7
ثَامْغَارْثْ إِسّْغكّْوَانْ ذ ؤُحُوذْرِي
مِّي إِنُو، حْضَا أَوَاڒنْ إِنُو،
خمّڒْ ثِيوصَّا إِنُو غَاركْ.
حْضَا ثِيوصَّا إِنُو
ؤُ شكْ أَذْ ثقِّيمذْ ثدَّارذْ،
حْضَا ثَاغُورِي إِنُو أَمْ مُومُّو ن ثِيطّْ نّشْ. 7:‏2 لَاوِي 18‏:‏5؛ أَوڒن. 4‏:‏4
قّنْ إِ-ثنْثْ غَارْ إِضوْضَانْ نّشْ،
أَرِي ثنْثْ خْ ثڒْوِيحْثْ ن وُوڒْ نّشْ. 7:‏3 أَعَوذ. 6‏:‏8؛ 11‏:‏18
إِنِي إِ ثِيغِيثْ: ’شمْ ذ ؤُتْشْمَا!‘،
ؤُ سمَّا ڒفْهَامثْ: ’أَمدُّوكّڒْ إِنُو!‘،
مَاحنْذْ نِيثنْثِي أَذْ شكْ حْضَانْثْ
زِي ثمْغَارْثْ ثَابَارَّانشْثْ،
زِي ثمْغَارْثْ زِي بَارَّا
إِ شكْ إِتّْغَارَّانْ س وَاوَاڒنْ نّسْ. 7:‏5 أَوڒن. 5‏:‏3
 
مَاغَارْ زِي ڒْكَازِي ن ثَادَّارْثْ إِنُو،
جَارْ شّبَّاشْ ن ڒْكَازِي سوْضغْ غَارْ وَادَّايْ،
سوْضغْ غَارْ إِحَافِييّنْ إِنِّي وَارْ إِتّْحِيكِينْ،
جَارْ إِحنْجِيرنْ ن بْنَاذمْ
حكَّارغْ إِجّْ ن ؤُحُوذْرِي
س وُوڒْ وَارْ إِمْثنْ.
نتَّا إِژْوَا أَبْرِيذْ غَارْ ثغْمَارْثْ نّسْ،
ؤُ إِطّفْ أَبْرِيذْ غَارْ ثَادَّارْثْ نّسْ.
غَارْ ثْبَامْبَاسْثْ، غَارْ ثْمذِّيثْ ن وَاسّْ،
ذِي ڒَادْجَاغْ نْ دْجِيڒثْ ذ ثُوبَّارْشنْثْ،
10 خْزَارْ، أَقَا إِشْثْ ن ثمْغَارْثْ ثُوسَا-د
إِ ؤُمْسَاڭَارْ أَكِيذسْ،
ذڭْ وَارُّوضْ ن ثمْغَارْثْ ن فَارْقْ-شّْغڒْ
ؤُ س ثحْرَايْمشْثْ ن وُوڒْ.
 
