أَذْلِيسْ إِقدّْسنْ أَوَاڒنْ إِوزْننْ ٣

١ مِّي إِنُو، وَارْ تّتُّو

ثَاغُورِي إِنُو ن شَّارِيعَا،

أجّْ ؤُڒْ نّشْ أَذْ إِحْضَا ثِيوصَّا إِنُو،

٢ مَاغَارْ نِيثنْثِي أَذْ أَشْ د-إِوْينْثْ

أَطَّاسْ ن وُوسَّانْ،

ؤُڒَا ذ إِسڭّْوُوسَا ن ثُوذَارْثْ ذ ڒهْنَا. ◘

٣ ثَامخْسِيوْثْ إِشوَّارنْ ذ ڒَْامَانْ

وَارْ ثنْ ثجِّيذْ أَذْ زَّايكْ فّْغنْ،

قّنْ إِ-ثنْ غَارْ يِيرِي نّشْ،

أَرِي ثنْ خْ ثڒْوِيحْثْ ن وُوڒْ نّشْ، ◘

٤ خنِّي أَذْ ثَافذْ أَرْضَا

ذ ڒفْهَامثْ إِصبْحنْ

ذِي ثِيطَّاوِينْ ن أَربِّي ؤُ ن بْنَاذمْ.

٥ ثِيقّْ ذِي سِيذِي س وُوڒْ نّشْ كُوڒْشِي،

وَارْ تّْشَاڒَا خْ ڒفْهَامثْ ن يِيخفْ نّشْ.

٦ سّنْ إِ-ث ذِي مَارَّا إِبْرِيذنْ نّشْ،

خنِّي نتَّا أَذْ إِسڭّمْ إِمسْرَاقْ نّشْ. ◘

٧ وَارْ تّڭّْ إِخفْ نّشْ ذ أَمِيغِيسْ.

ڭّْوذْ سِيذِي ؤُ بعّذْ

خْ مِينْ إِدْجَانْ ذ أَعفَّانْ. ◘

٨ أَيَا أَذْ يِيڒِي ذ أَڭنْفُو

إِ إِژوْرَانْ ن ثُوذَارْثْ نّشْ،

ذ ونْعَاشْ إِ إِغْسَانْ نّشْ.

٩ وقَّارْ سِيذِي س وَاڭْڒَا نّشْ،

س ثْمزْوَارُوثْ ن مَارَّا صَّابثْ نّشْ. ◘

١٠ خنِّي أَذْ تّْوَاشُّورنْ

ڒهْرِيثْ نّشْ س ؤُفيّضْ،

ؤُ ثِيسِيرِينْ نّشْ ن ؤُضِيڒْ

أَذْ دُّوقّْزنْ س بِينُو ن جْذِيذْ. ◘

١١ مِّي إِنُو، وَارْ نطَّارْ تَّارْبِييّثْ ن سِيذِي،

وَارْ تَّارَّا أَعْرُورْ خْ ؤُوبّخْ نّسْ، ◘

١٢ مَاغَارْ ونِّي إِسّْعِيزَّا سِيذِي،

أَذْ ث إِعَاقبْ عَاوذْ،

أَمْ إِتّڭّْ بَابَاسْ أَكْ-ذ مِّيسْ

ونِّي خْ يَارْضَا. ◘

١٣ سّعْذْ ن بْنَاذمْ نِّي إِتَّافنْ ثِيغِيثْ،

ؤُڒَا ذ بْنَاذمْ نِّي إِتّْكسَّابنْ ڒفْهَامثْ،

١٤ مَاغَارْ مِينْ ثتَّاوِي نتَّاثْ،

ثحْڒَا خْ ثْسبَّابْثْ ذِي نُّوقَارْثْ،

ؤُ ڒْْغِيدْجثْ نّسْ ثحْڒَا خْ وُورغْ إِتِّيسِّيقنْ. ◘

١٥ نتَّاثْ ثِيغْڒَا خْ ڒْْمَارْجَانْ،

ؤُ مَارَّا مِينْ ذِي ثْزمَّارذْ

أَذْ ثمّژْرذْ،

وَارْ إِزمَّارْ أَكِيذسْ إِتّمْقُودَّا. ◘

١٦ ثُوزّڭَّارْثْ ن وُوسَّانْ غَارسْ

ذڭْ ؤُفُوسْ نّسْ،

أَڭْڒَا ذ شَّانْ أَقَا أَثنْ خْ ؤُزڒْمَاضْ نّسْ.

