أَذْلِيسْ إِقدّْسنْ أَوَاڒنْ إِوزْننْ ١٠

١٠

أَوَاڒنْ إِوزّْننْ ن سُولِيمَانْ - ثَاسْغَارْثْ 1أَ

١ أَوَاڒنْ إِوزْننْ ن سُولِيمَانْ

إِجّْ ن مِّيسْ ذ أَمِيغِيسْ إِسّْفَارَّاحْ بَابَاسْ،

مَاشَا إِجّْ ن ؤُبُوهَاڒِي ن مِّيسْ

ذ ونِّي ذ أَمْنُوسْ أَمقّْرَانْ ن يمَّاسْ. ◘

٢ ثِيخُوبَايْ ن ثُوعفّْنَا وَارْ نّفّْعنْثْ،

مَاشَا ثَاسڭْذَا ثتّْفكَّا زِي ڒْْموْثْ. ◘

٣ سِيذِي وَارْ إِتّجِّي ڒعْمَارْ ن إِمْسڭَّاذنْ

أَذْ إِحيّفْ،

مَاشَا مژْرِي ن إِعفَّاننْ

إِعَارّنْ إِ-ث غَارْ ڒَْاڭّْوَاجْ.

٤ وِي إِخدّْمنْ س ؤُفُوسْ يَارْخُونْ،

إِتَّاوِي-د زّڒْضْ،

مَاشَا أَفُوسْ ن يِينِّي إِتّْشطَّارنْ

إِتَّاوِي-د أَڭْڒَا. ◘

٥ ونِّي إِيَارّْونْ ذڭْ ؤُنبْذُو

ذ إِجّْ ن مِّيسْ إِفهّْمنْ،

مَاشَا ونِّي إِتّطّْصنْ ذِي ثْميْرَا

ذ إِجّْ ن مِّيسْ ن ڒفْضِيحثْ.

٦ لْبَارَاكَاثْ أَرسَّانْثْ

خْ ؤُزدْجِيفْ ن إِمْسڭَّاذنْ،

مَاشَا لْعُونْفْ إِسّْذُورُّويْ

أَقمُّومْ ن إِعفَّاننْ.

٧ ڒِْيذَارثْ إِ ؤُمْسڭّذْ أَذْ د-يَاوِي لْبَارَاكَا،

مَاشَا إِسمْ ن إِعفَّاننْ أَذْ يَارْصُوضْ.

٨ ونِّي ذ أَمِيغِيسْ ذڭْ وُوڒْ،

أَذْ إِقْبڒْ ثِيوصَّا،

مَاشَا ونِّي إِسَّاوَاڒنْ ثُوبُّوهڒْيَا

س إِينْشِيشنْ نّسْ، أَذْ إِوْضَا. ◘

٩ ونِّي إِڭُّورنْ ذِي ڒصْفَايثْ،

إِڭُّورْ ذِي ڒَْامَانْ،

مَاشَا ونِّي إِڭُّورنْ إِبْرِيذنْ إِفَارْغنْ،

أَذْ إِتّْوَاسّنْ.

١٠ ونِّي إِتّْغمَّازنْ س ثِيطَّاوِينْ،

إِتّڭّْ ڒحْرِيقْ،

ونِّي إِسَّاوَاڒنْ ثُوبُّوهڒْيَا

س إِينْشِيشنْ نّسْ، أَذْ إِوْضَا.

١١ أَقمُّومْ ن ؤُمْسڭّذْ ذ ثَاڒَا ن ثُوذَارْثْ،

مَاشَا لْعُونْفْ إِسّْذُورُّويْ

أَقمُّومْ ن إِعفَّاننْ. ◘

١٢ أَشْرَاهْ ثسّكَّارَا-د إِمْشُوبّشنْ،

مَاشَا ثَايْرِي ثسّْذُورُّويْ مَارَّا إِخطَّانْ. ◘

١٣ خْ إِينْشِيشنْ ن ونِّي غَارْ إِدْجَا ڒفْهَامثْ

ثتّْوَافْ ثِيغِيثْ،

مَاشَا أَعْمُوذْ

إِ ونِّي وَارْ غَارْ إِدْجِي بُو ڒعْقڒْ. ◘

١٤ إِمِيغِيسنْ تّْخمَّارنْ ثُوسّْنَا،

مَاشَا أَقمُّومْ ن ؤُبُوهَاڒِي

إِتَّاذسْ غَارْ ؤُهلّكْ.

١٥ إِ بُو-وَاڭْڒَا مِينْ إِدْجَانْ نّسْ

ذ ثَانْذِينْثْ إِجهْذنْ نّسْ،

لبْلَا ن إِمزْڒَاضْ ذ أَهلّكْ نْسنْ.

١٦ ڒْْغِيدْجثْ ن ؤُمْسڭّذْ أَقَا-ت إِ ثُوذَارْثْ،

ڒْْمُونثْ ن ؤُعفَّانْ إِ دّنْبْ.

١٧ ونِّي إِحطَّانْ تَّارْبِييّثْ،

أَقَا-ث خْ وبْرِيذْ ن ثُوذَارْثْ،

مَاشَا ونِّي إِسمّْحنْ ذڭْ ؤُوبّخْ،

أَذْ إِودَّارْ.

