١ هَالِّيلُو-يَاهْ،

صبّْحمْ أَربِّي

ذِي زَّاوشْثْ نّسْ إِقدّْسنْ،

صبّْحمْ ث ذِي ڒْكُوبّثْ ن جّهْذْ نّسْ! ◘150:‏1 إِشا. 6‏:‏3

٢ صبّْحمْ ث خْ ثْمڭَّا نّسْ ثِيمقّْرَانِينْ،

صبّْحمْ ث خْ ڒمْغَارثْ نّسْ ثَامقّْرَانْثْ!

٣ صبّْحمْ س ثْمِيجَّا ن ؤُسُوضِي

ذڭْ ؤُيِيشّْ ن إِشَارِّي،

صبّْحمْ س لهَارْپَا ذ ڒْْڭَامْبْرِي!

٤ صبّْحمْ ث س ؤُبنْذِيرْ ذ شّْضِيحْ س نُّوبْثَاثْ،

صبّْحمْ ث س ثِيرَارْثْ ن إِفِيڒَانْ ذ ثمْجَا!

٥ صبّْحمْ أَسْ س ڒْْحسّْ إِفْسُوسنْ

ن ثدْجُونِينْ ن وُوزَّاڒْ،

صبّْحمْ أَسْ س ڒْْحسّْ يُوعْڒَانْ

ن ثدْجُونِينْ ن وُوزَّاڒْ!

٦ مَارَّا مِينْ إِتَّارَّانْ نّفْسْ،

صبّحْ إِ سِيذِي.

هَالِّيلُو-يَاهْ!