١ بُولُوسْ ذ ثِيمُوثِييُو، إِمْسخَّارنْ ن يَاسُوع لْمَاسِيحْ، إِ مَارَّا إِمْقدَّاسنْ ذِي يَاسُوع لْمَاسِيحْ إِنِّي إِدْجَانْ ذِي فِيلِيبِّي، أَكْ-ذ إِمْغَارنْ ذ إِمْسخَّارنْ ذِي ثْمسْمُونْثْ: ٢ أَرْضَا أَذْ كِيومْ يِيڒِي، ؤُڒَا ذ ڒهْنَا زِي أَربِّي بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ. ◘1:‏2 رُوم. 1‏:‏7؛ 1 بُط. 1‏:‏2.

٣ تّْقَاذِيغْ أَربِّي إِنُو ڒَْامِي ذَايْومْ تّْفكَّارغْ ڒبْذَا، ◘1:‏3 أَفا. 1‏:‏15؛ كُول. 1‏:‏3؛ 1 تس. 1‏:‏2؛ 2 تس. 1‏:‏3. ٤ مَاغَارْ ذِي كُوڒْ ثِيژَادْجِيثِينْ إِنُو خَاومْ، أَقَا كْسِيغْ س ڒْْمعْرُوفْ س ڒفْرَاحثْ ٥ ذِي سِّيبّثْ ن ثْمُونْثْ نْومْ أَكْ-ذ لْ-إِنْجِيلْ، زڭْ وَاسّْ أَمزْوَارُو أَڒْ إِضَا. ٦ أَقَا تِّيقّغْ بلِّي ونِّي ذَايْومْ إِبْذَانْ ڒخْذَايمْ إِصبْحنْ، أَذْ ثنْثْ إِكمّڒْ أَڒْ أَسّْ ن سِيذِيثْنغْ يَاسُوع لْمَاسِيحْ. ◘1:‏6 يُوح. 6‏:‏29؛ 1 تس. 1‏:‏3. ٧ إِشْنَا أَيِي أَذْ فكَّارغْ ذَايْومْ مَارَّا أَمُّو، مِينْزِي أَقَا كنِّيوْ غَارِي ذڭْ وُوڒْ إِنُو، خْمِي دْجِيغْ ذِي سّْنَاسڒْ ؤُڒَا خْمِي غَا أَوْثغْ خْ ثِيذتّْ ن لْ-إِنْجِيلْ، مِينْزِي كنِّيوْ ثْشَارْشمْ أَكِيذِي ذِي أَرْضَا. ◘1:‏7 أَفا. 3‏:‏1؛ 4‏:‏1؛ كُول. 4‏:‏3، 18؛ 2 تِيم. 1‏:‏8. ٨ مِينْزِي أَربِّي ذ أَشهَّاذْ إِنُو مشْحَاڒْ كنِّيوْ تّخْسغْ س ڒحْنُونشْثْ يُودْجْغنْ ن يَاسُوع لْمَاسِيحْ. ◘1:‏8 رُوم. 1‏:‏9؛ 9‏:‏1؛ 2 كُور. 1‏:‏23؛ 11‏:‏31؛ ڭال. 1‏:‏20؛ 1 تس. 2‏:‏5؛ 1 تِيم. 5‏:‏21؛ 2 تِيم. 4‏:‏1.

٩ مَانْ أَيَا إِ تّْژَادْجِيغْ، أَقَا ثَايْرِي نْومْ أَذْ ثْفيّضْ أَطَّاسْ س وَاطَّاسْ ذِي ثُوسّْنَا ذ قَاعْ ڒفْهَامثْ ثَارُوحَانشْثْ، ١٠ مَاحنْذْ أَذْ ثْفَارْزمْ مِينْ إِتّْڒِيقنْ، ؤُ مَاحنْذْ أَذْ ثِيڒِيمْ ثقُّورمْ ؤُ بْڒَا ڒْْعِيبْ ذڭْ وَاسّْ ن لْمَاسِيحْ، ١١ ثشُّورمْ س ڒْْغِيدْجثْ ن ثْسڭْذَا إِ يدْجَانْ ذِي يَاسُوع لْمَاسِيحْ إِ ؤُعُودْجِي ذ ؤُسمْغَارْ ن أَربِّي.

