أَذْلِيسْ إِقدّْسنْ أَوَاڒنْ إِوزْننْ ٤

١ سْڒمْ، كنِّيوْ إِحنْجِيرنْ،

غَارْ تَّارْبِييّثْ ن بَابَاثْومْ،

حكَّارمْ مْلِيحْ

مَاحنْذْ أَذْ ثكْسِيمْ ثُوسّْنَا س ڒفْهَامثْ،

٢ مَاغَارْ نشّْ أَذْ أَومْ وْشغْ

ثَاغُورِي إِصبْحنْ،

وَارْ سمّْحمْ ذِي ثْغُورِي إِنُو.

٣ مَاغَارْ نشّْ ثُوغَا أَيِي ذ مِّيسْ إِ بَابَا،

أَرقَّاغْ ذ أَينِّي ن مِّيسْ

زَّاثْ إِ وُوذمْ ن يمَّا. ◘

٤ نتَّا إِسّڒْمذْ أَيِي، إِنَّا أَيِي:

”أجّْ ؤُڒْ نّشْ أَذْ إِطّفْ ذڭْ وَاوَاڒنْ إِنُو،

حْضَا ثِيوصَّا إِنُو، خنِّي أَذْ ثدَّارذْ!“ ◘

٥ جْبذْ-د غَاركْ ثِيغِيثْ،

جْبذْ-د غَاركْ ڒعْقڒْ،

وَارْ ثتُّو ؤُ وَارْ ثْحيِّيذْ

خْ وَاوَاڒنْ ن ؤُقمُّومْ إِنُو.

٦ وَارْ سمّحْ ذِي ثِيغِيثْ،

خنِّي نتَّاثْ أَذْ شكْ ثحْضَا،

سْعِيزّْ إِ-ت ؤُ نتَّاثْ أَذْ شكْ ثسَّارْ. ◼

٧ بدُّو ن ثِيغِيثْ ذ ؤُضُوفْ ن ثِيغِيثْ،

طّفْ ڒفْهَامثْ س مَارَّا مِينْ غَاركْ. ◘

٨ سْڭعّذْ إِ-ت-إِ-د،

خنِّي نتَّاثْ أَذْ شكْ ثسّْڭعّذْ،

نتَّاثْ أَذْ أَشْ ثڭّْ شَّانْ مَاڒَا ثْذَارّْعذْ أَسْ.

٩ نتَّاثْ أَذْ أَشْ ثوْشْ إِجّْ ن تَّاجْ ثشْنَا

خْ ؤُزدْجِيفْ نّشْ،

أَذْ أَشْ ثوْشْ إِجّْ ن تَّاجْ إِزوّْقنْ. ◘

١٠ سڒْ، أَ مِّي، ؤُ كْسِي أَوَاڒنْ إِنُو،

خنِّي أَذْ مَّارْنِينْ

إِسڭّْوُوسَا ن ثُوذَارْثْ نّشْ.

١١ سّْڒمْذغْ أَشْ أَبْرِيذْ ن ثِيغِيثْ،

نذْهغْ شكْ ذِي ڒَاثَارَاثْ إِسڭّْمنْ.

١٢ مَاڒَا ثُويُورذْ، أَصُورِيفْ نّشْ

وَارْ إِتّْنحْصَّارْ،

مَاڒَا ثَازّْڒذْ، وَارْ تّْنقْرِيضذْ.◘

١٣ شبَّارْ ذِي تَّارْبِييّثْ،

وَارْ خَاسْ ثمّْسبْضَا،

حْضَا ت، مَاغَارْ نتَّاثْ ذ ثُوذَارْثْ نّشْ.

١٤ وَارْ ڭُّورْ خْ ؤُمسْرُوقْ ن إِعفَّاننْ،

وَارْ تِّيذِيفْ أَبْرِيذْ ن يِينِّي إِتّڭّنْ ڒْْغَارْ، ◘

١٥ حيّذْ خَاسْ، وَارْ خَاسْ ڭُّورْ،

فّغْ زَّايسْ ؤُ أَذْ ثكّذْ خَاسْ.

