8
أَڒَاغِي ن ثِيغِيثْ
مَا وَارْ ثتّْڒِيغِي ثِيغِيثْ ؤُ وَارْ ثسْڭِيعِّيذْ
ڒفْهَامثْ ثْمِيجَّا نّسْ؟ 8:‏1 أَوڒن. 1‏:‏20، 21
خْ ثْقِيشَّاثْ ن ڒڭْعُوذِي خْ وبْرِيذْ،
مَانِي تّمْسڒْقَانْ إِمسْرَاقْ
ثْبدّْ نتَّاثْ ذ أَبذِّي.
غَارْ ؤُغزْذِيسْ ن ثوُّورَا،
غَارْ وَاذَافْ ن ثنْذِينْثْ،
مَانِي غَا ثَاذْفذْ خْ ثوُّورَا،
ثتّْڒَاغَا س جّهْذْ:
 
”إِ كنِّيوْ، أَ إِرْيَازنْ، تّْڒَاغِيغْ،
ثْمِيجَّا إِنُو ثتّفّغْ غَارْ ثَارْوَا ن بْنَاذمْ.
كنِّيوْ إِحَافِييّنْ،
فهْممْ خنِّي مِينْ إِدْجَانْ ذ أَفْثَانْ،
كنِّيوْ إِبُوهَاڒِييّنْ،
فهْممْ س وُوڒْ نْومْ.
سْڒمْ، مِينْزِي أَذْ سِّيوْڒغْ
أَوَاڒنْ إِ د-إِجبّْذنْ ڒفْثنْ،
أَنُورْزمْ ن إِينْشِيشنْ إِنُو
جبّذْ-د ثِيمسْڒَايِينْ إِسڭّْذنْ،
مَاغَارْ أَنغْ إِنُو أَذْ يِينِي ثِيذتّْ س نّيّثْ،
ڒْْهَارْذْ إِعفّْننْ أَقَا-ث ذ نّْعِي
إِ إِينْشِيشنْ إِنُو.
مَارَّا أَوَاڒنْ ن ؤُقمُّومْ إِنُو
تّفّْغنْ-د زِي ثْسڭْذَا،
وَارْ ذَايْسنْ ؤُڒَا ذ إِشْثْ ن ڒْحَاجّثْ
إِخْنُونّسنْ نِيغْ إِفَارْغنْ.
أَقَا أَثنْ مَارَّا صْفَانْ
إِ ونِّي ذِي ثدْجَا ڒفْهَامثْ،
ؤُڒَا س ڒقْيَاسْ إِ يِينِّي إِخْسنْ أَذْ أَفنْ ثُوسّْنَا.
 
