيل. أَقَا نِيثْنِي أَمْ يِيشْثْ ن ثوْهِيبْثْ إِ كنِّيوْ ثنِّي إِتّْخصَّا أَذْ ثْوهّْبمْ إِ سِيذِي مَاحنْذْ أَذْ سخَّارنْ نِيثْنِي ذڭْ ؤُقِيضُونْ ن ؤُمْسَاڭَارْ. ◘18:‏6 ڒخْڒ. 3‏:‏45 7 مَاشَا شكْ ذ إِحنْجِيرنْ نّشْ أَكِيذكْ أَذْ ثطّْفمْ ثُوكهَّانْثْ نْومْ ذِي مَارَّا مِينْ إِقّْننْ أَكْ-ذ ؤُعَالْطَارْ ذ مِينْ إِدْجَانْ ذَاخڒْ إِ ؤُڒحَّافْ ؤُشَا أَمُّو أَذْ ثْسخَّارمْ كنِّيوْ. نشّْ أَذْ أَومْ وْشغْ ثُوكهَّانْثْ ذ ثْسخَّارْثْ أَمْ يِيشْثْ ن ثرْزفْثْ. أَبَارَّانِي نِّي د غَا إِقَارّْبنْ، أَذْ إِتّْوَانغْ.“

8 إِسِّيوڒْ سِيذِي أَكْ-ذ هَارُونْ:

”نشّْ، خْزَارْ، أَقَا ذ نشّْ إِ ذ أَشْ إِوْشِينْ أَحطُّو خْ ثوْهِيبِينْ ن ؤُسْڭعّذْ إِ قدّْمنْ نِيثْنِي إِ نشّْ. نشّْ وْشِيغْ ثنْثْ أَكْ-ذ مَارَّا ثِيوْهِيبِينْ إِقدّْسنْ ن أَيْثْ ن إِسْرَائِيل أَمْ ثسْغَارْثْ إِ خْ إِتّْوَاڭّْ وذْهَانْ، إِ شكْ ؤُ إِ وَارَّاوْ نّشْ، أَمْ يِيشْثْ ن ثوْصيّثْ إِ ڒبْذَا. 9 زِي ثوْهِيبِينْ إِقدّْسنْ أَذْ إِڒِينْثْ إِزِييْنَاثْ إِ وَارْ يُوذِيفنْ غَارْ ثْمسِّي إِ شكْ: مَارَّا ثِيوْهِيبِينْ نْسنْ أَكْ-ذ مَارَّا ثِيوْهِيبِينْ نْسنْ ن ڒْْغِيدْجثْ، أَكْ-ذ مَارَّا ثِيغَارْصَا نْسنْ ن دّنْبْ ؤُ أَكْ-ذ مَارَّا ثِيغَارْصَا نْسنْ ن ؤُمَارْوَاسْ نِّي ذ أَيِي د غَا يَارّنْ أَمْ ثخْرِيصْثْ. مَانْ أَيَا مَارَّا أَذْ يِيڒِي ذ أَمْقدَّاسْ قَاعْ إِ شكْ ؤُ إِ إِحنْجِيرنْ نّشْ. 10 أَذْ ثشّذْ أَيَا ذڭْ إِجّْ ن ومْشَانْ إِقدّْسنْ قَاعْ. كُوڒْ أَوْثمْ أَذْ زَّايسْ يشّْ. أَيَا أَذْ يِيڒِي ذ أَمْقدَّاسْ إِ كنِّيوْ.“

11 ”عَاوذْ ذ مَانْ أَيَا أَذْ يِيڒِي إِ شكْ: ثَاوْهِيبْثْ ن ؤُسْڭعّذْ ن ثوْهِيبْثْ نْسنْ أَكْ-ذ مَارَّا ثِيوْهِيبِينْ ن ونْهزِّي ن أَيْثْ ن إِسْرَائِيل. وْشِيغْ ثنْثْ إِ شكْ ؤُ إِ وَارَّاونْ نّشْ ذ ثَارَّاوِينْ نّشْ نِّي كِيذكْ إِدْجَانْ. أَقَا-ت ذ إِشْثْ ن ثوْصيّثْ إِ ڒبْذَا. كُوڒْ إِجّنْ ذِي ثَادَّارْثْ نّشْ نِّي إِدْجَانْ ذ أَمزْذَاڭْ، أَذْ زَّايْسنْثْ يشّْ.“ ◘18:‏11 لَاوِي 10‏:‏14

12 ”مِينْ إِدْجَانْ ڒمْخيَّارْ ن زّشْثْ ذ مِينْ إِدْجَانْ ڒمْخيَّارْ ن بِينُو ن جْذِيذْ ؤُ زڭْ إِرْذنْ، أَقَا ذ ثَامزْوَارُوثْ إِ زَّايْسنْ أَذْ وْشنْ إِ سِيذِي، أَقَا وْشِيغْ أَشْ ت. 13 ثَامنْزُوثْ ن مَارَّا مِينْ إِدْجَانْ خْ ثمُّورْثْ نْسنْ، نِّي د غَا يَاوْينْ غَارْ سِيذِي، أَقَا مَارَّا مَانْ أَيَا أَذْ يِيڒِي إِ شكْ. كُوڒْ إِجّنْ ونِّي إِدْجَانْ ذ أَمزْذَاڭْ ذِي ثَادَّارْثْ نّشْ، إِزمَّارْ أَذْ زَّايسْ يشّْ.“