١٧ إِبْرِيذنْ نّسْ ذ إِبْرِيذنْ ن ڒضْرَافثْ،

ؤُ مَارَّا إِمسْرَاقْ نّسْ أَقَا أَثنْ ذ ڒهْنَا.

١٨ نتَّاثْ ذ ثَاشجَّارْثْ ن ثُوذَارْثْ

إِ يِينِّي غَارسْ إِڒسْقنْ،

كُوڒْ إِجّنْ ونِّي ذَايسْ إِتّطّْفنْ،

أَذْ يِيڒِي ذ أَمسْعُوذْ. ◼

١٩ سِيذِي إِڭَّا ذْسَاسْ ن ثمُّورْثْ س ثِيغِيثْ نّسْ،

س ڒفْهَامثْ نّسْ إِڭَّا إِجنْوَانْ.

٢٠ زِي ثُوسّْنَا نّسْ دُّوقّْزنْ-د

وَامَانْ إِهوْڒنْ،

تّْنشْنِيشنْ-د إِسيْنُوثنْ نّْذَا. ◘

٢١ مِّي إِنُو، وَارْ ثنْثْ ثجِّيذْ

أَذْ فّْغنْثْ زِي ثِيطَّاوِينْ نّشْ،

حْضَا أَفْثَانْ ذ ؤُحَاضُورْ، ◼

٢٢ مَاغَارْ أَذْ إِڒِينْ ذ ثُوذَارْثْ إِ ڒعْمَارْ نّشْ

ؤُڒَا ذ أَرْضَا إِ يِيرِي نّشْ.

٢٣ خنِّي أَذْ ثُويُورذْ أَبْرِيذْ نّشْ ذِي ڒَْامَانْ،

وَارْ ثتّْنقْرِيضذْ ذڭْ ؤُضَارْ نّشْ. ◘

٢٤ مَاڒَا ثْرُوحذْ أَذْ ثزّْڒذْ،

وَارْ ثنّْخڒْعِيذْ،

ؤُ خْمِي إِ غَا ثزّْڒذْ، أَذْ يِيژِيذْ يِيضصْ نّشْ. ◘

٢٥ وَارْ تّڭّْوذْ زڭْ ؤُنخْڒِيعْ ن ذغْيَا

ؤُڒَا زڭْ وَاريّبْ س ؤُفُوسْ ن إِعفَّاننْ

خْمِي د غَا يَاسْ. ◘

٢٦ مَاغَارْ سِيذِي أَذْ أَشْ يِيڒِي ذ أَسنّذْ نّشْ،

نتَّا أَذْ إِحْضَا أَفُوسْ نّشْ زِي ثْسَارِّيفْثْ.

٢٧ وَارْ قطّعْ ڒْْخَارْ خْ بَابْ نّسْ،

مَاڒَا أَقَا-ث ذڭْ ؤُفُوسْ نّشْ

مَاحنْذْ أَذْ ثڭّذْ ڒْْخَارْ.

٢٨ وَارْ قَّارْ إِ جَّارْ نّشْ:

’رُوحْ ؤُشَا عْقبْ-د،

ثِيوشَّا أَذْ أَشْ ت وْشغْ!‘،

مَاڒَا ثَامسْڒَاشْثْ أَقَا-ت أَكِيذكْ.

٢٩ وَارْ نكّْوِي ڒْْغَارْ أَكْ-ذ جَّارْ نّشْ،

ؤُمِي أَكِيذكْ إِزدّغْ ذِي ڒَامَانْ.

٣٠ وَارْ ثمْشُوبُّوشْ

أَكْ-ذ إِجّْ ن بْنَاذمْ بْڒَا سِّيبّثْ،

مَاڒَا نتَّا وَارْ ذ أَشْ إِڭِّي ڒْْغَارْ.