١٢ أَ أَيْثْمَا، نشّْ خْسغْ أَذْ ثسّْنمْ بلِّي ثِيمسْڒَايِينْ إِ ذ أَيِي إِمْسَارنْ أَرْنِينْثْ عَاذْ ذِي ثُوزّڭَّارْثْ ن ثْبَارّحْثْ ن لْ-إِنْجِيلْ، ١٣ مِينْزِي ثتّْوَاسّنْ ثْمحْبَاسْثْ إِنُو زِي سِّيبّثْ ن لْمَاسِيحْ إِ قَاعْ إِنِّي إِدْجَانْ ذِي ڒقْصَارْ ن قَايْصَارْ ؤُ إِ قَاعْ مِينْ إِقِّيمنْ. ١٤ أَزْينْ أَمقّْرَانْ ن وَاوْمَاثنْ ذِي سِيذِيثْنغْ، ؤُمِي دْجِيغْ ذِي ثْمحْبَاسْثْ، إِذْوڒْ غَارْسنْ تِّيقّثْ كْثَارْ ؤُشَا ذوْڒنْ زعّْمنْ سَّاوَاڒنْ أَوَاڒْ ن أَربِّي س ثرْيَاسْثْ كْثَارْ، بْڒَا ثِيڭّْوُوذِي. ◘1:‏14 أَفا. 3‏:‏13؛ 1 تس. 3‏:‏3. ١٥ شَا زَّايْسنْ تّْبَارّْحنْ لْمَاسِيحْ زِي ڒحْسذْ ذ ؤُمْعَانذْ، مَاشَا شَا نّغْنِي عَاوذْ زِي نّيّثْ ثشْنَا ؤُ س ثَايْرِي، ١٦ مِينْزِي نِيثْنِي سّْننْ أَقَا تّْوَاڭّغْ مَاحنْذْ أَذْ وْثغْ خْ لْ-إِنْجِيلْ. ١٧ مَاشَا إِنِّي إِتّْبَارّْحنْ س لْمَاسِيحْ س ؤُمْعَانذْ، وَارْ ث تّڭّنْ س نّيّثْ ثشْنَا، مَاشَا تّخْسنْ أَذْ خَافِي أَرْنِينْ ڒْْمحْنثْ إِ سّْنَاسڒْ إِنُو.

