٩
١ ثِيغِيثْ ثبْنَا ثَادَّارْثْ نّسْ،
ثڭَّا ثسُّويْذَا إِپِيلَارنْ نّسْ،
أَقَا أَثنْ ذِي سبْعَا.
٢ نتَّاثْ ثْغَارْصْ إِ ڒْْمَاڒْ نّسْ،
ثْخدْجضْ بِينُو نّسْ.
عَاوذْ ثسُّو طَّابْڒَا نّسْ.
٣ نتَّاثْ ثسّكّْ
ثِيمْسخَّارِينْ نّسْ ثِيمژْيَانِينْ.
خْ ثْقِيشَّاثِينْ ن ڒڭْعُوذِي ن ثنْذِينْثْ ثتّْڒَاغَا: ◘9:3 أَوڒن. 8:2
٤ ”ونِّي إِدْجَانْ ذ أَحَافِي،
أجّْ إِ-ث أَذْ د-يَاسْ ذَانِيثَا!“
نتَّاثْ ثقَّارْ
إِ يِينِّي وَارْ غَارْ إِدْجِي شَا وُوڒْ إِمْثنْ:
٥ ”أَسمْ-د، شّمْ زڭْ وغْرُومْ إِنُو،
سْومْ زِي بِينُو نِّي ذ أَومْ د-خدْجْضغْ.
٦ جّمْ ثَاقُوبَّانشْثْ، ؤُشَا دَّارمْ،
ضْفَارمْ أَبْرِيذْ ن ڒفْهَامثْ.“
٧ ”ونِّي إِتّْوبّْخنْ أَمسْثهْزِييْ،
إِسَّاربُّو ڒفْضِيحثْ إِ يِيخفْ نّسْ،
ونِّي إِتّْعَاقَابنْ أَعفَّانْ،
أَقَا نتَّا يَاربُّو أَبقِّيضْ
ن ڒفْضِيحثْ نّسْ.
٨ وَارْ تّْعيَّابْ أَمسْثهْزِييْ
حِيمَا نتَّا وَارْ شكْ إِشَارّهْ،
عيّبْ أَمِيغِيسْ، خنِّي نتَّا أَذْ شكْ إِخْسْ. ◘9:8 مت. 7:6
٩ أوْشْ إِ ؤُمِيغِيسْ،
خنِّي أَذْ إِذْوڒْ ذ مِيغِيسْ كْثَارْ،
سْغَارْ ثُوسّْنَا إِ ؤُمْسڭّذْ،
خنِّي نتَّا أَذْ إِفْهمْ كْثَارْ.“
١٠ ثِيڭّْوُوذِي ن سِيذِي ذ بدُّو ن ثِيغِيثْ،
ثُوسّْنَا ن ؤُمْقدَّاسْ ذ أَمقّْرَانْ
ذ بدُّو ن ڒفْهَامثْ. ◘9:10 أَيُوبْ 28:28؛ إِزهد. 111:10؛ أَوڒن. 1:7
١١ مَاغَارْ زَّايِي أَذْ كْثَارنْ وُوسَّانْ نّشْ،
إِسڭّْوُوسَا ن ثُوذَارْثْ أَذْ تّْوَارْنِينْ إِ شكْ. ◘9:11 أَوڒن. 10:27
١٢ مَاڒَا شكْ ذ مِيغِيسْ،
خنِّي أَذْ ثِيڒِيذْ ذ مِيغِيسْ إِ يِيخفْ نّشْ،
ؤُ مَاڒَا ثسْثهزِّيذْ،
أَذْ ثَارْبُوذْ أَيَا سِيمَانْثْ نّشْ.“
١٣ ثَامْغَارْثْ ثابُوهَاڒشْثْ ثتّْبُوهْڒُويْ،
نتَّاثْ ذ ثَاقُوبَّانِيثْ، وَارْ ثسّنْ وَالُو. ◘9:13 أَوڒن. 7:11
١٤ نتَّاثْ ثتّْغِيمَا
غَارْ ثوَّارْثْ ن ثَادَّارْثْ نّسْ،
خْ إِجّْ ن كُورْسِي، خْ ڒڭْعُوذِي ن ثنْذِينْثْ
١٥ حِيمَا أَذْ ثْڒَاغَا خْ إِنِّي إِعدُّونْ،
إِنِّي إِڭُّورنْ نِيشَانْ إِمسْرَاقْ نْسنْ، ثنَّا:
١٦ ”ونِّي إِدْجَانْ ذ أَحَافِي،
أجّْ إِ-ث أَذْ د-يَاسْ ذَانِيثَا!“
نتَّاثْ ثقَّارْ
إِ يِينِّي وَارْ غَارْ إِدْجِي شَا وُوڒْ إِمْثنْ:
١٧ ”أَمَانْ إِتّْوَاشَارنْ ذ إِمِيژِيذنْ،
أَغْرُومْ إِنُّوفَّارنْ أَقَا إِشْنَا.“ ◘9:17 أَوڒن. 20:17
١٨ نتَّا وَارْ إِسِّينْ أَقَا ذِينْ ڒخْيَاڒَاثْ،
أَقَا إِنوْجِيونْ نّسْ
ذڭْ وَادْجَاغْ ن ڒَْاخَارْثْ إِ إِدْجَانْ. ◘9:18 أَوڒن. 2:18