٣١ وَارْ تَّاسمْ زڭْ إِجّْ ن بُو-ڒخْشُونثْ،

حْضَا مَاحنْذْ وَارْ ثتِّيخْضَارذْ

ؤُڒَا ذ إِجّْ زِي مَارَّا إِبْرِيذنْ نّسْ. ◘

٣٢ مَاغَارْ ونِّي إِتّفّْغنْ زڭْ وبْرِيذْ،

أَقَا-ث ذ نّْعِي إِ سِيذِي،

مَاشَا نتَّا إِتّڭّْ ڒَْامَانْ نّسْ

ذڭْ إِنِّي إِڭُّورنْ نِيشَانْ. ◘

٣٣ نّعْڒثْ ن سِيذِي

أَقَا-ت خْ ثَادَّارْثْ ن ؤُعفَّانْ،

مَاشَا ثَازذِّيغْثْ ن إِمْسڭَّاذنْ

أَذْ ت إِبَاركْ. ◘

٣٤ مَاڒَا ذ إِمسْثهْزَاينْ،

أَذْ زَّايْسنْ إِسّْثهْزَا نتَّا،

مَاشَا مَاڒَا ذ إِنِّي إِتّْوَاحْصَارنْ،

أَذْ أَسنْ إِسْشنْ أَرْضَا نّسْ. ◘

٣٥ إِمِيغِيسنْ أَذْ وَارْثنْ شَّانْ،

مَاشَا إِبُوهَاڒِييّنْ

أَذْ سَّارْبُونْ ڒفْضِيحثْ خْ يِيخفْ نْسنْ.

◘٣:٢ 3:‏2 أَعَوذ. 8‏:‏1؛ 30‏:‏20

◘٣:٣ 3:‏3 ؤُف. 13‏:‏9؛ أَعَوذ. 6‏:‏8

◘٣:٦ 3:‏6 1 إِم. 28‏:‏9

◘٣:٧ 3:‏7 رُوم. 12‏:‏16

◘٣:٩ 3:‏9 ؤُف. 23‏:‏19؛ 34‏:‏26؛ أَعَوذ. 26‏:‏2‏-‏11؛ مـَال. 3‏:‏10؛ لك. 14‏:‏13

◘٣:١٠ 3:‏10 أَعَوذ. 28‏:‏8

◘٣:١١ 3:‏11 أَيُوبْ 5‏:‏17؛ عبر. 12‏:‏5

◘٣:١٢ 3:‏12 أَسَا. 3‏:‏19

◘٣:١٤ 3:‏14 أَيُوبْ 28‏:‏15؛ إِزهد. 19‏:‏11؛ أَوڒن. 8‏:‏11، 19؛ 16‏:‏16

◘٣:١٥ 3:‏15 أَوڒن. 8‏:‏11

◼٣:١٨ 3:‏18 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘).

◘٣:٢٠ 3:‏20 أَمز. 1‏:‏9، 10

◼٣:٢١ 3:‏21 ثنْثْ - أَوَاڒْ-أَ إِشيَّارْ غَارْ ثِيغِيثْ ذ ڒفْهَامثْ إِ خْ إِسَّاوَاڒْ ؤُمْسڒْمَاذْ ن ثِيغِيثْ ذِي أَيثْ 13 ن وُوذمْ-أَ.

◘٣:٢٣ 3:‏23 إِزهد. 37‏:‏24؛ 91‏:‏11، 12

◘٣:٢٤ 3:‏24 لَاوِي 6‏:‏19؛ أَيُوبْ 11‏:‏19؛ إِزهد. 3‏:‏6؛ 4‏:‏9؛ 91‏:‏5، 6

◘٣:٢٥ 3:‏25 أَيُوبْ 5‏:‏21

◘٣:٣١ 3:‏31 إِزهد. 37‏:‏1؛ 73‏:‏3؛ أَوڒن. 23‏:‏17

◘٣:٣٢ 3:‏32 إِزهد. 25‏:‏14

◘٣:٣٣ 3:‏33 لَاوِي 26‏:‏14‏-‏45؛ أَعَوذ. 28‏:‏15‏-‏68؛ مـَال. 2‏:‏2

◘٣:٣٤ 3:‏34 يَاع. 4‏:‏6؛ 1 بُط. 5‏:‏5