١٨ س مَانْ أَيَا فَارّْهغْ، وَاهْ، أَذْ فَارْحغْ: أَقَا إِتّْوَابَارّحْ لْمَاسِيحْ س إِبْرِيذنْ إِفَارْزنْ، مَا س إِجّْ ن لْغَارَاضْ نّغْنِي، نِيغْ س ثِيذتّْ. ١٩ مِينْزِي سّْنغْ أَقَا ثِيمسْڒَايِينْ-أَ أَذْ إِڒِينْثْ إِ ثُوذَارْثْ إِ نشّْ س ثْژَادْجِيثْ نْومْ ؤُ س ثوْهِيبْثْ ن أَرُّوحْ ن يَاسُوع لْمَاسِيحْ، ◘1:‏19 ڒخ. 16‏:‏7؛ 2 كُور. 1‏:‏11. ٢٠ مَاحنْذْ نشّْ، أَمْ سِيثِيمغْ ؤُ تّْرَاجِيغْ، وَارْ تّْسضْحِيغْ شَا خْ وَالُو، مَاشَا أَمْ ڒبْذَا، ؤُڒَا ذ ڒخُّو أَذْ إِتّْوَاسّمْغَارْ لْمَاسِيحْ س بْطَايْطَايْ ذِي أَرِّيمثْ إِنُو، مَا س ثُوذَارْثْ إِنُو نِيغْ س ڒْْموْثْ إِنُو. ◘1:‏20 رُوم. 5‏:‏5. ٢١ مِينْزِي ثُوذَارْثْ إِنُو ذ لْمَاسِيحْ ؤُشَا ڒْْموْثْ ذ أَرْبحْ إِ نشّْ. ٢٢ مَاشَا مَاڒَا ذِينْ ڒْْغِيدْجثْ ذِي ثُوذَارْثْ-أَ ذِي أَرِّيمثْ زِي جِّيهثْ ن ڒْْخذْمثْ إِنُو، خنِّي وَارْ سِّينغْ مِينْ غَا خْضَارغْ. ٢٣ مَاغَارْ أَقَا أَيِي جَارْ ثْنَاينْ ن إِغزْذِيسنْ: ذَايِي مژْرِي مَاحنْذْ أَذْ رَاحغْ أَذْ إِڒِيغْ أَكْ-ذ لْمَاسِيحْ، مِينْزِي مَانْ أَيَا قَاعْ حْسنْ، ٢٤ مَاشَا أَغِيمِي ذِي أَرِّيمثْ إِتّْخصَّا عَاذْ كْثَارْ ذِي طّْوعْ نْومْ. ٢٥ ذ مَانْ أَيَا سّْنغْ نِيشَانْ، أَقَا أَذْ قِّيمغْ، وَاهْ، أَذْ قِّيمغْ ذِي طّْوعْ ن ڒفْرَاحثْ نْومْ ؤُ مَاحنْذْ أَذْ إِڭْمَا لْ-إِيمَانْ نْومْ، ٢٦ حِيمَا، خْمِي د غَا يَاسغْ غَارْومْ عَاوذْ، أَقَا أَسمْغَارْ نْومْ ذِي لْمَاسِيحْ وَاهَا أَذْ إِفيّضْ، ؤُمِي نشّْ قِّيمغْ.

٢٧ ؤُيُورمْ س ؤُوقَّارْ إِ ڒخْبَارْ أَصبْحَانْ ن لْمَاسِيحْ، حِيمَا، خْمِي د غَا يَاسغْ ؤُشَا أَذْ كنِّيوْ ژَترغْ ؤُڒَا خْمِي غَا غَابغْ، أَذْ زَّايْومْ سْڒغْ، أَقَا ثْبدّمْ نِيشَانْ ذڭْ إِجّْ ن أَرُّوحْ ؤُ س إِجّْ ن ڒعْمَارْ، ؤُشَا ثتّْغلّْبمْ س لْ-إِيمَانْ ذِي لْ-إِنْجِيلْ. ◘1:‏27 أَمز. 17‏:‏1؛ 1 كُور. 7‏:‏20؛ أَفا. 4‏:‏1؛ كُول. 1‏:‏10؛ 1 تس. 2‏:‏12؛ 4‏:‏1. ٢٨ وَارْ تّڭّْوْذمْ شَاعمَّارْصْ زڭْ إِنِّي خَاومْ د-إِكَّارنْ. مَانْ أَيَا ذ أَعدْجمْ إِ نِيثْنِي غَارْ ؤُهلّكْ، مَاشَا إِ كنِّيوْ غَارْ ؤُسنْجمْ. ٢٩ مِينْزِي أَقَا إِمّوْشْ أَومْ زِي أَربِّي، وَارْ إِدْجِي أَذْ ثَامْنمْ ذِي لْمَاسِيحْ وَاهَا، مَاشَا عَاوذْ مَاحنْذْ أَذْ ثْمَارّْثمْ ذِي طّْوعْ نّسْ، ٣٠ ؤُ أَذْ ثكْسِيمْ أَمنْغِي، أَمْ مَامّشْ إِ ذ أَيِي ث ثژْرِيمْ ؤُشَا ڒخُّو أَقَا خَافِي ثسْڒِيمْ.