14 ”مَارَّا مِينْ إِتّْوَاحَارّْمنْ ذِي إِسْرَائِيل، أَذْ يِيڒِي نّشْ. ◘18:‏14 لَاوِي 27‏:‏28 15 مَارَّا مِينْ يَارزْمنْ ڒمْڒَاوَاثْ ذ أَمزْوَارُو جَارْ مَارَّا أَيْسُومْ إِ غَا قدّْمنْ إِ سِيذِي، زِي بْنَاذمْ نِيغْ زِي ڒبْهِيمثْ، أَذْ يِيڒِي نّشْ. مَاشَا أَذْ ثفْذِيذْ قَاعْ أَمنْزُو ن إِوْذَانْ ؤُشَا إِتّْخصَّا عَاوذْ أَذْ ثفْذِيذْ أَمنْزُو ن ڒبْهَايمْ إِخمْجنْ. ◘18:‏15 ؤُف. 13‏:‏2؛ 22‏:‏29؛ لَاوِي 27‏:‏26؛ ڒخْڒ. 3‏:‏13 16 وِي زَّايْسنْ غَا تّْوَافْذِينْ نِيثْنِي، أَذْ تّْوَافْذِينْ ذ مِّيسْ ن إِجّْ ن ؤُيُورْ عْلَاحْسَابْ ڒْْقِيمثْ إِ ثْقدَّارذْ شكْ ذِي نُّوقَارْثْ، خمْسَا شِيقْلُو عْلَاحْسَابْ شِيقْلُو ن زَّاوشْثْ إِقدّْسنْ، ونِّي إِدْجَانْ عِيشْرِينْ جِيرَا. ◘18:‏16 ؤُف. 30‏:‏13؛ لَاوِي 27‏:‏25؛ ڒخْڒ. 3‏:‏47؛ حِز. 45‏:‏12 17 مَاشَا أَمنْزُو ن ؤُفُونَاسْ ذ ؤُمنْزُو ن ؤُحُوڒِي ذ ؤُمنْزُو ن إِغَايْضْ، وَارْ ث ثْفذِّيمْ شَا. أَقَا أَثنْ قدّْسنْ إِ دْجَانْ. أَذْ ثْزدْجْعذْ إِذَامّنْ نْسنْ خْ ؤُعَالْطَارْ ؤُ ثَاذُونْثْ نْسنْ أَذْ ت ثسّْبخَّارذْ أَمْ ثوْهِيبْثْ ن ثْمسِّي، أَمْ يِيشْثْ ن ڒفْوَاحثْ إِتّْفُوحنْ إِ سِيذِي. 18 أَيْسُومْ نّسْ أَذْ يِيڒِي نّشْ، أَمْ يِيذْمَارنْ ن ونْهزِّي أَمْ ؤُشكْرُوذْ أَفُوسِي أَذْ إِڒِينْ نّشْ. 19 مَارَّا ثِيوْهِيبِينْ ن ؤُسْڭعّذْ زِي ثوْهِيبِينْ إِقدّْسنْ نِّي غَا سّْڭعّْذنْ أَيْثْ ن إِسْرَائِيل إِ سِيذِي، وْشِيغْ ثنْثْ إِ شكْ ؤُ إِ إِحنْجِيرنْ نّشْ ذ ثْحنْجِيرِينْ نّشْ إِنِّي أَكِيذكْ إِدْجَانْ. أَقَا ذ إِشْثْ ن ثوْصيّثْ إِ ڒبْذَا، أَذْ يِيڒِي ذ إِجّْ ن ڒْْعَاهْذْ س ڒمْڒَاحثْ إِ ڒبْذَا زَّاثْ إِ وُوذمْ ن سِيذِي، إِ شكْ ؤُ إِ زَّارِيعثْ نّشْ نِّي أَكِيذكْ إِدْجَانْ.“

20 إِنَّا سِيذِي إِ هَارُونْ:

