1 إِسِّيوڒْ سِيذِي أَكْ-ذ مُوسَا ذ هَارُونْ، إِنَّا:

2 ”ثَا ذ ثَاوْصيّثْ ن شَّارِيعَا نِّي يُومُورْ سِيذِي، ؤُمِي إِنَّا: ’سِيوڒْ أَكْ-ذ أَيْثْ ن إِسْرَائِيل أَذْ أَشْ د-أَوْينْ إِشْثْ ن ثْفُونَاسْثْ ثَازڭّْوَاغْثْ، ثنِّي إِشْنَانْ ؤُ ثنِّي وَارْ ذِي إِدْجِي ؤُنعْضَابْ ؤُشَا وَارْ خَاسْ سَّارْسنْ عَاذْ أَزَايْڒُو. 3 أَذْ ت ثوْشمْ إِ ؤُكهَّانْ أَلِيعَازَارْ ؤُ نتَّا أَذْ ت إِسُّوفّغْ بَارَّا إِ ڒْْمَارْڭحْ ن ڒْْعسْكَارْ ؤُ أَذْ أَسْ غَارْصنْ زَّاثْ إِ وُوذمْ نّسْ. ◘19:‏3 عبر. 13‏:‏11، 12 4 أَكهَّانْ أَلِيعَازَارْ أَذْ إِكْسِي شْوَايْثْ ن إِذَامّنْ نّسْ س ؤُضَاضْ نّسْ ؤُشَا أَذْ إِرُوشّْ سبْعَا ن ثْوَاڒَاوِينْ شْوَايْثْ زڭْ إِذَامّنْ نّسْ جِّيهثْ ن وُوذمْ ن ؤُقِيضُونْ ن ؤُمْسَاڭَارْ. ◘19:‏4 عبر. 9‏:‏13 5 أَذْ سّْشمْضنْ ثَافُونَاسْثْ زَّاثْ إِ ثِيطَّاوِينْ نّسْ. ثِيڒْمشْثْ نّسْ، أَيْسُومْ نّسْ ذ إِذَامّنْ نّسْ أَذْ ثنْ سّْشمْضنْ جْمِيعْ أَكْ-ذ ؤُمسَّاڒْ نّسْ. ◘19:‏5 ؤُف. 29‏:‏14؛ لَاوِي 4‏:‏11، 12 6 أَذْ إِكْسِي ؤُكهَّانْ أَكشُّوضْ ن ثْشجَّارْثْ ن ثنْڭلْثْ ذ ثْعلْدْجثْ ذ ؤُزڭّْوَاغْ إِحذْقنْ ؤُشَا أَذْ إِنْضَارْ أَيَا ذِي ڒْْوسْطْ ن ثْمسِّي إِ ذِي ثتّْوَاشْمضْ ثْفُونَاسْثْ. ◼19:‏6 ’ثْعلْدْجثْ‘ - نِيغْ ’هِيسُوبْ‘ 7 خنِّي أَذْ إِصبّنْ ؤُكهَّانْ أَرُّوضْ نّسْ، أَذْ إِسِّيرْذْ أَرِّيمثْ نّسْ ذڭْ وَامَانْ، ؤُشَا أَوَارْنِي أَسْ أَذْ يَاذفْ غَارْ ڒْْمَارْڭحْ. أَكهَّانْ أَذْ يِيڒِي إِخْمجْ أَڒْ ثَامذِّيثْ. 8 ذ ونِّي ت إِسّْشمْضنْ، أَذْ إِصبّنْ عَاوذْ أَرُّوضْ نّسْ ذڭْ وَامَانْ ؤُشَا أَذْ إِسِّيرْذْ أَرِّيمثْ نّسْ س وَامَانْ. نتَّا أَذْ يِيڒِي إِخْمجْ أَڒْ ثَامذِّيثْ. 