10 كْسِيمْ تَّارْبِييّثْ إِنُو، وَارْ إِدْجِي نُّوقَارْثْ،
ؤُڒَا ثُوسّْنَا كْثَارْ خْ وُورغْ إِقُّورنْ،
11 مَاغَارْ ثِيغِيثْ حْسنْ زِي ڒْمَارْجَانْ،
مَارَّا مِينْ ذِي إِزمَّارْ بْنَاذمْ
أَذْ إِمژْرِي،
وَارْ إِزمَّارْ أَذْ ذَايسْ يَارْوسْ. 8:‏11 أَيُوبْ 28‏:‏15؛ إِزهد. 19‏:‏11؛ أَوڒن. 3‏:‏14، 15؛ 16‏:‏16
12 نشّْ، ثِيغِيثْ، زدّْغغْ غَارْ وفْثَانْ،
تَّافغْ ثُوسّْنَا س ؤُحَاذُورْ.
13 ثِيڭّْوُوذِي ن سِيذِي ذ أَشْرَاهْ ن ڒْغَارْ،
نّْفَاخثْ ذ ثْشنَّاعْثْ ذ ؤُمسْرُوقْ أَعفَّانْ،
نشّْ شَارّْهغْ ؤُڒَا ذ أَقمُّومْ
إِشُّورْ س ڒخْذَاعَاثْ.
14 غَارِي أَشَاوَارْ ذ ثْوِيزَا،
نشّْ ذ ڒفْهَامثْ، غَارِي جّهْذْ.
15 زَّايِي حكّْمنْ إِجدْجِيذنْ،
زَّايِي تَّاريْسنْ أَيْثْ ن جّهْذْ س ثْسڭْذَا.
16 زَّايِي حكّْمنْ ڒْحُوكَّامْ
ذ ثَارْوَا ن ثَاصِيڒثْ،
مَارَّا ڒْقُوضَاثْ ن ثمُّورْثْ.
17 نشّْ تّخْسغْ مَارَّا
إِنِّي ذ أَيِي إِتّخْسنْ،
ذ يِينِّي خَافِي يَارزُّونْ زِيشْ، أَذْ أَيِي أَفنْ.
18 أَڭْڒَا ذ شَّانْ أَقَا أَثنْ غَارِي،
أَڭْڒَا إِقِّيمنْ ذ ثْسڭْذَا. 8:‏18 أَوڒن. 3‏:‏16
19 فْرُوثَا إِنُو ثشْنَا خْ وُورغْ إِتِّيسِّيقنْ،
وَاهْ خْ وُورغْ أَزْذَاذْ،
ڒْْغِيدْجثْ إِنُو ثعْذُو نُّوقَارْثْ إِقُّورنْ.8:‏19 أَوڒن. 3‏:‏14
20 نشّْ ڭُّورغْ خْ ؤُمسْرُوقْ ن ثْسڭْذَا،
ذِي ڒْوسْطْ ن إِمسْرَاقْ ن ڒْحقّْ،
21 حِيمَا أَذْ أَرّغْ إِنِّي ذ أَيِي إِتّخْسنْ
أَذْ طّْفنْ إِشْثْ ن ثسْغَارْثْ ذ ڒْوَارْثْ،
نشّْ أَذْ شُّورغْ إِخَّامنْ ن ثْخُوبَايْ نْسنْ.
 
22 سِيذِي إِڭَّا أَيِي، ذ أَمزْوَارُو ن وبْرِيذْ نّسْ،
عَاذْ قْبڒْ أَمزْوَارُو ن ثْمڭَّا نّسْ
زڭْ وشْحَاڒْ ؤُيَا.
23 زِي ڒبْذَا إِتّْوَازدْجعْ خَافِي جّهْذْ،
زڭْ ؤُمزْوَارُو،
زِي ڒْوقْثْ ن ؤُمزْوَارُو
إِ ذِي ثتّْوَاڭّْ ثمُّورْثْ، 8:‏23 يُوح. 1‏:‏1
24 ؤُمِي وَارْ ذِينْ ثُوغِي عَاذْ أَمَانْ إِهوْڒنْ،
نشّْ تّْوَاخڒْقغْ-د،
ؤُمِي وَارْ ذِينْ ثُوغِي عَاذْ ڒْعُونْصَارَاثْ
شُّورنْثْ س وَامَانْ.
25 قْبڒْ مَا أَذْ تّْوَاڭّنْ إِذُورَارْ،
قْبڒْ مَا أَذْ إِڒِينْثْ ثوْرِيرِينْ،
ثُوغَا خڒْقغْ-د نشّْ.
26 نتَّا ثُوغَا عَاذْ وَارْ د-إِخْڒِيقْ
ثَامُّورْثْ ذ إِيَّارنْ،
ؤُڒَا ذ ثَامزْوَارُوثْ ن ثْعجَّاجْثْ ن دُّونشْثْ.
27 ؤُمِي نتَّا إِڭَّا إِجنْوَانْ، ثُوغَا أَيِي ذِينْ،
ؤُمِي نتَّا يَارْشمْ إِشْثْ ن ثْقُورَارشْثْ
خْ وُوذمْ ن وَامَانْ إِهوْڒنْ. 8:‏27 أَيُوبْ 26‏:‏10
 