١٦ مَاغَارْ نِيثْنِي وَارْ تّطّْصنْ

أَمْ وَارْ زمَّارنْ أَذْ ڭّنْ ثُوعفّْنَا،

إِتّْرَاحْ أَسنْ إِضصْ نْسنْ

مَاڒَا وَارْ سّْنقْرِيضنْ حذْ عَاذْ،

١٧ مَاغَارْ نِيثْنِي تّتّنْ أَغْرُومْ ن ڒْْغشّْ،

ؤُ نِيثْنِي سسّنْ بِينُو زِي ثْمڭَّا ن ڒخْشُونثْ.

١٨ أَمسْرُوقْ ن إِمْسڭَّاذنْ

أَمْ ثْفَاوْثْ إِتِّيسِّيقنْ ن ثفُّوثْ،

ثنِّي ثَارنِّي ذڭْ ؤُسقْسقْ

أَڒْ إِمْغَارْ وَاسّْ قَاعْ.

١٩ أَبْرِيذْ ن إِعفَّاننْ أَمْ ثَادْجسْثْ،

نِيثْنِي وَارْ سِّيننْ مِينْ ذِي إِ غَا نْقَارْضنْ.

٢٠ مِّي إِنُو، أوْشْ ثَايْنِيثْ إِ وَاوَاڒنْ إِنُو،

أوْشْ أَمزُّوغْ نّشْ إِ وَاوَاڒنْ إِنُو،

٢١ وَارْ ثنْ تّجِّي أَذْغفْڒنْ

زِي ثِيطَّاوِينْ نّشْ،

خمّڒْ إِ-ثنْ ذَاخڒْ ذڭْ وُوڒْ نّشْ،

٢٢ مَاغَارْ نِيثْنِي ذ ثُوذَارْثْ

إِ يِينِّي ثنْ إِ غَا يَافنْ،

ؤُڒَا ذ أَڭنْفُو إِ أَرِّيمثْ نْسنْ مَارَّا. ◘

٢٣ حْضَا ؤُڒْ نّشْ خْ مَارَّا

مِينْ إِزمَّارْ أَذْ إِتّْوَاحْضَا،

مَاغَارْ زَّايسْ فّْغنْ إِژوْرَانْ ن ثُوذَارْثْ.

٢٤ كّسْ إِخَارِّيقنْ ن ؤُقمُّومْ نّشْ،

سْبعّذْ خَاكْ أَفَارْيضْ ن إِينْشِيشنْ نّشْ.

٢٥ أجّْ ثِيطَّاوِينْ نّشْ أَذْ خْزَارنْثْ غَارْ زَّاثْ،

أجّْ أَبْڒِيونْ نّشْ أَذْ خْزَارنْ

غَارْ مِينْ إِدْجَانْ أَرنْذَاذْ نّشْ.

٢٦ وَاطَا ڒَْاثَارْ ن ؤُضَارْ نّشْ،

أجّْ أَذْ إِڒِينْ مَارَّا إِبْرِيذنْ نّشْ سَارّْحنْ.

٢٧ وَارْ فَارّغْ غَارْ يفُوسْ ؤُڒَا غَارْ ؤُزڒْمَاضْ،

سْبعّذْ أَضَارْ نّشْ زِي ثُوعفّْنَا. ◘

◘٤:٣ 4:‏3 1 إِم. 29‏:‏1

◘٤:٤ 4:‏4 1 إِم. 28‏:‏9

◼٤:٦ 4:‏6 ’وَارْ سمّحْ ذِي ثِيغِيثْ‘ - س ثْعِيبْرَانِيثْ ’وَارْ سمّحْ ذَايسْ‘.

◘٤:٧ 4:‏7 أَوڒن. 23‏:‏23

◘٤:٩ 4:‏9 أَوڒن. 1‏:‏19

◘٤:١٢ 4:‏12 إِزهد. 91‏:‏11

◘٤:١٤ 4:‏14 إِزهد. 1‏:‏1؛ أَوڒن. 1‏:‏10، 15

◘٤:٢٢ 4:‏22 أَوڒن. 4‏:‏13

◘٤:٢٧ 4:‏27 أَعَوذ. 5‏:‏32؛ 28‏:‏14