9 أَرْيَازْ أَمزْذَاڭْ أَذْ إِيْرُو إِغّضْ ن ثْفُونَاسْثْ ؤُشَا أَذْ ثنْ إِڭّْ بَارَّا إِ ڒْْمَارْڭحْ ذڭْ إِجّْ ن ومْشَانْ إِزْذِيڭْ. أَقَا خْ ثْمسْمُونْثْ ن أَيْثْ ن إِسْرَائِيل مَاحنْذْ أَذْ ثحْضَا خْ وَامَانْ ن وعْزَاڒْ، أَقَا أَثنْ إِ ؤُسِيزْذڭْ ن دّنْبْ. 10 ونِّي إِيْرُونْ إِغّضْ ن ثْفُونَاسْثْ أَذْ إِصبّنْ أَرُّوضْ نّسْ ؤُشَا أَذْ يِيڒِي إِخْمجْ أَڒْ ثَامذِّيثْ. أَقَا ذ إِشْثْ ن ثوْصيّثْ إِ ڒبْذَا إِ أَيْثْ ن إِسْرَائِيل ؤُ إِ ؤُبَارَّانِي نِّي إِزدّْغنْ ذِي ڒْْوسْطْ نْسنْ.‘ “

11 ”وِي غَا إِحَاذَانْ شَا ن ؤُمتِّينْ، مَامّشْ مَا ثڭَّا شَا ن ڒْْخشْبثْ ن بْنَاذمْ، أَذْ يِيڒِي إِخْمجْ سبْعَا ن وُوسَّانْ. ◘19:‏11 ڒخْڒ. 31‏:‏19؛ Ḥag. 2‏:‏13 12 ذڭْ وَاسّْ وِيسّْ ثْڒَاثَا أَذْ إِكّسْ دّنْبْ خْ يِيخفْ نّسْ س وَامَانْ ن وعْزَاڒْ. خنِّي أَذْ يِيڒِي إِزْذِيڭْ ذڭْ وَاسّْ وِيسّْ سبْعَا. مَاڒَا وَارْ إِكِّيسْ دّنْبْ خْ يِيخفْ نّسْ ذڭْ وَاسّْ وِيسّْ ثْڒَاثَا، وَارْ إِتِّيڒِي إِزْذِيڭْ ذڭْ وَاسّْ وِيسّْ سبْعَا. 13 مَارَّا وِي إِحَاذَانْ إِجّْ ن ؤُمتِّينْ، ڒعْمَارْ ن إِجّْ ن بْنَاذمْ إِمُّوثْ، ؤُشَا وَارْ إِكِّيسْ دّنْبْ خْ يِيخفْ نّسْ، أَقَا إِسّخْمجْ ثَازذِّيغْثْ ن سِيذِي. ڒعْمَارْ نِّي أَذْ إِتّْوَاقسّْ زِي إِسْرَائِيل. مِينْزِي وَارْ خَاسْ زُّوزَارنْ شَا أَمَانْ ن وعْزَاڒْ، أَذْ يِيڒِي إِخْمجْ. ڒخْمجْ نّسْ أَقَا-ث خَاسْ عَاذْ.“

14 ”وَا ذ أَزرْفْ خْ إِجّْ ن بْنَاذمْ نِّي إِمُّوثنْ ذڭْ إِجّْ ن ؤُقِيضُونْ. مَارَّا وِي غَا يَاذْفنْ غَارْ ؤُقِيضُونْ نِّي ؤُ مَارَّا وِي غَا إِقِّيمنْ ذڭْ ؤُقِيضُونْ نِّي، أَذْ يِيڒِي إِخْمجْ سبْعَا ن وُوسَّانْ. 15 عَاوذْ كُوڒْ ڒْْقشْعثْ يَارزْمنْ، وَارْ خَاسْ ثَاقبَّارْثْ ثقّنْ س ثسْغُونْثْ، أَذْ ثِيڒِي ثخْمجْ، 16 مَارَّا وِي إِحَاذَانْ حذْ إِتّْوَاسّْنُوقّْبنْ س سِّيفْ ذڭْ إِيَّارْ، نِيغْ شَا ن ؤُمتِّينْ نِيغْ إِغْسَانْ ن إِجّْ ن بْنَاذمْ، نِيغْ إِجّْ ن ونْضڒْ، أَذْ يِيڒِي إِخْمجْ سبْعَا ن وُوسَّانْ. 