28 ؤُمِي نتَّا إِڭَّا إِسيْنُوثنْ سنّجْ،
ؤُمِي تّْوَاجهْذنْثْ
ڒْْعُونْصَارَاثْ ن وَامَانْ إِهوْڒنْ، 8:‏28 أَمز. 7‏:‏11
29 ؤُمِي نتَّا إِڭَّا إِ ڒبْحَارْ أَيْمِيرْ نّسْ،
مَاحنْذْ أَمَانْ
وَارْ د -عدُّونْ ڒُومُورْ نّسْ،
ؤُمِي نتَّا إِعْبَارْ ذْسُوسَا ن ثمُّورْثْ، 8:‏29 أَمز. 1‏:‏9، 10؛ أَيُوبْ 38‏:‏10، 11؛ إِزهد. 104‏:‏9
30 ثُوغَا أَيِي ذ أَمُوذْرُوسْ إِعِيزّنْ
غَارْ ؤُغزْذِيسْ نّسْ.
نشّْ ثُوغَا أَيِي مَارَّا ذ ثَارِّيثْ ن مژْرِي
أَسّْ خْ وَاسّْ،
تِّيرَارغْ زَّاثْ إِ وُوذمْ نّسْ ڒبْذَا، 8:‏30 يُوح. 5‏:‏17
31 تِّيرَارغْ ذِي مَارَّا ثَامُّورْثْ نّسْ،
أَمْ ثُوغَا ثَارِّيثْ ن مژْرِي إِنُو
أَكْ-ذ ثَارْوَا ن بْنَاذمْ.
 
32 خنِّي ڒخُّو، أَ إِحنْجِيرنْ إِنُو،
سْڒمْ-د غَارِي!
سّعْذْ ن يِينِّي إِحطَّانْ إِبْرِيذنْ إِنُو. 8:‏32 إِزهد. 119‏:‏1، 2؛ 128‏:‏1؛ لك. 11‏:‏28
33 سْڒمْ غَارْ تَّارْبِييّثْ
ؤُ ذوْڒمْ ذ إِمِيغِيسنْ،
وَارْ نطَّارمْ تَّارْبِييّثْ.
34 سّعْذْ ن بْنَاذمْ نِّي غَارِي إِسْڒَانْ،
ونِّي إِطّْفنْ أَشْبَارْ غَارْ ثوُّورَا إِنُو
زڭْ وَاسّْ أَڒْ وَاسّْ،
إِحتَّا خْ ثْغمَّارْ ن ثوُّورَا إِنُو،
35 مَاغَارْ ونِّي ذ أَيِي يُوفِينْ، أَذْ يَافْ ثُوذَارْثْ،
ؤُ أَذْ إِطّفْ أَرْضَا ن سِيذِي. 8:‏35 أَوڒن. 12‏:‏2
36 ونِّي إِ ذ أَيِي إِخْضَانْ، إِيزّمْ ڒعْمَارْ نّسْ،
مَارَّا إِنِّي ذ أَيِي إِشَارّْهنْ، تّخْسنْ ڒْموْثْ.
 
 

8:1 8:‏1 أَوڒن. 1‏:‏20، 21

8:11 8:‏11 أَيُوبْ 28‏:‏15؛ إِزهد. 19‏:‏11؛ أَوڒن. 3‏:‏14، 15؛ 16‏:‏16

8:18 8:‏18 أَوڒن. 3‏:‏16

8:19 8:‏19 أَوڒن. 3‏:‏14

8:23 8:‏23 يُوح. 1‏:‏1

8:27 8:‏27 أَيُوبْ 26‏:‏10

8:28 8:‏28 أَمز. 7‏:‏11

8:29 8:‏29 أَمز. 1‏:‏9، 10؛ أَيُوبْ 38‏:‏10، 11؛ إِزهد. 104‏:‏9

8:30 8:‏30 يُوح. 5‏:‏17

8:32 8:‏32 إِزهد. 119‏:‏1، 2؛ 128‏:‏1؛ لك. 11‏:‏28

8:35 8:‏35 أَوڒن. 12‏:‏2