”وَارْ ثتّطّْفذْ ڒْْوَارْثْ ذِي ثمُّورْثْ نْسنْ ؤُ وَارْ غَاركْ ثتِّيڒِي بُو ثسْغَارْثْ ذِي ڒْْوسْطْ نْسنْ. نشّْ ذ ثَاسْغَارْثْ نّشْ ذ ڒْْوَارْثْ نّشْ ذِي ڒْْوسْطْ ن أَيْثْ ن إِسْرَائِيل. ◘18:‏20 أَعَوذ. 10‏:‏9؛ 18‏:‏2؛ حِز. 44‏:‏28 21 خْزَارْ، نشّْ وْشِيغْ إِ أَيْثْ ن لَاوِي مَارَّا ڒعْشُورْ ذِي إِسْرَائِيل ذ ڒْْوَارْثْ ذِي طّْوعْ ن ثْسخَّارْثْ نِّي ڭِّينْ نِيثْنِي، ثَاسخَّارْثْ ن ؤُقِيضُونْ ن ؤُمْسَاڭَارْ. 22 أَيْثْ ن إِسْرَائِيل وَارْ د-تّْقَارِّيبنْ عَاذْ غَارْ ؤُقِيضُونْ ن ؤُمْسَاڭَارْ، حِيمَا وَارْ د-تِّيوْينْ أَمُّو دّنْبْ خْ يِيخفْ نْسنْ ؤُشَا أَذْ مّْثنْ. 23 مَاشَا إِلَاوِييّنْ أَذْ سخَّارنْ ذِي ثْسخَّارْثْ ن ؤُقِيضُونْ ن ؤُمْسَاڭَارْ ؤُشَا أَذْ أَرْبُونْ ڒْْمُوعْصِييّثْ نْسنْ. أَقَا-ت ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ، أَقَا نِيثْنِي وَارْ تّطّْفنْ ڒْْوَارْثْ ذِي ڒْْوسْطْ ن أَيْثْ ن إِسْرَائِيل، 24 مِينْزِي ڒعْشُورْ ن أَيْثْ ن إِسْرَائِيل نِّي سّْڭعّْذنْ نِيثْنِي إِ سِيذِي أَمْ ثوْهِيبْثْ ن ؤُسْڭعّذْ، وْشِيغْ ثنْ إِ إِلَاوِييّنْ. خْ ؤُيَا نِّيغْ أَسنْ: وَارْ وَارّْثنْ ذِي ڒْْوسْطْ ن أَيْثْ ن إِسْرَائِيل!“

25 إِسِّيوڒْ سِيذِي أَكْ-ذ مُوسَا، إِنَّا:

26 ”أَمُّو إِ غَا ثسِّيوْڒذْ أَكْ-ذ إِلَاوِييّنْ ؤُشَا أَذْ أَسنْ ثِينِيذْ: ’خْمِي ثكْسِيمْ ڒعْشُورْ ن أَيْثْ ن إِسْرَائِيل نِّي وْشِيغْ كنِّيوْ ذ ڒْْوَارْثْ، خنِّي أَذْ زَّايْسنْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي، ڒعْشُورْ زِي ڒعْشُورْ. 27 أَذْ أَومْ د-ثتّْوَاحْسبْ أَمْ ثوْهِيبْثْ ن ؤُسْڭعّذْ، أَمْ يِيرْذنْ ن ؤُنذْرَارْ ؤُ أَمْ ثشُّورثْ ن ثْسِيرْثْ ن ؤُضِيڒْ. 28 أَمُّو إِ ذ أَومْ إِتّْخصَّا أَذْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي زِي مَارَّا ڒعْشُورْ نْومْ نِّي غَا ثكْسِيمْ زڭْ أَيْثْ ن إِسْرَائِيل. إِتّْخصَّا أَذْ ثوْشمْ ثَاوْهِيبْثْ، ثنِّي ثسّْڭعّْذمْ زَّايْسنْ إِ سِيذِي، غَارْ ؤُكهَّانْ هَارُونْ. 29 زِي مَارَّا مِينْ ذ أَومْ غَا وْشنْ، أَذْ ثسّْڭعّْذمْ ثَاوْهِيبْثْ ن ؤُسْڭعّذْ ثْمُونْ إِ سِيذِي، زِي ڒمْخيَّارْ نّسْ، ثَاسْغَارْثْ نّسْ إِقدّْسنْ زَّايسْ.‘

30 ؤُشَا إِتّْخصَّا أَشْ أَذْ أَسنْ ثِينِيمْ: ’مَاڒَا ثكْسِيمْ زَّايسْ ڒمْخيَّارْ نّسْ، أَقَا أَيَا أَذْ د-إِتّْوَاحْسبْ ذ ڒْْغِيدْجثْ ن ؤُنذْرَارْ ذ ڒْْغِيدْجثْ ن ثْسِيرْثْ ن ؤُضِيڒْ إِ إِلَاوِييّنْ. 31 أَذْ ثشّمْ أَيَا ذِي كُوڒْ أَمْشَانْ، كنِّيوْ ذ أَيْثْبَابْ ن ثَادَّارْثْ نْومْ، مِينْزِي ثَا ذ ڒْْمُونثْ إِ ثْسخَّارْثْ نْومْ ذڭْ ؤُقِيضُونْ ن ؤُمْسَاڭَارْ. 32 مَاڒَا أَذْ زَّايسْ ثكْسِيمْ مِينْ إِدْجَانْ حْسنْ، خنِّي وَارْ خَاومْ ثَاربُّومْ دّنْبْ. وَارْ إِعدّڒْ أَذْ ثْفسْذمْ ثِيوْهِيبِينْ إِقدّْسنْ ن أَيْثْ ن إِسْرَائِيل، حِيمَا وَارْ ثتّْمتِّيمْ شَا.‘ “