١٨ وِي إِتّفَّارنْ أَشْرَاهِي،

غَارسْ إِينْشِيشنْ سّْخَارِّيقنْ،

وِي إِتّْشقَّافنْ أَقَا-ث ذ أَبُوهَاڒِي.

١٩ غَارْ وَاطَّاسْ ن وَاوَاڒنْ

وَارْ إِقِّيمْ ؤُخطُّو إِنقّصْ،

مَاشَا ونِّي إِمنّْعنْ إِينْشِيشنْ نّسْ،

أَقَا إِتّڭّْ س ڒعْقڒْ.

٢٠ نُّوقَارْثْ إِقُّورنْ ذ إِڒسْ ن ؤُمْسڭّذْ،

ؤُڒْ ن إِعفَّاننْ وَارْ إِسكّْوِينْ.

٢١ إِينْشِيشنْ ن إِمْسڭَّاذنْ سّشَّانْ أَطَّاسْ،

مَاشَا إِبُوهَاڒِييّنْ مُّوثنْ

ؤُمِي وَارْ غَارْسنْ بُو وُوڒْ إِمْثنْ.

٢٢ لْبَارَاكَا ن سِيذِي ثتَّاوِي-د أَڭْڒَا،

أَرْبرْ ن بْنَاذمْ وَارْ ذَايسْ يَارنِّي وَالُو.

٢٣ إِ ؤُبُوهَاڒِي ثَامڭِّيثْ ن ڒفْضِيهثْ

أَمْ يِيشْثْ ن ڒُْورَارثْ،

مَاشَا إِ ورْيَازْ ن ڒفْهَامثْ

أَذبَّارْ س ثِيغِيثْ أَمْ مَانْ أَيَا. ◘

٢٤ مِينْ زِي إِتّڭّْوذْ ؤُعفَّانْ أَذْ ث إِڒْقفْ،

مَاشَا أَسِيثمْ ن إِمْسڭَّاذنْ أَذْ يِيڒِي.

٢٥ مَاڒَا ثعْذُو-د ثْحَارْيَاضْثْ،

أَعفَّانْ وَارْ إِتّْغِيمِي،

مَاشَا أَمْسڭّذْ أَذْ إِقِّيمْ إِمْثنْ إِ ڒبْذَا.

٢٦ أَمْ بِينُو أَسمَّامْ إِ ثغْمَاسْ

ذ دّخَّانْ إِ ثِيطَّاوِينْ،

أَمُّو إِ إِڭَّا ؤُمعْڭُوزْ إِ يِينِّي ث إِسّكّنْ.

٢٧ ثِيڭّْوُوذِي ن سِيذِي ثَارنِّي

ذڭْ ؤُسَّانْ إِ ثُوذَارْثْ،

مَاشَا إِسڭّْوُوسَا ن إِعفَّاننْ

تّْوَاسّْقُوضّضنْ. ◘

٢٨ ثَارَاجِيثْ ن إِمْسڭَّاذنْ ذ ڒفْرَاحثْ،

مَاشَا ڒَْايَاسْ ن إِعفَّاننْ ڭُّورْ أَذْ إِفْنَا. ◘

٢٩ أَبْرِيذْ ن سِيذِي ذ لْبُورْجْ إِجهْذنْ

إِ ونِّي إِڭُّورنْ نِيشَانْ،

مَاشَا ذ أَهلّكْ إِ يِينِّي إِتّڭّنْ ڒْْغشّْ. ◘

٣٠ أَمْسڭّذْعمَّارْصْ أَذْ إِنْهزّْ إِ ڒبْذَا،

مَاشَا إِعفَّاننْ وَارْ زدّْغنْ ذِي ثمُّورْثْ.

٣١ أَقمُّومْ ن ؤُمْسڭّذْ

إِتَّاوِي-د ثِيغِيثْ س وَاطَّاسْ،

مَاشَا إِجّْ ن يِيڒسْ إِعمَّارْ س ڒخْذَاعَاثْ

أَذْ إِتّْوَاقسّْ.

٣٢ إِينْشِيشنْ ن ؤُمْسڭّذْ سّْننْ مِينْ يَارْضَانْ،

مَاشَا أَقمُّومْ ن ؤُعفَّانْ

إِسّنْ ڒخْذَاعَاثْ وَاهَا.

◘١٠:١ 10:‏1 أَوڒن. 15‏:‏20

◘١٠:٢ 10:‏2 أَوڒن. 11‏:‏4

◘١٠:٤ 10:‏4 أَوڒن. 12‏:‏24

◘١٠:٨ 10:‏8 أَوڒن. 10‏:‏10

◘١٠:١١ 10:‏11 أَوڒن. 10‏:‏6، 13‏:‏14

◘١٠:١٢ 10:‏12 1 كُور. 13‏:‏7؛ 1 بُط. 4‏:‏8

◘١٠:١٣ 10:‏13 أَوڒن. 20‏:‏30

◘١٠:٢٣ 10:‏23 أَوڒن. 14‏:‏9

◘١٠:٢٧ 10:‏27 أَوڒن. 9‏:‏11

◘١٠:٢٨ 10:‏28 أَيُوبْ 8‏:‏13، 14؛ 11‏:‏20؛ إِزهد. 112‏:‏10

◘١٠:٢٩ 10:‏29 أَوڒن. 13‏:‏6