أَوَاڒنْ إِوزْننْ
1
أَوَاڒْ أَمزْوَارُو - لْغَارَاضْ ن وَاوَاڒنْ إِوزْننْ
1 أَوَاڒنْ إِوزْننْ ن سُولِيمَانْ،
مِّيسْ ن ذَاوُوذْ، أَجدْجِيذْ ن إِسْرَائِيل،
2 حِيمَا أَذْ إِسّنْ بْنَاذمْ ثِيغِيثْ ذ تَّارْبِييّثْ،
حِيمَا أَذْ إِفْهمْ أَوَاڒنْ شُّورنْ س ڒفْهَامثْ،
3 حِيمَا أَذْ إِقْبڒْ تَّارْبِييّثْ ذ ڒعْقڒْ،
ثَاسڭْذَا ذ ڒْحقّْ ذ ڒصْفَايثْ،
4 حِيمَا أَذْ إِوْشْ أَسْفَارْزْ إِ إِحَافِييّنْ،
ثُوسّْنَا ذ ؤُحَاذُورْ إِ ؤُحُوذْرِي.
5 أجّْ أَمِيغِيسْ أَذْ إِسڒْ
ؤُ أَذْ يَارْنِي ذِي ڒفْهَامثْ نّسْ،
أجّْ ونِّي إِفهّْمنْ أَذْ إِكْسبْ ڒقْنَاعثْ،
6 حِيمَا أَذْ إِفْهمْ أَوَاڒْ إِوزْننْ ذ لْمَاثَالْ،
أَوَاڒنْ ن إِمِيغِيسنْ
ذ ڒمْعَانِي إِنُّوفَارنْ نْسنْ.
7 ثِيڭّْوُوذِي ن سِيذِي ذ بدُّو ن ثُوسّْنَا،
مَاشَا إِبُوهَاڒِييّنْ
سّحْقَارَانْ ثِيغِيثْ ذ تَّارْبِييّثْ. ◘1:7 أَيُوبْ 28:28؛ إِزهد. 111:10؛ أَوڒن. 9:10؛ أَمب. 12:13
شّْوَارْ ن بَابَاسْ إِ مِّيسْ
8 سڒْ، أَ مِّي، غَارْ تَّارْبِييّثْ ن بَابَاشْ،
وَارْ تَّاڭِي شَا ثَاغُورِي ن يمَّاشْ،
9 مَاغَارْ نِيثنْثِي أَذْ إِڒِينْثْ
ذ تَّاجْ إِشْنَا خْ ؤُزدْجِيفْ نّشْ،
ذ ثْسدّْيِينْ إِزوّْقنْ إِ يِيرِي نّشْ.
10 أَ مِّي، مَاڒَا خْسنْ إِمذْنَابْ
أَذْ شكْ غْوَانْ،
وَارْ ذ أَسنْ تّڭّْ شَا أَرَّايْ.
11 مَاڒَا نِيثْنِي قَّارنْ:
”ؤُيُورْ أَكِيذْنغْ، أجّْ أَذْ نْحَامَا
إِ ؤُسِيزّڒْ ن إِذَامّنْ،
أجّْ أَنغْ أَذْ نڭّْ إِجّْ ن ڒْفخْ
إِ ؤُمزْذَاڭْ، بْڒَا سِّيبّثْ،
12 أجّْ أَنغْ أَذْ ثنْ نْصَارْضْ أَمْ دَّارنْ،
أَمْ مَامّشْ ثْصَارضْ ڒَاخَارْثْ،
أَمْ كمْڒمْ،
أَمْ مَامّشْ إِمْسَارْ
أَكْ-ذ يِينِّي إِهكّْوَانْ
ذڭْ وحْفُورْ ن ونْضڒْ.
13 أَذْ نَافْ عْڒَامْكُورْ ڒحْوَايجْ يِيغْڒَانْ أَطَّاسْ،
ثُوذْرِينْ نّغْ أَذْ ثنْثْ نشُّورْ س ثْكشَّاضْثْ.
14 شكْ أَذْ ثنْضَارذْ ثَاقدُّوحْثْ نّشْ جَارْ أَنغْ،
أَذْ غَارْنغْ ثِيڒِي مَارَّا إِشْثْ ن ثشْيَارْثْ.“
15 أَ مِّي، وَارْ كِيذْسنْ ڭُّورْ ذڭْ وبْرِيذْ،
سِيڭّْوجْ أَضَارْ نّشْ خْ ؤُمسْرُوقْ نْسنْ،
16 مَاغَارْ إِضَارنْ نْسنْ تَّازّْڒنْ غَارْ ڒْغَارْ،
ؤُ نِيثْنِي تّْقدْجِيقنْ
مَاحنْذْ أَذْ سِّيزّْڒنْ إِذَامّنْ. ◘1:16 إِشا. 59:7؛ رُوم. 3:15
17 مَاغَارْ س ڒْبَاطڒْ أَذْ ثتّْوَابزّعْ ثْرَاشَّا،
زَّاثْ إِ ثِيطَّاوِينْ ن مَارَّا
مِينْ غَارْ إِدْجَا وَافْرِيونْ،
18 مَاغَارْ نِيثْنِي تّْحَامَانْ
إِذَامّنْ ن يِيخفْ نْسنْ،
تّڭّنْ ڒْفخْ إِ ڒعْمُورْ ن يِيخفْ نْسنْ.