11 نتَّاثْ ثخْثِيخْ ؤُ ثْغوّغْ،
إِضَارنْ نّسْ وَارْ قِّيمنْ عَاذْ ذِي ثَادَّارْثْ. 7:‏11 أَوڒن. 9‏:‏13
12 إِشْثْ ن ثْوَاڒَا ذِي بَارَّا،
خنِّي عَاوذْ ذڭْ وَازَّاينْ،
غَارْ مَارَّا ثِيغمَّارْ ن إِبْرِيذنْ ثتّْحَامَا.
13 نتَّاثْ ثطّفْ إِ-ث ؤُ ثسُّوذمْ إِ-ث،
ثقْجَارْ ؤُذمْ نّسْ، ثنَّا أَسْ:
14 ”ثُوغَا خَافِي مَاحنْذْ أَذْ وْشغْ
ثِيوْهِيبِينْ ن ڒهْنَا.
أَسّْ-أَ سّْقفْڒغْ لْوُوعُوذْ إِنُو.
15 خْ ؤُيَا إِ د-فّْغغْ
مَاحنْذْ أَذْ شكْ مّْسَاڭَارغْ،
مَاحنْذْ أَذْ خَاكْ أَرْزُوغْ ؤُ أَمُّو إِ شكْ ؤُفِيغْ.
16 نشّْ سُّوغْ مَالْثَاثْ خْ قَامَا إِنُو،
ڒِْيزَارَاثْ إِزوّْقنْ زِي ڒقْثنْ أَزْذَاذْ زِي مِيصْرَا.
17 نشّْ رُوشّغْ ثَاسُّوثْ إِنُو
س مِيرُّو ذ وشْفِيڒْ ذ ڒْقَارْفَا. 7:‏17 إِزْڒِي 4‏:‏14.
18 أَسْ-د، أجّْ أَنغْ أَذْ نجِّيونْ
أَسْحِينّبْ أَڒْ ثُوفُّوثْ،
أجّْ أَنغْ أَذْ نَارّْ مژْرِي ذِي ڒِيرَارْثْ ن ثَايْرِي.
19 مَاغَارْ أَرْيَازْ وَارْ إِدْجِي ذِي ثَادَّارْثْ،
نتَّا إِسَافَارْ إِڭّْوجْ أَطَّاسْ.
20 إِكْسِي إِشْثْ ن ثْكمُّوسْثْ
ن ثْمنْيَاثْ ن نُّوقَارْثْ أَكِيذسْ،
أَذْ يَارڭّْوحْ غَارْ وَاسّْ ن ثْزِيرِي إِقفْڒنْ.“
21 أَمُّو إِ ث ثطّفْ س وَاطَّاسْ ن ڒْهَارْذْ نّسْ،
ثغْوَا إِ-ث س ڒهْرُوذْ نّسْ إِزوّْقنْ
ن إِينْشِيشنْ نّسْ.
 
22 ذغْيَا نتَّا يَارْذفْ إِ-ت،
أَمْ يِيجّْ ن ؤُفُونَاسْ إِڭُّورنْ غَارْ ڒْڭُورْنثْ،
أَمْ إِشْثْ ن سّْنسْڒثْ خْ إِضَارنْ ن ونِّي إِڭُّورنْ
غَارْ ؤُمَارّثْ ن ؤُبُوهَاڒِي
23 - أَڒَامِي د أَسْ ثْشَارّڭْ فْڒِيثْشَا ثْسَا -
أَمْ يِيجّْ ن وجْضِيضْ إِضْوِينْ ذڭْ إِجّْ ن ونْذَايْ،
ؤُ وَارْ إِسِّينْ أَقَا وَانِيثَا إِتّْوَاڭّْ
ضِيدّْ إِ ثُوذَارْثْ نّسْ. 7:‏23 أَوڒن. 1‏:‏17
 
24 خنِّي ڒخُّو، أَ إِحنْجِيرنْ، سْڒمْ-د غَارِي،
ؤُ سْڒمْ غَارْ وَاوَاڒنْ ن ؤُقمُّومْ إِنُو.
25 أجّْ ؤُڒْ نّشْ وَارْ إِتّْوذِّيرْ
ذڭْ إِبْرِيذنْ نّسْ،
وَارْ تّْميِّيڒْ غَارْ إِمسْرَاقْ نّسْ.
26 مَاغَارْ ذڭْ وَاطَّاسْ إِتّْوَايزْمنْ
إِنِّي ثغْضرْ،
إِمْغَارْ وَاطَّاسْ لْعَاذَاذْ ن مَارَّا إِنِّي ثنْغَا.
27 ثَادَّارْثْ نّسْ ثشُّورْ
س إِبْرِيذنْ غَارْ ڒَاخَارْثْ
نِّي إِهكّْوَانْ
غَارْ إِخَّامنْ ن ذَاخڒْ ن ڒْموْثْ. 7:‏27 أَوڒن. 2‏:‏18؛ 5‏:‏5
 
 

7:2 7:‏2 لَاوِي 18‏:‏5؛ أَوڒن. 4‏:‏4

7:3 7:‏3 أَعَوذ. 6‏:‏8؛ 11‏:‏18

7:5 7:‏5 أَوڒن. 5‏:‏3

7:11 7:‏11 أَوڒن. 9‏:‏13

7:17 7:‏17 إِزْڒِي 4‏:‏14.

7:23 7:‏23 أَوڒن. 1‏:‏17

7:27 7:‏27 أَوڒن. 2‏:‏18؛ 5‏:‏5