17 إِ يِيجّْ ن ؤُمخْمُوجْ إِتّْخصَّا أَذْ كْسِينْ شْوَايْثْ ن إِغّضْ ن ثْغَارْصْثْ ن دّنْبْ إِشمْضنْ ؤُشَا أَذْ خَاسْ سّْفَارّْغنْ أَمَانْ إِدَّارنْ ذڭْ إِشْثْ ن ڒْْقشْعثْ. 18 إِجّْ ن ورْيَازْ ذ أَمزْذَاڭْ أَذْ إِكْسِي ثْعلْدْجثْ، أَذْ ت إِسُّوفْ ذڭْ وَامَانْ ؤُشَا خنِّي أَذْ ت إِرُوشّْ خْ ؤُقِيضُونْ ؤُ خْ مَارَّا ڒقْشُوعْ ؤُ خْ ڒعْمُورْ نِّي ثُوغَا ذِينْ إِدْجَانْ، ؤُشَا أَمُّو عَاوذْ خْ وِي إِحَاذَانْ إِغْسَانْ نِيغْ شَا ن يِيجّنْ نِّي إِتّْوَاسّْنُوقّْبنْ نِيغْ شَا ن ؤُمتِّينْ نِيغْ شَا ن ونْضڒْ. ◘19:‏18 إِزهد. 51‏:‏9 19 أَمزْذَاڭْ أَذْ إِرُوشّْ خْ ؤُمخْمُوجْ ذڭْ وَاسّْ وِيسّْ ثْڒَاثَا ؤُ ذڭْ وَاسّْ وِيسّْ سبْعَا أَذْ خَاسْ إِرُوشّْ ؤُ ذڭْ وَاسّْ وِيسّْ سبْعَا أَذْ خَاسْ إِكّسْ دّنْبْ. أَذْ إِصبّنْ أَرُّوضْ نّسْ أَذْ إِسِّيرْذْ إِخفْ نّسْ س وَامَانْ ؤُشَا أَذْ يِيڒِي إِزْذڭْ أَڒْ ثَامذِّيثْ. 20 أَرْيَازْ إِخمْجنْ إِ وَارْ إِتّجِّينْ أَذْ إِكّسْ دّنْبْ خْ يِيخفْ نّسْ، ڒعْمَارْ نِّي أَذْ إِتّْوَاقسّْ زِي ڒْْوسْطْ ن وڭْرَاوْ ن ڒْْڭنْسْ، مِينْزِي أَقَا إِسّخْمجْ زَّاوشْثْ إِقدّْسنْ ن سِيذِي. وَارْ خَاسْ رُوشّنْ أَمَانْ ن وعْزَاڒْ، أَقَا إِخْمجْ. 21 ثَا ذ إِشْثْ ن ثوْصيّثْ إِ ڒبْذَا إِ نِيثْنِي. ونِّي إِرُوشّنْ أَمَانْ ن وعْزَاڒْ أَذْ إِصبّنْ أَرُّوضْ نّسْ ؤُ وِي غَا إِحَاذَانْ أَمَانْ ن وعْزَاڒْ، أَذْ يِيڒِي إِخْمجْ أَڒْ ثَامذِّيثْ. 22 مَارَّا مِينْ إِتّْوَاحَاذَانْ زڭْ ؤُمخْمُوجْ، أَذْ يِيڒِي إِخْمجْ، ؤُشَا بْنَاذمْ نِّي إِ غَا إِحَاذَانْ أَيَا، أَذْ يِيڒِي إِخْمجْ أَڒْ ثَامذِّيثْ.“