19 أَمُّو إِ إِدْجَانْ إِبْرِيذنْ ن كُوڒْ إِجّْ
ونِّي إِتَّازّْڒنْ غَارْ أَرْبحْ،
أَقَا أَيَا إِتّطّفْ ڒعْمَارْ ن سِيذِيسْ. ◘1:19 أَيُوبْ 8:13
ثِيغِيثْ
20 ثِيغِيثْ ثتّْڒَاغَا س جّْهذْ ذِيهَا بَارَّا،
ثسّْڭعّذْ ثْمِيجَّا نّسْ ذڭْ وَازَّاينْ.
21 غَارْ ؤُمزْوَارْ ن إِمُوشَانْ إِ ذَايْسنْ ڒْهَارَاجْ،
ثتّْبَارَّاحْ نتَّاثْ،
غَارْ وَاذَافنْ ن ثوُّورَا ن ثنْذِينْثْ
ثسَّاوَاڒْ أَوَاڒنْ نّسْ.
22 ”أَڒْ مڒْمِي غَا قِّيمنْ
إِحَافِييّنْ تّخْسنْ ثَاقُوبَّانشْثْ،
أَڒْ مڒْمِي ذ أَسنْ إِ غَا إِعْجبْ
ؤُحشِّي إِ إِمسْثهْزَاينْ،
ؤُ أَڒْ مڒْمِي غَا شَارْهنْ
إِبُوهَاڒِييّنْ ثُوسّْنَا؟
23 ذوْڒمْ غَارْ ؤُوبّخْ إِنُو!
خْزَارمْ، نشّْ أَذْ خَاومْ سّْفَارّْغغْ
أَرُّوحْ إِنُو،
أَوَاڒنْ إِنُو أَذْ أَومْ ثنْعڒْمغْ.“
24 ”أَقَا زعْمَا ڒَاغِيغْ ؤُ كنِّيوْ وَارْ ثخْسمْ،
سّْوِيژّْضغْ نشّْ أَفُوسْ إِنُو،
مَاشَا ؤُڒَا ذ إِجّْ وَارْ ذ أَسْ إِحكَّارْ. ◘1:24 إِشا. 65:12؛ 66:4؛ إِرْم. 13:10
25 ثنْضَارمْ شّْوَارْ إِنُو،
أَوبّخْ إِنُو وَارْ ث ثقْبِيڒمْ.
26 س ؤُينِّي ؤُڒَا ذ نشّْ
أَذْ ضحْشغْ خْ ؤُضيّعْ نْومْ،
نشّْ أَذْ زَّايْومْ سْثهْزغْ
خْمِي د غَا يَاسْ ؤُنخْڒِيعْ نْومْ،
27 خْمِي د غَا يَاسْ ؤُنخْڒِيعْ نْومْ
أَمْ يِيجّْ ن ؤُردّدْجْ،
أَضيّعْ نْومْ أَمْ يِيشْثْ ن ثْحَارْيَاضْثْ،
خْمِي خَاومْ د غَا ثوْضَا
ڒحْصَارثْ ذ ثڭّْوُوذِي. ◘1:27 أَيُوبْ 27:9؛ 35:12؛ إِشا. 1:15؛ إِرْم. 11:11؛ 14:12؛ حِز. 8:18؛ مِيخَا 3:4
28 خنِّي أَذْ خَافِي د-ڒَْاغَانْ،
مَاشَا نشّْ وَارْ د-تَّارِّيغْ،
أَذْ خَافِي أَرْزُونْ، مَاشَا وَارْ ذ أَيِي تِّيفنْ،
29 مِينْزِي نِيثْنِي شَارْهنْ ثُوسّْنَا،
ؤُ وَارْ إِخْضَارنْ أَذْ طّْفنْ ذِي ثِيڭّْوُوذِي ن سِيذِي.
30 نِيثْنِي وَارْ خْسنْ شَا ڒشْوَارْ إِنُو،
مَارَّا أَوبّخْ إِنُو نْضَارنْ ث.
31 نِيثْنِي أَذْ شّنْ زِي ڒْغِيدْجثْ ن وبْرِيذْ نْسنْ،
ؤُ أَذْ جِّيوْننْ س إِخَارِّيصنْ ن يِيخفْ نْسنْ،
32 مِينْزِي ؤُفُّوغْ ن إِحَافيّنْ
خْ وبْرِيذْ أَذْ ثنْ إِنغْ،
ؤُ أَفْڒَاحْ ن إِبُوهَاڒِييّنْ أَذْ ثنْ إِسّْهلّكْ.
33 وِي غَارِي إِ غَا إِسْڒنْ، أَذْ إِزْذغْ ذِي ڒَامَانْ،
أَذْ يِيڒِي ذِي ڒهْنَا بْڒَا أَنخْڒِيعْ ن ثُوعفّْنَا.“